Sapta 10
Ol Spirit Nogut i Gat Strong
1. Bilong wanem planti manmeri i ting ol inap toktok wantaim ol man i dai pinis?
SAMPELA man i tok, ol i bin toktok wantaim ol man i dai pinis. Wanpela bikpela bisop (James A. Pike) bipo em i tok, em i bin toktok wantaim pikinini man bilong em i dai pinis. Em i tok, pikinini i tokim em: “Planti manmeri i stap wantaim mi, na sampela han i litimapim mi . . . Taim mi no tokaut yet long yu long dispela samting mi stap bel hevi.”
2. (a) Bilong wanem i no gat wanpela man em inap toktok wantaim ol man i dai pinis? (b) Olsem na i gat wanem ol askim?
2 Planti manmeri i tok ol i bin toktok wantaim man i dai pinis, olsem na yumi save ol i bin toktok wantaim sampela spirit. Tasol ol i no bin toktok wantaim ol man i dai pinis. Baibel i tok klia: “Ol man i dai pinis ol i no save long wanpela samting.” (Eklisiastis 9:5, NW) Orait, ol i toktok wantaim husat? Husat ol i stap long ples spirit na ol i giamanim ol man na ol man i ting ol man i dai pinis i toktok wantaim ol?
3. (a) Husat ol i save giamanim ol man na ol man i ting em ol man i dai pinis? Bilong wanem ol i giamanim ol man olsem? (b) Planti taim ol spirit nogut i givim save long husat?
3 Em ol spirit nogut tasol, olsem ol ensel nogut. Taim Seten i bikhet long God, ol tu i bikhet. Tasol bilong wanem ol i laik giamanim ol man olsem? Ol i laik bai ol man i ting, taim yumi dai yumi no i dai tru, yumi stap laip yet long wanpela hap. Bilong helpim dispela tok giaman i kamap bikpela, ol spirit nogut i givim narapela kain save long ol wailis bilong ol na long ol glasman na posinman, na ol man i ting ol man i dai pinis i as bilong dispela save.
WANPELA SPIRIT NOGUT I MAKIM SAMYUEL
4. (a) Bilong wanem King Sol i tingting planti? (b) Lo bilong God i tok wanem long ol wailis bilong ol spirit na ol glasman?
4 Baibel i stori long wanpela spirit nogut em i giaman na makim Samyuel, wanpela profet bilong God em i dai pinis. Dispela samting i kamap taim Sol i stap king long Isrel inap 39 yia pinis. Ami bilong ol Filistia i kam pait wantaim ami bilong Sol na Sol i pret nogut tru. Sol i save long lo bilong God i tok: “Yupela i no ken i go long wailis bilong ol spirit, yupela i no ken singautim glasman, nogut yupela i kamap doti.” (Levitikas 19:31, NW) Tasol Sol i bin lusim Jehova. Long dispela taim Samyuel i stap laip yet, olsem na Samyuel i no bin toktok moa wantaim Sol. (1 Samyuel 15:35) Orait, taim ol Filistia i kam pait Sol i tingting planti, long wanem em i singaut singaut long Jehova na Jehova i no harim.
5. (a) Sol i go askim husat long helpim em? (b) Dispela wailis bilong ol spirit i mekim wanem?
5 Sol i laik tru long save wanem samting bai kamap, olsem na em i go lukim wanpela meri i stap long Endo em i save toktok wantaim ol spirit. Dispela meri i singautim Samyuel na wanpela spirit i kamap. Meri i tokim Sol em i lukim wanpela lapun i kamap em i pasim longpela klos. Sol i tok: “Em Samyuel tasol.” Dispela spirit nogut i giamanim Sol na Sol i ting em i Samyuel. Dispela spirit i tok: “Bilong wanem yu kirapim mi?” Sol i tok: “Mi gat bikpela hevi. Ol Filistia i kam pait long mi.” Dispela spirit i tok: “Bilong wanem yu singautim mi? Jehova yet em i lusim yu pinis na em i birua long yu.” Na dispela spirit nogut i tokim Sol, ol Filistia bai kilim em i dai long pait.—1 Samyuel 28:3-19, NW.
6. Olsem wanem yumi ken save, dispela spirit i toktok wantaim Sol em i no Samyuel?
6 Dispela spirit em meri i singautim em i kam em i no Samyuel. Samyuel i dai pinis, na yumi save ol man i dai pinis ol i “tanim i kamap graun gen” na tingting bilong ol i pinis. (Sam 146:4) Na tu Samyuel em i wanpela profet bilong God. Olsem na em i no laik tru long ol wailis bilong ol spirit. Taim Samyuel i stap laip yet na Sol i bikhet long God, Samyuel i no save toktok moa wantaim Sol. Orait taim Samyuel i dai pinis, yu ting wanpela wailis bilong ol spirit inap singautim em i kam toktok wantaim Sol? Na Jehova i sakim Sol, olsem na yu ting wanpela wailis bilong ol spirit em inap subim Jehova long givim sampela tok long Sol long maus bilong Samyuel? Na sapos tru ol man i stap laip yet ol inap toktok wantaim ol man i dai pinis, orait taim ol i go long wanpela wailis bilong ol spirit bilong mekim olsem, yu ting God bilong sori bai tok ol i “kamap doti”?
