Yumi Mas i Gat Strongpela Bel Olsem Jeremaia
“Yu mas bilip na wetim Bikpela i kam helpim yu. Sanap strong. Yu no ken bel hevi. Yu mas bilip na wetim Bikpela i helpim yu.”—SONG 27:14.
1. Wanem wanpela gutpela blesing bilong ol Witnes Bilong Jehova?
OL WITNES BILONG JEHOVA i stap long wanpela paradais bilong spirit. (Aisaia 11:6-9) Long dispela graun i gat planti hevi tru, tasol ol Witnes na ol wanbilip Kristen bilong ol, ol i stap narapela kain long ol samting bilong spirit, ol i stap wanbel wantaim God Jehova na wantaim ol arapela wanbilip. (Song 29:11; Aisaia 54:13) Na paradais bilong spirit bilong ol i wok long go bikpela. Olgeta husat i givim bel long mekim wok bilong God ol i helpim dispela paradais i go bikpela. (Efesus 6:6) Ol i mekim olsem wanem? Ol i mekim taim ol i bihainim ol stiatok bilong Baibel na wok long skulim ol narapela long mekim wankain samting. Long dispela rot ol i singautim ol narapela long kisim ol gutpela blesing bilong dispela paradais.—Matyu 28:19, 20; Jon 15:8.
2, 3. Ol trupela Kristen i mas karim hevi long wanem ol samting?
2 Tasol maski yumi stap long wanpela paradais bilong spirit, dispela i no makim olsem yumi no karim hevi. Sin i stap yet long yumi na yumi save karim pen na hevi bilong kain kain sik, lapun, na dai. Na tu, yumi lukim truim bilong ol tok profet i makim “taim bilong las de.” (2 Timoti 3:1) Woa, pasin raskol, bikpela sik, hangre, na ol arapela bikpela hevi i nogutim olgeta man long graun, na ol Witnes Bilong Jehova i no inap abrusim ol dispela samting.—Mak 13:3-10; Luk 21:10, 11.
3 Na tu, yumi kliagut olsem maski yumi stap gut long paradais bilong spirit, ol man i no insait long dispela paradais i birua yet long yumi. Jisas i mekim tok lukaut long lain bilong em: “Yupela i no man bilong dispela graun. Nogat. Mi makim yupela pinis bai yupela i lusim pasin bilong dispela graun. Olsem na ol manmeri bilong graun i save birua long yupela. Yupela i mas tingim gut dispela tok mi mekim long yupela. Wokboi i no winim bikman bilong en. Sapos ol i bin mekim nogut long mi, orait ol bai i mekim nogut long yupela tu.” (Jon 15:18-21) Ol samting long nau i wankain. Planti man i no kliagut long lotu bilong yumi o ting em i bikpela samting. Sampela i sutim tok long yumi, tok bilas long yumi, na sampela—olsem Jisas i tok—ol i bel nogut tru long yumi. (Matyu 10:22) Planti taim sampela i mekim wok long TV samting bilong kamapim ol tok kranki bilong giamanim ol man long ol samting bilong yumi o ol i mekim ol tok bilong nogutim nem bilong yumi. (Song 109:1-3) Yes, i gat sampela samting i save givim hatwok long yumi olgeta, na ating sampela bilong yumi i pilim olsem strong i laik pinis. Wanem samting inap helpim yumi long sanap strong na karim hevi?
4. Yumi lukluk long husat bilong helpim yumi long sanap strong na karim hevi?
4 Jehova bai helpim yumi. Holi spirit i kirapim man bilong raitim song long tok: “Planti hevi i save kamap long stretpela man, tasol Bikpela i save helpim em na ol dispela hevi i no daunim em.” (Song 34:19; 1 Korin 10:13) Planti bilong yumi i save pinis olsem long taim yumi bilip olgeta long Jehova, em i givim strong long yumi long karim olgeta kain hevi. Yumi laikim tru Jehova na yumi amamas long ol samting em i tok yumi bai kisim long bihain, dispela i save helpim yumi long daunim bel hevi na pasin bilong pret. (Hibru 12:2) Olsem na maski yumi gat hevi, yumi sanap strong yet.
