Jisas i Kirapim Bek Ol Daiman

DISPELA pikinini meri yu lukim long piksa, em i gat 12-pela krismas. Jisas i holim han bilong em, na mama na papa bilong em i stap klostu. Yu save bilong wanem tupela i amamas? Orait nau yumi ken stori long dispela.

Papa bilong dispela pikinini em i wanpela bikman, nem bilong em Jairus. Wanpela taim pikinini bilong em i sik, na em i mas slip long bet. Tasol em i no kamap orait. Sik bilong em i go bikpela moa. Jairus na meri bilong em ol i tingting planti, long wanem, i luk olsem pikinini bai dai. Tupela i gat dispela wanpela pikinini meri tasol. Olsem na Jairus i go painim Jisas. Em i bin harim tok long ol mirakel Jisas i wokim.

Taim Jairus i painim pinis Jisas, i gat bikpela lain manmeri i stap wantaim Jisas. Tasol Jairus i go namel long ol dispela manmeri na em i pundaun klostu long lek bilong Jisas. Em i tok: ‘Pikinini meri bilong mi em i gat bikpela sik. Plis, yu kam na oraitim em.’ Jisas i tok em bai kam.

Ol i wokabaut i go na bikpela lain manmeri i pas pas long em. Wantu Jisas i sanap i stap. Em i tok: ‘Husat i holim mi?’ Jisas i pilim hap strong bilong em i lusim em i go, olsem na em i save wanpela man i bin holim em. Tasol husat i mekim? Em wanpela meri em i bin sik i stap inap 12-pela yia. Em i bin kam na holim klos bilong Jisas, na sik bilong em i pinis!

Jairus i amamas, long wanem, em i lukim strong bilong Jisas long oraitim ol man. Tasol nau wanpela man i bringim tok i kam. Em i tokim Jairus: ‘Maski putim hevi long Jisas. Pikinini bilong yu i dai pinis.’ Jisas i harim dispela tok na em i tokim Jairus: ‘Yu no ken tingting planti, pikinini bilong yu bai i orait.’

Taim ol i go kamap long haus bilong Jairus, ol manmeri i bel hevi tru na ol i krai i stap. Tasol Jisas i tok: ‘Yupela i no ken krai. Pikinini i no i dai. Em i slip tasol.’ Tasol ol i lap long Jisas, long wanem, ol i save olsem pikinini i dai pinis.

Jisas i kisim papa na mama bilong pikinini na 3-pela aposel tasol i go long rum em pikinini i slip long en. Em i holim han bilong pikinini na em i tok: ‘Yu kirap!’ Na pikinini i kisim laip gen, olsem yu ken lukim long piksa. Em i kirap na wokabaut! Olsem na mama na papa bilong em ol i amamas tru!

Dispela em i no namba wan daiman Jisas i bin kirapim bek. Namba wan man Jisas i bin kirapim bek, em pikinini man bilong wanpela meri wanpis bilong taun Nain. Bihain, Jisas i bin kirapim bek Lasarus, em brata bilong Maria na Marta. Taim Jisas i mekim wok olsem King God i bin makim, em bai kirapim bek planti manmeri. Bai yumi amamas long dispela samting, a?