Sapta 9

Holim Strong Nem Bilong Jisas

PERGAMUM

1. Nau Jisas i salim tok i go long wanem kongrigesen? Ol dispela Kristen i stap long wanem kain taun?

SAPOS yumi lusim Smerna na wokabaut long nambis i go inap 80 kilomita long hap bilong not, na nau yumi bihainim wara Kaikas i go inap 24 kilomita, bai yumi kamap long taun Pergamum, nau ol i kolim Bergama. Bikpela haus lotu bilong god giaman Sus, o Jupita, i bin stap long dispela taun. Long yia 1800 samting ol man bilong painim ol samting bilong bipo ol i kisim alta bilong dispela haus lotu i go long Jemani na yu ken lukim long Haus Tumbuna Pergamon long Belin, na i gat planti piksa bilong ol god giaman bilong ol haiden tu i stap. Orait, Jisas i salim wanem tok i go long kongrigesen i stap long dispela taun i gat planti god giaman long en?

2. Jisas i stori olsem wanem long em yet bambai ol i ken save tru long em? Em i holim ‘bainat i gat tupela sap bilong en’ na dispela i makim wanem samting?

² Pastaim Jisas i mekim sampela tok bambai ol i ken save em i husat tru. Em i tokim Jon: “Yu mas raitim sampela tok long ensel bilong sios [kongrigesen] i stap long taun Pergamum. Dispela tok i olsem, ‘Mi holim longpela bainat i sap tumas na i gat tupela sap bilong en. Mi salim dispela tok i kam long yu.’ ” (KTH 2⁠:12) Olsem long KTH sapta 1 ves 16, Jisas i stori gen long em i Jas na Man bilong givim strafe long ol man nogut; em bai kilim i dai ol man i mekim nogut long ol disaipel bilong em. Dispela tok i strongim bel bilong yumi, a? Tasol ol man insait long kongrigesen ol tu i mas was gut, long wanem long rot bilong “ensel bilong autim tok bilong kontrak,” em Krais Jisas, bai Jehova i givim strafe long ol man i gat nem Kristen, tasol ol i lotuim god giaman, o mekim pasin pamuk, o mekim tok giaman, o stil, o ol i no helpim ol man i sot long samting. (Malakai 3⁠:​1, 5; Hibru 13⁠:​1-3) Kongrigesen i mas bihainim ol strongpela tok God i kirapim Jisas long givim long ol!

3. Long Pergamum i gat wanem ol pasin bilong lotuim god giaman? Olsem wanem yumi ken tok, “sia king bilong Satan” i stap long dispela ples?

³ Nau Jisas i tokim kongrigesen: “Mi save gut long dispela ples yu stap long en. Sia king bilong Satan i stap long dispela ples.” (KTH 2⁠:13a) Tru tumas, ol dispela Kristen i stap namel long ol manmeri i lotu long Satan. Haus lotu bilong Sus i stap, na i gat wanpela ples lotu i stap em bilong Aiskulapias, em god bilong oraitim sik. Na i gat wanpela lain long Pergamum ol i gat nem long lotuim king bilong Rom, em nambawan gavman. Dispela tok Hibru ol i tanim long tok Pisin olsem “Satan” insait bilong en i olsem “Man bilong sakim tok.” “Sia king” bilong em i makim wok bos em i mekim, em God i larim em i stap “king” inap liklik taim na em i bosim graun. (Jop 1⁠:⁠6) Long Pergamum ol man i lotuim planti god giaman, olsem na yumi save Satan i bosim ol strong na “sia king” bilong em i stap long dispela ples. Ating Satan i belhat tru long ol Kristen long Pergamum, long wanem ol i no daun long em​—⁠ol i no lotuim nambawan gavman bilong kantri!

4. (a) Jisas i mekim wanem gutpela tok long ol Kristen long Pergamum? (b) Bikpela man bilong Rom, em Plini, em i raitim wanem tok long King Trejan long pasin em i save mekim long ol Kristen? (c) Maski samting nogut inap painim ol Kristen long Pergamum, ol i mekim wanem?