Tok Bilong God i Bin Strongim Jeremaia
5, 6. (a) I gat wanem ol stori i stap bilong ol lain i lotu tru long God na ol i bin sanap strong? (b) Jeremaia i mekim wanem taim God i tokim em long mekim wok profet?
5 Kirap long bipo yet na i kam inap long nau, ol wokboi i stap gut long Jehova ol i stap amamas maski ol i gat hevi. Sampela i bin stap long taim bilong kot we Jehova i kamapim belhat bilong em long ol man nogut. Sampela bilong ol dispela wokboi i stap gut long Jehova em Jeremaia wantaim sampela narapela i bin stap long taim bilong em, na ol Kristen long taim bilong ol aposel. Ol samting dispela lain bilong bipo i bin mekim i stap long Baibel bilong strongim yumi, na yumi ken lainim planti samting taim yumi skelim stori bilong ol. (Rom 15:4) Olsem: Tingim Jeremaia.
6 Long taim em i stap yangpela, Jeremaia i kisim tok long em i mas mekim wok profet long Juda. Dispela wok i no isi long mekim. Planti i lotuim ol giaman god. Taim Jeremaia i kirapim wok bilong em, Josaia em i king, na em i stap gut long God, tasol ol king i kamap bihain long em ol i nogut, na planti bilong ol lain i gat wok long skulim ol pipel—ol profet na pris—ol i no stap gut long tok i tru. (Jeremaia 1:1, 2; 6:13; 23:11) Olsem na Jeremaia i pilim olsem wanem taim Jehova i tokim em long mekim wok profet? Em pret ya! (Jeremaia 1:8, 17) Jeremaia i kamapim tingting bilong em olsem: “Mi harim dispela tok bilong Bikpela na mi bekim tok bilong en olsem, ‘Sori, God, Bikpela, mi yangpela tumas na mi no save long pasin bilong autim tok.’ ”—Jeremaia 1:6.
7. Ol man i mekim wanem taim Jeremaia i autim tok long ol? Pasin bilong ol i kirapim Jeremaia long mekim wanem?
7 I no gat planti man i amamas long harim tok bilong Jeremaia, na planti taim ol man i birua tru long em. Wanpela taim Pasur, wanpela pris, i paitim em na tokim ol man long pasim em long hap plang. Jeremaia i kamapim tingting i stap long bel bilong em long dispela taim: “Mi tok long mi yet long mi no ken tingting moa long yu [Jehova], na mi no ken autim tok moa long nem bilong yu.” Ating sampela taim yu bin i gat wankain tingting—olsem yu laik givap. Tingim samting i bin helpim Jeremaia long sanap strong. Em i tok: “Mi pilim tok bilong yu i olsem wanpela bikpela paia i stap long bel bilong mi na i olsem paia i lait insait long ol bun bilong mi. Mi trai hat long pasim tok bilong yu, tasol mi no inap.” (Jeremaia 20:9) Ol tok bilong God i save mekim wankain samting long yu?
Ol Poroman Bilong Jeremaia
8, 9. (a) Wanem pasin i daunim profet Uria? Wanem samting i painim em? (b) Wanem samting i mekim na Baruk i bel hevi? Wanem samting i helpim em?
8 Jeremaia i no stap wanpis long wok profet bilong em. Em i gat ol poroman, na yumi ken ting ol i bin strongim em. Tasol sampela taim ol poroman bilong em i no bihainim savetingting. Olsem: Wanpela wanwok profet bilong em, nem bilong em Uria, em i wok strong long kamapim ol tok lukaut olsem Jerusalem na Juda bai bagarap “olsem Jeremaia i bin tok.” Tasol taim King Jehoiakim i tokim ol man long kilim i dai Uria, profet hia i pret na ranawe i go long Isip. Dispela i no helpim em. Lain bilong king i bihainim em, kisim em, na bringim em i kam bek long Jerusalem we ol i kilim em i dai. Jeremaia i mas kirap nogut na tingting planti long dispela!—Jeremaia 26:20-23.
