As na Yu Mas Abrusim Wok Bilong Ol Spirit
SAPOS ol man i bin lainim yu olsem sampela wok bilong ol spirit ol i rot bilong toktok wantaim ol gutpela spirit, ating bai yu kirap nogut long save long tok Baibel i mekim long dispela samting. Em i tok: “Yupela i no ken i go askim ol man i save toktok wantaim . . . ol man i dai pinis, long kisim tingting long ol . . . na givim long yupela. Sapos yupela i mekim olsem bai yupela i kamap doti tru long ai bilong mi.”—Wok Pris 19:31; 20:6, 27.
Baibel i tok, Jehova “i no laikim tru” ol manmeri i save mekim wok bilong ol spirit. (Lo 18:11, 12) Bilong wanem? Taim yumi skelim tok Baibel i mekim long wanpela bikpela hap wok bilong ol spirit—ol i tok ol inap toktok wantaim ol man i dai pinis—bai yumi kisim bekim long dispela askim.
Yu Ting Ol Man i Dai Pinis Ol i Stap Laip?
Baibel i tok, ol man i no inap toktok wantaim ol famili i dai pinis, tasol planti manmeri i ting ol inap mekim olsem. Bilong wanem ol i no inap toktok wantaim ol? Sapos wanpela man i toktok wantaim man i dai pinis, dispela daiman i mas i stap laip yet. I mas i gat wanpela hap bilong ol i no save dai. Sampela ol i tok tewel bilong man i stap laip taim bodi i dai. Olsem wanem? Dispela tok em i tru?
Baibel i stori long taim God i bin wokim man, olsem: “God Jehova i kisim graun na em i wokim man long en, na em i winim win bilong laip i go insait long nus bilong man, na man i kamap wanpela man i gat laip.” (Stat 2:7, NW ) Dispela tok i kamapim klia olsem man i gat laip na em i no gat wanpela tewel i save stap laip taim bodi i dai pinis. Baibel i tok: “Sapos wanpela man i mekim sin, dispela man tasol i mas i dai.” (Esekiel 18:4) “Ol man i gat laip i winim ol man i dai pinis. Long wanem, ol i save wanpela samting bai i kamap long ol. Ol i save bai ol i dai. Tasol ol man i dai pinis, ol i no inap save long wanpela samting. . . . Bai yu no inap mekim wok o tingting o kisim gutpela tingting na save long ples bilong ol man i dai pinis.”—Saveman 9:5, 10.
Olsem na Baibel i kamapim klia olsem man i no gat wanpela tewel i save stap laip yet taim em i dai, na ol man i stap laip ol i no inap toktok wantaim tewel. Orait nau mipela i laik kamapim tok bilong tupela saveman i gat nem em ol i ting taim man i dai em i dai tru. Wanpela tisa bilong lotu long Kanada, Clark H. Pinnock, em i tok: “Dispela tingting [olsem yumi gat tewel i no inap i dai] em i bin bosim tingting bilong ol lotu inap longtaim tru, tasol dispela tingting em i no bilong Baibel. Baibel i no lainim yumi olsem yumi gat tewel i no save dai.” Saveman John R. W. Stott, em tu i tok: “Bilip bilong tewel i no save dai, olsem em i no inap bagarap, em i wanpela bilip bilong ol Grik na i no bilong Baibel.”
Tasol ol man i save kisim ol toksave na harim sampela nek i olsem nek bilong ol man i dai pinis. Orait husat i toktok?
Toktok Wantaim Husat?
Olsem man i mekim wok long wanpela doli na tromoi tok long maus bilong en, Baibel i tok wanpela spirit i bin mekim wok long snek bilong toktok wantaim namba wan meri, Iv, na em i kirapim em long bikhet long God. (Stat 3:1-5) Baibel i tok dispela spirit o ensel, em i “dispela snek bilong bipo yet, na ol i kolim em Satan na ‘Man I Save Kotim Olgeta Manmeri.’ Em i man bilong giamanim olgeta manmeri bilong graun.” (KTH 12:9) Dispela spirit, Satan, em i pulim sampela narapela ensel long bikhet long God. (Jut 6) Ol i kolim ol dispela ensel nogut olsem ol spirit nogut na ol i birua bilong God.
Baibel i soim yumi olsem ol spirit nogut i gat strong long stiaim ol manmeri. (Luk 8:26-34) Olsem na yumi no kirap nogut long Lo bilong God i tok: “Yupela i no ken . . . mekim olkain pasin bilong glasman, na pasin tambaran na pasin sanguma na wokim posin na mekim marila. Na yupela i no ken toktok wantaim tewel bilong ol man i dai pinis. God, Bikpela bilong yumi, i no laikim tru ol manmeri i save mekim ol dispela kain pasin nogut.” (Lo 18:10-12) Wanem samting inap kamap sapos man i sakim dispela lo?
