Sapta 23
Lain Bilong God Long Graun
1. Baibel i tok wanem long lain bilong God long heven?
OLSEM WANEM yumi inap save tru, God i gat lain bilong em long graun em i save bosim ol? Long wanem, em i gat lain bilong em long heven. Jehova i wokim ol ensel bilong mekim laik bilong em long heven. (Jenesis 3:24; Aisaia 6:2, 3; Sam 103:20) Krais Jisas em i Namba Wan Ensel na em i winim ol dispela narapela ensel. (1 Tesalonaika 4:16; Jut 9; Revelesen 12:7) Ol dispela ensel i gat ol narapela narapela wok bilong ol olsem “ol gavman na ol hetman.” (Kolosi 1:16; Efesas 1:21) Jehova i givim tok long ol na ol i bihainim tok na mekim wok bilong em.—Danyel 7:9, 10; Jop 1:6; 2:1.
2. Taim yumi lukim ol samting God i wokim long graun na long antap, olsem wanem yumi save em i laikim ol samting i bihainim lo?
2 Na taim yumi lukim ol samting God i bin wokim long graun na long antap yumi ken save, em i laikim ol samting i bihainim lo na i no ken mekim nabaut. Tingim ol sta: Ol i planti tru na God i putim ol i stap olsem ol bikpela bikpela lain sta. Ol dispela lain sta na olgeta sta wan wan i gat lo bilong bosim wokabaut bilong ol na ol i bihainim stret rot bilong ol. Na graun tu, long olgeta yia em i save wokabaut raunim san stret tru long taim bilong en, em olsem 365 de na 5-pela aua na 48 minit na 45.51 Sekon.
3. Ol ensel na ol samting God i wokim long graun na long antap, ol dispela samting i save bihainim lo na i wok gut, olsem na yumi save long wanem samting?
3 Ol ensel long heven na ol samting God i wokim long graun na long antap, ol i save bihainim lo na i wok gut. Olsem na yumi save God Jehova em i Man bilong putim lo bilong bosim ol samting. Orait, em i mas putim lo na bosim tu ol manmeri bilong graun ol i givim bel tru long em, laka?
LAIN BILONG GOD LONG GRAUN—BIPO NA NAU
4, 5. Olsem wanem yumi save God i givim lo long Ebraham na long lain Isrel na soim rot long ol?
4 Tru tumas, God i save soim rot long ol wokboi bilong em long graun na givim lo bilong em long ol. Baibel i kamapim klia dispela samting. Ol bilipman bilong bipo, olsem Ebraham, ol i save lotuim Jehova na lainim ol wanhaus na wokboi bilong ol tu long mekim olsem. Jehova i save toktok wantaim Ebraham na tokim em long ol samting em i laik bai Ebraham i mekim. (Jenesis 12:1) Na em i tokim Ebraham em i mas givim ol dispela tok long ol narapela man. God i tok: “Mi makim [Ebraham] pinis bai em i tokim ol pikinini na ol lain tumbuna bilong en, ol i mas bihainim tok bilong mi.” (Jenesis 18:19) Em nau, God i givim lo long wanpela lain bambai ol inap lotuim em long pasin i stret.
5 Bihain ol Isrel i kamap planti na Jehova i no larim ol i mekim nabaut na lotu long em long laik bilong olgeta wan wan yet. Nogat. God i bungim ol olsem wanpela lain bilong lotuim em na em i givim lo bilong em long ol. Dispela lain Isrel ol i kolim “lain manmeri bilong Jehova.” (Nambas 20:4, NW; 1 Kronikel 28:8) Long dispela taim bipo olgeta man i laik lotu tru long Jehova ol i mas insait long dispela lain. Ol i no inap i stap ausait na lotu tru long Em.—Sam 147:19, 20.
6. (a) Jehova i mekim wanem na yumi save em i amamas long lain bilong Krais? (b) Olsem wanem yumi ken save, ol dispela Kristen i bung wantaim olsem wanpela lain na ol i lotuim Jehova?
