Komiunio​​—As Bilong Dispela Pasin Lotu

LONG olgeta hap bilong graun ol man i save mekim komiunio, olsem sampela taim insait long yia, o long olgeta wik, o long olgeta de. Tasol ol i save kolim dispela pasin olsem wanpela tok hait bilong bilip, na planti manmeri i mekim dispela pasin ol i no kliagut long en. Ol i bilip olsem em samting i holi na em i wanpela mirakel.

Komiunio em i wanpela pasin ol i mekim insait long Misa bilong ol Katolik, taim pris i beten long bret na wain na em i singautim kongrigesen long kisim Krais insait long Holi Komiunio.a Pop Benedict Namba 16 i tok, long ol Katolik, dispela pasin bilong lotu em i “as bilip bilong mipela.” I no longtaim i go pinis na Misin Katolik i bin mekim “Yia Bilong Komiunio” bilong “kirapim ol man long bilip gen long komiunio.”

Sampela Katolik em ol i no bilip strong, ol tu i gat strongpela tingting long Komiunio. Olsem: Long wanpela stori i stap long nius Time, wanpela meri em nius i tok em i wanpela yangpela Katolik, em i bihainim ol tingting bilong nau long lotu, tasol em i tok: “Maski mipela i no wanbel long sampela bilip na pasin bilong Misin Katolik, mipela i strong yet long holimpas samting i save pasim mipela ol Katolik i stap wanbel long bilip, em pasin bilong mipela long givim bel long mekim Komiunio.”

Tasol dispela Komiunio em i wanem samting tru? Yu ting lain bilong Krais i mas mekim dispela pasin? Orait pastaim yumi ken stori long olsem wanem dispela pasin bilong mekim Komiunio i bin kamap. Bihain long en yumi ken tingim wanpela askim i bikpela samting moa: Yu ting Komiunio i stret wantaim wanpela pasin Jisas Krais i bin kamapim klostu 2,000 yia i go pinis?

Komiunio na Kristendom

I no hatwok long save long as na ol man i ting Komiunio em i wanpela mirakel. Bikpela samting tru bilong en i kamap taim ol i mekim beten bilong Komiunio. Wanpela buk (Catechism of the Catholic Church) i tok, long dispela taim stret, “strong bilong ol tok bilong beten na wok bilong Krais, na strong bilong Holi Spirit” i mekim na bodi wantaim blut bilong Jisas i stap. Orait taim pris i kisim bret na wain, em i singautim ol bilipman long kisim Komiunio, na bilong mekim olsem ol i kaikai dispela bret tasol.

Misin Katolik i tok, long rot bilong mirakel dispela bret na wain i senis na i kamap bodi tru na blut tru bilong Krais​—em wanpela bilip bilong misin. Dispela bilip i bin kamap isi isi​—ol i kamapim dispela tok na putim olsem wanpela bilip tru bilong misin long yia 1250 samting. Taim ol lotu Talatala i kamap, ol i gat tok long sampela samting bilong Komiunio bilong Misin Katolik. Luther i sakim dispela bilip na em i skulim ol man olsem bret na wain i stap wantaim bodi na blut bilong Jisas, na i no save senis na kamap olsem bodi na blut bilong em. Tasol tupela bilip hia i klostu wankain.

Bihain, ol lotu insait long Kristendom i kisim ol narapela narapela tingting long as bilong Komiunio na long pasin bilong mekim, na hamas taim ol i mas mekim insait long yia. Tasol maski ol i mekim olsem wanem, dispela pasin bilong mekim Komiunio i stap yet olsem bikpela samting tru insait long olgeta lotu bilong Kristendom. Tasol dispela bung Jisas i bin kamapim, em i wanem kain?

Em i Kamapim ‘Kaikai Bilong Bikpela’

Jisas yet i bin kamapim ‘kaikai bilong Bikpela,’ olsem bung bilong tingim dai bilong em. (1 Korin 11:​20, 24) Tasol yu ting em i bin kamapim wanpela pasin bilong lotu i narakain tru we ol disaipel bilong em bai kaikai bodi tru na dring blut tru bilong em?