⁴ “Sia king bilong Satan” i stap long Pergamum, tasol kongrigesen i holim strong nem bilong Jisas. Jisas i tok: “Tasol yu save holim strong nem bilong mi, na yu bilip long mi, na yu no save haitim dispela bilip. Bipo dispela man Antipas, em man bilong autim tok bilong mi, em i bin i stap wantaim yupela. Em i bihainim tru tok bilong mi, na ol i kilim em i dai long ples bilong yupela, em dispela ples Satan i stap long en. Na long dispela taim tu yu no bin givim baksait long mi.” (KTH 2⁠:13b) Jisas i mekim gutpela tok tru i strongim bel bilong ol! Ating Antipas i no laik mekim sampela wok bilong ol spirit nogut o lotuim king bilong Rom, olsem na ol man i kilim em i dai. Jon i kisim dispela tok profet pinis na liklik taim bihain, wanpela hetman long lain bilong King Trejan bilong Rom, em Plini Namba 2, em i raitim pas long Trejan na em i stori long pasin em i save mekim long ol manmeri i gat kot long i stap Kristen. Trejan i orait long ol samting Plini i save mekim, olsem: Sapos ol i tok ol i no Kristen, orait Plini i larim ol i go, tasol Plini i tok, “Pastaim ol i mas . . . kolim wanpela beten long ol god, na ol i mas wokim smok smel na givim wain olsem ofa long piksa bilong yu [Trejan] . . . na ol i mas toknogutim Krais tu.” Na ol manmeri i tokaut long kot olsem tru ol i Kristen, orait ol i kilim ol i dai. Tasol ol Kristen long Pergamum i no pret long dispela samting nogut em inap painim ol. Ol i holimpas bilip. Ol i ‘holim strong nem bilong Jisas,’ long wanem ol i tingim gut bikpela wok Jehova i bin givim long Jisas, em wok bilong stretim bek gutnem bilong Jehova na wok Jas. Ol i bihainim lek bilong Jisas na stap gut long wok bilong autim tok bilong Kingdom.

5. (a) Bipo ol i save lotuim king, tasol i gat wanem wankain pasin long nau em i bin putim bikpela traim long ol Kristen long taim bilong yumi? (b) Wastaua i bin helpim ol Kristen olsem wanem?

⁵ Sampela taim Jisas i bin tokaut olsem Satan em i hetman bilong dispela graun. Tasol Jisas i stap gut long God, olsem na Satan i no inap mekim wanpela samting long em. (Matyu 4⁠:​8-​11; Jon 14⁠:30) Nau long taim bilong yumi, ‘king bilong not’ na ‘king bilong saut’ ol i bin resis long bosim graun. (Daniel 11⁠:40) Tru nau ol man i no lotuim moa king tasol ol i mekim wankain pasin, long wanem ol i givim bel tru long litimapim lain o kantri bilong ol yet. Tasol Wastaua i kamapim klia tok bilong Baibel olsem ol Kristen i no ken insait long ol wok politik o ol pait bilong dispela graun. (Wastaua [tok Inglis] bilong Novemba 1, 1939, na Novemba 1, 1979, na Wastaua bilong Mas 1, 1987) Tok bilong ol dispela Wastaua i soim rot long ol Kristen ol i laik wokabaut long nem bilong Jehova na winim pasin bilong graun, olsem Jisas i bin mekim.​—⁠Maika 4⁠:​1, 3, 5; Jon 16⁠:33; 17⁠:​4, 6, 26; 18⁠:​36, 37; Aposel 5⁠:⁠29.

