Sapta 7
God i Larim Pasin Nogut i Stap na Dispela i Lainim Yumi Long Wanem Samting?
MAMA i karim yumi na yumi kamap long graun na kain kain hevi i save painim yumi, tasol dispela i no asua bilong God. God i wokim namba wan man na meri i gutpela olgeta na em i putim tupela i stap long gutpela ples Paradais. Taim tupela i bikhet, sapos wantu tasol Em i kilim tupela i dai, bai i no gat ol lain manmeri bilong nau ol i gat sik na sampela i stap rabis na sampela i save mekim pasin nogut. Tasol Jehova i mekim pasin marimari na em i larim Adam tupela Iv i stap na kamapim pikinini pastaim, maski ol dispela pikinini ol i sinman. Orait, bihain tupela i dai. Tasol God i wokim rot long Krais bambai ol bilipman long lain bilong Adam ol i ken kisim ol samting Adam i bin lusim—em laip oltaim long Paradais.—Diu. 32:4, 5; Jon 10:10.
2 Dispela samting i helpim tru yumi. Tasol long dispela rot God i laik mekim wanpela bikpela wok moa i winim wok bilong kisim bek yumi.
Bilong Stretim Bek Nem Bilong Em
3 I gat sampela bikpela samting Jehova i tingim, olsem nem bilong em na em i Nambawan Bikpela King, na em i God bilong tok tru, na dispela i insait long wok God i mekim bilong kamapim laik bilong em long graun na long ol man. Jehova em i gat bikpela namba tru, olsem na olgeta man i mas bihainim tok bilong em na litimapim nem bilong em bambai ol i ken sindaun gut wantaim na i stap gutpela.
4 God i wokim Adam tupela Iv na bihain em i givim wok long tupela. Em i tokaut klia long laik bilong em, em i laik bai ol i mekim olgeta hap bilong graun i kamap gutpela ples Paradais. Na em i laik tu bai Adam tupela Iv i mas kamapim ol pikinini na bai ol i go sindaun long olgeta hap bilong graun. (Jen. 1:28) Tasol tupela i mekim rong. Orait, ating nau God i no inap kamapim laik bilong em na dispela bai bagarapim nem bilong em o olsem wanem?
5 Jehova i toksave pinis long Adam, olsem: Sapos Adam i bikhet na kisim kaikai long diwai bilong save wanem samting i gutpela na wanem samting i nogut, long dispela “de” bai Adam i dai. (Jen. 2:17, NW) Jehova i truim tok bilong em na long de Adam i kisim dispela kaikai, long dispela de stret God i wokim kot long tupela na tok tupela i mas i dai. Tupela i no inap abrusim dispela strafe. Long ai bilong God i olsem Adam tupela Iv i dai pinis. (Lukim Luk 20:37, 38.) Tasol Jehova i laik bai ol manmeri i ken i stap long graun, olsem na em i larim Adam tupela Iv i kamapim pikinini pastaim na bihain tupela i dai tru. Long ai bilong God 1,000 yia i olsem wanpela de. Orait, Adam i stap inap 930 yia tasol na em i dai, olsem na i stret God i tok, long dispela “de” stret bai em i dai. (Jen. 5:3-5; lukim tu Sam 90:4; 2 Pi. 3:8.) Em nau, Jehova i mekim tok i tru tasol. Em i tok tupela i mas i dai, orait tupela i dai. Na em i laik bai Adam i mas kamapim ol lain manmeri bilong i stap long graun, orait dispela laik bilong God i no lus nating. Tasol inap liklik taim God i mas larim ol man nogut bilong sin ol i stap long graun.