9 Narapela poroman bilong Jeremaia em kuskus bilong em, Baruk. Baruk i gutpela helpim bilong Jeremaia, tasol long wanpela taim em tu i no tingim ol samting bilong spirit. Em i kirap toktok planti olsem: “Sori tru, mi gat planti hevi na pen, na Bikpela i skruim hevi bilong mi i go moa yet. Mi wok long krai i stap na mi les tru. Hevi bilong mi i no save pinis. Em i stap olsem tasol.” Baruk i bel hevi, na i no amamas long ol samting bilong spirit olsem bipo. Maski em i pilim olsem, long pasin isi Jehova i givim gutpela tok long Baruk, na tingting bilong Baruk i kamap stret gen. Na Jehova i tokim em olsem bai em i no dai taim Jerusalem i bagarap. (Jeremaia 45:1-5) Taim Baruk i kisim bek stretpela tingting long ol samting bilong spirit, ating dispela i strongim tru bel bilong Jeremaia, a?
Jehova i Helpim Profet Bilong Em
10. Jehova i givim wanem tok promis long Jeremaia?
10 Nambawan bikpela samting, Jehova i no bin lusim Jeremaia. Jehova i pilim tru filings bilong profet bilong em, na long taim Jeremaia i gat hevi, Jehova i helpim em na strongim em. Olsem: Taim Jeremaia i no kirap yet long mekim wok autim tok bilong em na em i kamapim tingting bilong em olsem em i no ting em i fit long mekim wok, Jehova i tokim em: “Yu no ken pret long ol, long wanem, mi stap wantaim yu na bai mi lukautim yu. Mi Bikpela, mi tok pinis.” Na bihain long em i givim sampela tok long Jeremaia long wok em bai mekim, Jehova i tok: “Bai ol dispela man i birua long yu, tasol ol bai i no inap daunim yu. Long wanem, mi yet mi stap wantaim yu na bai mi helpim yu. Mi Bikpela mi tok pinis.” (Jeremaia 1:8, 19) Tok hia i strongim tru bel bilong em! Na Jehova i truim tok bilong em.
11. Olsem wanem yumi save Jehova i truim tok promis bilong em olsem em bai helpim Jeremaia?
11 Olsem na bihain long ol i bin pasim em long hap plang long pablik ples we ol man i tok bilas long em, Jeremaia i stap strong na tok: “Bikpela, yu olsem wanpela strongpela soldia na yu sambai bilong helpim mi. Olsem na samting nogut bai i kamap long ol dispela man i laik mekim nogut long mi, na dispela bai i daunim ol na bai ol i no inap winim mi. Nogat tru. Olsem na bai ol i sem nogut tru.” (Jeremaia 20:11) Sampela yia bihain taim sampela i bin traim long kilim i dai Jeremaia, Jehova i stap yet wantaim em, na olsem Baruk, Jeremaia i no dai taim Jerusalem i bagarap na em i no kalabus, tasol ol man i mekim nogut long em o sakim tok lukaut bilong em, sampela i bagarap na ol arapela i go kalabus long Babilon.
12. Maski i gat as na yumi bel hevi, yumi mas tingim wanem samting?
12 Olsem Jeremaia, planti Witnes Bilong Jehova long nau ol i karim pen na hevi. Olsem yumi tok pinis, sin bilong yumi i as bilong sampela bilong ol dispela hevi, na sampela em ol hevi bilong i stap long dispela graun we ol samting i paul nabaut, na sampela em ol hevi ol man i birua long wok bilong yumi i kamapim. Ol samting olsem inap mekim yumi bel hevi. Olsem Jeremaia, ating sampela taim yumi gat tupela tingting long yumi inap long mekim yet wok bilong yumi o nogat. Tru, yumi save olsem sampela taim bai yumi bel hevi. Taim yumi stap bel hevi, dispela i olsem wanpela traim i helpim yumi long save olsem pasin bilong yumi long laikim Jehova i strong o nogat. Olsem na yumi mas strong na yumi no ken larim bel hevi i kirapim yumi long lusim wok bilong Jehova olsem Uria i bin lusim. Mobeta yumi bihainim Jeremaia na bilip long Jehova bai helpim yumi.
