Sapta 8
‘Yumi Gat Pait Wantaim Ol Spirit Nogut’
OL MANMERI i save tingim ol samting bilong skin tasol, ol i no bilip olsem i gat ol spirit nogut i stap. Maski ol i bilip o nogat, ol dispela spirit nogut i stap na ol i mekim nogut long olgeta manmeri. Na ol i tingting moa yet long mekim nogut long ol manmeri i lotuim Jehova. Aposel Pol i tok yumi gat pait wantaim ol dispela spirit nogut. Em i tok: “Yumi pait wantaim olgeta spirit nogut i stap antap. Yumi pait wantaim ol hetman, na ol pesman, na ol strongpela het spirit bilong graun ol i save bosim dispela tudak.” (Ef. 6:12) Long taim bilong yumi dispela pait i kamap strong moa, long wanem ol i rausim Seten long heven i kam daun long graun na em i belhat. Em i save em i gat sotpela taim tasol.—Re. 12:12.
2 Olsem wanem yumi ol man inap pait wantaim ol strongpela spirit na winim pait? Yumi mas bilip tru olsem Jehova tasol inap helpim yumi long winim dispela pait, olsem na yumi mas bilip na wetim Em. Yumi mas harim na bihainim tok bilong Em. Sapos yumi mekim olsem, orait Seten i no inap bagarapim skin o pasin o bel o tingting bilong yumi olsem em i save mekim long ol man i stap aninit long em.—Ef. 6:11; Jems 4:7.
Ol Hetman i Stap Antap
3 Jehova i stap antap na em i lukluk i kam daun na em i lukim klia ol samting i kamap long graun. Jehova i soim ol samting long aposel Jon olsem driman na Jon i lukim Seten, em ‘dispela bikpela retpela snek’ em i laik kaikai kingdom bilong God na Krais taim dispela kingdom i kamap long heven long 1914 C.E. Tasol Seten i no inap mekim. Olsem na em i belhat na em i kirap mekim nogut tru long lain bilong dispela Kingdom ol i stap long graun. Em i birua tru long ol dispela ‘namba tu’ pikinini bilong “meri” bilong God.—Re. 12:3, 4, 13, 17.
4 Na Jon i lukim as tru bilong namba na strong bilong ol gavman bilong graun. Em i lukim wanpela “wel abus” i gat 7-pela het na 10-pela kom, na em i gat strong bilong bosim “olgeta lain, na . . . olgeta tok ples.” Dispela “wel abus” i no makim wanpela gavman tasol. Nogat. Em i makim olgeta gavman bilong graun. Jon i lukim “dispela snek [Seten] i givim strong bilong en long wel abus. Em i putim em i stap king olsem em yet, na i givim em bikpela strong.” (Re. 13:1, 2, 7; lukim tu Luk 4:5, 6.) Maski ol hetman politik i tok ol i gat lotu, tasol ol dispela lain bilong “wel abus” ol i no save daun long Nambawan King Jehova. Na ol i no save daun long dispela king God Jehova i bin givim namba long em, em Krais Jisas. Olgeta ol i wok strong long holimpas wok bilong ol long bosim graun. Revelesen i tok klia olsem: Nau long taim bilong yumi, ‘ol spirit nogut’ i bungim olgeta dispela lain i go long Amagedon, em “bikpela de bilong God I Gat Olgeta Strong.” (Re. 16:13, 14, 16) Olsem aposel Pol i tok, ol “hetman” tru bilong dispela graun ol i no man bilong graun; nogat; “olgeta spirit nogut i stap antap” ol i “hetman” tru bilong dispela graun. (Ef. 6:12) Olgeta man i laik lotu tru long Jehova, ol i mas save long dispela samting.
5 Long olgeta de i gat ol hevi na pait i save kamap bilong brukim ol man i stap narapela narapela lain. Ol man i save tingim lain bilong ol yet, olsem ol wanskin o wantok samting, na ol i mekim tok o narapela samting bilong helpim dispela lain na ol i birua long ol narapela lain. Na taim wanpela kros o pait i kamap, maski lain bilong ol yet i no insait tru long dispela pait, tasol ating bai ol i helpim lain bilong ol yet na birua long narapela lain. Tasol maski i gat wanem as bilong dispela kros o pait, na maski em i kros o pait bilong husat, tasol sapos ol i insait long en, yu ting ol i helpim tru husat? Baibel i tok klia: “Seten i stap het bilong olgeta man bilong graun.” (1 Jon 5:19) Orait, yumi mas mekim wanem na bai Seten i no paulim yumi tu? Yumi mas givim bel long Kingdom bilong God tasol na helpim wok bilong en na yumi no ken insait liklik long ol kros o pait bilong dispela graun.—Jon 17:15, 16.
