“Bai Mipela i Lotu long [Jehovah] Tasol”
“Tasol mi wantaim famili bilong mi, bai mipela i lotu long [Jehova] tasol.”−JOSUA 24:15.
1. Ol tok long hap bilong Josua long Baibel i strongim yumi na lukautim yumi olsem wanem?
STORI bilong ol samting i kamap long taim bilong Josua, ol dispela stori i stap long Baibel “bilong skulim yumi”; ol i olsem “piksa” bilong strongim na lukautim “yumi man i stap nau long taim i klostu i laik pinis.” (Rom 15:4; 1 Korin 10:11) Ol dispela tok i kirapim yumi long bihainim ol pasin God i laikim, olsem pasin bilong sanap strong, na bilip, na bihainim tok. “Ol Isrel i bilip long God, na ol i wokabaut na raunim banis ston bilong Jeriko inap long 7-pela de, na banis stotun i pundaun. Pamukmeri Rehap em i bilip long God. Na em i helpim tupela man i kam luk stil long ples. Olsem na em i no bagarap wantaim ol manmeri i no bilip.” (Hibru 11:30, 31) Bilip bilong Josua na Rehap na bilong ol narapela bilipman long dispela taim bipo em i mas kirapim yumi long sanap strong na i no ken pret, na bai yumi inap pinisim dispela wok God i givim long yumi bilong mekim long nau.−Josua 10:25; Jon 4:34.
2 Josua i winim pinis pait long Eyai na bihain em i givim bel long bihainim stret olgeta tok i stap long Diuteronomi 27:1–28:68 (NW ). Em i wokim wanpela alta bilong God antap long Maunten Ebal. Em i wokim dispela alta long ol ston ol i no bin katim. Em i bihainim olgeta tok bilong Moses, em Moses i tok tu: “Yupela i mas kukim ol ofa bilong wanbel na yupela i mas kaikai, na yupela i mas amamas long ai bilong Jehova, em i God bilong yupela.” Ol i kisim sampela ston moa na penim long waitpela pen na sanapim olsem wanpela mak, na Josua i raitim Lo bilong Moses long ol dispela ston. Nau ol i brukim ol Isrel i kamap tupela lain, wanpela lain i sanap long Maunten Gerisim bilong harim “tok bilong God i givim blesing long ol,” na wanpela lain i sanap long Maunten Ebal bilong harim “ol tok bilong God i bagarapim ol.” Ol Livai i singaut strong na kolim ol samting nogut bai painim ol Isrel sapos ol i sakim tok, na olgeta manmeri i harim na ol i bekim tok olsem: “Tru!” Sori tumas long Isrel sapos ol i no bihainim ‘olgeta tok bilong dispela lo na pret long bikpela nem bilong God Jehova.’−Josua 8:32-35.
3 Olsem wanem? Ol Isrel i bihainim ‘ol tok bilong dispela lo’? Planti taim Moses i strongim ol long mekim olsem, na bihain Josua tu i toksave long ol, tasol ol i no bihainim tok. Dispela samting ol i mekim i givim tingting long yumi long nau! Maski i gat planti toksave, tasol oltaim i gat sampela man ol i ting ol inap kalapim lo bilong God na bihainim laik bilong ol yet na ol i no ken bagarap. Em longlong pasin tru! Pol i stori long ol samting i bin painim ol Isrel long bipo na em i tok: “Man i tingim em yet i sanap strong, em i mas lukaut gut. Nogut em i pundaun.”−1 Korin 10:12; Eklisiastis 2:13.
