Wanpela Man Em i No Pret

LUKIM ol manmeri i lap long dispela yangpela man. Yu save em i husat? Em Jeremaia. Em i wanpela profet bilong God.

Liklik taim bihain long King Josaia i kirap bagarapim ol imis long Israel, Jehova i makim Jeremaia long kamap profet bilong Em. Jeremaia i pilim olsem em i yangpela tumas long mekim wok profet. Tasol Jehova i tok em bai helpim Jeremaia.

Jeremaia i tokim ol Israel long lusim ol pasin nogut. Em i tok: ‘Ol god bilong ol narapela lain ol i god giaman.’ Tasol planti Israel i laik lotuim ol dispela god na ol i no laik lotuim God tru, em Jehova. Taim Jeremaia i tokim ol man olsem God bai givim strafe long ol, ol i lap tasol long em.

Planti yia i lus. Josaia i dai, na 3-pela mun bihain pikinini bilong em Jehoiakim i kamap king. Jeremaia i wok long tokim ol manmeri: ‘Sapos yupela i no senisim pasin bilong yupela, Jerusalem bai bagarap.’ Ol pris i holim Jeremaia na ol i singaut: ‘Long ol kain tok olsem yu mas i dai!’ Ol i tokim ol hetman bilong Israel: ‘Jeremaia i mas i dai, long wanem, em i bin tok dispela taun bilong yumi bai bagarap.’

Orait nau Jeremaia bai mekim wanem? Em i no pret! Em i tokim ol: ‘Jehova i bin salim mi i kam bilong givim ol dispela tok long yupela. Sapos yupela i no senisim pasin nogut bilong yupela, Jehova bai bagarapim Jerusalem. Tasol yupela i mas save gut olsem: Sapos yupela i kilim mi i dai, yupela i kilim i dai wanpela man i no gat rong.’

Ol hetman i larim Jeremaia i stap, tasol ol Israel i no senisim pasin nogut bilong ol. Bihain Nebukatnesar, em king bilong Babilon, em i kam mekim pait long Jerusalem. Em i mekim ol Israel i kamap ol wokman bilong em. Em i kisim planti tausen bilong ol i go long Babilon. Sapos ol man bilong narapela hap i kisim yu i go long wanpela longwe ples, em i no gutpela, a?