Olsem Wanem Yumi Inap Sakim Bel Hevi
13. Olsem wanem yumi ken bihainim pasin bilong Jeremaia na Devit?
13 Jeremaia i toktok wantaim God Jehova long olgeta taim, na em i kamapim filings i stap insait tru long bel bilong em na askim God long givim strong long em. Em i gutpela pasin long bihainim. Devit i bin lukluk long dispela wankain Rot bilong kisim strong, em i tok: “Bikpela, harim prea bilong mi na putim yau long tok bilong mi. Yu king na God bilong mi, mi prea long yu. Yu ken harim singaut bilong mi.” (Song 5:1, 2) Stori long laip bilong Devit olsem Baibel i kamapim i soim olsem planti taim Jehova i harim prea bilong em long kisim helpim. (Song 18:1, 2; 21:1-5) Olsem tasol, taim i hatwok long karim ol hevi o i luk olsem ol i bikpela tumas, yumi kisim helpim taim yumi prea long Jehova na kamapim bel bilong yumi long em. (Filipai 4:6, 7; 1 Tesalonaika 5:16-18) Jehova i no les long putim yau long yumi. Nogat. Em i laik bai yumi save tru olsem ‘em i save wari long yumi.’ (1 Pita 5:6, 7) Tasol i no stret long prea long Jehova na bihain sakim tok bilong em, laka?
14. Tok bilong Jehova i mekim wanem long Jeremaia?
14 Jehova i save toktok long yumi long wanem rot? Tingim gen Jeremaia. Em i wanpela profet, olsem na Jehova yet i toktok wantaim em. Jeremaia i stori long samting tok bilong God i mekim long bel bilong em, em i tok: “Yu bin givim tok bilong yu long mi na mi kisim, olsem man i kisim kaikai. Na dispela tok bilong yu i mekim mi i amamas na belgut tru, long wanem, mi bilong yu, God Bikpela I Gat Olgeta Strong [“nem bilong yu i stap long mi,” NW ].” (Jeremaia 15:16) Yes, Jeremaia i amamas long nem bilong God i stap long em, na ol tok bilong God i bikpela samting long dispela profet. Olsem na, wankain olsem aposel Pol, bel bilong Jeremaia i kirap long autim tok God i givim long em.—Rom 1:15, 16.
15. Olsem wanem yumi inap putim tok bilong Jehova long bel bilong yumi? Yumi tingim wanem samting na yumi no inap tru long pasim maus?
15 Jehova yet i no save toktok wantaim wanpela man long graun long nau. Tasol yumi inap ritim tok bilong God i stap long Baibel. Olsem na sapos yumi givim bel long stadi gut long Baibel na tingim tingim long bel ol samting yumi lainim, tok bilong God bai mekim bel bilong yumi tu i “amamas na belgut tru.” Na yumi ken amamas tru long nem bilong Jehova i stap long yumi taim yumi autim ol dispela tok bilong God i go long ol man. No ken lusim tingting olsem i no gat narapela lain long graun long nau i autim nem bilong Jehova. Ol Witnes bilong em tasol i tokaut olsem Kingdom Bilong God i kamap pinis na ol tasol i skulim ol man i gat gutpela bel long kamap disaipel bilong Jisas Krais. (Matyu 28:19, 20) Em nau, God i mekim gut tru long yumi! Taim yumi tingim bikpela wok Jehova i givim long yumi, i hatwok long yumi long pasim maus na stap, a?
Yumi Mas Was Gut Long Ol Poroman
16, 17. Jeremaia i gat wanem tingting long pasin bilong poromanim ol narapela? Olsem wanem yumi ken bihainim pasin bilong em?
16 Jeremaia i tokaut long narapela samting i bin helpim em long sanap strong. Em i tok: “Mi no bin i stap wantaim ol man i save belgut na lap. Na mi no bin amamas wantaim ol. Nogat. Mi sindaun wanpis tasol, long wanem, mi pilim strong bilong yu i stap long mi na belhat bilong yu i pulap long mi.” (Jeremaia 15:17) Jeremaia i ting em i gutpela moa long stap wanpis, nogut ol poroman nogut i bagarapim pasin bilong em. Yumi gat wankain tingting long nau. Yumi no save lusim tingting long tok lukaut bilong aposel Pol olsem: “Sapos yumi poroman wantaim ol man nogut, bai ol i bagarapim gutpela pasin bilong yumi.” Dispela i makim tu ol gutpela pasin em yumi bin bihainim inap planti yia pinis.—1 Korin 15:33.
