Yu Mas Mekim Wanem?
50 Yu laik i stap oltaim long dispela gutpela ples Paradais?
Orait, yu mas kisim sampela save moa long ol tok bilong God. Gutpela sapos yu lain long kaunim Baibel.—Jon 17:3; Kamapim Tok Hait 1:3
51 Kisim sampela save moa long Jisas.—Lo 18:18, 19; Jon 3:16; Aposel 3:19-23
52 Wok long mekim ol gutpela pasin tasol na bihainim tok bilong Jehova.—Rom 6:17, 18, 22
53 Yu mas tingim dispela samting: Jehova i tok yumi no ken kilim i dai man.—Kisim Bek 20:13; 1 Jon 3:11, 12
54 Na yumi no ken kisim nating samting bilong narapela man.—Kisim Bek 20:15; Efesus 4:28
55 Man i no ken sindaun wantaim o slip wantaim meri i no meri tru bilong em.—Kisim Bek 20:14, 17; 1 Tesalonaika 4:3
56 God i orait long man i maritim hamas meri? Yu tingim? Man i mas sindaun wantaim meri bilong em inap long wanem taim?—Stat 2:22, 24; Matyu 19:5, 6; 1 Korin 7:2, 10, 11
57 Na yumi mas lotuim Jehova wanpela tasol.—Matyu 4:10; 1 Korin 8:6
58 Ol piksa o imis na ol god giaman ol i no inap helpim yumi. Bilong wanem?—1 Korin 8:4
Yu ting i gutpela sapos yumi gat sampela piksa bilong lotuim?—Lo 27:15; 1 Jon 5:21
59 Posin, marila, samting bilong sakim masalai—bilong wanem i nogut?—Lo 18:10-13; Kamapim Tok Hait 21:8
60 Ol ensel nogut, olsem ol spirit nogut, ol i bikhet long God. Long rot bilong ol glasman ol i save giamanim ol manmeri.—Aposel 16:16
61 Yumi mas beten long God. Beten i olsem yumi toktok wantaim God, bilong tokim em yumi laik mekim wok bilong em na bilong askim em long helpim yumi.—Filipai 4:6, 7
62 Yumi mas bihainim tok bilong Jisas na bilip long em.—Hibru 5:9; Jon 3:16
63 Yumi mas tingim em i dai bilong helpim yumi.—Rom 5:8
64 Yumi mas tingim Jisas em i King bilong yumi, em yumi no inap lukim em. Yumi mas bihainim tok bilong em.—Filipai 2:9-11; Kamapim Tok Hait 19:16
65 Jisas i tok yu mas tokim ol narapela manmeri long ol gutpela samting yu bin kisim save long en, na ol manmeri i laik mekim wok bilong God ol i mas kisim baptais.—Matyu 28:19, 20; Jon 4:7-15
66 Olsem na yu ken toktok wantaim ol poroman na ol wantok bilong yu long ol dispela gutpela samting.—Matyu 10:32
67 Sapos yu lain long kaunim gut tok, bai yu inap kisim save long planti samting moa na bai yu inap helpim gut ol narapela man.—2 Timoti 2:15
68 Jisas i lainim ol liklik pikinini tu long bihainim tok bilong God. Em i no save sakim ol.—Matyu 19:13-15
69 Ol papamama oltaim ol i mas lainim pikinini bilong ol long bihainim tok bilong God na laikim tumas Em.—Lo 6:6, 7; Sindaun 6:20-22; Efesus 6:4
70 I gat kain kain misin i stap. Planti tok ol i lainim ol man long en ol i no kisim long Baibel. Jehova i tok yumi mas lusim ol misin i no lainim ol man long tok i tru.—Kamapim Tok Hait 18:4; Jon 4:23, 24
71 Jehova i gat lain bilong em long graun ol inap lainim yu moa long em. Ol i husat? Yu save?—Aposel 15:14; Rom 10:14, 15
72 Em ol Witnes Bilong Jehova. Ol i stap wanbel wantaim. Long wanem narapela i save laikim tru narapela.—Aisaia 43:10-12; Jon 13:34, 35
73 Na ol i laikim tumas Jehova, olsem na ol i kisim baptais. Long dispela rot ol i tokaut olsem ol i lusim pinis ol pasin nogut bipo ol i save bihainim na nau ol i laik mekim wok bilong God oltaim.—Aposel 2:41
74 Ol Witnes Bilong Jehova i laik i stap long dispela gutpela nupela Paradais.—Song 37:9-11, 29
Yu mas mekim wanem na bai yu tu yu inap i stap long dispela gutpela ples wantaim ol?—Jems 1:22, 25; 2:20-26
75 Yu mas bung wantaim ol na lain long mekim wok bilong Jehova. Ol i laikim tumas Jehova na Krais Jisas na ol i save bihainim tok bilong tupela. Yu laikim tumas God na Krais? Yu laik helpim ol narapela man long kisim save long God?—Jon 6:45-47
76 Jehova na Krais Jisas i laikim yu na ol i laik bai yu inap i stap oltaim long Paradais.—Jon 3:16
Yu lukim ol piksa na tok bilong dispela nius na nau yu gat laik long i stap amamas oltaim long graun, a? Sapos yu laik kisim sampela save moa, gutpela sapos yu toktok wantaim wanpela Witnes Bilong Jehova em i stap long hap bilong yu. O yu ken raitim pas, o tokim narapela man long raitim, na salim i kam long ofis bilong ol Witnes long hap bilong yu. Lukim atres i stap long pes 2 bilong dispela nius.