4 Sampela manmeri long lain bilong God ol i no amamas long ol toksave yumi kisim; ol i tok ol i les long harim ol dispela wankain tok planti taim. Tasol ol dispela man i save pundaun kwik long ol traim bilong Seten. Hap bilong Baibel ol i kolim Diuteronomi (long tok Hibru ol i kolim Mish·nehʹ hat·to·rahʹ, insait bilong dispela nem i olsem “Kolim Gen Lo”) em i stori long 4-pela tok Moses i bin mekim long ol Isrel. Ol dispela tok Moses i mekim i tokaut klia long ol Isrel olsem ol i mas bihainim ol lo Jehova i kolim pinis. Moses i mekim planti tok tru bilong toksave long ol Isrel long ‘ol samting nogut’ bai painim sapos ol i sakim tok. Em i no mekim planti tok olsem bilong kolim ‘ol blesing.’ Long Maunten Ebal Josua i toksave gen long ol Isrel olsem ol i mas bihainim tok. Dispela i givim gutpela save long yumi na yumi save yumi mas taitim bun tru bambai yumi inap “go insait long liklik dua.”−Matyu 7:13, 14, 24-27; 24:21, 22.
5 Nau bikpela traim i laik painim ol Isrel. Jeriko i bagarap pinis olsem olgeta lotu giaman bai bagarap taim “bikpela hevi tru” i kirap. Eyai tu i bagarap. Tasol nau “ol king i stap long Jodan long hap san i go daun na ol king bilong ples maunten na ol king bilong ples stret, na ol king long nambis bilong Mediterenian Si i go long hap not inap long Lebanon, olgeta i harim nius long ol samting ol Isrel i mekim. Em ol king bilong ol Het, na ol Amo, na ol Kenan, na ol Peres, na ol Hivi na ol Jebus. . . . na ol i bung bilong pait wantaim Josua na ol Isrel.” (Josua 9:1, 2) Dispela i makim wanem samting long nau? Olsem: Long nau ol lain man i bung wantaim insait long dispela oganaisesen ol i kolim Yunaitet Nesen. Ol i painim rot bilong kamapim gutaim, tasol ol i laik kamapim long rot ol yet i tingim. Ol i mekim dispela samting na i olsem ol i ‘bung wantaim na i laik pait long Jehova na long dispela man em i makim pinis,’ em Man I Winim Josua. (Sam 2:1, 2) Orait, wanem samting bai kamap?
Bihainim Savepasin
6 Olsem Rehap i bin mekim, nau sampela man moa bilong ol narapela lain ol i laik painim rot bilong abrusim bagarap. Ol dispela man ol i man bilong Gibion. Gibion em wanpela biktaun i stap klostu liklik long Jerusalem long hap bilong not. Ol Gibion i harim tok long ol bikpela wok Jehova i bin mekim na ol i pasim tok long bihainim Jehova na painim rot bilong sindaun gut wantaim ol Isrel. Olsem na ol i salim sampela man i go long kem bilong ol Isrel long Gilgal. Ol dispela man i kisim bret i drai na i nogut pinis na ol i pulimapim long olpela bek, na ol i pulimapim wain long olpela skin meme i bruk bruk na ol i samapim gen, na ol i pasim olpela klos na olpela su. Ol i go kamap long Josua na ol i tok: “Mipela i kam long wanpela longwe ples, long wanem, mipela i harim stori long God, Bikpela bilong yupela. Mipela i harim [tok] bilong olgeta samting em i bin mekim.” Orait, “Josua i sekan long ol na i mekim wanpela kontrak wantaim ol bai ol Isrel i no ken kilim ol.”−Josua 9:3-15.
7 Ol Isrel i mekim kontrak pinis wantaim ol Gibion na tripela de bihain ol i painimaut olsem “ol dispela man i no bilong longwe i bilong klostu tasol”! Josua i ting olsem wanem long trik bilong ol? Em i tok, ol Isrel i kontrak pinis wantaim ol Gibion, olsem na ol i mas “larim ol i stap, tasol ol i mas katim paiawut na karim wara bilong [ol Isrel].”−Josua 9:16-27; lukim tu Diuteronomi 20:10, 11.