6 Orait, olsem wanem long taim bilong ol aposel? Ol tok bilong Nupela Testamen i soim yumi, Jehova i amamas long lain bilong Krais, na em i kapsaitim spirit holi long ol. Em i sakim lain Isrel na em i kisim dispela lain Kristen, na bilong kamapim dispela samting em i givim strong long ol dispela Kristen bilong oraitim ol sikman na kirapim bek man i dai pinis na mekim ol narapela strongpela wok. Sapos yumi kaunim ol tok bilong Nupela Testamen yumi ken save, ol dispela Kristen i bung wantaim olsem wanpela lain na ol i lotuim God. God i bin givim lo long ol olsem. (Hibru 10:24, 25) Olsem na long taim bilong ol dispela Kristen bilong pastaim, man i laik lotu tru long Jehova em i mas insait long dispela lain Kristen.
7. Olsem wanem yumi save Jehova i no gat planti lain bilong mekim wok bilong em?
7 Olsem wanem? Sampela taim Jehova i mekim wok long tupela o tripela lain wantaim? Long taim bilong Noa, Noa wantaim lain bilong em ol tasol i go insait long sip. God i lukautim dispela lain tasol na ol i no bagarap. (1 Pita 3:20) Na long taim bilong ol aposel tu, i no gat tupela o tripela lain Kristen. Nogat. God i gat wanpela lain tasol. “I gat wanpela Bikpela tasol, na wanpela bilip tasol, na wanpela baptais tasol.” (Efesas 4:5) Olsem tasol long nau, Krais Jisas i tok bai i gat wanpela rot tasol bilong givim tok bilong God long lain bilong em.
8. Jisas i tok wanem na yumi save, bai God i gat wanpela lain tasol long graun nau long taim bilong yumi?
8 Jisas i stori long taim em bai kam bek olsem King na em i tok: “Wanem wokboi i gat gutpela tingting, na i save lukaut gut long wok bilong en? Bosman bilong dispela man i bin makim em bilong bosim ol arapela wokboi bilong en, na bilong givim kaikai long ol long taim bilong en. Na bihain bikpela man bilong en i kam bek, . . . em bai i putim em i stap bos bilong olgeta samting bilong en.” (Matyu 24:45-47) Orait, taim Krais i kam bek long 1914, yu ting dispela “wokboi” i stap na i givim “kaikai” bilong spirit o save long ol narapela wokboi? Em i stap. Dispela “wokboi” em hap lain bilong ol 144,000 “brata” bilong Krais ol i stap yet long graun. (Revelesen 12:10; 14:1, 3) Kirap long 1914 na i kam inap long nau, planti planti manmeri ol i kisim “kaikai” long dispela lain na ol i bung wantaim ol na lotu tru long God. Olgeta dispela manmeri i mekim wok bilong God ol i kolim Ol Witnes Bilong Jehova.
9. (a) Bilong wanem ol manmeri i mekim wok bilong God ol i kisim nem olsem Ol Witnes Bilong Jehova? (b) Haus lotu bilong ol, bilong wanem ol i kolim Haus Kingdom?
9 Ol Witnes Bilong Jehova i larim God na tok bilong Baibel i soim rot long ol long olgeta samting ol i mekim. Dispela nem Ol Witnes Bilong Jehova i makim nambawan bikpela wok bilong ol, em wok bilong autim tok long nem na kingdom bilong God Jehova, olsem Krais i bin mekim. (Jon 17:6; Revelesen 1:5) Haus lotu bilong ol, ol i kolim Haus Kingdom. Long wanem, kingdom bilong God em i nambawan bikpela tok bilong Baibel. God i amamas long lain Kristen bilong pastaim, olsem na lain Witnes Bilong Jehova i bihainim pasin bilong ol long lukautim wok bilong lain bilong ol. Orait, nau yumi ken skelim dispela lain Kristen bilong pastaim em i wankain olsem wanem long lain bilong God long nau.