6. Ol Witnes Bilong Jehova i bin sanap strong long wanem kain traim, olsem Antipas long bipo?

⁶ Ol dispela gutpela tok i bin strongim tru ol Witnes. Ol man i givim bel long litimapim lain o kantri bilong ol yet ol i bin putim bikpela hevi long ol Witnes bilong liklik lain wantaim lain poroman bilong ol, tasol ol Witnes i bin holimpas bilip. Long Amerika, ol i bin rausim planti handet pikinini Witnes na tisa Witnes long skul, long wanem ol i no salut long plak bilong Amerika. Na long Jemani, ol man i bin mekim nogut tru long ol Witnes, long wanem ol i no laik salut long plak i gat mak bilong Hitler. Olsem yumi stori pinis, lain bilong Hitler i bin kilim i dai planti tausen Witnes Bilong Jehova, long wanem ol i no laik mekim dispela samting bilong litimapim kantri, em i olsem pasin bilong lotuim god giaman. Namel long 1930 na 1939, ol Japan i save bihainim lotu Sinto na ol i givim bel long lotuim king bilong Japan. Long dispela taim Japan i bosim kantri Taiwan na i gat tupela painia i autim tok bilong Kingdom long dispela kantri. Ami i tromoi tupela long kalabus na wanpela i dai pinis, long wanem ol i mekim nogut tru long em long kalabus. Na wanpela, bihain ol i larim em i go, tasol taim em i wokabaut i go ol i sutim em long baksait​—⁠em i wankain olsem Antipas long bipo. Inap long nau, i gat sampela kantri ol i save lotuim ol samting i olsem mak bilong kantri na ol i strong long ol man i mas givim bel long Gavman tasol. Planti yangpela Witnes long ol kain kantri olsem ol i bin kalabus, na ol birua i bin kilim i dai planti, long wanem ol i strong long bihainim lo Kristen i tok ol i no ken insait long pait. Ol i no pret; ol i sanap strong na holimpas bilip. Sapos yu yangpela yet na kain hevi olsem i painim yu, yu mas stadi long olgeta de na lainim gut ol tok bilong God long Baibel. Sapos yu mekim olsem bai yu “bilip na kisim laip,” em laip i stap oltaim.​—⁠Hibru 10⁠:​39–11:1; Matyu 10⁠:​28-​31.

7. Traim i painim 3-pela pikinini long India long pasin bilong litimapim kantri na 3-pela i mekim wanem? Bihain wanem samting i kamap long rot bilong dispela pasin 3-pela i bin mekim?

⁷ Kain traim olsem i bin painim planti yangpela ol i stap yet long skul. Long yia 1985, long provins Kerala, long India, 3-pela pikinini Witnes i no laik sakim bilip bilong ol em Baibel i as bilong en, na mekim singsing bilong litimapim kantri. Taim ol narapela skulmanki i mekim dispela singsing, 3-pela i sanap gut, tasol ol i no singsing. Olsem na tisa i rausim ol long skul. Papa bilong 3-pela i go long kot bilong stretim dispela hevi​—⁠em i apil i go inap long Sprim Kot bilong India. Tupela jas bilong Sprim Kot i tok, ol pikinini i no gat rong. Planti nius i putim gutpela stori long dispela samting i bin kamap, olsem na ol man long olgeta hap bilong dispela kantri ol i harim stori long dispela samting 3-pela i bin mekim na ol i save, i gat sampela Kristen long India em ol i save lotuim God Jehova, na ol i save sanap strong na holimpas ol lo bilong Baibel.

Samting i Laik Bagarapim Kongrigesen

8. Jisas i gat wanem tok long ol Kristen long Pergamum?

⁸ Tru tumas, ol Kristen long Pergamum i bin holimpas lo bilong God. Tasol Jisas i tok: “Mi gat sampela tok long yu.” Ol i mekim wanem na Jisas i gat tok long ol? Jisas i tok: “Yu gat sampela man i stap long Pergamum, ol i holim strong pasin bilong Balam. Pasin bilong Balam em i olsem: Bipo em i bin soim Balak long pasin bilong giamanim ol manmeri bilong Israel na mekim ol i pundaun long sin. Na Balak i kirapim ol Israel long kaikai abus ol i bin ofaim long ol giaman god, na long mekim pasin pamuk.”​—⁠KTH 2⁠:⁠14.