Samting i painim King Sol bilong Israel long bipo i bekim dispela askim. King Sol i pret long ol birua bilong em, olsem na em i go lukim wanpela wailis bilong ol spirit. Em i askim dispela wailis long toktok wantaim profet Samuel i dai pinis. Taim wailis i tok dispela spirit i olsem wanpela lapun man na em i stori long skin bilong em i luk olsem wanem, orait Sol i ting em i Samuel. Na dispela spirit i tok wanem long Sol? Ol birua bai daunim ol Israel, na Sol na ol pikinini man bilong em ol bai stap wantaim “Samuel”—dispela tok i makim olsem bai ol i dai. (1 Samuel 28:4-19) God i mekim wanem taim Sol i go toktok wantaim wailis bilong ol spirit? Baibel i tok: “Sol i dai, long wanem, em i no bihainim tok bilong Bikpela. . . . Na em i askim . . . man i dai pinis long soim em wanem rot em i mas bihainim.” (1 Stori 10:13) Man! Em i kisim pe nogut tru long pasin em i bin mekim, a?
Long nau tu, ol samting nogut tru inap painim ol manmeri i insait long wok bilong ol spirit nogut. Baibel i tok, “ol man i wokim posin na i yusim ol arapela kain pawa” ol bai kisim “namba 2 dai” olsem ol bai pinis olgeta. (KTH 21:8; 22:15) Olsem na em i savepasin na em bai helpim yumi long abrusim bagarap sapos yumi sakim olgeta kain wok bilong ol spirit nogut.
Rot Bilong Sakim Ol Spirit Nogut
Olsem wanem sapos yu insait pinis long wok bilong ol spirit nogut? Em i gutpela sapos yu mekim hariap ol samting bilong lukautim yu yet na famili bilong yu bambai ol spirit nogut i no ken bagarapim yupela. Yu mas mekim wanem ol samting? Yumi ken tok piksa olsem: Man i mas mekim wanem bilong lukautim haus na famili bilong em long ol binatang nogut? Taim em i rausim pinis ol binatang long haus, em i mas rausim tu ol samting i save pulim ol binatang i kam long haus. Em i mas stretim ol hul na strongim ol banis bilong pasim rot bilong ol binatang, na sapos ol binatang i stap yet, ating em bai askim sampela lain long helpim em long stretim dispela hevi.
Yu ken mekim wankain samting bilong sakim ol spirit nogut na long lusim wok bilong ol. Tingim pasin bilong ol Kristen long Efesus long taim bilong ol aposel, em ol i bin insait long wok bilong ol spirit nogut taim ol i no kamap Kristen yet. Taim ol i pasim tok pinis long bel long lusim wok bilong ol spirit nogut, ol i mekim 3-pela samting bilong lukautim ol yet long ol samting bilong ol spirit nogut. Ol i bin mekim wanem?
Namba Wan Samting
Baibel i tok: “Planti manmeri i bin wokim posin na marila samting, ol i bungim ol buk bilong ol i gat tok long pasin bilong wokim ol dispela samting, na ol i kukim long paia long ai bilong olgeta manmeri.” (Aposel 19:19) Ol i bagarapim ol buk bilong ol i stori long wok marila samting, olsem na ol dispela nupela Kristen i stap olsem gutpela piksa long ol man i laik sakim ol spirit nogut long nau. Rausim olgeta samting bilong wok bilong ol spirit nogut. Ol dispela samting em ol buk, nius, buk komik, video, piksa, Intenet samting, na ol kaset na CD em ol i kamapim ol samting bilong wok bilong ol spirit nogut, na tu, ol paspas o ol narapela samting ol man i save mekim wok long en bilong “lukautim” ol yet.—Lo 7:25, 26; 1 Korin 10:21.
Wanpela man long Saut Amerika em i bin insait tru long wok bilong ol spirit nogut inap planti yia, em i bihainim dispela tok bilong Baibel. Em i tok: “Wanpela de mi bungim olgeta samting bilong wok bilong ol spirit nogut na putim long ai bilong haus bilong mi, na mi kisim tamiok na katim ol i go liklik.” Na em i kukim olgeta samting long paia i go inap long ol i pinis olgeta. Bihain long dispela em i kamap strong long ol samting bilong spirit, na bihain liklik em i kamap strongpela wokman bilong autim tok long wanpela kongrigesen bilong ol Witnes Bilong Jehova.
Tasol dispela namba wan samting man i mas mekim em i no inap. Bilong wanem? Inap sampela yia bihain long ol dispela Kristen long Efesus ol i bin bagarapim ol buk i stori long wok marila samting, aposel Pol i tok: “Yumi pait long olgeta spirit nogut i stap antap.” (Efesus 6:12) Ol spirit nogut i no bin lusim wok bilong ol. Ol i traim yet long pulim ol dispela Kristen. Ol i mas mekim wanem samting moa?
Namba Tu Samting
Pol i tokim ol Efesus long taim bilong ol aposel: “Yupela i mas pasim olgeta klos pait God i save givim long yumi, na bai yupela inap long sanap strong na sakim olgeta kain pasin bilong trik na giaman Satan i save hait na mekim.” (Efesus 6:11) Dispela tok i stret long nau tu. Olsem man i wok strong long pasim rot bilong ol binatang long kam insait long haus bilong em, Kristen i mas strongim em yet bambai em i ken sakim ol spirit nogut. Bilong mekim dispela namba tu samting man i mas mekim wanem?
