Sapta 2
Ol Bikpela Tok i As Bilong Ol Samting Bai Painim Yumi Long Bihain
LONG dispela taim planti bikpela samting i wok long kamap em i mekim sampela samting long i stap bilong yumi long bihain, na ol dispela samting i kamap hariap hariap. Ol man long olgeta hap i karim planti hevi na ol i painim rot bilong pinisim ol dispela hevi. Ating ol i bilip long God, tasol ol i ting ol man i mas stretim ol dispela hevi bilong graun. Sampela i wok long mekim long rot bilong ol gavman bilong graun o long pasin bilong bung na tok pait long gavman. Sampela i ting ol i mas rausim olpela gavman na kamapim nupela gavman. Ol i ting sapos ol i senisim ol lo o senisim ol gavman, dispela bai stretim sampela hevi bilong graun. Tasol olsem wanem? Ol dispela samting ol man i mekim i stretim ol hevi? Ol i mekim mekim inap planti tausen yia, tasol ol i no bin kamapim wanpela gavman i mekim stretpela pasin tru, o i kamapim gutaim tru, o i helpim lain bilong en long i stap amamas oltaim. Bilong wanem ol i no inap mekim?
2 Maski ol bikman i laik helpim ol man, tasol i gat sampela strongpela samting i bosim olgeta gavman bilong graun na ol dispela gavman i no inap mekim ol gutpela wok ol i laik mekim. Husat i bosim ol gavman? Em ol spirit nogut, olsem Seten wantaim lain bilong em. Tru planti man i no bilip olsem i gat ol spirit nogut i stap. Tasol Krais Jisas i bilip. Em i save Seten i bin kamap olsem wanem na em i tok Seten em i “hetman bilong dispela graun.” (Jon 12:31) Baibel i mekim tok piksa na i tok olgeta gavman bilong graun i kain olsem wanpela “wel abus,” na Baibel i tok, “dispela snek [Seten] i givim strong bilong en long wel abus. Em i putim em i stap king olsem em yet, na i givim em bikpela strong.” (Revelesen 13:1, 2; lukim tu Danyel 7:2-8, 12, 23-26.) Na Baibel i tok profet long taim bilong yumi “bikpela hevi i laik kamap . . . Seten i go daun pinis long yupela.” (Revelesen 12:12) I no gat narapela as bilong ol hevi i painim ol manmeri bilong graun long nau. Tasol dispela samting i bin kamap olsem wanem? Yumi ken mekim wanem na bai ol dispela hevi i ken pinis long yumi?
BIKPELA TOK LONG WOK KING
3 Ol namba wan tok bilong Baibel i tok, taim God Jehova i wokim namba wan man na meri, em Adam tupela Iv, na i putim tupela long gaden bilong Iden, em i lainim tupela long ol i mas bihainim lo bilong em long wanem em i Papa bilong tupela, na em i Man bilong givim ol gutpela gutpela samting long tupela, na em i Nambawan Bikpela King bilong heven na graun. Sapos ol i laik i stap gutpela, ol i mas save ol i mas bihainim tok bilong God bambai ol i ken i stap oltaim oltaim.—Jenesis 2:16, 17; lukim tu Aposel 17:24, 25.
4 Long dispela taim bipo olgeta samting God i wokim i gutpela olgeta. Ol ensel na ol man bilong graun i narapela kain long ol animal—ol ensel na ol man inap tingim wanem samting ol i laik mekim. Tasol i no longtaim na wanpela ensel i kisim pasin bikhet. Em i bikhet long wok king bilong Jehova. Em i kamap wanpela birua bilong God, o man bilong sakim tok—em insait bilong dispela nem Seten. (Lukim Jems 1:14, 15; Revelesen 12:9.) Seten i laik kamap bikpela man. Em i laik pulim namba wan man na meri na bai tupela i givim baksait long God Jehova na i kam aninit long em. Em i ting, long bihain bai planti manmeri i kamap long graun na bai em i kamap bikpela bilong ol, olsem god bilong ol. (Lukim Aisaia 14:12-14; Luk 4:5-7.) Dispela stori bilong ol samting i kamap long Iden, em i no stori nating. Nogat. Krais Jisas i stori long ol dispela samting na yumi save ol i bin kamap tru.—Matyu 19:4, 5.
