Bilong Wanem Planti Man i Laik Mekim Wok Bilong Ol Spirit?
Ol i tok wok bilong ol spirit em olsem: “Planti man i bilip olsem yumi gat tewel na taim yumi dai, tewel i lusim bodi na em inap toktok wantaim ol man i stap laip yet, olsem long rot bilong man o meri em i wailis bilong ol spirit.”
LONG 1998, planti manmeri long Amerika ol i baim wanpela buk i stori long olsem wanem man i ken toktok wantaim ol man i dai pinis. Insait long sotpela hap taim tasol, dispela buk i kamap nambawan buk long lista bilong nius New York Times i kolim ol buk em planti man i save baim.
Inap sampela yia i go pinis long Mosko, ol man bilong wok politik na wok bisnis ol i tromoi bikpela mani long baim olkain glasman.
Long Brasil, planti manmeri i save lukim ol program long televisen ol i stori long wok bilong ol spirit.
Long planti manmeri long Afrika na Esia, pasin bilong mekim wok bilong ol spirit em i samting ol i save mekim planti taim, wankain olsem wok bilong maketim ol samting.
As na Planti Ol i Insait Long Wok Bilong Ol Spirit
Planti ol i save insait long wok bilong ol spirit bambai bel bilong ol i ken stap gut taim wanpela bilong famili i dai. Long rot bilong ol wailis bilong ol spirit, ol i kisim narapela kain save na i olsem dispela save i kam long ol man i dai pinis. Dispela i mekim na ol man i krai sori ol i bilip olsem ol famili bilong ol i dai pinis ol i stap laip yet, na ol i ting taim ol i toktok wantaim ol, dispela bai helpim ol long karim bel hevi bilong ol.
Sampela narapela ol i laik insait long wok bilong ol spirit, long wanem, ol i bin harim tok olsem ol spirit bai helpim ol long painim rot bilong oraitim ol sik, na lusim pasin bilong i stap rabis, na kirapim bel bilong man na meri long narapela i laikim narapela, na stretim ol hevi bilong marit, na painim wok mani. Na planti narapela man ol i insait long wok bilong ol spirit, long wanem, ol i laik kisim save long en.
Wanpela saveman bilong wok bilong ol spirit em i kamapim narapela as na planti milion manmeri i save insait long wok bilong ol spirit. Em i tok, ol i bin lainim ol man olsem wok bilong ol spirit em i “wanpela hap wok bilong lotu” ol i bungim “wantaim ol lotu Kristen.” Ol samting bilong lotu long Brasil i kamapim klia dispela samting.
Planti manmeri bilong Brasil ol i bilong Misin Katolik, winim ol narapela kantri, tasol olsem wanpela man bilong raitim buk, em Sol Biderman, em i tok, “planti milion man i stap gut long Misin ol i save laitim kandel long planti alta, na ol i ting em i orait long mekim olsem.” Wanpela nius (Veja) bilong Brasil i tok, inap 80 pesen bilong ol manmeri i save go lukim ol glasman samting, ol i baptais long Misin Katolik na ol i save go long Misa tu. Na sampela pris i save go long bung bilong ol glasman, olsem na yumi ken save bilong wanem planti man i save go long lotu, ol i ting God i orait long ol i toktok wantaim ol spirit bambai ol spirit i ken stiaim ol na mekim gut bel bilong ol. Tasol olsem wanem? God i orait long dispela samting?
[Blok/Ol Piksa long pes 3]
Kain Kain Wok Bilong Ol Spirit
Wok bilong ol spirit em pasin bilong toktok wantaim ol wailis bilong ol spirit, o toktok wantaim ol man i dai pinis, o lukim sampela mak bilong kisim save long ol samting i stap hait. Wanpela wok bilong ol spirit em planti man i save laikim em wok bilong glasman—em wok bilong kisim save long rot bilong ol spirit long ol samting bai kamap bihain o long ol samting i stap hait. Sampela wok bilong glasman em pasin bilong lukluk long ol sta na bal glas, kamapim insait bilong ol driman, lukim ol mak bilong han, na kisim save long ol samting bai kamap bihain long rot bilong ol kas ol i kolim tarot.