Abraham—Em i Husat?
BILIP bilong sampela man i bin mekim bikpela samting long ol lotu bilong graun. Ol manmeri bilong lotu Juda, lotu Muslim, na lotu Kristen, olgeta i litimapim nem bilong Abrahama na ol i tok em i “man i gat biknem long ol stori bilong Baibel,” na “em i stap gutpela piksa long pasin bilong holim strongpela bilip.” Baibel i kolim em olsem “papa bilong olgeta man em God i kolim ol stretpela man.”—Rom 4:11.
Bilong wanem Abraham i gat biknem tru? Wanpela as em olsem: Abraham wanpela tasol em man we inap 3-pela taim Baibel i kolim em olsem pren bilong God!—2 Stori 20:7; Aisaia 41:8; Jems 2:23.
Tasol long ol narapela samting, Abraham em i wankain man olsem yumi. Em tu i bin bungim ol wankain hevi olsem yumi—na em i bin sanap strong na winim ol dispela hevi. Yu laik save long olsem wanem em i bin mekim olsem? Orait yumi ken skelim ol stori bilong Baibel long dispela man.
Sindaun Bilong Em
Mama i karim Abraham long yia 2018 B.C.E., na em i kamap bikpela long taun Ur. (Stat 11:27-31) Ur em wanpela biktaun we ol man i gat gutpela sindaun na planti mani kago. Na tu, ol manmeri i insait tru long pasin bilong lotuim ol imis. Papa bilong Abraham, em Tera, ating em tu i bin lotuim ol kain kain imis. (Josua 24:2) Tasol Abraham i mekim disisen bilong em long lotuim Jehovab wanpela tasol, na i no ol imis bilong ol giaman god em ol i no gat laip.
Wanem samting i kirapim Abraham long mekim dispela disisen? Siem, pikinini man bilong Noa, em i bin stap laip yet inap 150 yia taim Abraham i stap long graun. Sapos Abraham i bin bung wantaim dispela man i gat bikpela krismas tru, yu ting dispela bai mekim wanem long Abraham? Ating Abraham i bin harim stret stori bilong Siem long olsem wanem ol i bin abrusim bagarap bilong Bikpela Tait. Em inap kisim save tu olsem em i bikpela samting long lotuim Jehova, em God husat i bin lukautim Siem na famili bilong em long taim bilong Bikpela Tait.
Maski Abraham i kisim stretpela save long God tru long wanem rot—olsem long rot bilong Siem o long sampela narapela man—em i bin bihainim tru ol stretpela save em i kisim. Jehova inap “painimaut” tingting i stap long bel bilong man, olsem na taim em i skelim Abraham, em i luksave olsem dispela man i gat gutpela pasin—na em i helpim Abraham long mekim pasin bilong em i kamap gutpela moa.—Sindaun 17:3; 2 Stori 16:9.
Laip Bilong Em
Laip na sindaun bilong Abraham i gutpela na i gat amamas long en, na maski planti taim i gat ol hevi, laip bilong em i gat as tru bilong en. Yumi ken skelim sampela samting i bin kamap long laip bilong em.
▪ Taim Abraham i stap long taun Ur, God i tokim em long lusim asples bilong em na i go sindaun long wanpela ples Em bai soim em long en. Maski Abraham na Sara i no save long wanem hap ol bai go long en o bilong wanem God i tokim ol long lusim Ur—ol i bihainim tasol tok bilong God. Taim Abraham na Sara i kamap long graun bilong Kenan, ol i stap olsem ol tripman na ol i sindaun long ol haus sel long laip olgeta bilong ol.—Aposel 7:2, 3; Hibru 11:8, 9, 13.
▪ Taim Abraham na Sara i no kamapim yet pikinini, Jehova i tok promis long mekim lain tumbuna pikinini bilong Abraham i kamap bikpela lain tru. Jehova i tok moa olsem olgeta lain manmeri bilong graun bai kisim ol blesing long rot bilong Abraham. (Stat 11:30; 12:1-3) Bihain Jehova i strongim gen dispela tok promis. Em i tokim Abraham olsem lain tumbuna pikinini bilong em bai kamap planti tru, olsem ol sta bilong skai.—Stat 15:5, 6.