LAIN KRISTEN BILONG PASTAIM
10. Wanem sampela samting ol Kristen bilong pastaim i save mekim?
10 Ol Kristen bilong pastaim, ol i save bung wantaim bilong lotuim God. Ol dispela kongrigesen i save bung wantaim bambai narapela i ken strongim narapela na ol i ken lainim tok bilong God. (Hibru 10:24, 25) Nambawan bikpela wok bilong ol em wok bilong autim tok na lainim ol man long Kingdom, olsem Jisas i mekim. (Matyu 4:17; 28:19, 20) Sapos wanpela Kristen long kongrigesen em i kirap bihainim pasin nogut, kongrigesen i rausim em.—1 Korin 5:9-13; 2 Jon 10, 11.
11, 12. (a) Olsem wanem yumi save ol kongrigesen Kristen bilong pastaim i kisim tok long ol aposel na “ol hetman” long Jerusalem bilong stiaim tingting bilong ol? (b) Husat tru i soim rot long ol kongrigesen? (c) Na dispela i mekim wanem long ol kongrigesen?
11 Olgeta wan wan kongrigesen bilong pastaim, yu ting ol i bihainim tingting bilong ol yet na mekim wok? Nogat. Baibel i tok, ol i gat wanpela bilip tasol na ol i stap wanbel. Ol tok bilong stiaim tingting bilong ol, ol i kisim long wanpela rot tasol, long lain hetman bilong ol. Olsem na taim ol i pait long toktok long pasin bilong katim skin, orait olgeta wan wan ol yet i no tingim ol samting ol i mas mekim. Nogat. Ol i salim Pol na Banabas na sampela moa ol “i go long Jerusalem na stretim dispela tok wantaim ol aposel na ol hetman.” “Holi Spirit” bilong God na tok bilong Baibel i givim tingting long ol dispela hetman na ol i tingim ol samting ol Kristen i mas mekim. Taim ol i pasim tok pinis ol i salim sampela gutpela Kristen i go givim dispela tok long ol kongrigesen.—Aposel 15:2, 27-29.
12 Ol dispela tok ol kongrigesen i kisim, God yet i as bilong en. God i givim long ol bilong soim rot long ol. Orait dispela i mekim wanem long ol kongrigesen? Baibel i tok, Pol wantaim ol poroman bilong em ol i “wokabaut i go long ol taun, na dispela tok bipo ol aposel na ol hetman ol i pasim long Jerusalem, em ol i givim long ol Kristen. Na ol i tok, ‘Yupela i mas bihainim dispela.’ Olsem na bilip bilong ol [kongrigesen] i kamap strong moa, na namba bilong ol i go bikpela moa long olgeta de.” (Aposel 16:4, 5) Olgeta kongrigesen i bihainim tok bilong dispela lain hetman long Jerusalem, na ol i kamap strong long bilip.
GOD I BOSIM LAIN BILONG EM LONG NAU
13. (a) Wanem lain i soim rot long lain manmeri bilong God long nau? Dispela lain i stap we long graun? (b) Ol dispela hetman i bosim wok ol i bilong wanem lain? na ol i olsem wanem samting bilong dispela lain?
13 Long nau tu, God i bosim lain manmeri bilong em long graun na ol i kisim tok bilong em bilong soim rot long ol. Long nambawan ofis bilong Ol Witnes Bilong Jehova long Bruklin, Nu Yok, i gat wanpela lain hetman Kristen ol i stap. Ol i kam long ol narapela narapela hap na ol i bosim ol wok bilong lain bilong God long olgeta hap bilong graun. Ol dispela hetman i bosim wok, ol i bilong dispela lain i olsem “wokboi i gat gutpela tingting.” Ol i olsem “maus” bilong dispela “wokboi.”
