Abraham na Sara—Yu Inap Bihainim Pasin Bilong Ol Long Bilip!
BAIBEL i kolim em “namba wan tumbuna bilong olgeta man . . . i bilip long God.” (Rom 4:11) Gutpela meri bilong em tu i gat dispela pasin. (Hibru 11:11) Em Abraham na meri bilong em Sara, na tupela i pret long God. Bilong wanem ol i olsem gutpela piksa long pasin bilong bilip? Wanem sampela hevi i bin painim ol? Na stori bilong ol inap helpim yumi olsem wanem?
Abraham i kamapim bilip taim God i tokim em long lusim ples bilong em. Jehova i tok: “Yu lusim graun bilong yu na ol brata bilong yu, na ol lain bilong papa bilong yu, na yu go long wanpela graun bai mi soim yu long en.” (Stat 12:1) Gutpela bilipman i bihainim tok, Baibel i tok: “Abraham i bilip long God, na taim God i singautim em, Abraham i bihainim tok bilong God. Em i lusim ples bilong en, na i go long wanpela graun God i laik givim em olsem graun bilong em stret. Abraham i no save em bai i go we, tasol em i bilip, na em i go.” (Hibru 11:8) Tingim ol samting ol i mas mekim bilong go long narapela hap.
Abraham i sindaun long Ur, long hap saut bilong kantri nau ol i kolim Irak. Ur em wanpela taun long Mesopotemia we bipo i gat planti wok bisnis; ol i mekim bisnis wantaim ol kantri long Persian Galf na Ples Daun Bilong Indus. Sir Leonard Woolley, em i go pas long wok bilong digim graun bilong painim ol samting bilong bipo long Ur, em i tok long taim bilong Abraham ol i wokim planti haus long brik, na ol i simenim na penim ol banis bilong haus long waitpela pen. Olsem: Haus bilong wanpela maniman bilong taun i gat 2-pela plua na long namel i gat wanpela ples bung we ol i wokim plua long ol ston. Ol wokboi na ol man i kam raun ol i stap long plua daunbilo. Long namba wan plua i gat wanpela veranda ol i wokim long diwai, na long dispela rot famili inap i go insait long ol rum ol i yusim. Haus i gat 10 i go 20 rum, na Woolley i tok ol kain haus olsem “i bikpela na naispela, na long tingting bilong ol man bilong Is, kain sindaun i gutpela tru.” Em ol haus “bilong ol man i gat gutpela sindaun na ol i bin inapim ol samting ol man bilong taun ol i pilim olsem ol i mas i gat.” Sapos Abraham na Sara i lusim wanpela haus olsem, na bihain ol i mas sindaun long ol haus sel, ol i bin lusim planti samting bilong skin bilong bihainim tok bilong Jehova.
Pastaim Abraham i kisim famili bilong em i go long Haran, wanpela taun long noten Mesopotemia, na bihain long Kenan. Em longwe inap olsem 1,600 kilomita—em longpela rot bilong tupela marit i lapun pinis! Taim ol i lusim Haran, Abraham i gat 75 krismas na Sara i gat 65 krismas.—Stat 12:4.
Yu ting Sara i pilim olsem wanem taim Abraham i tokim em long ol bai lusim Ur? Ating Sara i tingting planti long ol bai lusim gutpela haus, go long wanpela kantri ol i no save long en na ol man inap birua long ol, na sindaun bilong ol bai i no gutpela olsem long Ur. Tasol Sara i stap daun long man bilong em; em i tingim Abraham olsem “bikman” bilong em. (1 Pita 3:5, 6) Sampela saveman i ting dispela i kamapim pasin bilong Sara olsem “long olgeta taim em i bin daun long man bilong em,” na dispela em i “tingting na filings tru bilong em.” Tasol bikpela samting moa yet, Sara i bilip tru long Jehova. Pasin daun na bilip bilong em i olsem gutpela piksa ol meri Kristen i ken bihainim.
Tru, God i no askim yumi long lusim haus bilong yumi bilong bihainim tok bilong em, tasol sampela manmeri i autim tok fultaim ol i bin lusim kantri bilong ol bilong autim gutnius long narapela kantri. Maski yumi mekim wok bilong God long wanem hap, sapos yumi putim ol samting bilong spirit i go pas long laip bilong yumi, God bai lukautim yumi.—Matyu 6:25-33.
Sara na Abraham i no bel hevi long samting ol i bin mekim. Aposel Pol i tok: “Sapos ol i bin tingting tasol long dispela graun ol i bin lusim na i kam, orait ol inap i go bek long en.” Tasol ol i no go bek long ples bilong ol. Ol i bilip strong olsem “God i save mekim gut tru long ol man i wok long painim em,” na ol i bilip long ol tok promis bilong God. Yumi tu i mas bilip strong long ol tok promis bilong God sapos yumi laik givim bel olgeta bilong lotuim em.—Hibru 11:6, 15, 16.
