Kisim Strong Long “Kaikai Bilong Heven”
BIHAIN tasol long taim God i wokim mirakel bilong kisim bek ol Israel long Isip, ol i kamapim olsem ol i no bilip long Man bilong kisim bek ol, em Jehova. Long dispela as, Jehova i larim ol i raun long ples drai nating bilong Sainai inap 40 yia. Insait long dispela taim, ol Israel na ol “planti arapela lain manmeri” i bin go wantaim ol, ol i kaikai na dring na ol “inap tru.” (Kisim Bek 12:37, 38) Song 78:23-25 i tokim yumi long olsem wanem dispela samting i bin kamap: “Em [Jehova] i tokim skai antap na skai i op. Orait em i salim mana i pundaun na ol i kaikai. Em i givim kaikai bilong heven long ol manmeri. Olsem na ol i kisim kaikai bilong ol ensel. God i givim planti kaikai long ol, na ol inap tru.”
Moses i bin kaikai mana, olsem na em i stori gut long dispela narapela kain kaikai. Em i tok olsem, long moningtaim bihain long “taim dispela wara i drai pinis, ol i lukim planti liklik samting i stap long graun olsem ol lip i drai na i bruk bruk nabaut. Ol Israel i lukim dispela samting, na ol i no save long en. Orait ol i askim ol yet olsem, ‘Em i wanem samting?’ ” o long tok Hibru ol i tok “man huʼ?” Ating dispela tok i as bilong tok “mana,” em nem ol Israel i bin givim long dispela kaikai. Moses i tok: “Dispela mana i liklik waitpela samting olsem pikinini bilong wanpela diwai. Na i switpela olsem bisket ol i wokim wantaim hani.”—Kisim Bek 16:13-15, 31.
Mana em i no wanpela kaikai i save kamap long olgeta taim, olsem sampela i tok. Wanpela bikpela strong tru winim strong bilong ol man em i kamapim dispela kaikai. Olsem: Em i no bin kamap long wanpela hap tasol o long taim bilong en tasol. Sapos ol i bin putim i stap inap long narapela de, ol liklik snek i pulap long en na smel nogut i kamap. Tasol long de paslain long Sabat olgeta wan wan famili i kisim mana bilong tupela de, na dispela kaikai i no bagarap, bambai ol i ken kaikai long de Sabat—long dispela de mana i no bin kamap. Tru tumas, God i kamapim mana long rot bilong mirakel.—Kisim Bek 16:19-30.
Long Song 78, Baibel i kolim “ol ensel” na dispela i makim olsem ating Jehova i bin mekim wok long ol ensel bilong givim mana long ol Israel. (Song 78:25) Tasol maski ol ensel i givim kaikai long ol o nogat, i gat as tru na ol manmeri i mas tok tenkyu long God long gutpela pasin em i mekim long ol. Tasol planti i bin sakim tok na i no tenkyu long dispela Man i bin kisim bek ol long kalabus long Isip. Yumi tu, sapos yumi no tingim tingim long bel pasin marimari bilong God, yumi inap ting olsem ol samting Jehova i givim long yumi ol i no bikpela samting, o yumi no inap tenkyu long dispela. Olsem na yumi mas tenkyu long Jehova olsem em i bin putim long Baibel ol stori bilong ol samting em i bin mekim bilong kisim bek ol Israel, na ol samting ol Israel i bin mekim bihain long en “bilong skulim yumi.”—Rom 15:4.
Ol Samting i Painim Ol Israel i Givim Save Long Ol Kristen
Taim Jehova i givim mana long ol Israel, em i no mekim bilong inapim tasol 3 milion samting manmeri bambai ol i no ken hangre, nogat. I gat sampela bikpela samting moa em i laik skulim ol long en. Em i laik traim ol na mekim ol i bihainim pasin daun, na bihain em i ken mekim ol gutpela samting i kamap long ol. (Lo 8:16; Aisaia 48:17) Sapos ol i bihainim ol tok bilong em long stretim stretim ol na skulim ol, Jehova inap amamas long mekim ol gutpela samting i kamap long ol long bihain—olsem em inap helpim ol long i stap bel isi, na kisim planti gutpela samting, na stap amamas long Graun Bilong Promis.
Wanpela bikpela samting ol i mas kisim save long en, em olsem: “Man i no inap kisim laip long kaikai tasol. Nogat. [Em i] mas bihainim olgeta tok bilong God tu na bai [em i] kisim laip.” (Lo 8:3) Sapos God i no bin givim mana long ol manmeri, ol inap hangre na i dai—ol yet i tokaut long dispela samting. (Kisim Bek 16:3, 4) Ol Israel i pilim tru ol dispela samting, long olgeta wan wan de ol i save Jehova i mas helpim ol, na long dispela rot ol i bin kisim pasin daun. Taim ol i go insait pinis long Graun Bilong Promis i gat planti samting i pulap long en, ating ol i no inap lusim tingting long Jehova na long wetim em i helpim ol.