7. God i givim wanem toksave long lain bilong em bambai ol spirit nogut i no ken mekim nogut long ol?
7 Ol spirit nogut i laik nogutim ol man, olsem na Jehova i givim toksave long ol boi bilong em bilong lukautim ol. Em i toksave long ol Isrel long sampela pasin bilong ol spirit nogut long giamanim ol man. Em i tok: “Yupela i no ken larim sampela man i stap insait long lain bilong yupela, olsem . . . man i save wokim wanpela samting bilong kamapim save, o man bilong wokim majik, o man bilong painimaut ol samting i laik kamap bihain, o man bilong wokim posin, o man bilong wailisim narapela man, o man bilong singautim wailis bilong ol spirit, o glasman, o man bilong singautim man i dai pinis. Long wanem Jehova i nolaik tru long ol man i mekim ol kain pasin olsem.” (Diuteronomi 18:10-12, NW) Gutpela sapos yumi save long ol samting ol spirit nogut i mekim long nau bilong giamanim na nogutim ol man, na bai yumi inap sakim ol. Tasol yumi laik save, wanem taim ol spirit nogut i bin kamap? Na ol i kamap olsem wanem? Orait, nau yumi ken stori long dispela samting.
SAMPELA ENSEL I KAMAP SPIRIT NOGUT
8. (a) Seten i pulim husat moa na ol i bikhet long God? (b) Ol i lusim wok bilong ol long heven na ol i go we?
8 Wanpela ensel i mekim tok giaman long Iv long Iden na em i kamap ensel nogut, em Seten. Bihain em i wok long pulim ol narapela ensel tu long bikhet long God na em i pundaunim sampela. Olsem na sampela i lusim wok God i bin givim long ol long heven na ol i kam daun long graun. Ol i tanim i kamap man. Disaipel Kristen Jut em i stori long dispela samting, olsem: “Bipo sampela ensel tu, ol i no i stap gut long namba wan bikpela wok bilong ol. Nogat. Ol i lusim ples bilong ol.” (Jut 6) Bilong wanem ol i kam daun long graun? Seten i kirapim wanem laik nogut long bel bilong ol na ol i lusim gutpela wok bilong ol long heven?
9. (a) Bilong wanem ol dispela ensel i kam daun long graun? (b) Baibel i tok wanem na yumi ken save, dispela samting ol i mekim em i no stret?
9 Baibel i tok olsem: “Ol pikinini bilong God i lukim ol dispela meri i luk nais tumas. Na ol wan wan i pulim meri long laik bilong ol yet na maritim ol.” (Jenesis 6:2) Ol ensel i kam daun long graun, na ol i tanim i kamap man na maritim ol meri i gat gutpela gutpela skin. Tasol i no stret ol ensel i mekim olsem. Ol i bikhet na ol i mekim. Baibel i tok, pasin ol i mekim i nogut wankain olsem pasin bilong ol Sodom na Gomora. (Jut 6, 7) Wanem samting i kamap?
10, 11. (a) Ol dispela ensel i kamapim wanem kain pikinini? (b) Long taim bilong Tait Wara wanem samting i painim ol draipela man? (c) Tasol olsem wanem long ol ensel long taim bilong Tait?
10 Ol dispela ensel wantaim meri bilong ol i kamapim pikinini. Tasol ol dispela pikinini i narapela kain. Ol i go bikpela na kamap draipela man. Ol i man nogut. Baibel i tok, ol i “strongpela man tru na ol i gat biknem.” Ol dispela draipela man i laik subim olgeta manmeri long mekim pasin nogut wankain olsem ol. Olsem na Baibel i tok, “pasin bilong ol man long olgeta hap i nogut tru. Ol i tingting tasol long ol samting nogut.” (Jenesis 6:4, 5) Olsem na Jehova i salim Tait Wara i kam. Ol dispela draipela man na olgeta man nogut ol i bagarap. Tasol olsem wanem long ol dispela ensel i bin kam daun long graun?
