Jehova i Salim Jeremaia Long Autim Tok

Jehova i makim Jeremaia long stap profet bilong ol manmeri bilong Juda. Jehova i tokim em long autim tok long ol manmeri na givim tok lukaut olsem ol i mas stop long mekim ol pasin nogut. Jeremaia i tok: ‘Tasol Jehova, mi mangi tasol. Mi no save long pasin bilong autim tok long ol man.’ Jehova i tokim em: ‘Yu no ken pret. Mi bai tokim yu long ol tok yu bai mekim. Mi bai helpim yu.’

Jehova i tokim Jeremaia long bungim ol hetman bilong ol manmeri, brukim sospen graun long fran bilong ol, na tok: ‘Mi bai bagarapim Jerusalem wankain olsem dispela sospen graun.’ Taim Jeremaia i mekim samting Jehova i tokim em, ol hetman i belhat tru. Wanpela pris nem bilong em Pasur, i paitim Jeremaia na pasim hanlek na nek bilong em long ol hap plang. Long nait olgeta, Jeremaia i no inap muv. Long neks moning, Pasur i larim em i go. Jeremaia i tok: ‘Mi no inap karim dispela hevi moa. Bai mi stop long autim tok.’ Tasol tru tru Jeremaia i givap? Nogat. Taim Jeremaia i tingim gen dispela, em i tok: ‘Tok bilong Jehova i olsem paia i lait insait long mi. Mi no inap stop long autim tok.’ Jeremaia i wok yet long givim tok lukaut long ol manmeri.

Sampela yia i lus, na Juda i gat nupela king. Ol pris na ol giaman profet i heitim tok Jeremaia i autim. Ol i tokim ol hetman: ‘Dispela man i mas i dai.’ Jeremaia i tok: ‘Sapos yupela i kilim mi i dai, yupela bai kilim wanpela man i no gat rong. Mi autim tok bilong Jehova, i no tok bilong mi yet.’ Taim ol hetman i harim, ol i tok: ‘Dispela man i no ken i dai.’

Jeremaia i wok yet long autim tok, na ol hetman i belhat nogut tru. Ol i askim king long kilim i dai Jeremaia. King i tok ol i ken mekim wanem samting ol i laik mekim long Jeremaia. Ol i kisim Jeremaia na tromoi em i go insait long wanpela hulwara i gat graun malumalum, ol i laik bai em i dai long hap. Jeremaia i stat long sink i go insait long graun malumalum.

Nau wanpela ofisa bilong king, nem bilong em Ebetmelek i tokim king: ‘Ol hetman i tromoi Jeremaia i go insait long hulwara! Sapos yumi larim em long dispela hap, em bai dai.’ King i tokim Ebetmelek long kisim 30 man i go wantaim em na pulim Jeremaia i kam aut long hulwara. Jeremaia i no bin larim wanpela samting i stopim em long autim tok, yu ting yumi mas bihainim pasin bilong em?