5 Jisas i tok long Seten, olsem: “Em i no bihainim pasin i tru. . . . Em i man bilong tok giaman, na em i papa tru bilong pasin bilong tok giaman.” (Jon 8:44) Namba wan tok giaman bilong Seten Baibel i kolim, em dispela tok giaman Seten i mekim long Iv taim em i sutim tok long God olsem God i tok tru o nogat. Em i strong long Iv i mas sakim lo bilong God, na em i tok sapos olgeta wan wan i makim wanem lo ol i laik bihainim, dispela bai helpim ol. (Jenesis 3:1-5; lukim tu Jeremaia 10:23.) Olsem na long Iden Seten i gat tok long Jehova i stap king. Ol samting i kamap bihain i kamapim long ples klia olsem Seten i sutim tok tu long olgeta ensel na olgeta man olsem ol bai stap gut long God o nogat. Ol i givim bel tru long God na ol i mekim wok bilong em o nogat? Olsem wanem? Seten inap pulim ol na bai ol i lusim God? (Jop 1:7-12; 2:3-5; Luk 22:31) Olgeta ensel long heven na olgeta man long graun ol i insait long ol dispela tok. Orait, Nambawan King bilong heven na graun i mekim wanem?
6 Jehova i no kirap wantu tasol na kilim i dai ol dispela bikhetman. Nogat. Em i bihainim gutpela tingting na em i larim bikpela hap taim liklik bilong stretim ol dispela tok Seten i kamapim. Tasol God i no mekim dispela samting bilong helpim em yet; nogat; em i mekim bambai ol ensel na ol man ol yet i ken lukim ol samting nogut i kamap taim man i bikhet long wok king bilong God, na bilong givim rot long ol na ol i ken kamapim bel bilong ol, ol i laik bihainim husat. Taim Jehova i stretim pinis ol dispela bikpela tok, em i no ken larim wanpela man i bagarapim gen bel isi bilong heven na graun.
7 God Jehova em i Man bilong wokim ol man, olsem na i stret em i stap King bilong ol. (Revelesen 4:11) Tasol bihain Seten wantaim ol spirit nogut i wok long kirapim narapela tingting nogut long bel bilong ol man. Pastaim Seten i kirapim ol na ol i gat laik long makim wanem pasin ol yet i ting em i gutpela o i nogut, na nau em i kirapim ol na ol i gat laik long i stap antap long ol narapela man na bosim ol. Nimrot em i namba wan man bilong putim em yet i stap king; em i bosim ol bikpela taun long Mesopotemia. Em i bikhet long Jehova na em i ‘strongpela man tru bilong raunim abus’ na ol man. (Jenesis 10:8-12) Kirap long taim bilong Nimrot na i kam inap long nau, ol man i bin kamapim kain kain gavman. Tasol ol man i skelim ol samting i bin kamap ol i save, ol dispela gavman i bin mekim planti pasin giaman na kamapim pait na kilim man i dai.—Eklisiastis 8:9.
8 Taim Krais Jisas i stap long graun, Seten i laik pulim em tu bai em i stap aninit long strong bilong em. Em i tok long givim “olgeta kingdom bilong graun” long Jisas sapos Jisas i brukim skru na lotu long em wanpela taim tasol. Tasol Jisas i sakim Seten. (Luk 4:1-13) Bihain ol man i laik putim Jisas i stap king, tasol Jisas i lusim ol na i go. (Jon 6:15) Em i save long as bilong olgeta wok gavman na wok politik bilong graun, na em i save God i no laik bai em i wok long stretim.
