Sapta 7

Bihainim Savepasin na Abrusim Bagarap

SAPOS wanpela man i toksave long wanpela bikpela bagarap i laik kamap na dispela man i no save giaman, orait ol man i bihainim savepasin bai ol i kirap kwik na mekim ol samting bambai ol i ken abrusim bagarap. (Provep 22:3) Tasol planti tausen tausen manmeri i bin bilipim sampela tok i no gat as bilong en na bagarap i painim ol. Long yia 1912 ol pasendia bilong bikpela sip Titanic i harim toksave long bagarap i laik painim dispela sip na ol i mas kalap long ol liklik bot, tasol planti handet ol i bagarap, long wanem ol i bilipim tok bilong sampela man ol i tok dispela bikpela sip i no inap bagarap. Long yia 1902 smok na paia i kamap long Maunten Pele long Matinik. Ol manmeri i sindaun long wanpela taun klostu long dispela maunten ol i tingting planti. Tasol sampela man bilong politik na man bilong bosim ol tok bilong nius ol i laik helpim wok bisnis samting bilong ol bikpela man bilong dispela ples na ol i tok ol man i no ken pret na ranawe. Orait, wantu dispela maunten i pairap na 30,000 manmeri i bagarap.

² Long taim bilong yumi wanpela bikpela toksave tru i kamap—em i no toksave bilong wanpela liklik bagarap bai painim ol man long wanpela ples tasol; nogat; em toksave bilong Amagedon, em bikpela pait bilong God, em i laik kamap. (Aisaia 34:1, 2; Jeremaia 25:32, 33) Planti taim ol Witnes Bilong Jehova i bin i go long haus bilong ol man long olgeta hap na toksave long ol bilong kirapim ol long bihainim savepasin na abrusim bagarap. Yu laik tumas long i stap laip? Sapos olsem, orait yu mas kirap nau long mekim sampela samting na yu no ken wet!

“PASIN BILONG GRAUN BAI I PINIS”

³ Bikpela samting bilong helpim yu long abrusim bagarap em tingting bilong yu long ol samting bilong dispela graun. Taim yu stap laip yet, yu stap long dispela graun, tasol i no olsem yu mas bihainim ol laik nogut na pasin nogut bilong ol manmeri bilong dispela graun. Na i no olsem yu mas bilip long ol man na ol samting ol i tok long mekim na bai yu givim baksait long God na ol samting em i laik mekim. Nogat. Yu mas tingting: Yu laik bihainim God o yu laik bihainim pasin bilong dispela graun? Yu no inap bihainim tupela wantaim. “Man i laik pren long pasin bilong graun, orait bai em i kamap birua bilong God.” Bilong wanem em i kamap birua bilong God? Long wanem Baibel i tok: “Seten i stap het bilong olgeta man bilong graun.”—Jems 4:4; 1 Jon 5:19; Sam 146:3-5.

⁴ Ol man ol i strong long bihainim pasin Jehova i tambuim, Jehova i no ken lukautim ol na bai ol i stap long Nupela Taim i gat stretpela pasin long en. Wanem sampela pasin God i tambuim? Planti pasin olsem em ol man bilong dispela graun i ting i orait long mekim na i no gat rong long en. Tasol sapos yumi laik abrusim dispela bikpela bagarap bai painim ol man nogut bilong dispela graun, orait maski ol narapela man i bihainim wanem kain pasin na tingting, tasol yumi bai bihainim strongpela toksave bilong Baibel. Baibel i tok ol man i mekim pasin pamuk, o bagarapim marit, o mekim pasin sodom, na ol man i bihainim ol narapela pasin i no stret o pasin bilong bel i kirap, ol dispela man i no ken abrusim bagarap. Maski planti taim ol narapela man i mekim tok giaman o stil, tasol yumi bai sakim kain pasin olsem na wokabaut stret. Na maski planti man i laikim ol kain pasin marila na papait samting, tasol yumi bai klia long ol dispela kain pasin. Tru ating bai sampela man i bel nogut long narapela man, o kirapim kros, o belhat, o bai ol i kisim drak o dring planti tumas bilong lusim tingting long ol hevi bilong ol, tasol bai yumi no bihainim pasin bilong ol. Na sapos bipo yumi bin mekim ol dispela kain pasin, bai yumi save yumi mas lusim ol dispela kain pasin. Tru, ating bipo yumi ting ol dispela pasin i “orait” long yumi mekim, tasol nau bai yumi lusim olgeta. Bilong wanem bai yumi lusim olgeta? Long wanem yumi laikim tumas God, na yumi laik tumas long i stap laip, na Baibel i toksave olsem: “Olgeta man i mekim kain pasin olsem, bai ol i no kisim kingdom bilong God.”—Galesia 5:19-21; Efesas 5:3-7; 1 Korin 6:9, 10; 2 Korin 7:1; Revelesen 22:15.