Planti Samting Bilong Spirit na Skin
Taim Abraham i kamap pinis long Kenan, God i tokim em: “Bai mi givim dispela graun long ol lain pikinini bilong yu.” Orait, nau Abraham i wokim wanpela alta long Jehova na em i “kolim nem bilong Bikpela.” (Stat 12:7, 8) Jehova i mekim na Abraham i kamap maniman, na ol manmeri i stap wantaim em i kamap planti tru. Wanpela taim em i kisim 318 strongpela man long lain bilong em, em ol wokboi i bin kamap long lain bilong em, olsem na ol man i ting “lain olgeta i stap wantaim em ol i winim tru wan tausen.” Yumi no save long wanem as tru, tasol ol man i ting em i “wanpela namba wan hetman tru.”—Stat 13:2; 14:14; 23:6.
Abraham i go pas long lotuim Jehova, na em i skulim lain bilong em long ‘bihainim tok bilong Bikpela na bihainim gutpela na stretpela pasin.’ (Stat 18:19) Ol het bilong ol famili Kristen long nau i ken kisim strong long gutpela pasin bilong Abraham, olsem em i man i bin skulim gut lain bilong em long bilip long Jehova na long mekim stretpela pasin. Olsem na yumi ken save bilong wanem wokmeri bilong Sara, em Hagar, em i bilong Isip, na namba wan wokboi bilong Abraham, na pikinini bilong em Aisak, ol i wetim Jehova long helpim ol.—Stat 16:5, 13; 24:10-14; 25:21.
Abraham i Laik Kamapim Bel Isi
Ol samting i kamap long laip bilong Abraham i kamapim olsem em i gat ol pasin God i laikim. Kros i kamap namel long ol wokman i save lukautim ol sipsip bilong Abraham na ol wokman i save lukautim ol sipsip bilong Lot, em pikinini bilong brata bilong em, tasol Abraham i no larim dispela kros i stap, nogat; em i tok mobeta em na Lot i bruk long tupela lain, na em i larim man i yangpela long em, Lot, long makim wanem hap graun em i laik kisim. Abraham em i man bilong kamapim bel isi.—Stat 13:5-13.
Sapos yumi mas makim wanem samting yumi laik mekim, olsem yumi ken strong long mekim ol samting yumi ting i stret long mekim o yumi inap lusim sampela samting bilong yumi yet bilong kamapim bel isi, yumi ken tingim olsem Jehova i no bin larim Abraham i kisim sampela hevi, long wanem, em i mekim gutpela pasin long Lot. Nogat. God i tok promis long Abraham na lain pikinini bilong em olsem ol bai kisim olgeta hap graun ai bilong Abraham i bin lukim. (Stat 13:14-17) Jisas i tok: “Ol manmeri i save mekim dai ol kros na pait, em ol i ken amamas. Bai ol i kolim ol pikinini bilong God.”—Matyu 5:9.
Husat Bai Kisim Ol Samting Bilong Abraham?
Maski ol i kisim ol tok promis long wanpela pikinini, Sara i no karim yet pikinini. Abraham i toktok wantaim God long dispela samting. Olsem wanem? Wokman bilong em Elieser bai kisim olgeta samting bilong em? Nogat, long wanem Jehova i tok: “Dispela wokman, em bai i no inap kisim ol samting bilong yu. Pikinini tru bilong yu bai i kisim ples bilong yu, na em bai i kisim ol samting bilong yu.”—Stat 15:1-4.
Tasol ol i no gat pikinini yet, na Sara i gat 75 krismas na i no tingting moa long kisim bel. Olsem na em i tokim Abraham: “Bikpela i pasim bel bilong mi na mi no inap karim pikinini. Olsem na yu ken i go slip wantaim wokmeri bilong mi. Ating em bai i karim wanpela pikinini bilong mi.” Orait nau Abraham i kisim Hagar olsem namba 2 meri, em i slip wantaim em, na Hagar i kisim bel. Taim Hagar i save olsem em i gat bel, em i bikhet long Sara. Sara i toktok planti long Abraham na i daunim Hagar, na dispela i mekim na wokmeri i ranawe.—Stat 16:1-6.
Abraham na Sara i mekim ol samting ol i ting i stret long mekim, na ol i bihainim ol pasin i stret long taim bilong ol. Tasol dispela i no laik bilong Jehova long kamapim wanpela pikinini bilong Abraham. Sampela taim pasin long ples bilong yumi i orait long sampela pasin, tasol dispela i no makim olsem Jehova i orait long en. Tingting bilong em long ol samting inap narapela kain olgeta long yumi. Olsem na yumi mas kisim save long tok bilong Jehova long stiaim yumi, na beten askim em long soim yumi long rot em i laik yumi bihainim.—Song 25:4, 5; 143:8, 10.