8 Planti man bilong ol narapela lain, em bihain ol i wok long haus lotu bilong Jehova, ating ol i bilong lain Gibion. Olsem na ol Gibion inap kamap olsem piksa na makim ‘bikpela lain’ long nau, em “long san na long nait ol i save lotu long [God] long haus holi bilong en.” (Revelesen 7:9, 15) Long skin ol dispela manmeri i stap long dispela graun, olsem long Kenan, tasol long bel bilong ol “ol i no bilong dispela graun.” Bipo ol i kisim ol kaikai bilong spirit long ol misin ol i kolim Kristen, em dispela kaikai i olsem “bret i drai na i nogut pinis.” Na ol i no gat “wain”−ol i no amamas. Tasol taim ol i kam bung wantaim lain bilong God, nau ol i save, Jehova i mekim ol bikpela wok long rot bilong ol witnes bilong em. Ol i wokabaut longwe i kam−ol i lusim olpela pasin bilong Seten na ol i kam−bambai ol i ken senisim “olpela klos” bilong ol, olsem senisim tingting bilong ol na kamap nupela man, olsem ol wokboi bilong Jehova.−Jon 14:6; 17:11, 14, 16; Efesas 4:22-24.
Oganaisesen i Helpim Ol
9 Taim Adonisedek, king bilong Jerusalem i harim tok long ol Gibion i sekan pinis wantaim ol Isrel, em i “pret nogut tru, long wanem, Gibion em i bikpela taun wankain olsem ol arapela taun i gat king. . . . na olgeta man i strongpela man bilong pait.” Adonisedek i bung wantaim 4-pela narapela king na ol i go bilong pait wantaim ol Gibion. Olsem na ol Gibion i salim tok i go long Josua na ol i tok: “Yu kam kwik na helpim mipela!” Josua i harim dispela tok na wantu em i kirap i go helpim ol. Jehova i strongim Josua, em i tok: “Maski pret long ol. Mi givim ol pinis long han bilong yu. I no gat wanpela man inap winim yupela.” Josua wantaim ol ami i wokabaut “long nait” na i go kamap kwik na dispela samting i mekim ol birua i pret na paulim tingting bilong ol.−Josua 10:1-9.
10 Olsem dispela 5-pela king long bipo, sampela hetman bilong gavman long nau ol i save belhat taim ol i lukim planti man long lain bilong ol−ol “strongpela man bilong pait” tu−ol i givim bel long Man I Winim Josua na long stretpela Kingdom bilong em i bosim olgeta hap. Ol dispela hetman i laik bai ol man i ken bruk long narapela narapela lain na kantri, maski ol dispela lain i save birua na pait. Olsem na ol i wok long pasim rot bambai dispela ‘bikpela lain’ i laikim tumas pasin sekan ol i no inap kisim kaikai bilong spirit. Ol i save tambuim ol miting bilong ol bambai ol i no ken kisim dispela “kaikai” na ol i pasim ol long toktok wantaim ol narapela man long ol samting bilong spirit. Tasol dispela ‘bikpela lain,’ em ol Gibion bilong bipo i olsem piksa bilong ol, ol i pas wantaim lain Isrel bilong spirit na ol i tok: “Mipela bai go wantaim yupela.”−Sekaraia 8:23, NW; lukim tu Aposel 4:19, 20; 5:29.
11 Taim ‘bikpela lain’ i singautim oganaisesen, olsem “mama” bilong ol, long helpim ol, kwiktaim oganaisesen i helpim gut ol. Ol Witnes Bilong Jehova i save mekim kwik ol wok. Taim bikpela tait o guria i bagarapim ples, kwiktaim ol i stretim rot bilong helpim brata. Ol i sanapim kwik ol Haus Kingdom na ol narapela haus bung bilong helpim ol man long kisim ol “kaikai” bilong spirit. Ol i tok long putim kibung long wanpela bikpela stediam long Nu Yok (Yanki Stediam) long Jun 1986−long biknait, taim ol man i pinis long pilai besbal, ol brata sista i go insait long stediam na kwiktaim stediam i kamap klin tru na i stap olsem long 4-pela de bilong kibung. Ol elda long lain Witnes i save kirap kwik na mekim sampela samting taim hevi i kamap long wok bilong autim gutpela tok bilong Kingdom.−Filipai 1:6, 7.