14. Dispela lain hetman i bosim ol manmeri bilong God long nau, ol i larim wanem samting i stiaim tingting bilong ol?
14 Ol dispela hetman i bosim wok, ol i winim planti yia long wok bilong God na ol i gat save pinis, olsem ol aposel na ol hetman long Jerusalem long bipo. Taim ol i laik tingim wanpela samting bilong helpim ol kongrigesen, ol i no save bihainim tingting bilong ol man. Nogat. Ol i larim tok bilong Baibel na spirit bilong God i stiaim tingting bilong ol, olsem ol hetman long Jerusalem i bin mekim.—Aposel 15:13-17, 28, 29.
BOSIM LAIN BILONG GOD LONG OLGETA HAP
15. Taim yumi lukim tok bilong Jisas long Matyu 24:14 olsem wanem yumi save, long “las taim” bai God i gat wanpela bikpela lain manmeri long graun?
15 Jisas i mekim wanpela tok long Matyu 24:14 na yumi ken save, bai God i gat wanpela bikpela lain manmeri bilong mekim wok bilong Em long “las taim.” Jisas i tok: “Bai ol i autim dispela gutnius bilong kingdom long olgeta hap bilong graun, bai olgeta lain manmeri i ken harim, na bihain tasol bai las de i kamap.” Em i bikpela wok tru, a? Olsem wanem? Lain Kristen bilong nau wantaim ol hetman bilong en, ol inap mekim dispela bikpela wok na autim tok bilong Kingdom long ol dispela planti milion milion manmeri nau ol i stap long graun?
16. (a) Bilong wanem Ol Witnes Bilong Jehova i bin wokim planti bikpela haus faktori? (b) Ol i wokim wanem ol samting long ol dispela haus faktori?
16 Nau Ol Witnes Bilong Jehova i autim tok bilong Kingdom long 200 hap bilong graun na long ol ailan. Winim 3,700,000 manmeri i autim tok (long 1989) na bilong helpim ol long mekim dispela wok, ol i wokim planti bikpela haus faktori. Long ol dispela haus faktori ol i wokim planti planti Baibel na buk na nius. Long olgeta de bilong wok ol i wokim olsem 2 milion samting Wastaua na Kirap! na salim i go long olgeta hap bilong graun.
17. (a) Olgeta dispela buk na nius bilong Baibel em bilong mekim wanem? (b) Ol i laik bai yu mekim wanem?
17 Olgeta dispela buk na nius bilong Baibel em bilong helpim ol manmeri long kisim save long ol gutpela samting Jehova i laik mekim. Long namba wan pes bilong Wastaua ol i raitim tok olsem: “I Kamapim Tok Bilong Kingdom Bilong Jehova.” Mipela laik bai yu wok wantaim mipela long tilim ol dispela buk na nius samting long ol man na helpim ol long save long ol tok i tru bilong Baibel. Yu lain pinis long ol tok bilong dispela buk, nem bilong en Yu Inap i Stap Oltaim long Paradais long Graun. Orait, olsem wanem? Yu save long wanpela man o meri yu ken autim ol dispela tok long em?
18. (a) Lain bilong God long nau ol i wanem kain lain? (b) Bilong wanem i mas i gat ol samting bilong strongim bel bilong ol?
18 Lain bilong God long nau ol i lain bilong autim tok. Ol i tok promis long God (olsem dediket) na kisim baptais na ol i autim tok bilong Kingdom, olsem lain Kristen bilong pastaim. Ol i gat olgeta samting bilong helpim ol long mekim dispela wok. Ol i mas i gat sampela samting bilong strongim bilip bilong ol, long wanem Seten na lain bilong em ol i birua long tok bilong Kingdom. Jisas i autim tok bilong Kingdom na ol dispela birua i kilim em i dai. Orait, Baibel i toksave olsem: Ol bai mekim nogut long lain bilong Jisas tu.—Jon 15:19, 20; 2 Timoti 3:12.
19. (a) Long nau husat ol i stap bilong helpim na strongim lain manmeri bilong God? (b) Ol elda i mekim wanem bambai pasin nogut i no inap bagarapim kongrigesen?
