Abraham​—Pren Bilong God

WANPELA ples ol man i go i stap long en bihain long Bikpela Tait em Ur. Ur i kamap bikpela taun na i gat ol gutpela haus i stap long en. Tasol ol man bilong dispela taun i save lotuim ol god giaman, olsem ol i bin mekim long Babel. Ol man bilong Ur na Babel ol i no kain olsem Noa na pikinini bilong em, Siem. Tupela i lotuim Jehova.

Inap 350 yia bihain long tait, gutpela man Noa i dai. Tupela yia bihain long dispela, mama i karim dispela man yu lukim long piksa. God i laikim tru dispela man. Nem bilong em Abraham. Abraham i stap wantaim famili bilong em long taun Ur.

Wanpela taim Jehova i tokim Abraham: ‘Yu mas lusim Ur na lain bilong yu, na i go long wanpela hap mi bai soim long yu.’ Yu ting Abraham i bihainim tok bilong God na lusim gutpela sindaun bilong em long Ur? Yes, em i bihainim tok bilong God. Oltaim Abraham i save bihainim tok bilong God, olsem na em i kamap pren bilong God.

Sampela long famili bilong Abraham ol i go wantaim em taim em i lusim Ur. Papa bilong em, Tera, na Lot, em pikinini bilong brata bilong em, na meri bilong Abraham, em Sara. Bihain ol i go kamap long wanpela ples ol i kolim Haran, na Tera i dai long dispela hap. Ol i stap longwe tru long Ur.

Bihain liklik, Abraham na famili bilong em i lusim Haran na ol i go kamap long kantri ol i kolim Kenan. Long dispela hap Jehova i tok: ‘Mi laik givim dispela graun long lain bilong yu.’ Abraham i stap long Kenan na em i sindaun long ol haus sel.

God i helpim Abraham na em i kisim ol bikpela lain sipsip na kamel samting na planti handet wokboi. Tasol Abraham na Sara, tupela i no gat pikinini.

Taim Abraham i gat 99 krismas, Jehova i tok: ‘Mi tok promis long yu, bai lain pikinini bilong yu i kamap planti.’ Tasol dispela samting bai kamap olsem wanem? Abraham na Sara i lapun pinis na ol i no inap kamapim pikinini.