Jehova i Helpim Ol Isrel long Pait
12 Tasol Jehova i mekim wanem bilong helpim ol Gibion? Em i paulim tingting bilong ol birua na Isrel i ranim ol na kilim ol i dai. Na em i tromoi wanem samting i lusim heven na i kam daun? Ol bikpela hap ais, olsem ren ais. Dispela ren ais i kilim i dai planti birua winim namba ol ami bilong Isrel i kilim ol i dai. Nau, harim! Josua i toktok wantaim Jehova. Em i tok wanem long “ai bilong ol Isrel”? Em i tok: “San, yu sanap antap long Gibion. Mun, yu sanap antap long ples daun bilong Aisalon.” Narapela bikpela mirakel i kamap! San “i sanap i stap long skai inap olsem wanpela de olgeta.” “San i no i go daun kwik.” San i sanap i stap inap long taim strafe bilong God i painim pinis ol birua. Yumi no ken askim nabaut long olsem wanem Jehova i bin wokim dispela mirakel, olsem yumi no save askim nabaut long olsem wanem em i bin “putim” san na mun long “de namba foa” taim em i wokim olgeta samting. (Jenesis 1:16-19; Sam 135:5, 6) Baibel i tok klia: “Long taim bipo na i kam inap nau i no gat wanpela de olsem dispela de. [Jehova] i bin harim tok bilong wanpela man na em i helpim ol Isrel long pait.”−Josua 10:10-14.
13 Bihain ol i kilim i dai dispela 5-pela king, na long dispela taim Josua i tokim ol ofisa bilong ami bilong em: “Yupela i no ken pret na guria. Yupela i mas sanap strong na i no ken pret, bai [Jehova] i mekim olsem tasol long olgeta birua bilong yupela.” Na tru tumas, ol i daunim pinis 7-pela king bilong Kenan na bihain ol i daunim 24 moa. Inap 6-pela yia ol i mekim pait na bihain ol i no gat pait moa.−Josua 10:16-25; 12:7-24.
14 Nau bikpela pait bilong Amagedon i klostu na yumi mas sanap strong na i no ken pret wankain olsem Josua, na ol strongpela man long ami bilong em, na olgeta Isrel long bipo. Yumi ken bilip tru olsem Jehova bai mekim ol strongpela wok na helpim lain bilong em long winim Amagedon na i stap long nupela taim wankain olsem em i bin helpim ol Isrel long abrusim bagarap na i go insait long Graun Bilong Promis.−Revelesen 7:1-3, 9, 14; 19:11-21; 21:1-5.
Strongpela Tingting Bilong Yumi
15 Josua i go lapun liklik, em i gat 90 krismas, tasol i gat narapela bikpela wok em i mas mekim−em i mas tilim graun i go long olgeta lain bilong Isrel. I no olsem ol Isrel i ken sindaun nating nau na i no gat wok. Nogat. Kelep i laik kisim graun long Hebron. Ol draipela man bilong Anak i stap long dispela ples. Kelep i laik wok strong long rausim ol dispela birua bilong Jehova ol i stap yet long dispela graun. Dispela i no makim olsem long taim bilong 1,000 yia bai i gat sampela birua bilong God i stap yet long graun. Nogat. Tasol i makim olsem bai i gat wok yumi mas mekim. Long nupela taim bihain yumi no ken les na sindaun nating. Nogat. Taim ol i makim pinis wok bilong ol “arapela sipsip” bilong Bikpela long “nupela graun,” bai i gat planti wok ol i mas mekim bilong stretim bek graun na mekim i kamap gutpela ples Paradais.−Josua 14:6-15; Mak 10:29, 30; Rom 12:11.