9 Jisas i stap gut olgeta long Jehova, em God na Papa bilong em. Em i laikim tumas ol pasin bilong Papa bilong em, na olgeta taim em i mekim ol samting Papa bilong em i laikim. (Jon 8:29) Em i save i gat wanpela rot tasol bilong stretim ol hevi bilong graun, em Kingdom bilong God, em wanpela gavman tru bilong heven, na long stretpela pasin na pasin sori em bai bosim ol man. Dispela Kingdom tasol inap pinisim strong bilong Seten na ol spirit nogut. Dispela Kingdom tasol inap helpim ol man bilong olgeta lain na olgeta kain skin na bai ol i kamap wanbel na i stap brata brata tru olsem wanpela bikpela famili long olgeta hap bilong graun, na bai ol i stap isi wantaim. Dispela Kingdom tasol inap helpim ol man long lusim kalabus bilong sin na i dai, na helpim ol long i stap amamas oltaim. Dispela Kingdom i no wanpela samting ol gavman bilong graun i kamapim na ol misin i orait long en. Nogat. Ol Kristen tru i no save holim ol samting bilong mekim pait bilong helpim dispela Kingdom. Nogat. Dispela Kingdom em gavman bilong God yet na God yet i putim King bilong en na dispela King em i stretpela man olgeta. Em dispela Kingdom tasol Jisas i bin autim tok bilong en na em i lainim ol disaipel long beten askim God long kamapim.—Danyel 2:44; Revelesen 20:1, 2; 21:3, 4.
YU LAIK BIHAINIM HUSAT?
10 Bikpela samting yu mas tingim, em olsem: Yu save God Jehova em i Man bilong wokim heven na graun na em i King tru na Nambawan Bos bilong en na i stret em i holim dispela wok? Yu bin kisim save long laik bilong Em na ol samting Em i tok yumi mas mekim olsem Baibel i makim? Yu tingim gut bikpela namba bilong em, na yu pilim tru ol gutpela pasin bilong em, na long dispela as yu givim bel long em na wok long bihainim tok bilong em?—Sam 24:1, 10; Jon 17:3; 1 Jon 5:3.
11 Ol man i bihainim narapela rot, yu ting ol i amamas moa? Seten i tok sapos ol man i sakim tok bilong God na bihainim laik na tingting bilong ol yet, dispela bai helpim ol. Tasol wanem samting i bin kamap? Ol man i no daun long God, em i Papa bilong graun, na ol i no ting olgeta man i kamap long wanpela tumbuna tasol na ol i mas i stap olsem brata brata, olsem na planti pait i bin kamap long graun na ol i bin kilim i dai olsem 99 milion man meri pikinini long taim bilong yumi. Ol i no bihainim stretpela pasin em lo bilong Baibel i makim, olsem na planti famili i bruk, na ol sik bilong pamuk i go bikpela olgeta, na ol man i kisim drak long olgeta taim na bagarapim skin bilong ol, na pasin raskol i kamap. Na sapos man inap abrusim bagarap bilong pait o long han bilong ol raskol samting, tasol sin bilong Adam i stap long skin bilong em na em i mas i dai. Olgeta samting i kamap i makim wanpela samting olsem: Taim ol man i sakim ol gutpela stretpela lo God i putim bilong helpim ol, dispela samting i nogutim ol yet na ol narapela man. (Rom 5:12; lukim tu Aisaia 48:17, 18.) Yu no laik i stap nogut olsem, a? Yu inap bihainim gutpela rot bilong helpim yu tru.
