Sapta 47
Aiwara i Pinis na Bikpela Amamas i Kamap
TAIM Jairus i lukim Jisas i oraitim wanpela meri i save karim blut oltaim, ating em i bilip moa yet olsem Jisas i gat strong bilong wokim ol mirakel. Paslain liklik Jairus i bin askim Jisas long i go wantaim em na helpim pikinini meri bilong em, long wanem dispela pikinini em i laikim tumas, em i laik i dai. Jisas i toktok yet wantaim dispela meri, na sampela man i kam na ol i tok isi long Jairus, olsem: “Pikinini bilong yu i dai pinis. Maski givim hevi moa long tisa.”
Dispela tok i bagarapim tru bel bilong Jairus! Dispela man i gat biknem long ples bilong em, tasol nau em i no inap mekim wanpela samting bilong helpim pikinini bilong em i dai pinis. Jisas i bin harim dispela tok, olsem na em i strongim bel bilong Jairus. Em i tok: “Yu no ken pret. Yu mas bilip tasol.”
Bel bilong Jairus i bagarap stret, tasol nau Jisas i go wantaim em long haus bilong em. Taim ol i kamap long haus, ol i lukim bikpela lain i bung na ol i krai i stap na ol i wok long paitim bros bilong ol. Jisas i go insait long haus na em i tokim ol: “Bilong wanem yupela i krai na mekim bikpela nois? Dispela pikinini em i no i dai. Em i slip tasol.”
Taim ol i harim dispela tok bilong Jisas, ol i lap nogut tru long em, long wanem ol i save dispela pikinini i dai pinis. Tasol Jisas i tok em i slip. Em i laik mekim wok long strong Jehova i bin givim long em bambai ol i save, man i dai pinis em inap kirap bek, wankain olsem yumi inap kirapim man long slip.
Nau Jisas i tokim olgeta man long lusim haus. Em i kisim Pita na Jems na Jon na papamama bilong pikinini tasol i go insait long rum pikinini i stap long en. Em i holim han bilong pikinini na em i tok: “Talita, kum.” Insait bilong dispela tok i olsem: “Liklik meri, mi tokim yu, yu kirap.” Na kwiktaim dispela liklik meri i kirap na wokabaut! Taim papamama bilong em i lukim dispela, ol i amamas nogut tru.
Jisas i tokim Jairus na meri bilong em long givim sampela kaikai long pikinini, na bihain em i tok strong long ol i no ken tokim wanpela man long dispela mirakel. Tasol stori bilong dispela samting i go kamap long olgeta hap bilong dispela ples. Dispela em i namba tu taim Jisas i bin kirapim bek man i dai pinis. Matyu 9:18-26; Mak 5:35-43; Luk 8:41-56.
▪ Ol man i kam na tok wanem long Jairus? Jisas i strongim bel bilong em olsem wanem?
▪ Taim ol i kamap long haus bilong Jairus, wanem samting i kamap?
▪ Pikinini i dai pinis, orait bilong wanem Jisas i tok em i slip tasol?
▪ Husat ol 5-pela i stap wantaim Jisas na ol i lukim liklik meri i kirap bek?