16 Taim Josua i tilim graun, em i makim 6-pela taun bilong ol Livai, olsem ol taun bilong “ol man i go hait long ol,” 3-pela long narapela hapsait bilong Wara Jodan na 3-pela long narapela hapsait. Jehova i tokim ol long mekim olsem bilong helpim ol man i popaia na kilim i dai narapela man. Man i kilim i dai narapela man, tasol em i no birua long em, o man i no save em yet i bin kilim i dai narapela man, orait em i ken i go long wanpela bilong ol dispela taun. Em i mas i stap long dispela taun inap long taim het-pris i dai pinis na long dispela rot bai em i kamapim long ples klia olsem em i no gat asua; bel bilong em i klin long ai bilong God. ‘Bikpela lain’ long nau ol tu i mas mekim olsem. Bipo ol i insait long pasin bilong dispela graun na ol i gat asua long blut. Olsem na ol i mas wok long mekim ol samting bambai bel bilong ol i ken kamap klin long ai bilong God. Ol i mas autim sin bilong ol na hevi long rong ol i bin mekim na tanim bel na dediket long Jehova na kisim baptais long wara. Na ol i mas wok strong long i stap klin olsem long ai bilong God. Ol i mas i stap long dispela “taun” inap long taim Jisas i pinis long mekim wok pris bilong em. Long tok piksa i olsem em i “dai.” Dispela samting bai kamap long pinis bilong dispela 1,000 yia bilong em i stap king na bosim graun.−Josua 20:1-9; Revelesen 20:4, 5; 1 Korin 15:22, 25, 26.
17 Jehova i blesim tru lain bilong Em, em lain Isrel! Hevi na traim i bin painim ol long rot, tasol nau ol i kamap pinis long Graun Bilong Promis na ol i sindaun i stap. Bel bilong ol i pilim tru ol gutpela samting Jehova i bin mekim bilong helpim ol na ol i tenkyu tru long em! Sapos yumi stap gut long God bilong yumi, bai yumi tu i kisim bikpela amamas olsem taim yumi go insait long nupela taim, long “nupela graun.” Wankain samting bai painim yumi olsem i bin painim ol Isrel long taim bilong Josua, olsem: “[Jehova] inapim tru olgeta gutpela promis em i bin mekim long ol.” (Josua 21:45) Gutpela sapos dispela gutpela samting i painim yu!
18 Taim Josua i winim pinis 110 krismas, em i singautim ol hetman bilong Isrel i kam bung na em i kolim ol gutpela samting Jehova i bin mekim bilong helpim lain bilong Em kirap long taim bilong Ebraham na i kam inap long taim bilong Josua yet. Jehova i bin tokim ol Isrel: “Mi givim yupela wanpela graun yupela yet i no bin wok long en. Na mi givim yupela ol taun yupela i no bin wokim. Nau yupela i sindaun long ol dispela ples na yupela i save kaikai ol pikinini bilong diwai wain na diwai oliv. Tasol yupela yet i no bin planim.” Jehova i givim planti gutpela samting long ol Isrel, olsem na ol i mas ‘lotu long Em na oltaim ol i mas mekim wok bilong em long olgeta strong bilong ol.’ Liklik taim tasol na bai Jehova i kamapim gutpela nupela taim, olsem em i tok promis pinis, na yumi gat wankain laik−yumi laik lotu long Jehova na wok strong oltaim long mekim wok bilong em, a?−Josua 24:13, 14.