9. Balam em i husat? Olsem wanem tok em i givim long king i “mekim ol [Israel] i pundaun”?

⁹ Balam em wanpela profet i stap long taim bilong Moses. Em i no bilong lain Israel, tasol em i save liklik long pasin bilong Jehova. King Balak bilong Moap i baim Balam bilong tokaut olsem ol Israel i mas bagarap. Jehova i no larim Balam i mekim olsem; em i kirapim Balam long tokaut olsem God bai i mekim gut long ol Israel na bai ol i stap gutpela, na ol birua bilong ol i mas bagarap. Balak i no amamas long dispela, olsem na bilong mekim i dai kros bilong em, Balam i kirap tokim Balak long wanpela pasin ol i ken mekim bilong grisim ol Israel na bai ol i pundaun. Em i tokim king long salim ol meri Moap i go pulim ol man bilong lain Israel long pamuk nabaut na lotuim god giaman ol i kolim Bal bilong Peor! Orait ol Israel i pundaun na Jehova i belhat long ol. Em i salim wanpela sik long ol em i kilim i dai 24,000 bilong ol dispela pamukman bilong Israel. Dispela sik i bagarapim ol i go inap long taim pris Finias i kirap mekim sampela samting bilong pinisim dispela pasin nogut long Israel.​—⁠Namba 24⁠:​10, 11; 25⁠:​1-3, 6-9; 31⁠:⁠16.

10. Wanem samting i bin pundaunim sampela Kristen long kongrigesen long Pergamum? Ating ol dispela Kristen i gat wanem tingting na ol i ting God i no ken kros long rong ol i mekim?

¹⁰ Long taim bilong Jon tu i gat kain samting olsem i bin pundaunim ol Kristen long Pergamum! Sampela i mekim pasin pamuk na lotuim god giaman. Ol i no bihainim toksave God i bin givim long ol long rot bilong aposel Pol. (1 Korin 10⁠:​6-​11) Ol i bin karim hevi na sanap strong na ating ol i ting Jehova i no ken kros long ol sapos ol i pundaun long sin na mekim pasin pamuk samting. Olsem na Jisas i tokaut klia olsem ol i mas sakim ol dispela kain pasin nogut.

11. (a) Ol Kristen i mas was gut long wanem samting? Ol i no ken bihainim wanem kain tingting? (b) Insait long planti yia i go pinis ol i bin rausim hamas manmeri long ol kongrigesen? I gat wanem as na ol i rausim planti?

¹¹ Na olsem tasol long nau, ol Kristen i mas was gut, nogut ol i “senisim tok bilong marimari bilong God, na mekim em i kamap tok bilong ol kain kain pasin nogut.” (Jut 4) Yumi mas nolaik tru long pasin nogut. Yumi mas ‘paitim tru bodi bilong yumi’ bambai yumi ken bihainim stretpela pasin Kristen. (1 Korin 9⁠:27; Song 97⁠:10; Rom 8⁠:⁠6) Yumi no ken ting sapos yumi wok strong long mekim wok bilong God, na yumi sanap strong long traim, i orait long yumi mekim pasin pamuk samting. Nogat. Insait long planti yia i go pinis ol i bin rausim planti tausen tausen manmeri long kongrigesen Kristen long olgeta hap bilong graun, long wanem ol i bin mekim pasin pamuk o kain pasin olsem. Sampela yia ol i rausim planti tru, winim dispela 24,000 Israel bilong bipo. Olsem na oltaim yumi mas was gut, nogut yumi tu i pundaun olsem!​—⁠Rom 11⁠:20; 1 Korin 10⁠:⁠12.