6 Long taim bilong Moses Jehova i bin givim sampela tok long king bilong Isip, na long dispela tu yumi inap save, i gat wanem as na God i larim ol man nogut i stap pastaim. Taim king i tambuim ol Isrel long lusim Isip, Jehova i no kilim em i dai wantu tasol. Nogat. Em i salim 10-pela hevi i kain kain na ol man i kirap nogut long en. Ol dispela hevi i kamapim ples klia strong bilong Em. Taim em i tokaut long namba 7 hevi, em i tok em inap pinisim king wantaim lain bilong em olgeta, tasol em i tok, “Mi bin larim yupela i stap olsem bai mi ken soim bikpela strong bilong mi long yupela, na bai ol manmeri ken autim [nem] bilong mi long olgeta hap bilong graun.”—Eks. 9:15, 16.
7 Taim Jehova i helpim ol Isrel long lusim Isip, nem bilong em i kamap long planti hap. Na nau 3,500 yia bihain long dispela taim, yumi tingim yet ol samting Jehova i bin mekim. Planti lain i bin harim nem bilong Jehova na ol i kisim save tru long Em. Ol dispela samting em i bin mekim i kamapim ples klia olsem em i Man bilong tok tru tasol, na em i save truim tok promis bilong em na helpim ol wokboi bilong em. Na ol dispela samting em i bin mekim i kamapim bikpela strong bilong em; i no gat wanpela samting inap pasim em long kamapim laik bilong em. Liklik taim bai Jehova i kamapim moa yet bikpela strong bilong em na bai em i kisim biknem tru long en—bai em i bagarapim olgeta samting nogut yumi inap lukim na yumi no inap lukim, na bai yumi no ken lusim tingting long biknem bilong Em. Ol samting dispela wok bai kamapim, em bai helpim yumi inap long olgeta taim bihain.—Esi. 38:23; Re. 19:1, 2.
‘Save Bilong God i Pulap Tru!’
8 Long pas Pol i raitim long ol Rom, em i tok: “ ‘God i mekim pasin i no stret,’ ating yumi ken tok olsem, a?” Bilong bekim dispela askim em i stori long pasin marimari bilong Jehova na ol tok Jehova i bin mekim long king bilong Isip. Pol i tok tu yumi olsem sospen graun. Olsem wanem? Sospen i ken tokim man bilong wokim em, ‘Bilong wanem yu wokim mi olsem?’ Na Pol i tok: “[God] i laik kamapim ples klia belhat bilong em, bai olgeta man i ken save long strong bilong em. Na ol sospen bilong kisim pe nogut ol i redi pinis long bagarap, tasol em i larim ol na i wet longtaim long brukim ol. Long wanem em i laik bai olgeta man i save long bikpela lait na bilas bilong heven em i laik kamapim long ol sospen bilong kisim marimari, bipo em i redim ol pinis bilong kisim dispela samting. Em yumi tasol. Em i bin singautim yumi, i no lain bilong Juda tasol, nogat, ol arapela lain wantaim.”—Rom 9:14-24.
9 Kirap long taim Jehova i mekim tok profet long Jenesis 3:15, Seten wantaim lain bilong em i kamap olsem “sospen bilong kisim pe nogut ol i redi pinis long bagarap.” Tasol Jehova i wet yet. Em i no bagarapim kwik ol. Ol man nogut i bin tok bilas long ol wok bilong Em. Ol i bin mekim nogut long ol wokboi bilong em, na kilim i dai Pikinini bilong em. Tasol Jehova i bosim gut bel, na dispela samting i helpim ol wokboi bilong em inap long olgeta taim bihain. Nau olgeta ensel na olgeta man inap lukim ol samting nogut i bin kamap long pasin bilong bikhet long God. Tasol ol manmeri i bihainim tok bilong God, i dai bilong Jisas i wokim rot bilong helpim ol na “rausim wok bilong Seten.”—1 Jon 3:8; Hi. 2:14, 15.