19 Tasol long olgeta kongrigesen i gat sampela “hetman” o elda i stap, ol i makim ol bilong helpim na strongim ol kongrigesen, olsem long taim bilong ol aposel. Ol dispela elda inap helpim yu tu. Ol inap givim gutpela tok bilong Baibel long yu bilong helpim yu. Ol i lukautim ‘lain sipsip bilong God.’ olsem na sapos wanpela bilong kongrigesen i kirap bihainim pasin nogut na em i no laik lusim, orait, ol dispela “hetman” o elda i mas rausim em bambai kongrigesen i ken i stap klin na i stap gutpela long ai bilong God.—Taitas 1:5; 1 Pita 5:1-3; Aisaia 32:1, 2; 1 Korin 5:13.
20. (a) Long taim bilong ol aposel, ol hetman i stap long Jerusalem ol i salim husat i go? Ol i salim ol i go bilong mekim wanem? (b) Long nau lain bilong bosim Ol Witnes ol i save salim husat i go?
20 Ol hetman Kristen bilong pastaim long Jerusalem, ol i salim Pol na Sailas na sampela man moa ol i go lukim ol kongrigesen na karim tok bilong ol dispela hetman i go long ol, na ol i strongim ol dispela kongrigesen. Olsem tasol, nau long “las taim,” lain bilong bosim ol Kristen tru i save salim sampela man i go mekim wankain wok, em ol wasman sekit. (Aposel 15:24-27, 30-32) Tupela taim samting long olgeta yia, ol dispela wasman sekit i go lukim ol kongrigesen ol i makim bilong ol na i stap wan wik wan wik wantaim ol.
21. Wasman sekit i save mekim wanem bilong helpim kongrigesen?
21 I gat planti kongrigesen bilong Ol Witnes Bilong Jehova i stap long olgeta hap bilong graun, winim 60,000. Ol i save bungim 20 samting kongrigesen wantaim na ol i kolim wanpela sekit. Wasman sekit i save wok wantaim ol manmeri bilong ol dispela kongrigesen long autim tok bilong Kingdom. Dispela samting i strongim ol, na tu em i save givim sampela gutpela tok long ol bilong helpim ol long mekim gut dispela wok.—Aposel 20:20, 21.
22. (a) Tupela taim long olgeta yia ol i save putim wanem samting bilong strongim lain bilong God? (b) Ol i laik bai yu mekim wanem?
22 Na tupela taim long olgeta yia ol i save putim kibung bilong ol kongrigesen insait long wanpela sekit, na inap 200 o 2,000 samting ol i bung inap wanpela o tupela de. Mipela laik bai yu go long wanpela kibung sekit olsem. Mipela save, ol tok yu harim long dispela kibung bai strongim yu long spirit na helpim yu.
23. (a) Wanpela taim long olgeta yia ol i putim wanem narapela kibung? (b) Wanpela kibung olsem em i bikpela olsem wanem?
23 Wanpela taim long olgeta yia ol i putim ol bikpela kibung, olsem kibung distrik. Gutpela sapos yu wok strong long i go long wanpela kibung olsem na bai yu save, em i gutpela samting bilong strongim na helpim yu. Sampela taim ol i putim bikpela kibung tru na olgeta manmeri bilong wanpela hap i bung wantaim (kibung nesenel ), o ol manmeri bilong planti hap bilong graun ol i bung wantaim (kibung intenesenel). Nambawan bikpela kibung olsem i bin kamap long 1958, long tupela bikpela stediam, olsem ples bilong pilai spot, long hap bilong Nu Yok. Ol i bung inap 8-pela de na 253,922 manmeri i bung bilong harim bikpela tok, nem bilong en: “Kingdom Bilong God i Kamap—Ating Dispela Graun i Laik Pinis?” Tasol nau ol i no save kibung olsem, long wanem i no gat wanpela ples bung inap long ol. Ol i save putim ol bikpela bikpela kibung long narapela narapela biktaun.