“I No Gat Wanpela Samting Bikpela i No Inap Long Mekim”
Bihain, Hagar i karim wanpela pikinini man long Abraham, nem bilong em Ismael. Tasol em i no dispela Pikinini bilong promis. Sara yet i mas karim dispela Pikinini, maski em i lapun pinis.—Stat 17:15, 16.
Taim God i kamapim olsem Sara bai karim wanpela pikinini man long man bilong em, “Abraham i brukim skru na putim pes i go daun long graun. Tasol em i lap na i tingting olsem, ‘Man i gat 100 krismas pinis, ating em inap kamapim pikinini, a? Na Sara i gat 90 krismas. Ating em inap long karim pikinini?’ ” (Stat 17:17) Taim wanpela ensel i kamapim gen dispela tok na Sara i ken harim, Sara i “lap long em yet.” Tasol “i no gat wanpela samting Bikpela i no inap long mekim.” Yumi ken bilip tru olsem em inap long mekim olgeta samting em i laik mekim.—Stat 18:12-14.
Hibru 11:11 i tok: “Sara tu i bilip long God. Em i lusim pinis taim bilong karim pikinini, tasol em i bilip, na em i kisim strong inap long karim pikinini. Sara i tingting olsem, ‘God i promis pinis long mi bai karim pikinini. Na God i save tok tru tasol.’ ” Bihain Sara i karim Aisak, mining bilong dispela nem i olsem “Lap.”
Bilip Strong Long Ol Tok Promis Bilong God
Jehova i tokaut olsem Aisak i dispela pikinini ol i bin wet longtaim tru long em. (Stat 21:12) Olsem na ating Abraham i kirap nogut tru taim God i tokim em long kilim i dai pikinini man bilong em olsem ofa. Tasol Abraham i gat as tru long bilip strong long God. Em i save olsem Jehova inap kirapim bek Aisak long indai. (Hibru 11:17-19) Long rot bilong mirakel God i kamapim pinis strong bilong em taim em i kirapim bek strong bilong Abraham na Sara bambai ol i ken kamapim Aisak. Abraham i bilip tru olsem God bai truim tok promis bilong Em, na em i redi long bihainim tok. Tasol God i pasim em long kilim i dai pikinini bilong em. (Stat 22:1-14) Pasin Abraham i mekim long dispela samting i helpim yumi long save long hatwok bilong God Jehova long “givim dispela wanpela Pikinini . . . bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”—Jon 3:16; Matyu 20:28.
Pasin bilong bilip long God i mekim na Abraham i save olsem dispela man bilong kisim tok promis bilong Jehova i no ken maritim wanpela meri i lotu long ol god giaman bilong Kenan. Olsem tasol wanpela papa o mama i daun long God i no inap orait long pikinini bilong em i maritim wanpela poroman i no lotuim Jehova, a? Olsem na Abraham i painim wanpela gutpela meri bilong Aisak namel long lain bilong em long Mesopotemia, em longwe inap olsem 800 kilomita. God i blesim dispela wok long rot bilong kamapim klia olsem Rebeka i dispela meri em i bin makim bilong maritim Aisak na kamap tumbuna bilong Mesaia. Tru tumas, Jehova “i bin mekim olgeta samting Abraham i mekim i kamap gutpela.”—Stat 24:1-67; Matyu 1:1, 2.
Ol Blesing Bilong Olgeta Lain Manmeri
Abraham na Sara i gutpela piksa tru long pasin bilong karim ol hevi na kamapim bilip long ol tok promis bilong God. Truim bilong ol dispela tok promis i bikpela samting long ol samting bai painim ol man i go inap long olgeta taim bihain, long wanem, Jehova i tokim Abraham: “Olgeta lain pipel long graun bai ol i askim mi long givim blesing long ol na mekim gut long ol olsem mi mekim gut long ol lain tumbuna pikinini bilong yu. Long wanem, yu bin bihainim tok bilong mi.”—Stat 22:18.
Tru, Abraham na Sara i gat sin, wankain olsem yumi. Tasol taim ol i kisim save long laik bilong God, kwiktaim ol i redi long bihainim—maski ol i mas lusim planti samting. Olsem na Baibel i kolim Abraham olsem ‘Pren bilong God,’ na Sara olsem meri i ‘givim laip bilong em yet long God na wetim em i mekim ol samting em i bin promis long mekim.’ (Jems 2:23; 1 Pita 3:5) Taim yumi wok strong long bihainim pasin bilong bilip bilong Abraham na Sara, yumi tu inap pas gut wantaim God. Na tu, yumi inap kisim ol gutpela samting long ol tok promis Jehova i bin mekim long Abraham.—Stat 17:7.
[Piksa long pes 26]
Abraham na Sara i bilip, olsem na Jehova i blesim ol na em i givim wanpela pikinini man long tupela taim ol i lapun pinis
[Piksa long pes 28]
Samting Abraham i mekim i helpim yumi long save long ol samting Jehova i pilim taim Em i larim dispela wanpela Pikinini bilong em dai