Pasin Giaman Bilong Seten
6 Long olgeta taim Seten i bin kirapim ol man long mekim tok nogut o pasin nogut long ol lain i save lotu tru long God bambai ol i lusim Em. Na Seten i save mekim ol pasin hait na pasin giaman tu.
7 Long rot bilong lotu giaman em i trikim planti man na ol i stap tudak. Em i giamanim ol na ol i ting ol i lotu long God. Ol i no laikim tru tok i tru, olsem na ating ol i laikim wanpela lotu i gat ol tok hait long en o i kirapim bel bilong ol o i mekim ol strongpela wok. (2 Te. 2:9, 10) Tasol Baibel i toksave olsem: Sampela manmeri bipo ol i lotu tru long God, bai ol i “lusim bilip. Bai ol i harim maus bilong ol spirit bilong giaman na bihainim tok bilong ol spirit nogut.” (1 Ti. 4:1) Olsem wanem dispela samting inap kamap?
8 Long pasin hait Seten i save traim man long samting em i no gat strong long sakim. Olsem: Sapos man i pret yet long ol man, orait bai Seten i kirapim sampela man, olsem ol wantok samting, bilong pretim em na ating bai em i insait wantaim ol long sampela pasin em lotu giaman i as bilong en. Olsem wanem? Man i gat pasin antap? Orait, taim sampela man i laik stretim em o ol i no bihainim tingting bilong em, ating bai em i bel nogut long dispela. (Pro. 29:25; 15:10; 1 Ti. 6:3, 4) Olsem wanem sapos man i no laikim tru God na ol narapela man na i gat narapela tingting i kirapim em long autim tok? Ating bai em i no laik stretim tingting na bihainim Krais, a? Bai em i harim tok bilong ol man i ‘skirapim yau bilong em long sampela tok em i laikim,’ na bai em i tok, ‘Sapos yumi kaunim Baibel na mekim gutpela pasin, em inap.’ (2 Ti. 4:3) Maski em i go insait long narapela lotu o em i bihainim tingting bilong em yet long mekim lotu, dispela i no bikpela samting long Seten. Seten i laik bai dispela man i no lotuim Jehova moa long pasin Jehova i makim long rot bilong Baibel na oganaisesen bilong Em.
9 God i bin putim gutpela laik long skin bilong yumi, tasol Seten i grisim yumi long mekim pasin nogut bilong inapim ol dispela laik. Yumi gat laik long marit, tasol Seten i laik paulim dispela na pulim yumi long mekim pasin pamuk samting. Planti manmeri i sakim lo bilong Baibel na ol i orait long man na meri singel i slip wantaim. Ol i tok, em rot bilong kisim amamas o rot bilong soim olsem ol i bikpela pinis. Na olsem wanem long ol marit? Planti marit, sapos hevi i kamap namel long tupela, ol i katim marit na maritim narapela poroman o i stap nating wantaim narapela poroman. Taim yumi lukim dispela pasin, yumi ting olsem wanem? Yumi pilim olsem lo Kristen i strong tumas na i pasim yumi na pasin bilong ol em rot bilong kisim amamas? Seten i laik giamanim yumi na bai yumi ting olsem Jehova i pasim rot bilong yumi long kisim gutpela samting. Seten i laik kirapim yumi long tingim amamas yumi inap kisim nau—na bai yumi no tingim ol samting nogut inap painim yumi yet na ol narapela man long dispela rot, na bai yumi no tingting tu long i stap gut long ai bilong Jehova na Pikinini bilong em.—Ga. 6:7, 8; 1 Ko. 6:9, 10.
10 Na yumi gat laik long painim amamas. Sapos yumi painim gutpela amamas, dispela inap mekim gut skin na bel na tingting bilong yumi. Tasol Seten i laik giamanim yumi na bai yumi mekim samting bilong amamas i no stret wantaim tingting bilong Jehova. Long kain taim olsem, yumi mekim wanem? Yumi save Jehova i nolaik tru long ol man i save laikim pasin bilong pait na bagarapim man. (Sam 11:5) Orait, taim piksa bilong dispela samting i kamap long haus piksa o long video o televisen, yu save sindaun i stap na lukim? O taim ol man i pilai spot na ol i mekim dispela kain pasin, yu orait long en na singaut strong bilong kirapim ol long pait strong?—Lukim Jenesis 6:13.