17 Ol poroman nogut inap opim rot long spirit bilong dispela graun long bagarapim tingting bilong yumi. (1 Korin 2:12; Efesus 2:2; Jems 4:4) Olsem na yumi mas skulim gut tingting bilong yumi na bai yumi inap luksave klia long ol poroman nogut na sakim ol olgeta. (Hibru 5:14) Sapos Pol i stap laip long nau, yu ting em bai tok wanem long wanpela Kristen husat i save lukim long TV ol piksa i kamapim pasin pamuk o pasin bilong pait o sampela pilai spot olsem boksen samting? Em bai tok wanem long wanpela brata i mekim wok long Intenet bilong prenim sampela lain em i no save liklik long ol? Bai em i ting wanem long wanpela Kristen husat i save lusim planti aua long pilaim ol vidio gem o long lukim TV, tasol em i no bihainim gut wanpela sediul bilong stadi long Baibel?—2 Korin 6:14b; Efesus 5:3-5, 15, 16.
No Ken Lusim Paradais Bilong Spirit
18. Wanem samting bai helpim yumi long stap strong long ol samting bilong spirit?
18 Yumi tingim paradais bilong spirit bilong yumi olsem samting i dia tumas. I no gat wanpela samting long graun long nau i wankain liklik long dispela samting. Ol ausait lain tu i luksave na mekim sampela tok long dispela pasin laikim, tingim gut man, na mekim gut long man, em ol Kristen i save mekim long ol arapela Kristen. (Efesus 4:31, 32) Tasol long nau winim olgeta taim long bipo yumi mas wok strong long sakim bel hevi. Ol gutpela poroman, beten, na gutpela sediul bilong stadi inap helpim yumi long stap strong long ol samting bilong spirit. Ol dispela samting inap strongim yumi, na long rot bilong bilip long Jehova yumi inap karim ol traim i painim yumi.—2 Korin 4:7, 8.
19, 20. (a) Wanem samting bai helpim yumi long sanap strong na karim hevi? (b) Neks stadi i bilong husat? Husat moa bai i gat laik long skelim?
19 Yumi no ken larim ol man i no laik tru long ol tok bilong Baibel yumi kamapim long pretim yumi na mekim yumi i no strong moa long bilip. Wankain olsem ol birua i bin mekim nogut long Jeremaia, ol man i birua long yumi ol i birua long God. Ol bai i no inap win. Jehova husat i gat bikpela strong tru winim ol birua bilong yumi, em i tokim yumi: “Yu mas bilip na wetim Bikpela i kam helpim yu. Sanap strong. Yu no ken bel hevi. Yu mas bilip na wetim Bikpela i helpim yu.” (Song 27:14) Pasin bilong bilip long Jehova i stap strong long bel bilong yumi, olsem na yumi strong long no ken les long mekim ol samting i gutpela. Yumi ken bilip tru, olsem Jeremaia na Baruk, bai yumi kisim ol gutpela samting sapos yumi no slek long wok.—Galesia 6:9.
20 Planti Kristen i mas wok oltaim long sakim bel hevi. Na ol yangpela i gat ol narakain samting i givim hatwok long ol. Tasol tu i gat ol nambawan gutpela samting ol yet i gat rot long mekim. Neks stadi i bilong ol yangpela namel long yumi. Na tu, ol papamama wantaim olgeta bikpela manmeri long kongrigesen i dediket pinis bai amamas long skelim. Ol inap helpim ol yangpela long kongrigesen long rot bilong tok ol i mekim, pasin ol i bihainim, na long samting ol yet i mekim long helpim ol yangpela.
Bai Yu Bekim Olsem Wanem?
• Bilong wanem yumi no ken kirap nogut long ol samting i kamap bilong mekim yumi bel hevi? Yumi lukluk long husat bilong helpim yumi?
• Olsem wanem Jeremaia i bin sakim pasin bilong bel hevi maski em i gat wanpela wok i hatwok long mekim?
• Wanem samting bai mekim bel bilong yumi i ‘amamas na belgut’ maski yumi gat hevi?
[Piksa long pes 9]
Jeremaia i bin ting em i yangpela tumas na i no gat inap save long mekim wok profet
[Piksa long pes 10]
Long taim ol i mekim nogut long em, Jeremaia i save olsem Jehova i sambai long em olsem wanpela “strongpela soldia”