12. Ol Kristen long nau i mas bihainim wanem ol lo, olsem ol wokboi bilong God long bipo i mas bihainim?

¹² Jisas i gat tok long ol Kristen long Pergamum long narapela samting tu, olsem: Ol i “kaikai abus ol i bin ofaim long giaman god.” Ating ol i bin mekim pasin olsem Pol i tok sampela Kristen long Korin i save mekim​—⁠ol i save kaikai dispela kain abus maski dispela i pundaunim narapela man. Tasol ating ol i bin mekim sampela pasin bilong lotuim god giaman tu na ol i kaikai dispela abus ol i bin ofaim long god giaman. (1 Korin 8⁠:​4-​13; 10⁠:​25-​30) Ol gutpela Kristen long nau ol i mas tingim ol narapela man na sori long ol. Ol i mas was gut, nogut ol i pundaunim narapela man. Ol i mas klia long olgeta pasin i olsem pasin bilong lotuim god giaman. Olsem: Ol i no ken litimapim nem bilong ol manmeri i gat biknem long televisen, o long piksa wokabaut, o long spot, na bihainim ol olsem god bilong ol; na ol i no ken givim bel long mani o long inapim laik bilong bodi, na bai dispela i kamap olsem god bilong ol!​—⁠Matyu 6⁠:24; Filipai 1⁠:​9, 10; 3⁠:​17-​19.

No Ken Brukim Lain!

13. Nau Jisas i givim wanem strongpela tok long ol Kristen long Pergamum? Kongrigesen i mekim wanem na i stret Jisas i krosim ol olsem?

¹³ Na Jisas i krosim ol Kristen long Pergamum na em i tok: “Sampela man i stap long yu, ol i save bihainim tok bilong ol lain bilong Nikolas.” (KTH 2⁠:15) Jisas i bin tokim ol Efesus ol i mekim gutpela wok, long wanem ol i nolaik tru long pasin bilong lain bilong Nikolas. Tasol em i mas givim strongpela tok long ol Kristen long Pergamum bambai ol i was gut na ol i no ken bihainim dispela lain na bai kongrigesen i bruk. Ol i mas wok strong moa long i stap wanbel olsem Jisas i tok taim em i mekim beten i stap long Jon 17⁠:​20-​23. Ol i mas “skulim ol manmeri long olgeta tok tru.” Na ol i mas “tok strong long ol man bilong sakim tok, bai ol i pilim tru rong bilong ol.”​—⁠Taitus 1⁠:⁠9.

14. (a) Kirap long pastaim tru, husat ol i bin kamapim hevi insait long lain Kristen? Pol i stori olsem wanem long ol dispela kain man? (b) Sapos sampela i laik bihainim ol man i lusim lotu Kristen tru na kamapim lain bilong ol yet, ol i mas tingim gut wanem tok bilong Jisas?

¹⁴ Kirap long pastaim tru i gat sampela man long lain Kristen ol i gat pasin antap na ol i lusim lotu Kristen tru na kamapim lain bilong ol yet. Ol i mekim ol tok gris bilong giamanim ol man na ol i “save sakim dispela tok” i kam long rot Jehova i makim, na ol i “brukim sios.” (Rom 16⁠:​17, 18) Long planti pas Pol i raitim long ol Kristen em i toksave long ol olsem dispela kain pasin inap bagarapim ol.a Nau long taim bilong yumi, Krais i stretim pinis lain Kristen tru na ol i stap stret na i stap wanbel, tasol pasin bilong lusim bilip tru na brukim lain i stap yet. Olsem na sapos sampela i laik bihainim ol man i bin lusim bilip Kristen tru na kamapim lain bilong ol yet, orait ol i mas harim gut dispela tok Jisas i mekim, olsem: “Yu mas tanim bel. Sapos nogat, orait bihain liklik bai mi kam long yu, na bai mi pait long ol dispela man long dispela bainat i stap long maus bilong mi.”​—⁠KTH 2⁠:⁠16.

