Sapta 22
No Ken Mangal Long Samting Yu Lusim Pinis!
OL SAMTING i kamap long nau i truim tok profet bilong Baibel, dispela i makim olsem klostu nau na God i laik kamapim gutpela nupela taim. Liklik taim nau na ol pasin nogut bilong dispela graun bai pinis. Bai olgeta hevi na hatwok i pinis. Graun bai kamap gutpela ples Paradais na ol man i lotuim trupela God bai ol inap i stap oltaim oltaim long en na i stap gutpela tru. Olgeta tok promis bilong Jehova bai kamap tru, olsem na em i tokim aposel Jon: “Yu raitim dispela tok. Dispela tok em i tru olgeta, inap long olgeta man i ken bilip tru long en.” (Revelesen 21:1-5) Tasol yumi kirap nogut long sampela man, em ol i save long ol dispela gutpela tok promis bilong God na ol i kirap bihainim gen pasin bilong dispela graun, em God i tok em bai pinisim. Sori tru! Bilong wanem ol i mekim olsem?
2 Taim ol i harim gutpela tok bilong Kingdom bilong God long namba wan taim na ol i save long ol gutpela samting Kingdom bai mekim, ol i bilip. Tasol yumi no ken bilip tasol; yumi mas wok long kamap strongpela Kristen; yumi mas wok long kisim gutpela save long ol tok bilong Baibel na wok long bihainim. (Hibru 6:1, 11, 12) Sapos man i no pilim tru dispela samting na em i les long mekim, orait em i no ken amamas long mekim wok bilong God. Kain man olsem i laik kisim kwik ol gutpela samting bilong skin God i bin tok promis long en, na em i no pilim olsem em i mas kamap strong long spirit na em i mas insait tru long wok God i givim long yumi long nau, em wok bilong autim tok na kamapim ol disaipel. Ating bai em i kirap long lusim bikpela hap taim moa bilong inapim laik bilong em long kisim ol samting bilong skin na painim ol amamas. Bai em i putim ol samting bilong spirit i go namba tu. Isi isi tasol em i wok long i go bek insait long pasin bilong dispela graun.—1 Timoti 6:9, 10.
3 Ating man bai tok, em i laik abrusim bagarap na i stap long “nupela graun,” em stretpela pasin bai stap long en. Tasol em i gat laik long poroman wantaim wanem kain man? Dispela laik i stret wantaim dispela tok bilong em? Tru long olgeta de yumi mas bung wantaim ol man i no save mekim wok bilong Jehova, olsem long ples wok na long skul na long ol stua, na sampela taim long haus tu. Tasol long belo long ples wok, o paslain o bihain long taim bilong skul, o taim em i telefon toktok wantaim ol wantok o i go lukim ol, o taim em i gat malolo, em i gat laik long poromanim husat? Em bikpela samting o nogat? Baibel i toksave olsem: “Nogut ol i giamanim yupela. ‘Sapos yumi wokabaut wantaim ol man nogut, bai ol i bagarapim gutpela pasin bilong yumi.’ ” (1 Korin 15:33) Tasol husat ol i olsem ol man nogut na yumi no ken poromanim ol? Sapos yumi poromanim ol man i no lotuim Jehova, ol i bihainim pasin ol yet i ting em i stret, yu ting dispela em i samting nating? Sapos yumi tingim ol tok yumi lainim pinis, yumi save ol kain man olsem ol i no ken abrusim bagarap na i stap long “nupela graun.” Ol man i ting lo bilong Jehova i samting nating na ol i poromanim ol kain man olsem, kwiktaim bai ol i go bek insait long pasin bilong dispela graun em bipo ol i ting ol i lusim pinis. Tasol i gat sampela stori long Baibel i olsem piksa na i givim tingting long yumi na sapos yumi putim gut long bel, yumi no ken bihainim rot nogut olsem.—1 Korin 10:11.
“DISPELA OL STORI I STAP LONG BAIBEL BILONG GIVIM TINGTING LONG YUMI”
4 Taim Jehova i helpim ol Isrel long lusim wok kalabus long Isip, ating ol i amamas tru! Josep i dai pinis na bihain ol Isip i bin mekim nogut tru long ol Isrel na i olsem ol i stap insait long wanpela bikpela paia. (Eksodas 1:13, 14; Diuteronomi 4:20) Tasol bihain Jehova i salim 10-pela hevi long Isip na ol inap save Jehova em i God tru na ol god bilong ol Isip i god giaman. Olsem na taim ol Isrel i lusim Isip, “planti arapela lain manmeri” ol i go wantaim ol. Dispela i olsem piksa na i makim “planti tumas manmeri” long nau ol i lusim pasin bilong dispela graun na ol i bung wantaim hap lain Isrel bilong spirit ol i stap yet long graun. (Eksodas 12:38) Tasol taim ol Isrel i lusim pinis Isip i no longtaim na ol i kirap mekim wanem?
