Gideon na 300 Man

YU LUKIM samting ol man i mekim long dispela piksa? Olgeta i ami bilong Israel. Ol man i brukim skru ol i dring wara. Jas Gideon i sanap klostu long ol. Em i skelim pasin bilong ol long dring wara.

Lukim gut narapela narapela pasin bilong ol long dring wara. Sampela i putim pes i go daun long wara. Tasol wanpela i kisim wara long han na i dring, na bai em inap was i stap. Dispela em i bikpela samting, long wanem, Jehova i tokim Gideon long makim tasol ol man i was i stap taim ol i dring wara. God i tok olgeta arapela i mas i go bek long ples. Bilong wanem God i tok olsem?

Planti hevi i painim gen ol Israel. Dispela samting i kamap, long wanem, ol i no bihainim tok bilong Jehova. Ol Midian i daunim ol na givim hevi long ol. Olsem na ol Israel i krai long Jehova i helpim ol, na Jehova i harim krai bilong ol.

Jehova i tokim Gideon long bungim wanpela ami, olsem na Gideon i bungim 32,000 man. Tasol ami bilong ol birua em inap 135,000 man. Tasol maski i olsem, Jehova i tokim Gideon: ‘Yu gat planti man tumas.’ Bilong wanem Jehova i tok olsem?

Em i tok olsem, long wanem, nogut ol Israel i winim pait na ol i ting ol i win long strong bilong ol yet. Nogut ol i ting i no gat wok long Jehova i helpim ol. Olsem na Jehova i tokim Gideon: ‘Olgeta man i pret, tokim ol long go bek long ples.’ Taim Gideon i mekim olsem, inap 22,000 man i go bek long ples. Nau 10,000 tasol i stap bilong pait wantaim 135,000 birua.

Tasol harim! Jehova i tok: ‘Yu gat planti man tumas i stap yet.’ Olsem na em i tokim Gideon long salim ol i go dring wara, na olgeta man i putim pes i go daun long wara, em i mas salim ol i go bek long ples. Jehova i tok promis olsem: ‘Mi bai helpim yu long winim pait wantaim dispela 300 man em ol i was i stap taim ol i dring wara.’

Ol i redi nau long i go pait. Gideon i tilim dispela 300 man long tripela lain. Long olgeta wan wan em i givim wanpela biugel, na sospen graun i gat bombom i stap insait long en. Long biknait, ol i go raunim kem bilong ol birua. Nau, long wankain taim, olgeta i winim biugel na brukim sospen, na singaut olsem: ‘Bainat bilong Jehova na bilong Gideon!’ Taim ol birua i kirap, ol i paul na pret. Olgeta i kirap ranawe i go, na ol Israel i winim pait.