Pol i tok: “Yupela i mas kisim dispela olgeta samting bilong pait, na yupela i mas kisim tu pasin bilong bilip, na holim strong olsem hap plang, bai yupela inap long mekim i dai olgeta spia paia dispela man nogut Satan i save sutim i kam long yupela.” (Efesus 6:16) Yu mas i gat dispela kain bilip. Taim bilip bilong yu i wok long kamap strong moa, bai yu inap strong moa long sakim ol spirit nogut.—Matyu 17:20.
Olsem wanem yu ken strongim yu yet long sakim ol spirit nogut? Wok yet long stadi long Baibel. Pasin bilong stadi long Baibel inap mekim wanem long bilip bilong yu? Sapos as bilong haus i strong, orait banis tu bai strong, na olsem tasol bilip bilong man bai strong sapos as bilong bilip bilong em i strong. Wanem samting i olsem as bilong bilip?
Stretpela save long Tok Bilong God. Aposel Pol i tok: “Orait yumi save, yumi harim tok bilong God na dispela i kirapim bilip. Na dispela tok yumi harim, em i kamap long maus bilong Krais.” (Rom 10:17) Yu ken askim wanpela Witnes Bilong Jehova long stadi long Baibel wantaim yu, na yu yet i ken makim taim na ples bilong mekim dispela stadi. Kain stadi olsem bai strongim bilip bilong yu. (Rom 1:11, 12; Kolosi 2:6, 7) Dispela bai kamapim wanem samting? I no longtaim na bilip bilong yu bai kamap olsem wanpela strongpela hap plang i lukautim yu long wok bilong ol spirit nogut.—Song 91:4; 1 Jon 5:5.
Wanem namba 3 samting ol Kristen long Efesus i mas mekim?
Namba Tri Samting
Long Efesus long bipo ol dispela nupela bilipman ol i bin mekim ol samting bilong sakim ol spirit nogut, tasol ol dispela Kristen i stap yet long wanpela taun em wok bilong ol spirit nogut i pulap long en. Ol i mas mekim sampela samting moa bilong lukautim ol yet. Olsem na taim aposel Pol i raitim pas i go long ol wanbilip bilong em, em i tokim ol long samting ol i mas mekim. Em i tok: “Yupela i mas strong long mekim ol kain kain beten . . . Oltaim yupela i mas was gut bai yupela i no lusim dispela pasin. . . . Oltaim yupela i mas prea na askim God long helpim olgeta manmeri bilong en.”—Efesus 6:18.
Tru tumas, long bipo na long nau tu pasin bilong beten strong long olgeta taim na askim Jehova long lukautim yu, em i wanpela bikpela samting yu mas mekim bilong sakim ol spirit nogut. Na yumi amamas long save olsem Jehova bai harim ol beten bilong yu na lukautim yu, na ol ensel bilong em tu bai helpim yu. (Song 34:7; 91:2, 3, 11, 14; 145:19) Olsem na em i bikpela samting long beten oltaim na askim God olsem, “Yu ken tekewe mipela long ol samting nogut.”—Matyu 6:13; 1 Jon 5:18, 19.
Antônio, bipo em i wanpela wailis bilong ol spirit long Brasil, em i kisim save olsem beten em i bikpela samting. Taim em i kirap stadi long Baibel na kisim save long nem bilong God, Jehova, em i kirap beten strong long God Jehova bambai em i ken helpim em long lusim wok bilong ol spirit nogut. Em i tingting i go bek, na em i tok: “Pasin bilong beten long Jehova em i bin helpim mi na planti narapela man em bipo ol spirit nogut i bin bosim ol.”—Sindaun 18:10.
Yu Inap Lusim
Taim yu kisim pinis save long Jehova, em i bikpela samting long yu mas bilip olgeta long em, na daun long wok bos bilong em, na bihainim tok bilong em. Sapos yu mekim olsem, orait taim yu askim em long helpim yu na yu mekim wok long nem bilong em, em bai lukautim yu. God i givim dispela kain helpim long Antônio. Long nau em i wanpela elda Kristen long wanpela kongrigesen bilong ol Witnes Bilong Jehova long Sau Paulo, na em i amamas tru long em i bin painim tok i tru i helpim em long kamap fri.—Jon 8:32.
Olsem Antônio na planti tausen narapela man em bipo ol i mekim wok bilong ol spirit nogut na nau ol i lotu long God Jehova, yu tu inap lusim dispela wok nogut. Olsem na rausim olgeta samting bilong wok bilong ol spirit nogut, na stadi long Baibel bilong strongim bilip bilong yu, na beten askim Jehova long lukautim yu. Mekim ol dispela samting—long dispela rot yu inap kisim laip!
[Rait long pes 5]
Baibel i tok, ol man i stap laip ol i no inap toktok wantaim ol man i dai pinis
[Piksa long pes 6]
1. Rausim olgeta samting bilong wok bilong ol spirit nogut
[Piksa long pes 7]
2. Wok yet long stadi long Baibel
[Piksa long pes 8]
3. Beten strong na beten planti taim