5 Disaipel Kristen Stiven i stori olsem: “Bel bilong ol i mangal gen long Isip.” Dispela samting i kamap sampela mun tasol bihain long taim ol i bin lusim Isip. (Aposel 7:39, 40) Wanem samting i kamapim long ples klia bel bilong ol? Ol i wokim piksa bilong pikinini bulmakau long gol—olsem ol i bin lukim long Isip—na ol i wokim bung bilong lotuim dispela samting, na ol i kaikai na dring na ol i tok ol i mekim bilong ‘givim biknem long Jehova.’ Tasol ol i bihainim pasin bilong ol Isip. (Eksodas 32:1-6) Jehova i belhat tru long ol. Pasin bilong ol i no stret liklik wantaim Lo ol i bin kisim long Maunten Sainai. God i kilim i dai planti tausen. Bilong wanem ol i bikhet olsem? Long wanem ol i save long ol lo bilong Jehova, tasol ol i no putim gut long bel bilong ol na ol i no bilip olsem Jehova i bringim ol i go.
6 Taim ol Isrel na ol “planti arapela lain manmeri” i lusim Isip, ol i save ol i mekim pasin i stret. Tasol wanpela yia i go pinis na ol i no kamap yet long Graun Bilong Promis; ol i no sindaun yet long dispela graun “i gat planti gris na ol kaikai i save kamap gutpela tumas.” Ol i gat kaikai bilong skin inap long ol, na ol i gat planti kaikai bilong spirit. Ol i lukim smok na paia i wokabaut i go pas long ol na ol i save, Jehova i bringim ol i go. Long Solwara Retsi na long Maunten Sainai ol i bin lukim bikpela strong bilong Jehova na ol i kirap nogut tru long en. Ol lo Jehova i givim long ol i strongim ol long spirit na givim malolo long bel bilong ol. Na i makim planti wok ol i mas mekim bilong stretim pasin na tingting na bel bilong ol bambai ol i ken i stap gutpela long ai bilong Jehova. Tasol ol i no pilim ol dispela gutpela samting Jehova i mekim bilong helpim ol, na ol i kirap mangal gen long ol samting bilong skin ol i bin kisim long Isip. Planti ol i bihainim dispela pasin mangal na ol i bagarap.—Nambas 11:4-6, 31-34.
7 Bihain liklik Moses i salim sampela man i go lukluk long Graun Bilong Promis. Taim ol i kam bek ol i wanbel long tok, dispela graun “i gat planti gris na ol kaikai i save kamap gutpela tumas.” Tasol 10-pela bilong ol i pret long ol man bilong dispela ples, na ol i ting ol taun bilong dispela ples i strongpela taun tumas na ol Isrel i no inap daunim. Ol i no bilip strong long Jehova, na ol i mekim bel bilong ol narapela Isrel i pret. Ol i kirap tingim gen Isip na ol i tok ol bai i go bek. Ol i no bilip, olsem na olgeta manmeri bilong dispela lain em ol i winim pinis 20 krismas, ol i dai long ples nating na ol i no go insait long Graun Bilong Promis.—Nambas 13:27-33, NW; 14:1-4, 29.