15. Pasin bilong brukim lain i save kamap olsem wanem?

¹⁵ Pasin bilong brukim lain i save kamap olsem wanem? Ating wanpela long kongrigesen i kirap na lainim ol man long ol tok i narapela kain long tok i tru bilong Baibel na dispela i paulim tingting bilong ol na nau ol i gat tupela tingting (olsem yumi stap long las taim o nogat), olsem na sampela i bihainim tok bilong em na ol i lusim kongrigesen. Em nau, ol i lusim lotu i tru na kamapim lain bilong ol yet. (2 Timoti 3⁠:1; 2 Pita 3⁠:​3, 4) O ating wanpela i kirap na toknogutim pasin Jehova i makim bilong mekim wok bilong em. Ating em i tok, Baibel i no tok yumi mas i go long ol haus na autim tok, na i no gat wok long yumi mekim olsem. Em nau, ol man i laik abrusim hatwok, ol i laikim kain tok olsem na ol i bihainim dispela man. Ol i no laik mekim wok olsem Jisas na ol aposel i bin mekim, na lain long bihainim pasin daun. Olsem na ol i bruk long lain Kristen tru na ating wan wan taim tasol ol yet i bung wantaim bilong kaunim Baibel. (Matyu 10⁠:​7, 11-​13; Aposel 5⁠:42; 20⁠:​20, 21) Ol dispela man i gat tingting bilong ol yet long Bung bilong tingim i dai bilong Jisas (Memorial), na long lo bilong Baibel i tambuim blut, na long pasin bilong insait long ol amamas samting bilong ol bikpela de bilong dispela graun, na long pasin bilong smok. Na ol i save daunim nem bilong Jehova. Olsem na ol i lusim lotu i tru na kirap bihainim gen pasin bilong Bikpela Babilon na orait long kain kain pasin nogut. Na ol i mekim pasin i moa nogut​—⁠Satan i kirapim ol ‘long paitim ol wanwok bilong ol,’ em ol brata bilong ol long bipo.​—⁠Matyu 24⁠:49; Aposel 15⁠:29; KTH 17⁠:⁠5.

16. (a) Sampela brata i harim tok bilong ol man i lusim bilip na ol i gat tupela tingting, bilong wanem ol dispela brata i mas kirap kwik na tanim bel? (b) Ol man i no laik tanim bel, wanem samting bai painim ol?

¹⁶ Sapos tok bilong ol dispela kain man i paulim tingting bilong sampela, kwiktaim ol i mas bihainim tok bilong Jisas na tanim bel! Ol i mas sakim tok bilong ol dispela man i olsem marasin i gat gip na em inap bagarapim ol! Pasin bilong bel nogut i as bilong en, na tok bilong ol i narapela kain tru long ol stretpela, klinpela, gutpela tok i tru em Jisas i save lainim kongrigesen long en. (Luk 12⁠:42; Filipai 1⁠:​15, 16; 4⁠:​8, 9) Na ol man i no laik tanim bel, bai Jisas i “pait long ol dispela man long dispela bainat i stap long maus bilong [em].” Em i wok long skelim lain bilong em na rausim ol man nogut bambai lain bilong em i ken i stap wanbel. (Jon 17⁠:​20-​23, 26) Sampela ol i lusim bilip na ol i no laik harim gutpela tok ol “sta” long han sut bilong Jisas i givim long ol bilong helpim ol, olsem na Jisas i skelim ol long kot na givim strafe long ol na “bagarapim tru” ol. Em i rausim ol i “go ausait long ples tudak.” Ol i raus long kongrigesen na ol i no inap mekim moa ol wok nogut insait long lain bilong God.​—⁠Matyu 24⁠:​48-​51; 25⁠:30; 1 Korin 5⁠:​6, 9, 13; KTH 1⁠:⁠16.

‘Mana i Hait i Stap na Waitpela Ston’

17. Ol Kristen God i bin makim, ol bai kisim wanem gutpela pe sapos ol i “winim pait”? Ol Kristen long Pergamum i mas sakim wanem ol pasin?