11 Na yumi save, Jehova i “no laik tru” long ol man i mekim wok bilong ol spirit nogut, olsem posin o papait o marila samting, na ol man i painim rot bilong toktok wantaim ol man i dai pinis. Yumi no save go long ol dispela man o singautim ol i kam mekim wok bilong Seten long haus bilong yumi, a? Tasol yu save harim stori bilong ol long redio o lukim long piksa wokabaut? Yumi no save go lukim “dokta bilong ples,” a? Tasol olsem wanem? Yu save taitim hap rop samting long han o nek bilong nupela pikinini bambai sik i no ken kisim em? Na yumi save Baibel i tok Jehova nolaik tru long ol man i wokim marila long wanpela man; orait olsem wanem? Yumi save go lukim ol trikman ol i gat strong long bosim tingting bilong man na kirapim em long mekim ol narapela kain samting?—Diu. 18:10-12; Ga. 5:19-21.
12 Baibel i tok, ‘yumi no ken toktok liklik’ long pasin pamuk na ol kain pasin doti olsem yumi tok pilai long en o yumi gat tingting nogut na yumi mekim kain tok olsem. (Ef. 5:3-5) Tasol olsem wanem sapos ol i putim tok bilong dispela samting long wanpela singsing na i gat gutpela musik bilong en yumi save laikim? Ating bai yumi kirap mekim dispela singsing na kolim tok bilong en i litimapim pasin pamuk o drak samting. Na yumi save yumi no ken bihainim pasin bilong ol man i save mekim ol dispela kain pasin, tasol yumi save bihainim pasin bilong ol long bilasim skin o mekim tok wankain olsem ol na ol man i ting yumi wanlain bilong ol? Seten i save moa long paulim ol man! Em i mekim kain kain pasin hait bilong pulim yumi long bihainim tingting nogut bilong em! (2 Ko. 4:3, 4) Oltaim yumi mas was gut bambai yumi no bihainim pasin o tingting bilong ol manmeri bilong dispela graun. Olsem bai yumi inap sakim ol pasin hait bilong Seten. Yumi no ken lusim tingting: “Ol spirit nogut” i bosim dispela graun na oltaim yumi mas pait strong long sakim ol samting ol i mekim bilong pulim yumi.—Ef. 6:12; 1 Pi. 5:8.
Yumi Inap Winim Pait
13 Paslain liklik long taim Jisas i dai, em i tokim ol aposel: “Bel bilong yupela i ken i stap strong. Mi winim pinis pasin bilong dispela graun.” Ol tu inap winim pasin bilong dispela graun; na 60 samting yia bihain aposel Jon i tok: “Husat i save winim pait na daunim pasin bilong graun? Man i bilip long Jisas em i Pikinini Bilong God, dispela man i save win.” (Jon 16:33; 1 Jon 5:5) Bilong kamapim dispela bilip bilong yumi, yumi mas bihainim tok bilong Jisas na bilong Baibel. Na yumi mas mekim wanem samting moa? Yumi mas i stap klostu long dispela kongrigesen Jisas i het bilong en. Taim yumi popaia, yumi mas tanim bel na askim God long tekewe rong bilong yumi long rot bilong ofa bilong Krais. Long dispela rot, maski yumi gat ol liklik pasin kranki na yumi save popaia, tasol bai yumi inap winim pait.
14 Bilong winim dispela pait, yumi mas pasim ‘olgeta klos pait God i save givim long yumi.’ Opim Baibel long Efesas 6:13-18 na kaunim tok long ol dispela klospait. Bihain yu ken bekim ol askim i stap daunbilo na tingting long olsem wanem ol dispela klospait wan wan inap helpim yu:
“Pasim tok tru olsem let”
Ating yumi save long tok i tru, tasol sapos yumi stadi na tingim gut ol tok bilong Baibel na go oltaim long ol miting, olsem wanem dispela inap helpim yumi? (Fl. 3:1; 4:8, 9; 1 Ko. 10:12, 13; 2 Ko. 13:5; 1 Pi. 1:13)
‘Kisim stretpela pasin olsem siot kapa’
Yumi mas kisim stretpela pasin bilong husat? (Re. 15:3)
Sapos yumi no laikim tru pasin bilong Jehova na yumi sakim lo bilong Em, olsem wanem dispela samting inap bagarapim yumi long spirit? (Lukim 1 Samuel 15:22, 23; Diuteronomi 7:3, 4.)