Long dispela taim Jisas i bin mekim Pasova bilong ol Juda na em i rausim pinis Judas Iskariot, em dispela aposel i laik kamapim em long ol birua. Matyu, em wanpela bilong ol 11-pela aposel i stap wantaim Jisas long dispela taim, em i stori long ol samting i kamap, olsem: “Ol i kaikai i stap, na Jisas i kisim wanpela bret, na i tenkyu long God na i brukim, na i givim long ol disaipel. Na em i tok, ‘Yupela kisim na kaikai. Dispela em i [“makim,” NW] bodi bilong mi.’ Na em i kisim wanpela kap wain, na i tenkyu long God, na i givim long ol, na i tok, ‘Yupela olgeta dring long dispela. Dispela em i [“makim,” NW] blut bilong mi bilong mekim kontrak. Mi kapsaitim bilong lusim sin bilong planti manmeri.’ ”​—Matyu 26:​26-​28.

Jisas, na olgeta narapela wokman bilong God, oltaim ol i save beten na tenkyu long God long taim ol i laik kaikai. (Lo 8:10; Matyu 6:11; 14:19; 15:36; Mak 6:41; 8:6; Jon 6:​11, 23; Aposel 27:35; Rom 14:6) Yu ting i gat as na yumi ken bilip olsem taim Jisas i tenkyu long kaikai, em i wokim wanpela mirakel wantaim na dispela i mekim na ol disaipel bilong em i mas kaikai bodi tru na dring blut tru bilong em?

“Dispela i Makim” o “Dispela Em i”?

Tru, Buk Baibel na sampela Baibel moa i tanim dispela tok bilong Jisas olsem: “Yupela kisim na kaikai. Dispela em i bodi bilong mi,” na “Yupela olgeta dring long dispela. Dispela em i blut bilong mi.” (Matyu 26:​26-​28, Buk Baibel; The New Jerusalem Bible) Na i tru olsem tok Grik e·stin΄, mining bilong en i olsem “em i.” Tasol yumi ken tanim tu dispela tok olsem “makim.” Long planti Baibel ol i tanim dispela tok Grik olsem “makim.”b Ol tok i stap klostu long dispela ves i makim wanem pasin i stret long tanim dispela tok Grik. Olsem: Long Matyu 12:​7, planti Baibel i tanim tok e·stin΄ olsem “makim.” Olsem: “Sapos yupela i bin save gut long mining [tok Grik, e·stin] bilong dispela tok, ‘Mi no laikim ol ofa, mi laik bai yupela i mekim pasin marimari,’ orait bai yupela i no inap kotim ol man i no gat asua.”​—Baibel CEI; Douay Version.

Planti saveman bilong Baibel i gat nem ol i wanbel long tok olsem dispela tok “em i,” i no stret wantaim tingting Jisas i bin kamapim long dispela ves. Olsem: Saveman Jacques Dupont i tingim pasin na tingting bilong ol man em Jisas i bin sindaun namel long ol na em i tok, gutpela rot bilong tanim dispela tok i olsem: “Dispela i makim bodi bilong mi.”

Tasol yumi save, Jisas i no laik tok olsem ol disaipel bilong em i mas kaikai bodi tru na dring blut tru bilong em. Bilong wanem i olsem? Bihain long Bikpela Tait long taim bilong Noa, taim God i givim tok orait long ol man i ken kaikai mit bilong ol animal, em i tambuim ol long kaikai blut. (Stat 9:​3, 4) God i kamapim gen dispela tok insait long Lo Bilong Moses, em Jisas i bin bihainim tru. (Lo 12:23; 1 Pita 2:22) Na holi spirit i bin givim tingting long ol aposel long kamapim gen dispela lo long ol i no ken kaikai blut, olsem na dispela lo i bilong olgeta Kristen i mas bihainim. (Aposel 15:​20, 29) Orait yu ting Jisas bai kamapim wanpela pasin em lain bilong em i mas bihainim, tasol taim ol i mekim olsem ol i brukim wanpela lo holi bilong God i Gat Olgeta Strong? Nogat tru!

Em nau, i klia tru olsem Jisas i mekim wok long bret na wain bilong makim sampela samting. Bret i no gat yis i makim bodi bilong em i no gat sin na em bai givim olsem ofa. Retpela wain i makim blut bilong em, em bai kapsaitim bilong “lusim sin bilong planti manmeri.”​—Matyu 26:28.

