Yu Gat Strongpela Bilip Kain Olsem Bilong Abraham?
“Taim Pikinini Bilong Man i kam, em bai i lukim ol manmeri i stap long graun ol i bilip, o nogat?”—LUK 18:8.
1. Bilong wanem i hatwok long holimpas strongpela bilip long nau?
LONG nau i hatwok long holimpas strongpela bilip. Ol lain bilong dispela graun i save putim planti hevi long ol Kristen bilong pulim tingting bilong ol na bai ol i no ken tingim ol samting bilong spirit. (Luk 21:34; 1 Jon 2:15, 16) Planti ol i hatwok tru long abrusim bagarap long ol pait, o ol bikpela bagarap olsem guria o bikpela win ren samting, o ol bikpela sik, o bikpela hangre. (Luk 21:10, 11) Long planti kantri, ol manmeri i strong tumas long bihainim ol pasin bilong ples, na taim ol i lukim sampela man i bihainim bilip bilong ol long i stap na wokabaut bilong ol, ol i ting ol dispela man i no gat stretpela tingting, na ol i strong tumas long bihainim lotu bilong ol. Na tu, bilip bilong ol Kristen i mekim na planti ol i save kisim nogut long han bilong ol man. (Matyu 24:9) Olsem na dispela askim Jisas i bin mekim olsem 2,000 yia i go pinis, em i stret tru: “Taim Pikinini Bilong Man i kam, em bai i lukim ol manmeri i stap long graun ol i bilip, o nogat?”—Luk 18:8.
2. (a) Bilong wanem i bikpela samting long ol Kristen i mas i gat strongpela bilip? (b) Yumi mas tingim pasin bilong husat long holimpas bilip?
2 Tasol strongpela bilip i bikpela samting sapos yumi laik bai i stap bilong yumi i kamap gutpela long nau na bihain yumi ken kisim laip i stap oltaim, olsem God i bin promis long en. Aposel Pol i kamapim wanpela tok Jehova i bin givim long Habakuk na em i raitim tok olsem: “ ‘Stretpela man bilong mi em i bilip, olsem na em bai i stap laip. Na sapos em i surik, orait bai mi no amamas long em.’ . . . Man i no bilip long God, em i no inap bihainim laik bilong God.” (Hibru 10:38–11:6; Habakuk 2:4) Pol i tokim Timoti: “Man i bilip long Krais, em i olsem man i ran long resis. Olsem na yu mas ran strong long dispela gutpela resis na bai yu kisim laip i stap gut oltaim oltaim.” (1 Timoti 6:12) Orait, olsem wanem yumi ken holim strongpela bilip i no inap bagarap? Bilong skelim dispela askim, yumi ken tingim wanpela man em i bin stap olsem 4,000 yia i go pinis, tasol ol lain bilong 3-pela bikpela lotu—lotu Islam, lotu Juda, na lotu Kristen—ol i save tingim yet bilip bilong em. Dispela man em Abraham. I gat wanem as na ol man i save tingim tru pasin bilong em long bilip? Inap yumi ken bihainim pasin bilong em long nau?
Em i Bihainim Tok Bilong God
3, 4. Bilong wanem Tera i kisim lain bilong em na em i lusim Ur na i go sindaun long Haran?
3 Nem bilong Abraham (pastaim ol i bin kolim em Abram) i kamap long namba wan buk bilong Baibel. Stat 11:26 i tok: “Tera . . . i kamap papa bilong Abram na Nahor na Haran.” Tera wantaim lain bilong em ol i bin sindaun long Ur, long hap bilong Kaldia, em i wanpela bikpela taun i gat planti wok bisnis long en na i stap long hap saut long Mesopotemia. Tasol ol i no stap olgeta long dispela hap. “Tera i kisim ol lain bilong en, na ol i lusim taun Ur long hap bilong Kaldia na ol i go olsem long graun Kenan. Nem bilong ol lain i go wantaim Tera i olsem, Abram, pikinini bilong em yet, na Sarai [Sara], meri bilong Abram, na Lot, pikinini bilong Haran na tumbuna pikinini bilong Tera. Dispela lain i go inap long taun Haran na ol i stap long dispela taun.” (Stat 11:31) Brata bilong Abraham, em Nahor, em tu i kisim lain bilong em i go sindaun long Haran. (Stat 24:10, 15; 28:1, 2; 29:4) Tasol bilong wanem Tera i lusim taun Ur i gat planti wok bisnis samting long en na em i go sindaun long dispela longwe ples Haran?