12 Baibel i tok: “Bikpela i save mekim gutpela pasin long yumi! Yupela yet i mas traim na lukim na bai yupela i save Bikpela i gutpela tru. Man i save bilip tru long Bikpela, em i ken i stap belgut tru.” (Sam 34:8) Bilong mekim olsem yu mas save long Jehova na kirap bihainim tok bilong em. Taim yu mekim olsem bai i stap bilong yu i gat as bilong en na bai yu no pilim olsem yu stap nating tasol. Bai yu no mekim sampela samting bilong kisim amamas inap liklik taim na lusim tingting long ol hevi bilong yu na bihain bai yu karim hevi long ol dispela samting yu mekim. Nogat. Bai yu lain long rot bilong i stap belgut na amamas, maski i gat hevi. (Provep 3:5, 6; 4:10-13; 1:30-33) Na bai yu tu yu inap kisim ol gutpela samting i kamap long rot bilong Kingdom bilong God. Yu laik i stap gutpela olsem? Orait nau yu mas kirap mekim sampela samting. Bilong wanem nau yu mas mekim?
OLGETA LAIN I WOKABAUT I GO LONG AMAGEDON
13 Ol man na oganaisesen, em ol i bihainim Seten long laik bilong ol yet o ol i no tingim na ol i bihainim nating, God i no ken larim ol i stap. Em i no ken larim ol i sakim lo bilong em oltaim na bagarapim graun na bagarapim sindaun bilong ol narapela man. Bai de bilong kot i painim ol, em Baibel i kolim olsem “bikpela de bilong Jehova.”—Sefanaia 1:2, 3, 14-18, NW.
14 Krais Jisas i tokaut long ol samting i mas kamap long taim bilong pinis bilong dispela pasin nau i stap long graun na em i tok, “ol dispela spirit nogut tru” bai ol i “go long ol king bilong olgeta man bilong graun. Ol i laik bungim ol bilong kirapim pait long dispela bikpela de bilong God I Gat Olgeta Strong.” Em i tok, “ol i bungim ol king long dispela hap, long tok Hibru ol i kolim Amagedon.” Nau long dispela taim ol i wok long bungim ol dispela lain!—Revelesen 16:14, 16.
15 Maski ol lain bilong graun i pasim tok long ol i no ken wokim moa ol bom nuklia, tasol ol i no inap abrusim dispela Amagedon Baibel i stori long en. Maski ol narapela narapela gavman i bung na toktok wantaim long pasim ol pait, tasol ol i no inap pasim Amagedon. Dispela nem Amagedon, ating wanpela taun bilong bipo, em Megido, em as bilong dispela nem. Tasol Amagedon i no ken kamap long wanpela ples long Midel-Is. Nogat. Seten, em “hetman bilong dispela graun,” na maski ol man i gat kain kain tingting politik, Seten i subim ol na ol i bung wantaim na nau samting i kamap ples klia, olsem ol i birua long God Jehova. Seten i subim “ol king bilong olgeta man bilong graun” wantaim lain bilong ol na ol i mas kamapim ples klia tingting bilong ol, ol i laik bihainim husat. Stret long taim Amagedon i laik kamap bai ol i birua moa yet long Kingdom bilong God na olgeta man i autim tok bilong en. Maski ol i bilip olsem Seten i stap o nogat, tasol “Seten i stap het bilong olgeta man bilong graun,” olsem Baibel i tok. Dispela pasin nogut bilong nau wantaim olgeta man i bilip long en, yes, olgeta man i bihainim pasin nogut bilong dispela graun, ol i mas pinis.—1 Jon 5:19; 2:15-17.
16 Pasin nogut na pasin giaman i pulap olgeta long dispela graun. I no ol raskol tasol i sakim ol lo na i no tingim ol narapela man na ol samting bilong ol. Nogat. Ol man nating tu i save mekim olsem. Olgeta i sakim tok bilong God long Baibel. Ol i no laik daun long wok king bilong God. Ol i bagarapim tru nem bilong God, olsem na God i mas kirap mekim sampela samting bilong stretim bek nem bilong em, na bilong stretim rot bilong kamapim Paradais long graun. Long dispela Paradais ol man i laikim tumas stretpela pasin bai ol inap kisim gutpela sindaun na i stap bel isi tru.