8 Inap 400 yia paslain long dispela taim, i gat wanpela samting i bin kamap na i lainim yumi long wankain samting. Pikinini bilong brata bilong Ebraham, em Lot, em i go sindaun long taun Sodom. Ol manmeri bilong Sodom i gat gutpela sindaun na planti samting bilong skin, tasol ol i save mekim pasin nogut tru i gat sem. Pasin bilong ol Sodom na ol ples klostu i nogut olgeta, olsem na Jehova i tingting pinis long bagarapim ol dispela ples na ol man i no ken wokim gen. Em i salim ol ensel i go bilong helpim Lot wantaim lain bilong em long ranawe bambai ol i no ken bagarap. Lot i toksave long tupela man ol i bin makim bilong maritim tupela pikinini meri bilong em, tasol “tupela i ting em i tok pilai tasol.” Tasol Lot i no tok pilai. Tulait pinis na tupela ensel i hariapim Lot na lain bilong em. Tupela i bringim ol i go ausait long taun na i tokim ol, “Yupela ranawe. Nogut yupela i dai! Yupela i no ken lukluk i go bek.” Ol i mas bihainim tok bambai ol i no ken bagarap. Lot wantaim tupela pikinini meri bilong em ol i bihainim tok na ol i no bagarap. Tasol ating meri bilong Lot i tingim ol gutpela gutpela samting bilong skin ol i bin lusim long Sodom. Olsem na em i lukluk i go bek na em i bagarap. Em i kamap olsem sol na i sanap olsem wanpela pos i stap. Orait olsem wanem long yumi? Yumi kisim gut na pilim tru insait bilong dispela stori? Bilong helpim yumi long mekim olsem, Jisas i kamapim dispela stori taim em i givim toksave long yumi ol man bilong nau na em i tok, yumi mas hariap na ranawe lusim olpela pasin bilong dispela graun. Em i tok, nogut yumi tingting tumas long kisim planti samting bilong skin, na em i tok: “Yupela i mas tingim meri bilong Lot.” (Jenesis 19:12-26; Luk 17:31, 32) Wanem samting inap helpim yumi bambai yumi no ken pundaun olsem ol Isrel na meri bilong Lot i bin mekim?
‘BEL I GO PINIS LONG NARAPELA PLES I GUTPELA MOA’
9 Bilong abrusim ol samting i laik pulim yumi long lukluk i go bek, yumi mas wok long strongim bilip bilong yumi long ol samting bai kamap bihain. Hibru 11:1 i tok, pasin bilong bilip i olsem: “Bel bilong yumi em i holimpas pinis ol samting yumi wet long God i givim yumi. Na ol samting ai bilong yumi i no lukim, em bel bilong yumi i save tru long dispela i stap.” Yumi ken bilip olsem bai yumi kisim tru ol samting God i tok promis long givim long yumi. Bilip bilong yumi i gat as bilong en. I gat planti samting yumi inap lukim, olsem na bel bilong yumi i ken bilip tru long ol samting ai bilong yumi i no inap lukim. Yumi no bilip nating o bilip kwik long ol tok i swit long yau bilong yumi. Nogat. Bilong kisim bilip tru, yumi mas i gat laik long kisim save long ol samting em i as bilong bilip. Na tu yumi mas tingting gut long olsem wanem yumi yet yumi ken bihainim ol dispela samting yumi kisim save long en, na yumi mas pilim tru long bel.
10 Ebraham i gat kain bilip olsem. Olsem na em i bihainim tok bilong Jehova na em i lusim gutpela sindaun bilong em long ples Ur long Kaldia na em i go i stap long ples Kenan, em longwe ples em i no bin lukim bipo. Em i stap long dispela hap olsem man bilong narapela ples; em i no i go sindaun insait long wanpela taun o kingdom bilong dispela ples bambai em i ken i stap gut. Nogat. “Oltaim Ebraham i ting long lukim dispela taun i gat strongpela pos bilong en [Kingdom bilong Jehova em Krais i bosim]. Ebraham i wetim taim bilong em i go insait long dispela taun. God wanpela tasol em i tingim pasin bilong wokim taun na em yet i wokim.” Sapos oltaim em i wok long tingim gutpela sindaun bilong em long Kaldia bipo, ating em bai go bek. Tasol em i no mekim olsem. “Bel bilong [em] i go pinis long narapela [ples], em i winim dispela na i gutpela moa. Em [bilong] heven tasol.” (Hibru 11:8-16) Ebraham i no wok inap sampela yia tasol bilong kisim dispela ‘narapela ples i gutpela moa.’ Em i mekim i go i go inap long taim em i dai, em olsem 100 yia samting bihain long taim em i bin lusim Ur. Em i no maus nating tasol na i tok em i bilip; nogat; em i mekim ol wok i kamapim bilip bilong em. Olsem na em bai kisim tru pe bilong em. Em i mas kirap bek, olsem na Jisas i tok, long ‘ai bilong God Ebraham i stap laip.’—Luk 20:37, 38; Jems 2:18.