19 Bihain Josua i tok stret long ol Isrel, olsem: “Sapos yupela i no laik lotu long [Jehova], orait yupela i tingting gut nau. Bambai yupela i lotu long husat? . . . TASOL MI WANTAIM FAMILI BILONG MI, BAI MIPELA I LOTU LONG [JEHOVA] TASOL.” Olsem wanem? Yumi olgeta wan wan, na ol famili bilong yumi i bilip, na ol kongrigesen bilong yumi, na olgeta “manmeri bilong God” long olgeta hap bilong graun, yumi inap mekim wankain tok? Yumi inap mekim! (Efesas 2:19) Ol manmeri long taim bilong Josua i bekim tok long em na ol i tok: “Mipela i laik lotu long God [Jehova], Bikpela bilong yumi na bihainim ol lo bilong em tasol.” (Josua 24:15, 24) Tasol sori tru, bihain ol i no mekim olsem. Nogut yumi mekim pasin wankain olsem ol. Yumi mas bihainim pasin bilong Josua wantaim famili bilong em na Kelep na ol Gibion na Rehap. Yes, yumi laik LOTU LONG JEHOVA TASOL! Yumi gat strongpela tingting long mekim olsem. Olsem na yumi mas sanap strong na bilip tru olsem i no gat wanpela samting em inap “tekewe yumi long sori bilong God.”−Rom 8:39.
Ol Tok i Stap long Hap Bilong Josua i Lainim Yumi Olsem Wanem long—
◻ Gutpela wok i save kamap taim ol i wok long stretim tingting bilong yumi planti taim?
◻ Wok bilong lukautim “ol Gibion” bilong nau?
◻ Ol samting Jehova bai mekim bilong pait long Amagedon?
◻ Yumi mas ranawe i go long wanpela ‘taun bilong hait’?
◻ Yumi mas tingim gut wanem god yumi laik lotuim?
2. (a) Josua i mekim wanem na em i bihainim stret olgeta tok? (b) Wanem samting i kamap long Maunten Ebal na Maunten Gerisim?
3, 4. (a) Ol samting ol Isrel i bin mekim i givim wanem gutpela tingting long yumi long nau? (b) Bilong wanem yumi no ken les long harim ol tok ol i givim long yumi planti taim? (c) Yumi mas mekim wanem bambai yumi inap “go insait long liklik dua”?
5. Husat ol i bung wantaim na i laik pait long Isrel? I gat wanem wankain samting i kamap long nau?
6, 7. (a) Ol Gibion i laik mekim wanem? Ol i mekim olsem wanem? (b) Josua i mekim wanem?
8. Olsem wanem ol Gibion i olsem piksa na i makim ‘bikpela lain’?
9. (a) Bihain liklik wanem hevi i kamap? (b) Josua i mekim wanem? Na Jehova i strongim em olsem wanem?
10. (a) Sampela man long nau i mekim wanem na i wankain olsem dispela 5-pela king i go pait long ol Gibion? (b) “Ol Gibion” bilong nau i tok wanem?
11. Taim wanpela hevi i kamap long nau, ol Witnes Bilong Jehova i save mekim wanem?
12. Jehova i wokim wanem ol mirakel bilong helpim ol Isrel long daunim ol birua bilong ol Gibion? (Lukim Habakak 3:1, 2, 11, 12.)
13. Josua i tok wanem bilong strongim ol ofisa bilong ami bilong em? Na wanem samting i kamap?
14. Nau Amagedon i klostu na yumi mas bilip tru long wanem samting?
15. God bai givim wanem ol wok long ol “arapela sipsip” long nupela taim bihain?
16. Jehova i putim ol ‘taun bilong hait’ long bipo na dispela i makim wanem samting long nau?
17. Long nau yumi wet long kisim wanem bikpela amamas?
18. (a) Josua i stori long wanem samting long ol hetman bilong Isrel? (b) Yumi olgeta i mas i gat wanem laik long nupela taim Jehova bai kamapim?
19. (a) Josua i tokim ol Isrel ol i mas tingim gut wanem samting? Na ol i bekim wanem tok long em? (b) Yumi laik bihainim pasin bilong husat? (c) Yumi gat strongpela tingting long mekim wanem?