¹⁷ Ol manmeri i harim ol tok em spirit holi bilong Jehova i kirapim Jisas long givim long ol, olgeta bai kisim gutpela pe. Harim! Em i tok: “Orait man i gat yau, em i mas harim gut dispela tok Holi Spirit i autim long ol sios [kongrigesen]. Sapos man i winim pait, orait mi bai givim em sampela mana nau i stap hait, na mi bai givim em wanpela waitpela ston. Na long dispela ston mi bai raitim nupela nem, na i no gat wanpela man i save long dispela nem. Man i kisim ston, em tasol bai i save.” (KTH 2⁠:17) Jisas i laik strongim ol Kristen long Pergamum, olsem em i bin mekim long ol Kristen long Smerna, bambai ol i “winim pait.” Bilong mekim olsem, ol dispela Kristen long Pergamum, em ples sia king bilong Satan i stap long en, ol i mas sakim pasin bilong lotuim god giaman. Ol i mas sakim pasin pamuk, na pasin bilong brukim lain, na pasin bilong lusim bilip, em ol pasin Balak na Balam na lain bilong Nikolas i kirapim ol man long bihainim. Ol dispela Kristen God i bin makim, sapos ol i sakim ol dispela pasin, olsem winim pait, orait bai ol inap kisim “sampela mana nau i stap hait.” Wanem insait bilong dispela tok?

18, 19. (a) Dispela mana Jehova i givim long ol Israel em wanem samting? (b) Wanem mana i stap hait? (c) Taim ol man i kisim ‘mana i stap hait,’ dispela i makim wanem samting?

¹⁸ Long taim bilong Moses, Jehova i givim wanpela kain kaikai long ol Israel, ol i kolim mana, em bilong strongim skin bilong ol long taim ol i wokabaut long ples nating. Dispela mana i no i stap hait, long wanem long olgeta de​—⁠tasol long de Sabat nogat​—⁠dispela mana i kamap nating olsem mirakel na i stap ples klia long graun long moningtaim. Em i olsem ol lip i drai na i bruk bruk nabaut na i waitpela na i karamapim graun olsem ais. God i givim dispela “bret” long ol Israel bilong kaikai bambai ol i no ken i dai. Jehova i tokim Moses long putim sampela long wanpela sospen gol insait long Bokis Kontrak “bai ol lain pikinini [bilong ol Israel] i kamap bihain ol i ken save long en.”​—⁠Kisim Bek 16⁠:​14, 15, 23, 26, 33; Hibru 9⁠:​3, 4.

¹⁹ Em gutpela piksa tru! Dispela mana i stap hait insait long Rum Tambu Tru long haus lotu sel. Long dispela ples i gat lait i kamap olsem mirakel; dispela lait i stap antap long ai gol bilong Bokis Kontrak na i makim olsem Jehova i stap wantaim ol. (Kisim Bek 26⁠:34) I tambu tru long man i go insait long dispela ples holi na kaikai dispela mana. Tasol Jisas i tok, ol disaipel God i bin makim na ol i winim pait, ol bai kaikai “sampela mana nau i stap hait.” Krais i “no bin i go insait long haus lotu ol man i wokim long han na em i piksa tasol bilong haus lotu tru bilong God. Nogat. Em i go insait long heven stret.” Na olsem tasol ol dispela lain bilong em bai go insait long heven stret. (Hibru 9⁠:​12, 24) Taim ol i kirap bek ol i kisim bodi i no save bagarap, na bai ol i stap oltaim na i no ken i dai. Em gutpela samting tru Jehova i givim long ol​—⁠i olsem em i givim dispela ‘mana i stap hait’ long ol, em kaikai i no inap bagarap. Dispela liklik lain i winim pait ol i kisim gutpela samting tru!​—⁠1 Korin 15⁠:​53-​57.

20, 21. (a) Taim Jisas i givim waitpela ston long ol Kristen God i bin makim, dispela i makim wanem samting? (b) I gat 144,000 waitpela ston tasol, olsem na ol manmeri bilong bikpela lain i ken wetim wanem gutpela samting?