OL MITING BILONG KONGRIGESEN
24. Ol kongrigesen i save mekim wanem 5-pela miting long olgeta wik?
24 Lain bilong bosim Ol Witnes Bilong Jehova ol i save putim ol skul tu long olgeta kongrigesen bilong lainim ol long ol tok bilong Baibel. I gat 5-pela bung o miting bilong kongrigesen long olgeta wik, em Skul Bilong Wok Autim Tok, Miting Bilong Wok Autim Tok, Miting Bilong Harim Pablik-Tok, stadi Wastaua, buk-stadi. Ating yu no i go yet long ol dispela miting, olsem na nau mipela i ken stori long en.
25, 26. Wanem wok bilong Skul Bilong Wok Autim Tok na Miting Bilong Wok Autim Tok?
25 Skul Bilong Wok Autim Tok em i bilong lainim kongrigesen long pasin bilong autim gut tok bilong Kingdom. Ol manmeri i insait long dispela skul, sampela taim ol i sanap long ai bilong kongrigesen na mekim liklik tok long Baibel. Na bihain wanpela elda i save givim sampela tok long ol bilong helpim ol long mekim gut tok.
26 Na taim Skul i pinis, bihain ol i mekim Miting Bilong Wok Autim Tok. I gat wanpela liklik nius bilong dispela miting ol i kolim Wok Kingdom Bilong Yumi. Lain bilong bosim Ol Witnes i wokim dispela nius long olgeta mun. Long dispela miting ol i save kamapim sampela gutpela tok na soim bilong lainim kongrigesen long pasin bilong toktok wantaim ol man long tok bilong Kingdom. Krais tu i bin lainim ol disaipel long pasin bilong autim tok.—Jon 21:15-17; Matyu 10:5-14.
27, 28. Miting Bilong Pablik-Tok na stadi Wastaua na buk-stadi, ol i wanem kain miting?
27 Long olgeta Sande ol i save singautim ol manmeri bilong ausait i kam harim wanpela tok long Baibel, em Pablik-Tok, na ol i mekim stadi Wastaua tu. Wastaua em i wanpela nius i kamapim ol bikpela tok bilong Baibel, na long stadi Wastaua ol i save holim wanpela nupela Wastaua na mekim ol askim long tok bilong en na kongrigesen i bekim tok.
28 Ol i save putim ol dispela miting long ol Haus Kingdom na kongrigesen olgeta i kam bung. Tasol long olgeta wik ol i save mekim ol liklik bung tu long haus bilong sampela man, em buk-stadi. Ol i save lukim wanpela buk, kain olsem dispela buk nau yu kaunim, na inap wanpela aua ol i lainim sampela tok bilong Baibel.
29. (a) Long olgeta yia ol Kristen tru i save bung bilong tingim i dai bilong husat? (b) I stret husat tasol ol i ken kisim bret na wain?
29 I gat ol dispela miting bilong Ol Witnes, na wanpela taim long yia ol i mekim wanpela bikpela bung bilong tingim i dai bilong Jisas, em Memorial. Taim Jisas i kamapim dispela bung long pastaim, em i tok: “Yupela mekim olsem bilong tingim mi gen.” (Luk 22:19, 20) Jisas i kisim bret na wain bilong makim skin na blut bilong em, em i laik givim olsem ofa bilong helpim ol manmeri. Olsem na long olgeta yia long bung bilong Memorial, liklik hap lain bilong ol 144,000 wanlain bilong Krais em ol i stap yet long graun, ol i save kisim dispela bret na wain bilong makim tingting bilong ol, ol i bilong i go long heven.
30. (a) Tasol husat moa ol i mas bung? Ol i gat tingting long wanem samting? (b) Jisas i stori olsem wanem long dispela bikpela lain manmeri?
