Askim

Jehova i mekim kontrak wantaim Abraham long Ur o long Haran?

Namba wan taim Baibel i stori long kontrak Jehova i mekim wantaim Abraham, em long Stat 12:​1-3, em i tok: “Bikpela i tokim Abram olsem, ‘Yu lusim graun bilong yu na ol brata bilong yu, na ol lain bilong papa bilong yu, na yu go long wanpela graun bai mi soim yu long en. Bai mi mekim ol lain tumbuna bilong yu i kamap bikpela lain tru. . . . Na long yu, bai mi mekim gut long olgeta lain manmeri bilong graun.’ ”a Ating Jehova i mekim dispela kontrak wantaim Abraham taim em i stap long Ur na Em i kamapim gen taim Abraham i stap long Haran.

Long taim bilong ol aposel, Stiven i kamapim dispela tok Jehova i bin givim long Abraham olsem em i mas i go stap long Kenan. Stiven i tokim ol kaunsil: “Taim tumbuna bilong yumi Abraham i stap long graun bilong Mesopotemia na i no i go yet long taun Haran, God bilong heven, em God i gat bikpela strong, em i kamap long Abraham. Na God i tokim em olsem, ‘Yu lusim graun bilong yu na ol brata bilong yu, na yu go long wanpela graun bai mi soim yu long en.’ ” (Aposel 7:​2, 3) As ples bilong Abraham em Ur, na olsem tok bilong Stiven i makim, taim Abraham i stap long Ur, em namba wan taim em i bin harim dispela tok long go long Kenan. (Stat 15:7; Nehemia 9:⁠7) Stiven i no kolim dispela kontrak God i mekim wantaim Abraham, tasol Stat 12:​1-3 i bungim dispela kontrak wantaim dispela tok bilong go long Kenan. Olsem na i stret yumi ken ting olsem Jehova i mekim dispela kontrak wantaim Abraham long Ur.

Tasol taim yumi skelim gut dispela stori long Stat, yumi kisim tingting olsem taim Abraham i stap long Haran, Jehova i kolim gen dispela kontrak, olsem em i mekim planti taim gen long Kenan na em i skruim sampela tok moa long en. (Stat 15:5; 17:​1-5; 18:18; 22:​16-​18) Stat 11:​31, 32 i tok, papa bilong Abraham, Tera, i lusim Ur bilong i go long Kenan wantaim Abraham na Sara na Lot. Ol i kamap long Haran na ol i stap long Haran inap long taim Tera i dai. Yumi ken ting Abraham i bin stap longtaim liklik long Haran, long wanem, em i kisim planti mani kago taim em i stap long dispela ples. (Stat 12:⁠5) Nahor, brata bilong Abraham, em tu i kam sindaun long dispela hap.

Taim Baibel i stori pinis long Tera i dai, em i stori long tok Jehova i givim long Abraham na i tok moa: “Orait Abram i lusim taun Haran na i go olsem Bikpela i bin tokim em.” (Stat 12:⁠4) Stat 11:⁠31–12:4 i givim tingting long yumi olsem Jehova i mekim dispela tok long Stat 12:​1-3 bihain long taim Tera i dai. Sapos olsem, orait Abraham i lusim Haran na i go long graun Jehova i soim long em, long wanem, em i laik bihainim dispela tok em nau tasol em i harim, wantaim dispela tok em i bin harim sampela yia i go pinis long Ur.

Long Stat 12:​1, Jehova i tokim Abraham: “Yu lusim graun bilong yu na ol brata bilong yu, na ol lain bilong papa bilong yu.” Pastaim dispela “graun” bilong Abraham em Ur, na “ol lain” bilong papa bilong em ol i stap long Ur. Tasol papa bilong Abraham i kisim lain famili bilong em i go long Haran, olsem na Abraham i kirap kolim Haran olsem as ples bilong em. Abraham i stap planti yia long Kenan na taim em i salim wokboi bilong em i go long ‘as ples na ol lain bilong em’ bilong painim wanpela meri bilong maritim Aisak, wokboi i go long “taun bilong Nahor” (em dispela taun Haran o wanpela ples klostu long en). (Stat 24:​4, 10) Long dispela hap wokboi i painim Rebeka namel long ol wanblut bilong Abraham, em ol i bilong bikpela lain famili bilong Nahor.​​—⁠Stat 22:​20-​24; 24:​15, 24, 29; 27:​42, 43.

Taim Stiven i mekim tok long ol kaunsil, em i stori long Abraham olsem: “Taim papa bilong en i dai pinis, God i salim em i kam i stap long dispela graun, nau yupela i stap long en.” (Aposel 7:⁠4) Dispela i soim olsem Jehova i toktok wantaim Abraham long Haran. I stret yumi ken ting, long dispela taim Jehova i toktok wantaim Abraham, em i kolim gen dispela kontrak em i bin mekim wantaim Abraham olsem Stat 12:​1-3 i kamapim, long wanem, dispela kontrak bai kirap mekim wok taim Abraham i go insait long graun Kenan. Em nau, ol dispela tok yumi skelim pinis i givim tingting long yumi olsem Jehova i mekim dispela kontrak wantaim Abraham long Ur na em i kamapim gen long Haran.

[Futnot]