⁵ Sapos yumi ting em i bikpela samting long yumi inap i stap laip oltaim na i stap amamas, orait yumi mas kisim save long ol samting yumi mas mekim bambai Man bilong givim laip long yumi, em God Jehova, em i ken amamas long yumi. (Aposel 17:24-28; Revelesen 4:11) Yumi mas wok long bihainim tok bilong God long olgeta wokabaut bilong yumi. Sapos yumi mekim olsem, dispela bai kirapim yumi long skelim gut tingting bilong yumi, yumi ting olsem wanem long yumi yet na ol narapela man, na long mani kago samting bilong yumi, na long ol wok yumi laik mekim, na bai yumi tingting gut olsem: Tingting bilong mi long ol dispela samting em i helpim mi long i stap stret long ai bilong God o nogat? Ating ol narapela man i litimapim nem bilong ol yet, o bilong lain bilong ol, o kantri bilong ol, tasol yumi bai tingim gut tok bilong Baibel i tok: “God i save sakim ol man bilong bikhet, tasol em i save marimari long ol man i daunim [nem] bilong ol yet.”—Jems 4:6; Sefanaia 2:2, 3; Sam 149:4.

⁶ Ol man bilong dispela graun i laikim tumas mani kago samting na dispela i kirapim kain kain laik nogut long bel bilong ol, na sampela man i laik kisim biknem, tasol yumi bai skelim i stap bilong yumi wantaim tok bilong 1 Jon 2:15-17, em i tok: “Yupela i no ken laikim pasin bilong graun, na olgeta samting bilong graun. Sapos wanpela man i laikim pasin bilong graun orait em i no save laikim tru Papa. Yumi save, olgeta pasin bilong man bilong graun, em pasin bilong bel kirap na aigris na bikhet, ol dispela i no kam long Papa. Nogat. Ol i kamap long pasin bilong graun. Na pasin bilong graun bai i pinis, na aigris bilong en tu wantaim. Tasol man i bihainim tok bilong God, em bai i stap oltaim.” Sapos yumi mas senisim sampela pasin bilong yumi, orait nau em i taim bilong mekim.

⁷ Ol manmeri bilong dispela graun na pasin bilong ol bai pinis. I no ken i stap oltaim. Ating ol man bilong dispela graun bai giamanim yet lain bilong ol na bai ol i ting ol wok ol i mekim inap stretim ol hevi bilong graun na ol samting bai kamap gutpela. I gat wanpela rot tasol bilong abrusim bikpela bagarap i laik kamap, em olsem: Yumi mas bilipim toksave bilong God. Long taim bilong profet Jona, ol man bilong ples Niniva i bin mekim olsem. Ol i stap olsem piksa na yumi mas bihainim pasin bilong ol.

“OL I HARIM TOK JONA I AUTIM, NA OL I TANIM BEL”

⁸ Samting olsem 8 handet yia paslain long taim bilong Krais, Jehova i givim wok long Jona bilong i go long ol manmeri bilong Niniva, em nambawan biktaun bilong Asiria, na em i mas toksave long ol olsem Niniva bai bagarap, long wanem ol i mekim pasin nogut. Jona i tokim ol, inap 40 de moa na bai ol i bagarap. Orait, ol i harim na ol i mekim wanem? Ol i no bikhet na sakim tok bilong Jona, “ol i bilipim dispela tok bilong God. Na ol i tok olsem, ‘Yumi mas tambuim kaikai. Na yumi bikpela man na man nating tu yumi mas putim klos bilong sori.’ ” King tu i mekim na em i tokim ol man ol i mas beten strong long God na ol i mas lusim olgeta pasin nogut na kain kain rong ol i bin mekim. Em i tok: “Sapos yumi mekim olsem, ating bai God i senisim tingting na lusim kros, na bai yumi no i dai.” Orait ol i lusim pasin nogut bilong ol na God i marimari long ol. Em i no bagarapim ol.—Jona 3:2-10.