Wok Bilong Kaikai Bilong Bikpela

Taim Jisas i mekim pinis namba wan Kaikai Bilong Bikpela, em i tok: “Yupela i mas mekim olsem bilong tingim mi.” (Luk 22:19) Tru tumas, dispela bung i save helpim yumi long tingim Jisas na ol gutpela samting tru indai bilong em i bin mekim. Na tu, yumi tingim olsem em i bin sambai long wok king bilong Papa bilong em, Jehova. Na yumi tingim tu olsem, long rot bilong dai bilong em​—em man i gutpela olgeta na i no gat sin​—Jisas i bin givim “laip bilong em bilong baim bek planti manmeri.” Dispela pe bilong baim bek ol man i mekim na ol man i bilip long ofa bilong em, ol i no ken kalabus moa long sin na ol i gat rot long kisim laip i stap gut oltaim oltaim.​—Matyu 20:28.

Tasol nambawan samting, dispela Kaikai Bilong Bikpela i wanpela kaikai bilong bung wantaim. Ol lain i insait long en em (1) God Jehova, em yet i bin stretim rot bilong givim ofa bilong baim bek ol man, (2) Jisas Krais, em “Pikinini Sipsip Bilong God,” em yet i bin givim dispela ofa bilong baim bek ol man, na (3) ol brata spirit bilong Jisas. Taim ol i kisim bret na wain, ol dispela brata bilong em i soim olsem ol i stap wanbel tru wantaim Krais. (Jon 1:29; 1 Korin 10:​16, 17) Na tu, ol i soim olsem ol i insait long “nupela kontrak,” olsem ol disaipel bilong Jisas em holi spirit bilong God i bin makim ol. Em dispela lain ol bai stap king na pris wantaim Krais long heven.​—Luk 22:20; Jon 14:​2, 3; KTH 5:​9, 10.

Wanem taim yumi mas mekim Memorial bilong tingim dai bilong Krais? Yumi ken kliagut long dispela samting taim yumi tingim bek olsem Jisas i bin makim wanpela de stret bilong kamapim dispela bung, ol i kolim Pasova. Lain bilong God i bin mekim dispela Pasova long olgeta yia, em Nisan 14 long kalenda bilong ol, na ol i bin mekim inap 1,500 yia samting bilong tingim wanpela bikpela samting tru Jehova i bin mekim bilong kisim bek lain manmeri bilong em. I klia tru olsem Jisas i tokim ol disaipel long ol i mas makim dispela de stret bilong mekim bung bilong tingim wanpela bikpela samting moa yet God bai mekim bilong kisim bek ol man long rot bilong dai bilong Krais. Olsem na ol lain tru bilong Jisas ol i save go long bung bilong Kaikai Bilong Bikpela long olgeta yia long de i stret wantaim Nisan 14 long kalenda bilong ol Hibru.

Yu ting ol i gat laik long mekim wanpela pasin bilong lotu na long dispela as ol i mekim dispela bung? Planti manmeri i save laikim ol bilaspasin bilong Komiunio. Meri bilong raitim stori long dispela nius Time, em i tok: “Taim yumi insait long ol pasin bilong lotu i bin kirap long bipo yet na planti manmeri i save bihainim long nau, dispela i save mekim gut bel bilong yumi.” Olsem planti Katolik long nau, dispela meri i laik bai ol i mekim ol tok bilong Komiunio long tok Latin olsem ol i bin mekim bipo. Bilong wanem? Em i tok: “Mi laik harim ol i mekim singsing bilong Misa long tok ples mi no save long en, long wanem, taim ol i mekim long tok Inglis mi no amamas long ol tok ol i mekim.”

Ol Witnes Bilong Jehova wantaim planti milion manmeri i laikim tok bilong Baibel, ol i amamas long harim tok bilong bung bilong Kaikai Bilong Bikpela long tok ples bilong ol yet, maski ol i stap long wanem hap. Ol i amamas long kliagut long as na Krais i dai na ol gutpela samting tru dai bilong em i mekim. Ol dispela tok i tru ol inap tru long yumi ken tingim tingim na toktok long en long olgeta taim. Ol Witnes i ting pasin bilong mekim Memorial em i nambawan rot bilong tingim bikpela pasin laikim bilong God Jehova na Pikinini bilong em, Jisas Krais. Dispela i helpim ol long wok yet long “tokaut long pen na i dai bilong Bikpela, inap long taim em i kam bek.”​—1 Korin 11:26.

[Ol Futnot]

[Rait long pes 27]

Dispela bung Jisas i bin kamapim em i wanem kain?

[Piksa long pes 28]

Jisas i kamapim bung bilong tingim i dai bilong em

[Piksa long pes 29]

Ol i mekim bung bilong tingim i dai bilong Jisas Krais