4 Inap 2,000 yia samting bihain long taim bilong Abraham, bilipman Stiven i sanap long ai bilong Nambawan Kaunsil bilong ol Juda na em i stori long as na Tera wantaim lain bilong em ol i lusim Ur. Em i tok: “Taim tumbuna bilong yumi Abraham i stap long graun bilong Mesopotemia na i no i go yet long taun Haran, God bilong heven, em God i gat bikpela strong, em i kamap long Abraham. Na God i tokim em olsem, ‘Yu lusim graun bilong yu na ol brata bilong yu, na yu go long wanpela graun bai mi soim yu long en.’ Olsem na Abraham i lusim graun bilong ol Kaldia na em i go i stap long Haran.” (Aposel 7:2-4) Ol samting Jehova i laik mekim long Abraham, Tera i daun long en, olsem na em i kisim lain bilong em na em i go long Haran.
5. Abraham i go we taim papa bilong em i dai? Bilong wanem em i mekim olsem?
5 Tera wantaim lain bilong em ol i sindaun long dispela nupela taun bilong ol. Planti yia bihain, taim Abraham i toktok long “as ples bilong mi,” em i no tok long Ur—em i tok long Haran. (Stat 24:4) Tasol Abraham i no ken sindaun olgeta long Haran. Stiven i tok: “Taim papa bilong [Abraham] i dai pinis, God i salim em i kam i stap long dispela graun, nau yupela i stap long en.” (Aposel 7:4) Abraham i bihainim tok bilong Jehova na em wantaim Lot i brukim wara Yufretis na ol i go insait long graun bilong Kenan.a
6. Jehova i mekim wanem tok promis long Abraham?
6 Bilong wanem Jehova i bin kirapim Abraham long lusim Ur na go long Kenan? As bilong en, em ol samting God i laik mekim long dispela bilipman. Jehova i bin tokim Abraham: “Yu lusim graun bilong yu na ol brata bilong yu, na ol lain bilong papa bilong yu, na yu go long wanpela graun bai mi soim yu long en. Bai mi mekim ol lain tumbuna bilong yu i kamap bikpela lain tru. Na bai mi mekim gut long yu na mekim yu i gat biknem tru. Olsem na taim ol manmeri i laik mekim gutpela tok long ol arapela man, ol bai i tokim ol olsem, ‘God i ken mekim gut long yu, olsem em i bin mekim long Abram.’ Bai mi mekim gut long ol man i save mekim gutpela pasin long yu. Tasol bai mi yet mi bagarapim ol man i tok long bagarapim yu. Na long yu, bai mi mekim gut long olgeta lain manmeri bilong graun.” (Stat 12:1-3) Abraham bai kamap papa bilong wanpela bikpela lain tru em Jehova bai lukautim ol na ol bai sindaun long Kenan, olsem graun bilong ol yet. Em wanpela gutpela tok promis tru! Tasol Abraham i mas senisim planti samting long i stap bilong em bambai em i ken kisim dispela graun.
7. Abraham i mas redi long mekim wanem bambai em i ken kisim ol samting bilong promis bilong Jehova?
7 Taim Abraham i lusim Ur, em i lusim wanpela taun i gat planti wok bisnis long en na i gat ol lain wanblut bilong papa bilong em—em ol samting i save helpim gut sindaun bilong ol man long dispela taim bipo. Taim Abraham i lusim Haran, em i bruk long lain bilong papa bilong em, na famili bilong brata bilong em, Nahor, na em i go long wanpela kantri em i no save long en. Long Kenan em i no tingting long sindaun insait long banis bilong wanpela taun na bai em i ken i stap gut, nogat. Bilong wanem em i no mekim olsem? Bihain liklik long taim em i go insait long dispela graun, Jehova i tokim em: “Yu wokabaut na lukim olgeta dispela graun. Bai mi givim olgeta long yu.” (Stat 13:17) Abraham, em i gat 75 krismas, na meri bilong em Sara, em i gat 65 krismas, ol i bihainim dispela tok. “Em i bilip na i go sindaun long dispela graun bipo God i tok long givim em. Na em i stap long dispela graun olsem man bilong narapela lain. Em i sindaun long haus sel.”—Hibru 11:9; Stat 12:4.