11 Ol i no bagarap long tait wara. Ol i tanim i kamap spirit gen na ol i go bek long heven. Tasol God i no larim ol i go bek insait long lain bilong em long heven na bung gen wantaim ol ensel holi. Baibel i tok: “Ol sampela ensel bipo ol i mekim sin, tasol God i no larim ol. Nogat. Em i kalabusim ol i stap long [Tartarus], long hul tudak nogut tru. Nau ol i kalabus i stap bilong wetim kot.”—2 Pita 2:4.
12. (a) Taim ol ensel nogut i go bek long heven, wanem samting i painim ol? (b) Bilong wanem ol i no inap tanim i kamap man gen? (c) Olsem na nau ol i mekim wanem?
12 Ol dispela ensel nogut ol i no kalabus long wanpela ples tru ol i kolim Tartarus. Nogat. Sampela Baibel i tanim kranki dispela tok na ol i raitim olsem “hel.” Tasol em i no stret. Dispela tok Tartarus i makim God i daunim tru ol dispela ensel nogut. Ol i no inap kisim save moa long ol samting bilong God; i olsem ol i stap long tudak. Ol i wetim kot na bai ol i bagarap olgeta. (Jems 2:19; Jut 6) Tait i pinis na bihain God i pasim ol dispela ensel na ol i no inap tanim i kamap man gen. Ol i no gat rot bilong maritim ol meri na inapim ol laik nogut bilong skin bilong ol. Tasol ol i gat bikpela strong na ol inap bosim ol man na meri na nogutim ol, na long rot bilong ol Seten i “giamanim olgeta manmeri bilong graun.” (Revelesen 12:9) Long nau pasin bilong bagarapim meri, na pait na kilim man i dai, na ol narapela pasin nogut i go bikpela. Olsem na yumi mas was gut, nogut ol dispela spirit i giamanim yumi na pulim yumi i go long rot nogut.
ROT BILONG OL I GIAMANIM YUMI
13. (a) Ol spirit nogut i save giamanim ol man olsem wanem? (b) Wok bilong ol spirit em wanem ol kain wok? Baibel i tok wanem long ol dispela kain wok?
13 Olsem yumi lain pinis, Seten em i “god giaman bilong dispela graun,” na long rot bilong ol gavman bilong graun na ol lotu giaman em i pasim tingting bilong ol man na ol i no bilip long ol tok i tru bilong Baibel. (2 Korin 4:4) Na ol spirit nogut i giamanim ol man long rot bilong posin na kain kain wok marila tu. Tasol posin na marila na ol kain wok olsem bilong oraitim sik samting, em wok bilong ol spirit nogut? Tru tumas, ol manmeri i mekim ol dispela kain wok ol i mekim wok bilong ol spirit nogut. Ol i toktok wantaim ol spirit nogut na ol spirit nogut i bosim ol. Tasol Baibel i toksave olsem: Yumi mas klia long olgeta wok bilong ol spirit nogut.—Galesia 5:19-21; Revelesen 21:8.
14. (a) Wanem wanpela wok bilong ol spirit nogut planti manmeri i save mekim? (b) Baibel i tok wanem long dispela samting?
14 Planti manmeri i laik painim save long samting bai i kamap bihain o i stap hait. Ol i save singautim ol spirit bilong helpim ol long kisim dispela save. Em wanpela wok bilong ol spirit nogut. Luk i stori olsem: “Wanpela slev meri . . . i gat spirit nogut i stap long en, na spirit i save kamapim tok hait. Na meri i save askim dispela spirit long kain kain tok, na spirit i save bekim. Olsem na ol bosman bilong dispela meri ol i save kisim planti pe long dispela.” Tasol Pol i tok na dispela spirit i lusim meri, na meri i no inap kamapim moa tok hait o kolim samting bai kamap bihain.—Aposel 16:16-19.
15. (a) Kolim sampela samting ol manmeri i mekim na em i wok bilong ol spirit nogut. (b) Sapos yumi insait long ol dispela kain wok, bilong wanem em i nogut?
15 Ol wok bilong ol spirit nogut i save pulim tingting bilong planti manmeri. Olsem na ol i traim kain kain wok marila, olsem marilaim meri, na ol i laik kisim save long rot bilong driman, na ol i lukluk long ol pisin o sta samting bilong painim save, na ol i mekim wok long kain kain samting, olsem buai gorgor kawawar tanget samting. Sampela man i save kaunim ol buk o lukim ol piksa wokabaut i stori long ol dispela samting. O ating ol i go bung taim wanpela wailis i laik toktok wantaim ol spirit. Tasol man i laik mekim wok bilong God, nogut em i mekim ol dispela kain wok. Dispela samting inap bagarapim em. Na bihain bai God i skelim long kot na rausim olgeta manmeri i mekim posin na marila samting.—Revelesen 22:15.