Olsem ol Israel, ol Kristen i mas wetim God i helpim ol long ol samting ol i mas kisim long i stap bilong ol—ol samting bilong skin na bilong spirit. (Matyu 5:3; 6:31-33) Long wanpela traim Satan i putim long Jisas, Jisas i kamapim tok bilong Moses long Lo 8:3 na em i tok long Satan olsem: “Buk bilong God i gat tok olsem, ‘Ol manmeri i no inap kisim laip long kaikai tasol. Nogat. Ol i mas bihainim olgeta tok bilong God tu na bai ol i kisim laip.’ ” (Matyu 4:4) Em nau, ol man i lotu tru long God, ol i kisim strong taim ol i kaunim ol tok bilong Jehova i stap long Baibel. Na tu, bilip bilong ol i kamap strong taim ol i lukim olsem ol tok bilong God i helpim ol long i stap bilong ol taim ol i stap gut wantaim God na putim ol samting bilong Kingdom i stap namba wan.
Ol manmeri i gat sin ol inap lusim pasin bilong tenkyu long ol samting ol i save kisim long olgeta taim—maski ol dispela samting i kamapim klia pasin sori bilong Jehova long helpim ol. Olsem: Taim God i wokim mirakel na givim mana long ol Israel, pastaim ol i kirap nogut long dispela na ol i amamas long en, tasol bihain planti bilong ol i krai na toktok planti olsem: “Mipela i les pinis long dispela rabis kaikai.” Dispela i kamapim olsem ol i kirap nau long “givim baksait long God i gat laip.” (Namba 11:6; 21:5; Hibru 3:12) Olsem na ol samting ol i bin mekim i mas “givim tingting long yumi ol man i stap long dispela taim nau, em taim dispela graun klostu i laik pinis.”—1 Korin 10:11.
Olsem wanem ol dispela samting inap givim tingting long yumi? Wanpela rot i olsem: Yumi no ken larim ol tok bilong Baibel o ol samting bilong spirit yumi kisim long wokboi i gat gutpela tingting i kamap olsem wanpela samting nating. (Matyu 24:45) Taim yumi kirap long tingim ol presen bilong Jehova i olsem ol samting nating, o yumi les long ol dispela presen, dispela inap mekim na isi isi bai yumi no pas gut moa wantaim em.
I gat gutpela as na Jehova i no save skulim yumi long planti planti nupela samting long wankain taim. Tasol isi isi em i save kamapim insait bilong ol tok bilong Baibel long taim stret bilong en. (Sindaun 4:18) Dispela i save helpim ol manmeri bilong em long kisim gut ol tok na bihainim ol samting ol i kisim save long en. Jisas i bin bihainim pasin bilong Papa bilong em taim em i skulim ol disaipel bilong em bilong pastaim. Em i skulim ol long Tok Bilong God “inap long mak bilong tingting bilong ol,” o inap long ol i ken “save gut long en,” olsem sampela Baibel i kamapim.—Mak 4:33; skelim wantaim Jon 16:12.
Pilim Tru Ol Samting God i Save Givim Yumi
Jisas i bin skulim skulim gen ol man long wanpela tok planti taim. Tru, tingting inap kisim kwik wanpela tok—olsem wanpela lo bilong Baibel—tasol bilong putim gut long tingting na bel na mekim i kamap olsem wanpela pasin bilong Kristen i “kamap nupela,” yumi mas lusim sampela hap taim. Dispela i bikpela samting sapos ol olpela pasin bilong dispela graun i pas strong long tingting bilong man. (Efesus 4:22-24) Dispela i stret long ol disaipel bilong Jisas, long wanem, ol i mas wok strong long lusim pasin antap na kisim pasin daun. Planti taim Jisas i mas skulim ol long pasin daun. Long olgeta dispela taim em i bihainim narapela narapela pasin bilong skulim ol long dispela wankain tok, bambai dispela tok inap i go insait long bel bilong ol. Na bihain ol disaipel i kisim dispela tok.—Matyu 18:1-4; 23:11, 12; Luk 14:7-11; Jon 13:5, 12-17.