‘Kisim pasin bilong autim gutnius olsem su’
Sapos yumi wok strong long autim tok long ol samting God i bin mekim bambai yumi ken i stap wanbel wantaim em, dispela bai helpim yumi olsem wanem? (Rom 10:15; Sam 73:2, 3; 1 Ti. 5:13)
“Kisim bilip tu olsem hap plang”
Sapos yumi gat strongpela bilip bai yumi ting olsem wanem long ol samting bilong mekim yumi i gat tupela tingting o bilong mekim yumi i pret? (Skelim 2 Timoti 1:12; 2 King 6:15-17.)
God i kisim bek yu—putim dispela olsem “hat kapa”
Yumi bilip na wetim God i kisim bek yumi, orait olsem wanem dispela i helpim yumi long abrusim pasin bilong laikim tumas mani kago samting? (1 Ti. 6:7-10, 19)
“Bainat bilong Holi Spirit”
Yumi mas mekim wok long wanem samting bilong helpim yumi long sakim ol samting i laik bagarapim yumi o narapela man long spirit? (Sam 119:98; Pro. 3:5, 6; lukim tu Matyu 4:3, 4.)
Olsem na Efesas 6:18, 19 i kolim wanem narapela samting em i bikpela samting bilong helpim yumi long winim pait? Yumi mas beten planti taim o sampela taim tasol? Yumi mas beten bilong helpim husat?
15 Yumi ol soldia Kristen yumi insait long bikpela ami ol i mekim pait bilong spirit. Sapos yumi was gut na pasim olgeta klospait God i save givim long yumi, bai yumi no ken bagarap long dispela pait. Bai yumi sanap strong na yumi inap strongim ol narapela wokboi bilong God. Bai yumi pait strong, olsem wok strong long autim dispela gutpela tok bilong Kingdom bilong God i stap long han bilong Krais, em dispela gavman Seten i birua tru long en.
Stori Gen Long Ol Dispela Tok
● Ol manmeri i lotu long Jehova, bilong wanem ol i no save insait liklik long ol pait na kros bilong ol lain bilong dispela graun?
● Wanem sampela pasin hait Seten i mekim bilong bagarapim bilip bilong ol Kristen?
● Dispela klospait God i givim long yumi, olsem wanem em i bikpela samting bilong lukautim yumi long dispela pait?
[Askim Bilong Stadi]
1. Bilong wanem yumi mas tingim ol wok ol spirit nogut i mekim?
2. Olsem wanem yumi inap pait wantaim ol strongpela spirit na winim pait?
3. Seten i birua tru long wanem samting? Na em i birua tru long husat?
4. (a) Baibel i tok husat i givim strong long ol gavman bilong graun? (b) Husat i bungim olgeta hetman politik nau long dispela taim? Ol i bungim ol i go we?
5. Bilong wanem yumi mas lukaut gut bambai Seten i no ken pulim yumi long helpim ol wok em i bin kamapim?
6. Wanem sampela rot bilong Seten long pulim ol man na ol i bin lusim lotu i tru?
7. Seten i mekim wanem wok long lotu giaman na em i trikim ol man?
8. Sampela manmeri bipo ol i lotuim Jehova, tasol Seten i giamanim ol olsem wanem na pulim ol i go insait long lotu giaman?
9. Olsem wanem Seten i mekim wok long maritpasin bilong kamapim laik nogut bilong em?
10. Long wanem rot Seten i laik paulim tingting bilong yumi long pasin bilong pait na bagarapim man?
11. Maski man i save Jehova i no laik tru long wok bilong ol spirit nogut, tasol sapos em i no was gut, olsem wanem em inap pundaun long dispela samting?
12. (a) Olsem wanem Seten i mekim wok long musik na singsing bilong kirapim yumi long kisim tingting kranki? (b) Klos bilong yumi o pasin bilong bilasim gras, o tok yumi mekim, olsem wanem dispela inap makim olsem yumi laikim ol manmeri Jehova yet i no save laikim pasin bilong ol? (c) Yumi mas mekim wanem bambai Seten i no ken paulim yumi?
13. Yumi gat sin na yumi no gutpela olgeta, tasol olsem wanem yumi inap winim pasin bilong dispela graun em Seten i bosim?
14. (a) Kaunim Efesas 6:13-18. (b) Lukim ol askim na skripsa hia na toktok wantaim long olsem wanem olgeta wan wan hap bilong klospait ol inap helpim yumi.
15. (a) Dispela pait em i bilong yu wanpela tasol? (b) Yumi mas mekim wanem wok na bai yumi strong long mekim dispela pait?