16. Baibel i tok wanem na yumi save, ol Kristen i gat pait wantaim ol spirit nogut?
16 Maski man i klia long ol dispela wok bilong ol spirit, tasol ating bai ol spirit nogut i wok long traim em. Seten i traim Krais Jisas. Em i tokim Jisas long mekim sampela samting na bai Jisas i brukim lo bilong God. (Matyu 4:8, 9) Na ol spirit nogut i bin traim ol narapela boi bilong God tu. Aposel Pol i tok: “Yumi pait wantaim olgeta spirit nogut i stap antap.” Olsem na yumi mas kisim “olgeta klos pait” God i save givim long yumi bambai yumi inap sakim ol spirit nogut.—Efesas 6:11-13.
SAKIM OL SPIRIT NOGUT
17. Sapos wanpela “nek” i kamap nating na i toktok long yu, yu mas mekim wanem?
17 Sapos yu harim wanpela “nek” i kamap nating, olsem wanpela spirit i toktok long yu, yu mas mekim wanem? Olsem wanem sapos dispela “nek” i laik giamanim yu na em i tok em i wanpela wanblut i dai pinis, o em i tok em i wanpela gutpela spirit? Taim “hetman bilong ol spirit nogut” em i toktok long Jisas, Jisas i mekim wanem? (Matyu 9:34) Em i tok: “Seten, yu klia!” (Matyu 4:10) Yu tu yu ken mekim olsem. Na yu ken singaut long Jehova. Yu ken beten kolim long maus, na kolim strong nem bilong God. Na yu no ken lusim tingting, strong bilong God i winim strong bilong ol spirit nogut. Em gutpela rot bilong sakim ol spirit nogut. Yu no ken putim yau long “nek” bilong ol spirit. (Provep 18:10; Jems 4:7) Sampela taim man i gat sik long skin o long tingting na em i ting em i harim wanpela “nek” i toktok, tasol ating i no wanpela spirit nogut i toktok long em.
18. Sapos man i laik lusim ol wok bilong ol spirit nogut, em i ken bihainim wanem gutpela pasin bilong ol Kristen bilong Efesas?
18 Ating bipo yu bin mekim wok marila samting, tasol nau yu laik lusim olgeta wok bilong ol spirit nogut. Orait yu ken mekim wanem? Tingim ol samting ol nupela Kristen bilong Efesas i bin mekim. Baibel i tok ol dispela manmeri “i bin mekim posin na marila samting, ol i bungim buk bilong ol na kukim long paia long ai bilong olgeta manmeri.” Pe bilong ol dispela buk em inap 50,000 mani silva! (Aposel 19:19, 20) Sapos yu holim sampela samting bilong mekim wok bilong ol spirit, orait yu ken bihainim pasin bilong ol dispela Kristen bilong bipo. Maski ol dispela samting i gat bikpela pe, yu ken brukbrukim o kukim long paia samting.
19. (a) Ol manmeri i mekim kain kain wok marila, ol i no save ol i mekim wanem? (b) Sapos yumi laik i stap oltaim long graun na i stap amamas, yumi mas mekim wanem?
19 Long nau planti manmeri i laik save long ol samting i narapela kain o i stap hait na ol i mekim kain kain wok marila samting. Ol i no save ol i mekim wok bilong ol spirit nogut. Tasol posin na ol kain wok marila i no samting bilong pilai tasol. Nogat. Ol spirit nogut i gat strong na ol inap nogutim na bagarapim ol manmeri. Ol i gat laik long bagarapim ol. Bihain bai Krais i kalabusim ol spirit nogut na bai ol i bagarap olgeta. Tasol pastaim ol i wok strong long pulim ol manmeri long bihainim ol bambai ol manmeri i ken i stap aninit long strong bilong ol. (Matyu 8:28, 29) Olsem na sapos yu laik i stap oltaim long graun na i stap amamas taim olgeta pasin nogut i pinis, orait yu mas klia long olgeta kain wok bilong ol spirit nogut.
[Piksa long pes 91]
Wailis bilong ol spirit em i stap long Endo em i singautim Samyuel, tasol husat i kamap?
[Ol Piksa long pes 92, 93]
Ol pikinini bilong God long heven, em ol ensel, ol i lukim ol meri bilong graun
[Piksa long pes 94]
Ol ensel i bin tanim i kamap man ol i no bagarap long tait wara. Ol i tanim i kamap spirit gen na ol i go bek long heven
[Piksa long pes 97]
Baibel i toksave olsem: ‘Yu mas klia long olgeta kain wok bilong ol spirit nogut’
[Piksa long pes 98]
Taim sampela manmeri bilong Efesas i kamap Kristen ol i kukim buk bilong ol i stori long rot bilong mekim posin na marila—ol i makim gutpela pasin yumi ken bihainim long nau