▪ Taim Abraham i gat 99 krismas na Sara i gat klostu 90 krismas, Jehova i tok promis olsem tupela bai gat wanpela pikinini man. Long tingting bilong ol man, dispela samting i no inap tru long kamap, tasol i no longtaim na Abraham na Sara i luksave olsem “i no gat wanpela samting Bikpela i no inap long mekim.” (Stat 18:14) Wanpela yia bihain, taim Abraham i gat 100 krismas, em i kamap papa bilong wanpela pikinini man na kolim em Aisak. (Stat 17:21; 21:1-5) God i kamapim klia tok promis bilong em olsem ol lain manmeri bilong graun bai kisim ol gutpela blesing long rot bilong Aisak.
▪ Sampela yia bihain, Jehova i askim Abraham long mekim wanpela samting i narapela kain tru: Em i askim Abraham long givim Aisak long em olsem ofa—Aisak i yangpela man na em i no marit yet na em i no gat pikinini.c Maski Abraham i pilim bikpela bel pen tru long pikinini bilong em bai dai, em i redi long bihainim tok bilong Jehova na givim Aisak olsem ofa. Abraham i bilip tru olsem God i gat strong bilong kirapim bek Aisak, na em inap mekim olsem bambai ol tok bilong Em i kamap tru. (Hibru 11:19) Taim Abraham i redi stret long givim pikinini bilong em olsem ofa, God i stopim em na larim Aisak i stap laip. Em i tok amamas long Abraham long nambawan gutpela pasin bilong em long bihainim tok. Na Jehova i kolim gen ol tok promis em i bin mekim long Abraham long pastaim.—Stat 22:1-18.
▪ Abraham i dai taim em i winim pinis 175 krismas. Baibel i tok: “Em i lapun tru na em i amamas long laip bilong en, na em i dai.” (Stat 25:7, 8) Dispela i truim narapela tok promis em God i bin mekim, olsem Abraham bai stap bel isi inap longpela taim na em bai dai taim em i kamap lapun tru.—Stat 15:15.
Ol Gutpela Wok Bilong Em
Abraham em i wanpela bilipman husat i bin stap tru long bipo. Stori bilong em i stap yet i kam inap long nau, na yumi olgeta inap kisim skul long planti gutpela pasin em yumi yet i ken bihainim. (Hibru 11:8-10, 17-19) Orait nau yumi ken skelim 4-pela bilong ol gutpela pasin bilong Abraham. Pastaim yumi bai stori long nambawan gutpela pasin bilong em—bilip.
[Ol Futnot]
a Nem tru bilong Abraham em Abram na meri bilong em Sarai. Tasol bihain God i senisim nem Abram na kolim em Abraham, mining bilong en “Papa Bilong Planti Lain Manmeri,” na em i senisim tu nem bilong Sarai na kolim em Sara, mining bilong en “Prinses.” (Stat 17:5, 15) Long ol dispela atikol, mipela bai kolim tupela olsem Abraham na Sara.
b Jehova em nem bilong God olsem Baibel i kamapim.
c Lukim atikol “Ol Man i Askim . . . Bilong Wanem God i Tokim Abraham Long Givim Pikinini Bilong Em Olsem Ofa?” long pes 23 bilong dispela magasin.
[Blok long pes 4]
Baibel i Stori Planti Long Em
Sapta 1 i go sapta 10 bilong Buk Stat i stori long ol bilipman olsem Abel, Enok, na Noa. Tasol 15-pela sapta i kamap bihain long en i stori long wanpela man tasol, em Abraham.
Na tu, taim Baibel i stori namba 1 taim long sampela bikpela tok i tru bilong Baibel, em i kolim tu nem bilong Abraham. Olsem, long laip stori bilong Abraham . . .
▪ em namba 1 taim Baibel i stori long God i olsem Hap Plang bilong lukautim ol wokman bilong em.—Stat 15:1; lukim Lo 33:29; Song 115:9; Sindaun 30:5.
▪ em namba 1 taim Baibel i kolim dispela hap tok, bilipim tok bilong God.—Stat 15:6.
▪ em namba 1 taim Baibel i kolim dispela wed profet.—Stat 20:7.
▪ em namba 1 taim Baibel i stori long pasin laikim bilong papamama.—Stat 22:2.