Skulim Ol Pikinini Bilong Yu

Jeremaia i No Givap

SAMPELA taim yu save bel hevi na yu pilim olsem yu laik givap?​​—a Planti man i save pilim olsem. Yangpela Jeremaia i bin pilim olsem. Tasol em i no larim toktok bilong ol narapela o pasin bilong ol i mekim em i givap. Nau bai yumi stori long wanem samting i mekim na Jeremaia em i spesel long ai bilong God, maski i olsem, em i pilim olsem em i laik givap.

Paslain long mama i karim Jeremaia, God tru, em Jehova, i makim em bilong mekim wok profet na givim tok lukaut long ol manmeri olsem ol i wok long sakim pasin God i laikim. Inap sampela yia bihain, yu save Jeremaia i tok wanem long Jehova?​​​— “Sori, God, Bikpela, mi yangpela tumas na mi no save long pasin bilong autim tok.”

Yu ting Jehova i bekim wanem tok long Jeremaia?​​​— Long gutpela pasin em i tok stret long Jeremaia olsem: “Yu no ken tok olsem, yu yangpela tumas. Nogat. Taim mi salim yu i go long sampela lain man, orait yu mas i go long ol. Na olgeta tok mi givim yu, em yu mas autim. Yu no ken pret long ol.” Bilong wanem em i no ken pret? Jehova i tok: “Mi stap wantaim yu na bai mi lukautim yu.”​​—Jeremaia 1:​4-8.

Tasol olsem yumi stori pinis long antap, bihain Jeremaia i bel hevi. Em i pilim olsem, long wanem, ol man i tok bilas long em i mekim wok bilong God. Em i tok: “Olgeta manmeri i wok long tok bilas long mi na ol i lap long mi oltaim.” Olsem na em i tingting pinis long givap. Em i tok: “Mi no ken tingting moa long [God], na mi no ken autim tok moa long nem bilong yu.” Tasol yu ting tru tru em i bin givap?

Jeremaia i tok: “Mi pilim tok bilong yu i olsem wanpela bikpela paia i stap long bel bilong mi na i olsem paia i lait insait long ol bun bilong mi. Mi trai hat long pasim tok bilong yu, tasol mi no inap.” (Jeremaia 20:​7-9) Maski sampela taim Jeremaia i pret, pasin bilong em long laikim tru Jehova i mekim na em i no lusim wok bilong em. Orait nau yumi ken skelim olsem wanem God i bin lukautim Jeremaia, long wanem, em i no bin givap.

Jehova i tokim Jeremaia long givim tok lukaut long ol manmeri olsem Jerusalem bai bagarap sapos ol manmeri i no senisim pasin nogut bilong ol. Taim Jeremaia i autim dispela tok lukaut, ol manmeri i belhat na ol i tok: “Dispela man i mas i dai.” Jeremaia i strong long ol i mas “bihainim tok bilong God.” Na em i tok: ‘Yupela i save olsem sapos yupela i kilim mi i dai, yupela bai i gat asua bilong kilim nating wanpela man i no gat rong.’ Yu save long wanem samting i kamap?​​—

Baibel i tok: “Ol hetman na olgeta manmeri i tokim ol pris na profet olsem, ‘Dispela man i bin autim tok long nem bilong God, Bikpela bilong yumi. Em i no gat asua, olsem na yumi no ken kilim em i dai.’ ” Em nau, Jeremaia i no larim pasin bilong pret i mekim em i givap, olsem na Jehova i lukautim em. Nau yumi ken skelim samting i kamap long narapela profet bilong Jehova, em Uria, husat i mekim pasin i narapela kain long pasin bilong Jeremaia.

Baibel i tok: ‘Uria i bin tok long Jerusalem na Juda bai i bagarap, olsem Jeremaia i bin tok.’ Tasol taim King Jehoiakim i belhat long Uria, yu save Uria i mekim wanem?​​​— Em i pret, na em i lusim wok bilong em na em i ranawe i go long Isip. Olsem na king i salim ol man i go painim em long hap na bringim em i kam bek. Taim ol i mekim olsem, yu save dispela king nogut i mekim wanem?​​​— Em i kilim i dai Uria long bainat!​—Jeremaia 26:​8-24.

Yu ting bilong wanem Jehova i lukautim Jeremaia, na em i no lukautim Uria?​​​— Tru Jeremaia i pret, wankain olsem Uria, tasol Jeremaia i no lusim wok bilong Jehova na ranawe. Em i no givap. Yu ting yumi ken kisim wanem skul long pasin bilong Jeremaia?​​​— Sampela taim ating bai yumi hatwok long mekim samting God i tokim yumi long mekim, tasol yumi mas bilip na bihainim tok bilong em.

[Futnot]

Ol Askim:

○ God i makim wanem wok bilong Jeremaia?

○ Bilong wanem Jeremaia i pilim olsem em i laik givap?

○ Bilong wanem Jehova i lukautim Jeremaia, na em i no lukautim Uria?

○ Yu kisim wanem skul long stori bilong Jeremaia?