Taim Ol Israel i Kalabus Long Babilon Inap Long Taim Ol i Wokim Gen Banis Bilong Jerusalem

Taim ol Israel i stap kalabus long Babilon, planti samting i traim bilip bilong ol. Ol Babilon i tromoi Satrak, Mesak, na Abetnego i go insait long bikpela paia, tasol God i helpim ol na ol i no bagarap. Bihain, taim ol Midia na Persia i daunim ol Babilon, ol i tromoi Daniel i go insait long hul bilong ol laion, tasol God i pasim maus bilong ol laion na Daniel i no bagarap.

Bihain King Sairus bilong Persia i larim ol Israel i go fri. Ol i bin i stap kalabus long Babilon inap 70 yia na nau ol i go bek long ples bilong ol. Taim ol i kam bek pinis long Jerusalem, ol i kirap wokim gen haus lotu bilong Jehova. Tasol i no longtaim na ol birua i pasim wok bilong ol. Olsem na 22 yia bihain long taim ol i kam bek, ol i pinisim wok bilong sanapim haus lotu.

Ol i wokim pinis haus lotu na 47 yia bihain Esra i go bek long Jerusalem bilong mekim gut dispela haus lotu. Na 13 yia bihain long dispela, Nehemia i helpim ol long wokim gen banis bilong Jerusalem. Hap FAIV i stori long ol samting i bin kamap insait long 152 yia olgeta.