Timoti i Laik Helpim Ol Man

Timoti em wanpela yangpela man husat i amamas long helpim ol man. Olsem na em i raun long planti ples bilong helpim ol narapela. Na long dispela rot, planti gutpela samting i painim em. Yu laik harim stori bilong em?—

Timoti i go bikpela long wanpela taun ol i kolim Listra. Taim em i liklik boi yet, bubu meri bilong em Lois, na mama bilong em Yunis, i skulim em long Jehova. Taim Timoti i wok long go bikpela, em i gat laik long helpim ol narapela long kisim save long Jehova.

Taim Timoti i yangpela man yet, Pol i askim em long raun wantaim em bilong autim tok long ol narapela ples. Timoti i tok: ‘Yes!’ Em i redi long go na helpim ol narapela.

Timoti i go wantaim Pol long wanpela taun long Grik, em ol i kolim Tesalonaika. Bilong i go long dispela ples, ol i mas wokabaut inap longpela hap na bihain kalap long bot. Taim ol i go kamap, ol i helpim planti manmeri long kisim save long Jehova. Tasol sampela man i belhat na ol i laik mekim nogut long tupela. So Pol na Timoti i mas lusim dispela taun na go autim tok long ol narapela ples.

Sampela mun bihain, Pol i askim Timoti long go bek na lukim ol bratasista long Tesalonaika. Timoti i mas strongim bel bilong go bek long dispela taun nogut! Maski em i pret, em i go bek bikos em i wari long ol bratasista long dispela hap. Na em i bringim gutpela ripot i kam bek long Pol, olsem ol bratasista long Tesalonaika i holim strong bilip bilong ol!

Timoti i wok wantaim Pol inap planti yia. Wanpela taim Pol i raitim pas na tok em i ken salim Timoti bilong helpim ol kongrigesen, bikos Timoti i laikim Jehova na em i laikim ol manmeri.

Yu laikim ol narapela na yu laik helpim ol long kisim save long Jehova?— Sapos olsem, bai yu stap amamas na ol gutpela samting bai painim yu, wankain olsem Timoti!