Strongpela Bilip Kain Olsem Bilong Abraham Long Nau
8. Yumi tingim pasin bilong Abraham na ol narapela witnes bilong bipo, olsem na yumi mas wok long kisim wanem samting?
8 Nem bilong Abraham wantaim lain bilong em i stap insait long dispela bikpela lain “manmeri bilong bipo [paslain long taim bilong ol Kristen] ol i sanap na raunim yumi i stap olsem bikpela klaut,” em Hibru sapta 11 i stori long ol. Pol i tingim strongpela bilip bilong ol dispela wokboi bilong God long bipo, olsem na em i tokim ol Kristen long “lusim olgeta kain samting i mekim yumi i no inap ran strong, na . . . sin [olsem pasin bilong lusim bilip] i save pas long yumi.” (Hibru 12:1) Em nau, pasin bilong lusim bilip em inap “pas long yumi.” Tasol long taim bilong Pol na long taim bilong yumi tu, ol Kristen tru i bin kisim strongpela bilip wankain olsem bilong Abraham na sampela moa bilong bipo. Pol i toktok long em yet wantaim ol wanwok Kristen na em i tok: “Yumi no man bilong surik na lus. Nogat tru. Yumi ol manmeri bilong bilip na kisim laip.”—Hibru 10:39.
9, 10. Wanem samting i soim yumi olsem planti manmeri long nau ol i gat strongpela bilip kain olsem bilong Abraham?
9 Tru, nau long taim bilong yumi pasin bilong graun i senis na i no olsem long taim bilong Abraham. Tasol yumi save mekim yet wok bilong dispela “God bilong Abraham,” na em i no save senis. (Aposel 3:13; Malakai 3:6) Jehova em inap tru long yumi mas lotuim em long nau, wankain olsem long taim bilong Abraham. (KTH 4:11) Planti manmeri ol i save givim ol yet long Jehova, na olsem Abraham i bin mekim, ol i save senisim sampela pasin long i stap bilong ol bambai ol i ken mekim laik bilong God. Long yia i go pinis, inap 316,092 manmeri ol i kamapim long ples klia olsem ol i dediket pinis long Jehova na ol i kisim baptais long wara “long nem bilong Papa na bilong Pikinini na bilong Holi Spirit.”—Matyu 28:19.
10 Planti bilong ol dispela nupela Kristen ol i no gat wok long go long ol narapela kantri bambai ol i ken truim dediket bilong ol. Tasol long tok piksa i olsem planti ol i go longwe tru. Olsem: Long Marisas, bipo Elsie em i wanpela meri bilong wokim posin. Olgeta man i pret long em. Orait wanpela painia salim i stretim rot bilong stadi long Baibel wantaim pikinini meri bilong Elsie, na dispela i opim rot na bai Elsie i ken ‘givim baksait long tudak na kam long lait.’ (Aposel 26:18) Pikinini meri bilong Elsie i laik tru long stadi, olsem na Elsie i orait long stadi long Baibel Stori Buk Bilong Mi. Em i stadi 3-pela taim long olgeta wik, long wanem, dispela painia i mas wok long strongim bel bilong em long olgeta taim. Ol dispela pasin bilong posin na marila samting em i mekim i no bin helpim em long i stap amamas, na em i gat planti hevi. Tasol bihain em inap lusim wok bilong ol spirit nogut na kirap mekim lotu i tru—i olsem em i go kamap pinis long dispela longwe ples. Taim ol manmeri i kam askim em long mekim wok bilong em olsem marila samting bilong helpim ol, em i save tokim ol, Jehova tasol inap lukautim ol na bai ol spirit nogut i no inap bagarapim ol. Nau Elsie em i wanpela Witnes i baptais pinis, na 14 manmeri namel long famili na ol pren bilong em ol i kisim tok i tru.