²⁰ Ol i kisim tu “wanpela waitpela ston.” Long kot bilong ol Rom, ol i save mekim wok long ol ston taim ol i vot bilong makim man i win long kot o lus long kot.b Sapos ol i givim waitpela ston long man, dispela i makim olsem em i no gat asua na em i win long kot, na sapos ol i givim blakpela ston long man, em i lus long kot, na ating bai kot i tok long kilim em i dai. Jisas i givim “wanpela waitpela ston” long ol Kristen long Pergamum na dispela i makim olsem em i skelim ol long kot na ol i no gat asua; ol i stap stret. Tasol ating dispela tok bilong Jisas i gat narapela insait bilong en tu, long wanem long taim bilong ol Rom, ol i mekim wok long ol ston olsem tiket bilong go insait long ol bikpela bung. Olsem na ating dispela waitpela ston i makim wanpela bikpela samting bilong ol dispela Kristen, em God i bin makim ol na ol i winim pait​—⁠bai ol inap i go insait long heven long bikpela bung bilong marit bilong Pikinini Sipsip. I gat 144,000 tasol bai kisim kain ston olsem.​—⁠KTH 14⁠:1; 19⁠:​7-9.

²¹ Olsem na sapos yu bilong bikpela lain poroman bilong dispela liklik lain, yu ting God i no tingim yu? Nogat! Tru yu no ken kisim dispela waitpela ston bilong go insait long heven, tasol sapos yu sanap strong yu inap abrusim bagarap long taim bilong bikpela hevi tru, na bai yu inap insait long wok bilong kamapim bek Paradais long graun, em wok bilong amamas. Ol bilipman i dai paslain long taim bilong ol Kristen, na ol arapela sipsip ol i dai long nau, bai ol i kirap bek na wok wantaim yu long mekim dispela wok. Na bihain olgeta manmeri i dai pinis na God i baim bek ol, bai ol i kirap bek na kisim laip long Paradais long graun.​—⁠Song 45⁠:16; Jon 10⁠:16; KTH 7⁠:​9, 14.

22, 23. Dispela nem i stap long ol ston em liklik lain i kisim, em i makim wanem samting? Dispela i mas kirapim ol long mekim wanem? Na i strongim bikpela lain long mekim wanem?

²² Wanem dispela nupela nem i stap long dispela ston? Ol i save givim nem long man bambai yumi ken save long em. Ol dispela Kristen em God i bin makim ol, ol i kisim dispela ston taim ol i winim pinis pait long graun na ol i kirap bek. Olsem na dispela nem long ston i makim gutpela samting bai painim ol long heven, olsem ol bai stap wantaim Krais long heven. Ol bai mekim wok king wantaim Krais​—⁠ol manmeri bilong kisim Kingdom bilong heven, ol tasol inap kisim dispela gutpela wok. Olsem na dispela nem o namba bilong kisim wok, “i no gat wanpela man i save long [en]. Man i kisim ston, em tasol bai i save.”​—⁠Lukim Kamapim Tok Hait 3⁠:⁠12.

²³ Em gutpela samting tru bilong kirapim dispela lain em Jon i piksa bilong ol, na bai ol i “harim gut” na bihainim “dispela tok Holi Spirit i autim long ol sios [kongrigesen]”! Na dispela i strongim bikpela lain poroman bilong ol long wok gut wantaim ol taim ol i stap yet long graun na autim tok bilong Kingdom bilong Jehova!

[Ol Futnot]

[Ol Piksa long pes 43]

Ol dispela piksa bilong ol god giaman bilong ol haiden i stap long Haus Tumbuna Pergamon long Belin

[Piksa long pes 45]

Ol i bin haitim sampela mana long Bokis Kontrak. Ol manmeri God i makim ol na ol i winim pait, taim ol i kisim ‘mana i stap hait,’ dispela i makim olsem ol i kisim laip i stap oltaim na ol i no ken i dai

[Piksa long pes 45]

Waitpela ston em bilong ol manmeri ol inap go long marit bilong Pikinini Sipsip