⁹ Taim Jisas i givim strongpela tok long ol Juda i no bilip, em i stori long ol samting i bin kamap long ol Niniva, em i tok: “Taim God i skelim ol manmeri bambai ol man bilong Niniva ol i sanap long kot na telimautim pasin nogut bilong ol manmeri bilong dispela taim nau. Long wanem ol Niniva ol i harim tok Jona i autim, na ol i tanim bel. Tasol i gat wanpela man i stap hia em i winim Jona.”—Matyu 12:41.

¹⁰ Orait, olsem wanem long taim bilong yumi? I gat sampela man i tanim bel olsem ol Niniva i bin mekim? Yes, i gat planti tausen long olgeta hap, bipo ol tu i no bin lotuim God bilong Baibel, tasol nau ol i harim toksave Jehova i givim long ol na ol i bilip long en. Taim ol i kisim save long as bilong bikpela bagarap i laik painim ol man bilong dispela graun, ol i laik bai God i marimari long ol. Ol i tanim bel tru; ol i lusim pasin bipo ol i bihainim na ol i kirap mekim ol “wok inap long pasin bilong tanim bel.” (Aposel 26:20; lukim tu Rom 2:4.) Yu gat laik long mekim olsem? Sapos yu gat dispela laik, orait yu no ken lusim taim.

HARIAP NA KAMAP WANBEL WANTAIM GOD

¹¹ Ol man bilong Gibion long taim bilong Josua ol tu i bihainim savepasin bambai ol i ken abrusim bagarap. Ol i lain bilong Kenan na pasin bilong ol Kenan i nogut tru—ol i save pamuk na laikim tumas mani kago samting na lotuim ol god giaman na mekim ol kain wok marila na posin samting. Jehova i putim tok long bagarapim ol. Ol i save pinis long ol samting Jehova i bin mekim bilong helpim ol Isrel long lusim Isip inap fopela ten yia bipo, na ol i save ol Isrel i bin daunim ol strongpela king bilong ol Amo long wara Jodan long hap bilong sankamap. Olgeta ol i save ol Isrel i no bin mekim wok long sampela samting bilong paitim banis bilong Jeriko, tasol dispela draipela banis i bruk olgeta; na ol i save ol Isrel i bin bagarapim taun Eyai olgeta. (Josua 9:3, 9, 10) Ol man bilong Gibion ol i no laik bagarap, tasol ol i save ol i no inap pait long God bilong Isrel na winim pait. Olsem na ol i mas mekim hariap wanpela samting. Ol i mas mekim wanem? Ol i no inap strong long ol Isrel i mas sekan wantaim ol, tasol ol i tingim wanpela rot bilong kirapim ol Isrel long mekim olsem. Wanem dispela rot?

¹² Ol i bihainim savepasin na ol i salim sampela man i go long Josua, em ol i pasim olpela klos samting na karim hap bret i drai pinis bambai ol Isrel i ting ol i man bilong longwe ples. Ol i kamap long Josua na ol i tok, ‘Mipela i kam long longwe ples. Mipela harim stori bilong olgeta samting God bilong yupela i bin mekim. Mipela i wokboi bilong yupela. Plis yupela i mekim wanpela kontrak bilong sindaun gut wantaim mipela.’ Josua wantaim ol hetman bilong Isrel ol i orait long dispela samting. Bihain ol Isrel i save ol Gibion i bin giamanim ol, na nau ol Gibion i tokaut long ol i pret long bagarap na ol i bin mekim dispela pasin giaman. Na ol i tok, wanem wanem samting Josua i laik bai ol i mekim, ol i amamas long mekim. (Josua 9:4-25) Jehova i lukim pinis ol samting ol Gibion i mekim. Ol i no giamanim em. Em i save ol i no laik pulim lain bilong em long mekim pasin nogut olsem ol Moap i bin mekim. Em i save ol i laik tru long abrusim bagarap. Olsem na em i larim ol i kisim wok olsem wokboi bilong ol Livai long haus lotu sel; ol i gat wok long bungim paiawut na karim wara bilong helpim lotu bilong Jehova. Tasol bilong kisim dispela wok, pastaim ol i mas lusim ol pasin doti bipo ol i bin mekim.—Josua 9:27; Levitikas 18:26-30.