10 Jisas i dai na kirap bek na 1,900 yia i lus. Long dispela bikpela hap taim Jehova i bin larim sampela moa “sospen bilong kisim pe nogut” ol i stap. Bilong wanem em i mekim olsem? Long wanem em i wok long kisim ol namba tu pikinini bilong “lain bilong meri,” em ol bai wok wantaim Krais long Kingdom bilong heven. (Ga. 3:29) Ol dispela 144,000 manmeri ol i “sospen bilong kisim marimari,” olsem aposel Pol i bin toktok long en. Pastaim God i singautim ol Juda bambai ol i ken insait long dispela lain, na bihain ol Sameria, na bihain moa ol manmeri bilong ol narapela lain. Jehova i isi long ol man na em i wok long kamapim laik bilong em. Em i no subim ol man long mekim wok bilong em. Tasol em i mekim gut long ol manmeri i pilim tru ol wok Em i mekim bilong redim dispela lain bilong heven. Klostu dispela wok em inap pinis.
11 Tasol olsem wanem long ol lain bilong i stap long graun? Long taim God i makim, bai milion milion manmeri i lusim matmat na ol bai kirap bek. Bai ol i stap long graun aninit long Kingdom. Na kirap long 1935 C.E. pasin isi bilong Jehova i opim rot bambai “planti tumas manmeri” bilong olgeta lain ol i ken i kam bung na em i ken kisim bek ol.—Re. 7:9, 10; Jon 10:16.
12 Olsem wanem? Yu ting God i mekim pasin i no stret? Nogat tru! Sapos God i wet longtaim long bagarapim “ol sospen bilong kisim pe nogut” bambai em inap marimari long ol narapela na kamapim laik bilong em, orait, no gat wanpela man inap sutim tok long God na tok God i mekim pasin i no stret, a? Taim yumi lukim ol samting Jehova i mekim, yumi kisim save long pasin bilong em. Yumi kirap nogut long stretpela pasin na marimari na pasin isi na kain kain save bilong em. Jehova i bihainim gutpela save long stretim dispela tok bilong Seten, na inap long olgeta taim bihain olgeta i ken save wok king bilong em i gutpela. Yumi tingim dispela na yumi mekim tok wankain olsem aposel Pol: “Olaman! Tingting bilong God na save bilong en i pulap tru, . . . Yumi man i no inap tru long painim as bilong olgeta tingting bilong en.”—Rom 11:33.
Yumi Gat Rot Bilong Kamapim Bel Bilong Yumi
13 Sampela taim yumi karim bikpela hevi, long wanem God i no pinisim yet ol man nogut na helpim ol man long kamap gutpela gen. Orait, yumi ting olsem wanem long dispela samting? Taim kain hevi olsem i painim yumi yet, yumi ting olsem em i rot bilong wok wantaim Jehova long stretim bek nem bilong em na soim olsem Seten em i man bilong giaman? Provep 27:11 inap strongim yumi long mekim olsem; em i tok: “Pikinini bilong mi, yu mas kisim gutpela tingting na save na bai mi belgut tru. Na sapos wanpela man i sutim tok long mi, bai mi inap bekim tok long em.” Seten i sutim tok long Jehova. Em i tok, sapos hevi i painim ol man na sampela samting bilong ol i lus o skin bilong ol i bagarap, bai ol i tok em asua bilong God. Bai ol i toknogutim God. (Jop 1:9-11; 2:4, 5) Taim hevi i painim yumi na yumi stap gut long God, yumi kamapim long ples klia olsem Seten i giaman na yumi mekim bel bilong Jehova i amamas. Yumi bilip tru olsem Jehova i save sori long ol wokboi bilong em, na sapos yumi stap gut long em bai em i givim gutpela pe long yumi olsem em i bin mekim long Jop.—Jems 5:11; Jop 42:10-16.
14 Taim hevi nogut i painim yumi, sapos yumi bilip na wetim Jehova i helpim yumi, yumi inap lain na kisim ol gutpela gutpela pasin. Jisas i karim pen na hevi na dispela i “skulim em tru long pasin bilong bihainim tok.” Yumi tu yumi inap lain long karim hevi na sanap strong na pilim tru ol stretpela pasin bilong Jehova. Olsem wanem? Bai yumi karim ol hevi na larim ol dispela hevi i skulim yumi?—Hi. 5:8, 9; 12:11; Jems 1:2-4.