17 Taim dispela bikpela bagarap i kamap, olgeta man bai save Jehova i as bilong en. Bikpela bagarap tru bai kamap long olgeta hap. Taim ami bilong Jehova long heven i kirap mekim wok bilong bagarapim ol birua, bai olgeta lain man i save Jehova yet i mekim dispela samting. Strong bilong ol gavman bai pinis na nau olgeta man bai kirap na pait wantaim ol narapela man. Pikinini bilong God yet long heven bai bosim ol samting i kamap long dispela taim.—Revelesen 6:16, 17; 19:11-13; Sekaraia 14:13.
18 Dispela pait i no wankain olsem pait bilong ol man. Sapos ol i kirapim wanpela pait nuklia bai gutpela man na man nogut wantaim i bagarap, a? Tasol dispela pait bilong God i no olsem. Orait, husat bai abrusim bagarap long dispela pait bilong God na i stap laip? Ating olgeta man i gat lotu? O olgeta man i tok ol i Kristen? Nogat. Long wanem Jisas i tok, “planti” man olsem ol i “man bilong mekim rong.” (Matyu 7:21-23) Ol man i abrusim bagarap na i stap laip long “nupela graun,” em ol man i bin wok long kamap pren tru bilong Jehova na Pikinini bilong em, em King Krais Jisas. Ol dispela man tasol inap i stap laip long dispela taim. Wokabaut bilong ol na wok ol i bin mekim bilong autim tok bilong Kingdom, i kamapim pinis bel bilong ol, ol i ‘save tru long God’ na “bihainim gutnius bilong Bikpela bilong yumi Jisas.” Yu wok long kamap kain man olsem?—2 Tesalonaika 1:8; Jon 17:3; Sefanaia 2:2, 3.
[Askim Bilong Stadi]
1. (a) Planti man i gat bikpela tingting long wanem ol samting i kamap long nau? Na ol i ting wanem samting inap stretim ol dispela hevi? (b) Tasol planti taim ol i no tingim wanem samting?
2. Bilong wanem i gat planti hevi long nau?
3. I stret man i mas mekim wanem long God, olsem Jenesis 2:16, 17 i tok?
4. (a) Seten i kamap olsem wanem? (b) Wanem laik nogut i kamap long bel bilong Seten?
5. (a) Wanem ol bikpela tok i kamap long Iden? (b) Husat i insait long ol dispela tok?
6. Bilong wanem Jehova i no kirap wantu tasol na kilim i dai ol bikhetman?
7. (a) Ol gavman bilong graun i kamap olsem wanem long pastaim? (b) Ol i bin mekim wanem kain wok?
8. Bilong wanem Jisas i no laik insait long wok gavman bilong graun?
9. (a) Kingdom bilong God tasol inap mekim wanem bilong stretim ol hevi bilong graun? (b) Dispela Kingdom em wanem samting?
10. (a) Yumi olgeta wan wan i mas tingim wanem bikpela samting? (b) Olsem na yumi mas mekim wanem long nau?
11. Sapos yu bihainim narapela rot, bilong wanem dispela i no ken helpim yu long i stap amamas?
12. (a) Baibel i tokim yumi long mekim wanem? (b) Taim yumi wok long bihainim tok bilong God long Baibel, i stap bilong yumi bai i olsem wanem?
13. Bilong wanem nau yumi mas givim bel tru long Jehova?
14. Nau olgeta lain i bung bilong mekim wanem?
15, 16. (a) Amagedon em wanem samting? (b) Bilong wanem em i mas kamap?
17. (a) Dispela bagarap em bai kamap, em bikpela bagarap tru o olsem wanem? (b) Husat bai bosim ol samting i kamap long dispela taim?
18. Husat bai abrusim bagarap na i stap laip?