Timoti​—⁠Nupela Helpim Bilong Pol

DISPELA yangpela man i stap wantaim aposel Pol em Timoti. Timoti i stap wantaim famili bilong em long Listra. Nem bilong mama bilong em Yunis, na nem bilong bubu meri bilong em Lois.

Dispela em i namba tri taim Pol i go long Listra. Wanpela yia samting paslain, Pol na Barnabas i go namba wan taim long Listra na autim tok long hap. Nau Pol i kam gen wantaim pren bilong em, Sailas.

Yu save Pol i tok wanem long Timoti? Em i tok: ‘Yu laik kam wantaim mitupela Sailas? Mipela i laik bai yu helpim mipela long autim tok long ol longwe ples.’

Timoti i tok: ‘Yes, mi laik i go.’ Olsem na em i lusim famili bilong em na em i go wantaim Pol na Sailas. Tasol paslain long yumi stori long raun bilong ol, yumi ken stori long ol samting i kamap long Pol. Bipo Jisas i bin kamap long Pol long Damaskus na nau 17 yia i go pinis.

Tingim, Pol i go long Damaskus bilong bagarapim ol disaipel bilong Jisas, tasol em yet i kamap wanpela disaipel! Bihain sampela birua i laik kilim i dai Pol, long wanem, ol i no amamas long em i autim tok long Jisas. Tasol ol disaipel i helpim Pol long ranawe. Ol i go antap long banis bilong taun na putim em long wanpela basket na slekim basket i go daun long ausait.

Bihain Pol i go autim tok long Antiok. Long Antiok ol disaipel bilong Jisas i kisim nem Kristen long namba wan taim. Bihain Pol na Barnabas i go autim tok long ol kantri i stap longwe. Wanpela taun ol i go long en em Listra, em ples bilong Timoti.

Wanpela yia bihain Pol i raun long namba tu taim na em i go long Listra. Taim Timoti i go wantaim Pol na Sailas, yu save ol i go we? Orait lukluk long mep, na yumi ken kisim save long sampela ples.

Pastaim ol i go long Aikoniam, na long narapela taun i gat nem Antiok. Bihain ol i go long Troas, Filipai, Tesalonaika, na Beria. Yu lukim Atens long mep? Pol i autim tok long Atens tu. Bihain long en, ol i stap wan na hap yia long Korin na autim tok. Na ol i stap liklik taim long Efesus. Bihain ol i kalap long sip na go bek long Sisaria, na go long Antiok, na Pol i stap long hia.

Olsem na Timoti i raun inap planti handet kilomita na helpim Pol long autim “gutnius” na kamapim planti kongrigesen Kristen. Olsem wanem? Taim yu bikpela bai yu stap gutpela wokman bilong God olsem Timoti?