11. Ol man i dediket long Jehova ol i orait long mekim wanem long i stap bilong ol?
11 Planti namel long ol dispela lain i bin dediket long mekim wok bilong Jehova long yia i go pinis ol i no gat bikpela wok olsem Elsie bilong senisim pasin bilong ol. Tasol long ol samting bilong spirit i olsem pastaim olgeta ol i dai pinis, na bihain ol i senis na kamap laip. (Efesus 2:1) Ol i stap yet long graun, tasol ol i no insait moa long pasin bilong graun. (Jon 17:15, 16) Olsem ol Kristen God i bin makim ol na ol i bilong kamap “manmeri bilong heven,” ol tu i olsem “ol man bilong narapela ples, na olsem ol tripman.” (Filipai 3:20; 1 Pita 2:11) Ol i bin stretim pasin na wokabaut bilong ol na bai em i stret wantaim ol lo bilong God, na bikpela samting tru i bin kirapim ol long mekim olsem, em pasin bilong ol long laikim tumas God na ol narapela man. (Matyu 22:37-39) Ol i no wok long painim ol samting bilong helpim ol yet o painim ol mani kago samting, na ol i no ting ol i mas wok long inapim ol laik bilong ol long dispela graun, nogat. Ol i putim ai bilong ol i go long samting God i tok promis long kamapim, em ‘nupela skai na nupela graun, em stretpela pasin tasol bai i stap long en.’—2 Pita 3:13; 2 Korin 4:18.
12. Wanem wok long ripot bilong yia i go pinis i soim olsem taim Jisas i kam i stap, em i painim pinis sampela “manmeri i stap long graun ol i bilip”?
12 Taim Abraham i lusim ples bilong em na i go long Kenan, em wantaim lain bilong em ol tasol i stap, na Jehova tasol i stap bilong helpim na lukautim ol. Tasol dispela 316,092 Kristen i baptais nupela, ol i no olsem. Tru, Jehova i save helpim na lukautim ol long rot bilong spirit bilong em, olsem em i bin mekim long Abraham. (Sindaun 18:10) Tasol em i save helpim ol tu long rot bilong wanpela “lain” i stap long olgeta hap bilong graun na em i bikpela lain tru, winim lain bilong planti kantri long nau. (Aisaia 66:8) Long yia i go pinis, inap 5,888,650 manmeri bilong dispela lain ol i kamapim bilip bilong ol na ol i toktok wantaim ol man long ol tok promis bilong God. (Mak 13:10) Ol i lusim planti aua moa yet, inap olsem 1,186,666,708 aua, long mekim dispela wok, na ol i wok long painim ol man i laik harim tok bilong Baibel. Olsem na ol i mekim 4,302,852 Baibel-stadi wantaim ol man i laik kisim pasin bilong bilip. Na ol i mekim narapela samting tu i kamapim klia olsem ol i givim bel tru long mekim dispela wok—inap 698,781 insait long dispela “lain” ol i mekim wok painia, em sampela i mekim long olgeta mun na sampela i mekim long wanpela o tupela mun samting. (Wok ol Witnes Bilong Jehova i bin mekim long yia i go pinis, yumi inap lukim long pes 12 i go inap 15.) Dispela bikpela wok ol i bin mekim em inap tru long bekim dispela askim bilong Jisas, “Taim Pikinini Bilong Man i kam, em bai i lukim ol manmeri i stap long graun ol i bilip, o nogat?”
Ol i Stap Gut Long God Maski Ol Hevi
13, 14. Kolim sampela hevi i bin painim Abraham wantaim lain bilong em long Kenan.
13 Planti taim Abraham wantaim lain bilong em ol i gat hatwok long i stap bilong ol long Kenan. Wanpela taim i gat bikpela hangre i kamap long Kenan na em i mas lusim dispela hap na go long Isip. Na tu, king bilong Isip na king bilong Gerar (klostu long Gasa) ol i laik kisim meri bilong Abraham, em Sara, olsem meri bilong ol. (Stat 12:10-20; 20:1-18) Na i gat kros i kamap namel long ol wokboi i save lukautim ol sipsip na meme bilong Abraham na ol wokboi i lukautim ol sipsip na meme bilong Lot, na dispela i mekim na lain bilong Abraham na Lot i bruk. Abraham i mekim gutpela pasin na em i larim Lot i go pas long makim wanem hap graun em i laik kisim, na Lot i makim graun long distrik bilong Jordan bilong sindaun long en, em graun i gat gutpela gris na em i naispela ples tru, olsem Iden.—Stat 13:5-13.