¹³ Nau yumi stap klostu long pinis bilong “las taim,” olsem na olgeta man i laik abrusim bagarap ol i mas kirap hariap na mekim wok na ol i mas bilip tru. Krais Jisas em i man bilong givim strafe bilong God long ol man bilong nau na yumi no inap giamanim em olsem ol Gibion i bin mekim long Josua. I gat wanpela rot tasol na ol kain man olsem inap sekan o kamap wanbel wantaim em na bai em i no ken bagarapim ol. Dispela rot em olsem: Ol i mas tokaut long ol i bilip olsem Jehova em i God tru. (Lukim Aposel 2:17-21.) Na ol i mas bilip long Krais Jisas na long ol wok God i bin givim long em. Na nau i stap bilong ol i mas kamapim long ples klia olsem ol i no laikim pasin bilong dispela graun God i tok pinis long bagarapim. Na ol i mas mekim pasin daun na kamap wokboi bilong God na wok wantaim lain bilong em long lotuim em na mekim wok holi bilong em.—Jon 17:16; Revelesen 7:14, 15.

¹⁴ Ol Gibion i sekan pinis wantaim lain bilong Jehova, orait wanpela bikpela hevi i painim ol. Faipela king bilong ol Amo i kam bilong subim ol Gibion long i go wantaim ol na mekim pait long ol Isrel. Ol Gibion i krai long Josua i kam helpim ol na Jehova i mekim wanpela bikpela samting tru bilong helpim ol. Jehova i mekim ol birua i pret na paulim tingting bilong ol, na em i tromoi ren ais i kam daun long ol olsem ston, na em i wokim mirakel na san i sanap i stap. San i no go daun inap long taim ol Isrel i daunim pinis ol birua. (Josua 10:1-14) Jehova i helpim ol Gibion na dispela samting i olsem piksa na i makim bikpela samting Jehova bai mekim long pait bilong Amagedon bilong helpim ‘bikpela lain’ ol i lotuim em na ol i no ken bagarap. Ol man bilong olgeta lain i gat rot bilong abrusim bagarap sapos nau ol i bihainim savepasin. Orait, olsem wanem long yu yet? Yu bihainim savepasin bambai yu ken abrusim bagarap?—Revelesen 7:9, 10.

[Askim Bilong Stadi]

1. Sampela man, ol inap abrusim bagarap, tasol bilong wanem ol i bagarap (a) taim sip Titanic i bagarap? (b) taim Maunten Pele i pairap?

2. (a) Wanem bikpela toksave i kamap nau long taim bilong yumi? (b) Bilong wanem yumi mas kirap kwik long mekim sampela samting?

3. Tingting bilong yumi long ol samting bilong dispela graun, olsem wanem dispela inap helpim yumi o pasim yumi long abrusim bagarap?

4. (a) Opim Baibel na stori long ol pasin na tingting, sapos man i bihainim bai em i no inap i stap aninit long Kingdom bilong God. (b) Ol man i bin mekim ol dispela kain pasin, bilong wanem ol i mas lusim hariap?

5. (a) Sapos yumi laik tumas long i stap laip, yumi mas lain long mekim wanem? (b) Ol skripsa long pinis bilong dispela paragraf i stori long wanem ol gutpela pasin? Ol dispela pasin i bikpela samting o nogat? Yumi mas mekim wanem bilong kisim ol dispela pasin?

6, 7. Bilong wanem yumi mas skelim i stap bilong yumi wantaim tok bilong 1 Jon 2:15-17?

8. Taim Jona i givim toksave bilong God long ol Niniva, ol i mekim wanem na yumi save ol i bihainim savepasin? Olsem na wanem samting i kamap?

9, 10. (a) Jisas i tingim wanem pasin bilong ol Niniva na em i tok ol i olsem gutpela piksa yumi ken bihainim? (b) Long nau husat i olsem ol man bilong Niniva?

11. (a) Ol Gibion i bilong wanem lain, na dispela lain i gat wanem kain pasin? (b) Bilong wanem ol i laik sekan wantaim ol Isrel?

12. (a) Maski ol Gibion i mekim pasin giaman, tasol olsem wanem na ol i no bagarap? (b) Tasol ol i mas mekim wanem? Na ol Isrel i givim wanem wok long ol?

13. (a) Stori bilong ol Gibion inap helpim yumi olsem wanem? (b) Sapos yumi no laik kisim strafe long han bilong Man I Winim Josua, orait yumi mas mekim wanem?

14. Taim Jehova i helpim ol Gibion long abrusim bagarap long han bilong ol birua, dispela i makim wanem samting na yumi mas tingim?