30 Planti tausen manmeri moa ol i save bung wantaim dispela lain long taim bilong Memorial, em ol i lukluk tasol na harim ol tok i kamap. Dispela i kirapim ol tu long tingim ol samting God Jehova na Krais Jisas i bin mekim bilong baim bek ol. Ol i no gat tingting long i go long heven; ol i gat tingting long i stap oltaim long paradais long graun. Amamas bilong ol i wankain olsem bilong Jon Bilong Baptais, em i “poroman” bilong man i laik marit, em Krais. Jon i no bilong dispela lain 144,000, olsem “meri” bilong Krais. (Jon 3:29) Olsem tasol, ol dispela bikpela lain manmeri, ol i no bilong dispela “liklik lain sipsip,” em “meri” bilong Krais; nogat; ol i bilong lain “arapela sipsip.” Tasol ol i wok wantaim dispela “liklik lain sipsip” na ol i kamap “wanpela lain sipsip tasol.”—Jon 10:16; Luk 12:32.
WOK WANTAIM LAIN BILONG GOD
31. Ol manmeri i laik i stap insait long lotu giaman na lain bilong God wantaim, olsem wanem yumi save God i no orait long ol?
31 Tru tumas, long nau God i gat lain bilong em long graun olsem long bipo! Em i givim wok long dispela lain long nau bilong lainim ol manmeri bambai ol inap i stap long nupela taim em i laik kamapim. Tasol yumi no inap i stap insait long lotu giaman na lain bilong God tu wantaim. Baibel i tok: “Yupela i no ken wokabaut wantaim ol [man i no bilip] na helpim ol long pasin bilong ol. Nogat. Olsem wanem stretpela pasin na pasin bilong sakim lo tupela i ken pren wantaim? Olsem wanem lait i ken bung wantaim tudak? . . . Olsem wanem bilipman na man i no bilip tupela i ken holim wanpela kain tingting?” Olsem na God i tok: “Yupela i mas lusim ol.”—2 Korin 6:14-17.
32. (a) Yumi mas mekim wanem na bai yumi “lusim ol”? (b) Sapos nau yumi kirap wok wantaim lain bilong God, wanem gutpela samting bai painim yumi?
32 Yumi mas mekim wanem na bai yumi “lusim ol”? Sapos yumi laik bihainim dispela tok, yumi mas insait long lain bilong Jehova. Yumi no ken insait long narapela misin o helpim wok bilong en. Olsem na sapos yumi stap insait yet long wanpela misin olsem, yumi mas toksave long ol yumi laik lusim ol. Sapos nau yumi lusim ol manmeri bilong lotu giaman, na yumi kirap wok wantaim dispela lain God i bosim, orait bai yumi insait long dispela lain, em God i tok long ol olsem: “Bai mi stap wantaim ol na wokabaut namel long ol. Na bai mi stap God bilong ol, na ol bai i stap lain manmeri bilong mi.”—2 Korin 6:16.
[Piksa long pes 192]
Long taim bilong Tait, God i gat wanpela lain o planti lain?
[Ol Piksa long pes 196]
NAMBAWAN OFIS BILONG OL WITNES BILONG JEHOVA
Ol masin kompiuta
FAKTORI LONG BRUKLIN BILONG WOKIM OL BUK
Ol masin bilong wokim ol buk na nius samting
Ples bilong wokim ol buk
Ples bilong salim ol buk i go
[Ol Piksa long pes 197]
I GAT PLANTI FAKTORI BILONG WOKIM OL BUK BILONG SOSAITI WAS TAUA. EM PIKSA BILONG SAMPELA
Brasil
Englan
Saut Afrika
Walkil, Nu Yok
Kanada
[Ol Piksa long pes 198]
Wanpela bikpela kibung tru bilong Ol Witnes Bilong Jehova long Nu Yok
Stediam Polo Graun
Yanki Stediam
[Piksa long pes 201]
Ol i save lainim tok bilong Baibel long ol miting bilong Ol Witnes Bilong Jehova