14 Orait bihain hevi i painim Lot taim king bilong kantri Elam wantaim ol lain pren bilong em i pait wantaim ol king bilong 5-pela taun long ples daun bilong Sidim. Ol king bilong ol dispela narapela kantri ol i winim pait na daunim ol king bilong Kenan, na ol i kisim planti samting, na ol i kisim Lot wantaim ol samting bilong em. Taim Abraham i harim tok bilong dispela samting i bin kamap, kwiktaim em i kirap bihainim ol dispela king bilong ol narapela kantri, na em i kisim bek Lot wantaim lain bilong em, na olgeta samting bilong ol king bilong Kenan. (Stat 14:1-16) Tasol bihain wanpela samting nogut moa i painim Lot long Kenan, winim dispela. Wanpela samting i mekim na Lot i go sindaun long Sodom, maski dispela taun i gat nem olsem ples bilong pasin pamuk.b (2 Pita 2:6-8) Bihain tupela ensel i kam toksave long Lot olsem ol bai bagarapim dispela taun, olsem na Lot wantaim meri na ol pikinini meri bilong em ol i ranawe. Tasol meri bilong Lot i sakim ol tok em tupela ensel i bin givim long ol, olsem na sol i karamapim em olgeta na i kamap olsem matmat bilong em. Inap sampela mun o yia samting, Lot wantaim tupela pikinini meri bilong em i mas slip long wanpela bikpela hul bilong ston klostu long taun Soar. (Stat 19:1-30) Ating Abraham i bel hevi stret long ol dispela samting i kamap, long wanem, Lot i bin kam wantaim em long Kenan olsem wanpela wanhaus bilong em.
15. Maski ol hevi i painim Abraham taim em i sindaun long ol haus sel long wanpela kantri em i no save long en, em i abrusim wanem ol tingting kranki?
15 Yu ting sampela taim Abraham i ting, i gutpela sapos em wantaim Lot i bin stap olgeta long Ur wantaim lain bilong papa bilong em, o stap olgeta long Haran wantaim brata bilong em, Nahor? Sampela taim em i laik sindaun olgeta insait long wanpela taun i gat strongpela banis na bai em i ken i stap gut, na maski sindaun long ol haus sel tasol? Yu ting em i tingting olsem em i no bin bihainim savepasin long lusim gutpela sindaun bilong em na raun raun olsem tripman long wanpela kantri em i no save long en? Aposel Pol i stori long Abraham wantaim lain bilong em na em i tok: “Sapos ol i bin tingting tasol long dispela graun ol i bin lusim na i kam, orait ol inap i go bek long en.” (Hibru 11:15) Tasol ol i no go bek. Maski ol i gat hatwok long raun raun olsem, ol i stap long dispela hap Jehova i laik bai ol i stap long en.
Stap Strong na Karim Hevi Long Nau
16, 17. (a) Wanem ol hevi i save painim planti Kristen long nau? (b) Ol Kristen i holim wanem stretpela tingting? Bilong wanem ol i holim kain tingting olsem?
16 Insait long lain Kristen long nau, yumi inap lukim wankain pasin bilong i stap strong na karim hevi. Tru, ol i kisim bikpela amamas long mekim wok bilong God, tasol nau long taim bilong las de, ol Kristen tru i gat hatwok long i stap bilong ol. Maski ol i stap long wanpela paradais bilong spirit, ol hevi bilong mani i save painim ol, wankain olsem ol narapela man. (Aisaia 11:6-9) Sampela i bin kisim nogut long ol pait bilong ol kantri, maski ol yet i no gat asua, na sampela ol i kamap rabis olgeta, maski em i no asua bilong ol. Na tu, ol i stap olsem liklik lain namel long ol man, na planti man i no save laikim ol, olsem na ol i kisim hevi long dispela. Long planti kantri ol i save autim gutnius long en, planti man i les long harim. Na long sampela kantri, ol man ‘i save putim lo i tok orait long ol manmeri i ken mekim nogut’ long ol, na ol “i save kotim ol man i no bin mekim rong, bilong ol i ken kilim ol i dai.” (Song 94:20, 21) Na maski long sampela kantri ol man i no pasim tok long mekim nogut long ol, na sampela taim ol man i litimapim nem bilong ol taim ol i lukim ol strongpela lo ol i bihainim, ol dispela Kristen i save ol i stap narapela kain long ol wanskul na ol wanwok bilong ol—kain olsem Abraham, em i bin sindaun long ol haus sel, tasol planti ol narapela man long ol dispela hap ol i save sindaun insait long ol taun. Tru tumas, i hatwok long yumi stap long dispela graun tasol yumi “no bilong” dispela graun.—Jon 17:14.