15 Taim ol narapela i lukim yumi karim hevi long wanem yumi laikim tumas stretpela pasin, ating bai sampela i pilim husat tru ol i “brata” bilong Krais long nau, na bai ol i bung wantaim ol dispela “brata” bilong Krais na lotu long God. Long dispela rot ol inap kisim laip i stap oltaim. (Mt. 25:34-36, 40, 46) Jehova wantaim Krais i laik bai ol inap kisim laip i stap oltaim. Olsem wanem long yumi? Yumi redi long karim hevi bambai ol i ken kisim laip?
16 Taim hevi na traim i painim yumi, yumi ken tingim dispela i olsem gutpela rot bilong kamapim bel bilong yumi, yumi givim bel tru long Jehova na yumi laik insait long wok bilong kamapim laik bilong em! Sapos yumi mekim olsem, bai yumi kamapim long ples klia olsem yumi wok long kamap wanbel wantaim God na Krais olsem Jisas i beten long en bilong helpim olgeta Kristen tru.—Jon 17:20, 21.
Stori Gen Long Ol Dispela Tok
● Jehova i larim pasin nogut i stap, tasol olsem wanem em i mekim gut long nem bilong em yet?
● God i larim “ol sospen bilong kisim pe nogut” ol i stap pastaim na long dispela rot, olsem wanem marimari bilong em i kisim ol man i kam inap long yumi tu?
● Taim hevi i painim yumi yet, yumi mas ting olsem wanem long en?
[Askim Bilong Stadi]
1. (a) Sapos wantu tasol God i bin kilim i dai ol bikhetman long Iden, bai olsem wanem long yumi? (b) Tasol em i mekim wanem gutpela pasin sori bilong helpim yumi?
2. Em i laik kisim bek yumi na long dispela as tasol em i mekim ol dispela samting?
3. Wanem bikpela samting i insait long ol wok Jehova i mekim bilong kamapim laik bilong em long graun na long ol man?
4. God i laik bai Adam tupela Iv i mekim wanem?
5. (a) Olsem Jenesis 2:17 i tok, sapos wanpela i kisim kaikai long diwai bilong save wanem samting i gutpela na wanem samting i nogut, wanem taim bai em i dai? (b) Olsem wanem Jehova i truim dispela tok na kamapim tu laik bilong em long ol manmeri i mas pulap long graun?
6, 7. (a) Olsem Eksodas 9:15, 16 i makim, i gat wanem as na Jehova i larim ol man nogut i stap pastaim? (b) Olsem wanem Jehova i kamapim bikpela strong bilong em long king bilong Isip? Olsem wanem nem bilong Em i kamap long planti hap? (c) Orait, olsem wanem long taim dispela pasin nogut bilong nau i pinis?
8. Pol i kirapim yumi long tingim wanem samting moa?
9. (a) Husat ol i olsem “sospen bilong kisim pe nogut”? (b) Ol man i mekim pasin birua long Jehova, tasol bilong wanem em i isi long ol na i karim dispela hevi inap longtaim? Tasol ol samting bihain bai kamap, olsem wanem dispela i bilong helpim ol manmeri i laikim tumas Em?
10. Bilong wanem Jehova i no les kwik long ol man nogut insait long dispela 1,900 yia?
11. Jehova i isi long ol man na dispela i helpim wanem narapela lain tu?
12. (a) Olsem na yumi kisim wanem save long pasin bilong Jehova? (b) Taim yu save long ol samting Jehova i bin mekim bilong stretim dispela tok, yu ting olsem wanem?
13. (a) Taim hevi i painim yumi yet, yumi gat rot long mekim wanem? (b) Wanem samting inap helpim yumi long bihainim gutpela tingting na save?
14. Taim traim i painim yumi, sapos yumi bilip na wetim Jehova, dispela inap helpim yumi olsem wanem?
15. Sapos yumi karim hevi na sanap strong, dispela inap helpim ol narapela olsem wanem?
16. Taim hevi i painim yumi, tingting bilong yumi long dispela hevi em i mekim wanem long pasin bilong i stap wanbel?