Long taim bilong yumi, ol miting Kristen na ol buk na nius samting bilong Sosaiti Was Taua i save bihainim pasin bilong Jisas na planti taim ol i save kamapim gen ol wankain tok. Olsem na yumi mas pilim tru dispela samting na tingim olsem em samting God i givim long yumi na i kamapim sori bilong em na yumi no ken les long kisim ol dispela samting, olsem ol Israel i bin mekim long mana. Tru tumas, taim yumi no les long kisim gut ol tok Jehova i save skulim yumi long en long olgeta taim, dispela bai helpim gut yumi long i stap bilong yumi. (2 Pita 3:1) Dispela pasin bilong pilim gut ol samting, i kamapim stret olsem yumi save pilim “as bilong tok” bilong Baibel long bel na tingting bilong yumi. (Matyu 13:15, 19, 23) Man bilong raitim Song, em Devit, em i stap olsem gutpela piksa. Maski em i no gat rot bilong kisim narapela narapela kaikai bilong spirit olsem nau yumi gat, em i tok olsem lo bilong Jehova i “swit tumas na i winim hani. Em i winim tru gutpela switpela hani.”—Song 19:10.
“Mana” Bilong Givim Laip Oltaim
Jisas i bin tokim ol Juda olsem: “Mi yet, mi bret bilong laip. Ol dispela tumbuna bilong yupela ol i kaikai mana long ples nating, ol i dai pinis. . . . Mi dispela bret i gat laip na i lusim heven na i kam daun. Sapos wanpela man i kaikai dispela bret, em bai i gat laip i stap oltaim. . . . Na dispela bret mi bai givim long em, em i bodi bilong mi. Mi givim bai ol manmeri bilong graun ol i ken kisim laip.” (Jon 6:48-51) Bret tru tru o mana, i no bin givim laip oltaim long ol man na i no inap givim laip oltaim long ol. Tasol ol manmeri i bilip long ofa bilong Jisas bilong baim bek ol manmeri, ol bai kisim laip oltaim.—Matyu 20:28.
Planti bilong ol manmeri em ofa bilong Jisas i helpim ol, ol bai i stap oltaim oltaim long graun i kamap paradais. “Planti manmeri tru” bilong dispela lain—em dispela “planti arapela lain manmeri” i bin lusim Isip wantaim lain Israel i olsem piksa bilong ol—ol bai abrusim bikpela hevi tru em bai pinisim olgeta hevi na pasin nogut long dispela graun. (KTH 7:9, 10, 14; Kisim Bek 12:38) Na ol lain em ol Israel yet i olsem piksa bilong ol, ol bai kisim bikpela blesing moa. Aposel Pol i toktok long ol dispela lain, em namba bilong ol inap 144,000, olsem ol i “Israel tru bilong God.” Pe ol bai kisim taim ol i dai, em ol bai kirap bek na kisim laip long heven. (Galesia 6:16; Hibru 3:1; KTH 14:1) Long heven Jisas bai givim narapela kain mana long ol.
‘Mana i Stap Hait’
Jisas, nau i kirap bek pinis, em i tokim ol Israel bilong spirit olsem, “Sapos man i winim pait, orait mi bai givim em sampela mana nau i stap hait.” (KTH 2:17) Dispela mana i stap hait em i wanpela tok piksa na i kirapim yumi long tingim mana em God i bin tokim Moses long putim long wanpela sospen gol na putim insait long Bokis Kontrak. Dispela Bokis i stap insait long Rum Tambu Tru bilong haus lotu sel. Ol man i no inap lukim, na i olsem em i stap hait. Ol i putim dispela mana bilong tingim gen ol samting i bin kamap, na taim dispela mana i stap insait long Bokis Kontrak em i no bin bagarap. Olsem na dispela i stret tru bilong makim kaikai i no save bagarap. (Kisim Bek 16:32; Hibru 9:3, 4, 23, 24) Taim Jisas i givim dispela mana i stap hait long ol 144,000, em i kamapim klia olsem ol bai kisim bodi i no save dai o bagarap na ol bai kamap olsem ol pikinini spirit bilong God.—Jon 6:51; 1 Korin 15:54.
Man bilong raitim Song i tok: “Yu as tru bilong laip bilong olgeta samting.” (Song 36:9) I stret dispela stori bilong mana—mana tru tru na mana long tok piksa—i strongim dispela as tok i tru! Mana God i bin givim long ol Israel, na dispela narapela kain mana em i bin givim, em bodi bilong Jisas bilong baim bek yumi, na dispela mana i stap hait em i givim long ol 144,000 long rot bilong Jisas, ol i kirapim yumi olgeta long tingim olsem, bilong stap laip yumi mas wetim God tasol i helpim yumi. (Song 39:5, 7) Long pasin daun, yumi mas mekim ol samting i kamapim olsem yumi wetim Jehova tasol long helpim yumi long olgeta taim. Na Jehova bai ‘mekim ol gutpela samting i kamap long yumi’ long bihain.—Lo 8:16.
[Ol Piksa long pes 26]
Bilong kisim laip oltaim, olgeta manmeri i mas wetim “dispela bret i gat laip na i lusim heven na i kam daun,” em i helpim ol
[Piksa long pes 28]
Taim yumi go long olgeta miting Kristen, dispela i kamapim klia olsem yumi pilim tru ol samting Jehova i skulim yumi long en