11 Tasol olsem wanem long pikinini bilong Ebraham, em Aisak, na pikinini bilong Aisak, em Jekop? Ol i no bin save long gutpela sindaun bilong ol Kaldia. Tasol ol i no ting olsem ol i mas kisim save long en. Papamama i lainim ol long ol tok promis bilong Jehova na ol i putim gut long bel bilong ol. Ol i wok long kisim strongpela bilip wankain olsem bilong Ebraham. Bel bilong ol tu i go pinis long dispela ‘narapela ples i gutpela moa.’ Olsem na God i no sem long ol dispela man i tok, em i God bilong ol.—Hibru 11:9, 16, 20, 21; Jenesis 26:24, 25; 28:20-22.
12 Tasol brata bilong Jekop, em Iso, em i no tingim ol samting bilong God. Em i maritim ol meri i no save lotuim Jehova. Em i no tingim tumas ol samting i holi, olsem na bilong baim kaikai wanpela taim tasol, em i tromoi olgeta blesing bilong namba wan pikinini. (Jenesis 25:29-34; 26:34, 35; Hibru 12:14-17) Em i laik inapim kwik ol laik bilong skin. Na bikpela hevi i bin painim tu pikinini meri bilong Jekop, em Daina. Bilong wanem hevi i painim em? Long wanem em i laik tumas long bung wantaim ol yangpela meri haiden bilong dispela ples.—Jenesis 34:1, 2.
13 Sapos yu bihainim pasin bilong Ebraham na Aisak na Jekop na bel bilong yu i laik tru long kisim dispela ‘narapela ples i gutpela moa,’ olsem yu laik kisim laip i stap aninit long Kingdom bilong God na Krais, orait yu no ken larim wanpela samting i pulim yu i go bek insait long pasin bilong dispela graun. Yu no ken lusim tingting: Pasin bilong dispela graun i no inap helpim yu long i stap oltaim. “Tasol man i bihainim tok bilong God, em bai i stap oltaim.” Na i stap bilong em bai i gutpela tru!—1 Jon 2:17.
[Askim Bilong Stadi]
1. (a) Wanem ol gutpela samting liklik taim bai painim ol gutpela wokboi bilong God? (b) Tasol sampela man i bin mekim wanem?
2. (a) Man i mas mekim wanem bambai em i no ken i go bek insait long pasin bilong graun? (b) Sapos em i les long mekim olsem, ating em bai kisim bikpela tingting long wanem samting? Na wanem samting bai kamap?
3. (a) Bilong wanem yumi mas lukaut gut na yumi no ken poromanim ol man i no save lotuim Jehova? (b) Long wanem taim ating bai man i poromanim ol kain man olsem?
4. (a) Josep i dai pinis na ol Isrel i stap olsem wanem long Isip? (b) Taim ol Isrel i lusim Isip, bilong wanem “planti arapela lain manmeri” i go wantaim ol? (c) Wanem samting i kamap long nau na i truim dispela piksa?
5. (a) Ol i lusim Isip na liklik taim bihain ol i mekim wanem na i olsem ‘ol i mangal gen long Isip’? (b) Bilong wanem ol i bin mekim olsem?
6. (a) Taim ol i stap long ples nating, Jehova i givim wanem ol samting long ol? (1 Korin 10:3, 4) (b) Bilong wanem sampela i kirap mangal gen long ol samting bipo ol i bin kisim long Isip?
7. (a) Ol man i go lukluk long Graun Bilong Promis, taim ol i kam bek ol i givim wanem ripot na ol Isrel i tok ol bai go bek long Isip? (b) Olsem na wanem samting i kamap? (Hibru 3: 17, 19)
8. (a) Taim Sodom i bagarap, Lot wantaim lain bilong em i mas mekim wanem bambai ol i no ken bagarap? (b) Bilong wanem meri bilong Lot i bagarap? (c) Samting i painim meri bilong Lot i givim wanem toksave long yumi?
9. Pasin bilong bilip em i olsem wanem? Bilong kisim bilip tru, yumi mas mekim wanem?
10. (a) Ebraham i mekim wanem na em i kamapim long ples klia bilip bilong em? Em i mekim i go inap long wanem taim? (b) Olsem wanem yumi save samting Ebraham i mekim em i stret?
11. Aisak na Jekop i mekim wanem na yumi save ol tu i bilip?
12. Bilong wanem bikpela hevi i painim Iso na Daina?
13. (a) Olsem wanem long i stap bilong ol manmeri bilong dispela graun long nau? (b) Yumi mas tingim wanem samting na bai yumi no larim wanpela samting i pulim yumi i go bek insait long pasin bilong dispela graun?
[Piksa long pes 172]
Tingim meri bilong Lot!