Skulim Ol Pikinini Bilong Yu

Timoti​—Em i Redi na i Gat Laik Long Mekim Wok

“YU REDI?” Wanpela i bin givim dispela askim long yu bipo?​— Man i givim dispela askim long yu i laik save olsem yu redi long mekim samting. Ating em i laik save: ‘Yu gat ol buk bilong yu bilong stadi? Yu ritim pinis asainmen bilong yu?’ Yumi bai kisim save olsem Timoti em i redi.

Na tu, Timoti i gat laik long mekim wok. Yu save long mining bilong dispela?​— Taim Pol i singautim Timoti long mekim wok bilong God, Timoti i gat wankain tingting olsem narapela wokboi bilong God, dispela wokboi i tok: “Mi stap! Salim mi.” (Aisaia 6:​8, NW) Timoti em i redi na i gat laik long mekim wok, olsem na ol gutpela samting em i ken amamas long en i painim em. Yu gat laik long harim stori bilong Timoti?​—

Mama i karim Timoti long taun Listra, em planti handet kilomita longwe long Jerusalem. Bubu meri bilong em Lois na mama bilong em Yunis, ol i save stadi gut long ol tok bilong Baibel. Taim Timoti i stap bebi yet ol i kirap skulim em long Tok Bilong God.​—2 Timoti 1:5; 3:15.

Taim Timoti i gat 17 krismas samting, aposel Pol wantaim Barnabas, ol i visitim Listra long namba wan raun bilong Pol. Yumi ken ting olsem long dispela taim mama na bubu meri bilong Timoti i kamap Kristen. Olsem wanem? Yu laik harim stori bilong ol hevi i bin painim Pol tupela Barnabas?​— Ol man i no laikim ol Kristen ol i tromoi ston long Pol, em i pundaun, na ol i pulim em i go ausait long taun. Ol i ting em i dai pinis.

Ol manmeri i bilip long tok Pol i autim ol i sanap raunim em, na em i kirap sanap. Long neks de, Pol na Barnabas i lusim Listra, tasol bihain liklik ol i go bek gen. Taim ol i go bek, Pol i mekim wanpela tok long ol disaipel olsem: “Yumi laik i go insait long kingdom bilong God, tasol pastaim yumi mas wokabaut long rot i gat planti hevi i stap long en.” (Aposel 14:​8-​22) Yu save long mining bilong dispela tok bilong Pol?​— Pol i laik tok olsem i gat ol man husat bai mekim nogut long ol man i mekim wok bilong God. Bihain Pol i raitim pas na tokim Timoti: “Olgeta man i laik pas wantaim Krais Jisas na i bihainim pasin bilong God, ol man bai i mekim nogut long ol.”​—2 Timoti 3:12; Jon 15:20.

Taim Pol na Barnabas i lusim Listra, ol i go bek long ples. Sampela mun bihain, Pol i makim Sailas bilong raun wantaim em, na tupela i go bek long strongim ol nupela disaipel i stap long ol hap we Pol i bin raun long en pastaim. Yumi ken ting olsem Timoti i mas amamas tru long lukim Pol gen taim em wantaim Sailas i kamap long Listra! Tasol Timoti i amamas moa yet taim Pol i singautim em long raun wantaim em na Sailas. Em i redi na i gat laik long i go.​—Aposel 15:40–16:5.

Tripela i raun wantaim na ol i wokabaut inap planti kilomita, na bihain ol i kalap long wanpela bot. Ol i sua pinis, na ol i wokabaut i go long Tesalonaika long kantri Grik. Long dispela hap planti manmeri i kamap Kristen. Tasol ol arapela manmeri ol i belhat na ol i bung bilong mekim nogut long 3-pela. Laip bilong Pol, Sailas, na Timoti inap lus long dispela hap, olsem na ol i lusim dispela hap na i go long Beria.​—Aposel 17:​1-​10.

Pol i wari long ol nupela disaipel long Tesalonaika, so em i salim Timoti i go bek long dispela taun. Yu save wai na em i mekim olsem?​— Bihain Pol i kamapim as na em i salim Timoti i go, em i tokim ol Kristen long Tesalonaika olsem: ‘Bilong strongim yupela na helpim yupela, nogut dispela hevi na pen yupela i karim i mekim yupela i tingting planti.’ Yu save long as na Pol i salim yangpela man Timoti long mekim wok long hap we bagarap inap painim em?​— Ol birua i no save tumas long Timoti, na tu, Timoti i gat laik long i go. Timoti i mas i gat strongpela bel! Wanem samting i kamap? Taim Timoti i go bek na bungim Pol, em i tokim Pol long pasin bilong ol Tesalonaika long holim strong bilip. So Pol i raitim tok long ol olsem: “Mipela i harim olsem yupela i bilip strong i stap, na dispela i strongim bel bilong mipela.”​—1 Tesalonaika 3:​2-7.

Inap 10-pela yia moa Timoti i wok wantaim Pol. Orait bihain Pol i kalabus long Rom, na Timoti, husat i lusim kalabus nau tasol, i go bilong i stap wantaim Pol. Taim Pol i kalabus i stap em i raitim pas i go long ol Filipai, na ating Timoti i wok kuskus bilong em. Pol i tok: ‘Bai mi salim Timoti i kam long yupela. Mi no gat narapela man i wankain olsem Timoti. Em i save wanbel wantaim mi na oltaim em i save tingting long painim rot bilong helpim yupela.’​—Filipai 2:​19-​22; Hibru 13:23.

Yumi ken ting olsem Timoti i amamas tru long harim dispela tok! Pol i laikim tumas Timoti bikos Timoti em i redi na i gat laik long mekim wok. Mipela i laik bai yupela tu i gat wankain pasin.

Ol Askim:

❍ Timoti i go bikpela long wanem hap? Wanem samting i kamap taim Pol i visitim dispela hap long namba wan taim?

❍ Timoti i mekim wanem taim Pol i singautim em long raun wanem em na Sailas?

❍ Timoti i mekim wanem na dispela i soim olsem em i gat strongpela bel? Bilong wanem Pol i laikim em tumas?

[Piksa long pes 24]

Wanem samting i kamap?