17 Orait olsem wanem? Yumi bel hevi long yumi bin dediket long God? Yumi ting i gutpela sapos yumi bin i stap insait long pasin bilong dispela graun na yumi stap wankain olsem ol narapela man? Yumi bel hevi long ol samting yumi bin lusim bambai yumi ken mekim wok bilong Jehova? Nogat tru! Yumi no lukluk i go bek long ol gutpela samting yumi bin lusim; yumi save, olgeta samting yumi bin lusim i olsem pipia nating taim yumi skelim wantaim ol gutpela blesing yumi kisim long nau na ol gutpela blesing bai yumi kisim long bihain. (Luk 9:62; Filipai 3:8) Na tu, yu ting ol man bilong dispela graun ol i stap amamas? Planti ol i laik save long as bilong ol hevi na ol narapela samting em yumi save pinis long en. Ol i karim pen na hevi, long wanem, ol i no bihainim ol tok bilong God i stap long Baibel bilong stiaim ol olsem yumi save bihainim. (Song 119:105) Na planti ol i gat bikpela laik tru long kisim ol kain gutpela poroman olsem bilong yumi ol Kristen, em yumi save amamas tru long bung wantaim ol.—Song 133:1; Kolosi 3:14.
18. Taim ol Kristen i gat strongpela bel kain olsem Abraham na ol i no pret, wanem gutpela samting i save kamap long en?
18 Tru, sampela taim yumi mas i gat strongpela bel olsem Abraham taim em i bihainim ol man i bin holim Lot na kisim em i go. Tasol taim yumi mekim olsem, Jehova i save mekim gut long yumi. Olsem: Long Noten Aialan, narapela lain i save pait na bagarapim narapela lain, olsem na pasin bilong bel nogut na birua i kamap strong tru namel long ol dispela lain, na man i mas i gat strongpela bel na bai em i no ken insait long dispela pasin. Tasol ol Kristen i stap gut long God ol i bihainim tok Jehova i bin givim long Josua: “Yu mas sanap strong na yu no ken pret, na yu no ken surik long wanpela samting. Long wanem, mi God, Bikpela bilong yu, bai mi go wantaim yu long olgeta hap.” (Josua 1:9; Song 27:14) Inap planti yia ol i bin sanap strong na ol i no pret, na dispela i mekim na ol man i save tingim ol, na long nau ol inap autim tok long olgeta hap bilong kantri bilong ol na i no gat wanpela samting i pasim ol.
19. Ol Kristen i amamas long i stap we? Ol i bilip long wanem gutpela samting bai kamap taim ol i bihainim tok bilong Jehova bilong stiaim ol?
19 Yumi inap bilip tru olsem maski wanem kain hevi i painim yumi, sapos yumi bihainim tok bilong Jehova bilong stiaim yumi, ol samting i kamap long dispela bai givim biknem long em, na bai yumi kisim gutpela samting long en inap long olgeta taim bihain. Maski ol hevi i painim yumi, na yumi mas lusim sampela laik bilong yumi, yumi gat bikpela laik tru long i stap insait long wok bilong Jehova, winim ol narapela samting yumi inap mekim, na yumi inap poroman wantaim ol brata Kristen bilong yumi, na tingting long laip i stap oltaim oltaim olsem God i promis pinis long en.
[Ol Futnot]
a Ating Abraham i bin kisim Lot olsem pikinini bilong em taim papa bilong Lot, em brata bilong Abraham, em i dai.—Stat 11:27, 28; 12:5.
b Sampela i ting Lot i tingim dispela hevi i bin painim em taim 4-pela king i holim em na kisim em i go, na long dispela as em i go sindaun long wanpela taun na bai em i no ken pret long kain hevi olsem bai painim em gen.
Yu Tingim Yet?
◻ Bilong wanem yumi mas i gat strongpela bilip?
◻ Olsem wanem Abraham i soim olsem em i gat strongpela bilip?
◻ Taim yumi dediket long God, olsem wanem i gat sampela senis i kamap long i stap bilong yumi?
◻ Bilong wanem yumi amamas long mekim wok bilong God, maski wanem hevi i painim yumi?
[Ol Piksa long pes 7]
Abraham i orait long senisim planti samting long i stap bilong em bambai em i ken kisim ol samting bilong promis
[Ol Piksa long pes 9]
Ol samting i soim yumi olsem taim Jisas i kam i stap, em i painim pinis sampela “manmeri i stap long graun ol i bilip”