Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • w98 9/1 p. 8-13
  • Stap Gut Insait Long Oganaisesen Bilong God

No gat vidio bilong dispela seksen.

Sori, popaia kamap long lodim vidio.

  • Stap Gut Insait Long Oganaisesen Bilong God
  • Wastaua i Tokaut Long Kingdom Bilong Jehova—1998
  • Ol Liklik Het Tok
  • Wankain Infomesen
  • Oganaisesen Bilong Jehova
  • Em i Lukautim Yumi Olsem Wanem?
  • Husat Ol i Insait Long Oganaisesen Bilong God?
  • Pren Wantaim Pasin Bilong Graun
  • Lain Bilong God Long Graun
    Yu Inap i Stap Oltaim long Paradais long Graun
  • Wanbel Wantaim Man Bilong Wokim Oganaisesen Bilong Heven na Graun
    Wastaua i Tokaut Long Kingdom Bilong Jehova—1985
  • “Skelim Gut Wanem Ol Samting i Bikpela Samting Moa”
    Wastaua i Tokaut Long Kingdom Bilong Jehova—2013
  • Yu Wok Gut Wantaim Oganaisesen Bilong Jehova?
    Wastaua i Tokaut Long Kingdom Bilong Jehova—2014
Lukim Moa
Wastaua i Tokaut Long Kingdom Bilong Jehova—1998
w98 9/1 p. 8-13

Stap Gut Insait Long Oganaisesen Bilong God

“Nem bilong Jehova i olsem strongpela haus. Ol stretpela man i ran i go insait long en na i stap gutpela.”​—⁠SINDAUN 18:⁠10, NW.

KLOSTU long taim Jisas i dai, em i beten long Papa bilong em long heven bilong helpim ol disaipel bilong em. Em i tingim tru ol na em i tok: “Tok bilong yu, mi givim pinis long ol. Na ol manmeri bilong dispela graun ol i save birua long ol, long wanem, ol manmeri bilong mi ol i no bilong dispela graun, olsem mi tu mi no bilong dispela graun. Mi no askim yu long tekewe ol long dispela graun. Nogat. Mi beten long . . . yu ken lukautim ol, na man nogut i no ken bagarapim ol.” (Jon 17:​14, 15) Jisas i save, dispela graun em i ples ol Kristen inap kisim bagarap long en. Ol man bilong dispela graun bai kamapim klia olsem ol i bel nogut long ol Kristen​—⁠ol bai sutim tok giaman long ol, na mekim nogut long ol. (Matyu 5:​11, 12; 10:​16, 17) Na tu, pasin bilong dispela graun inap paulim ol.​—⁠2 Timoti 4:​10; 1 Jon 2:​15, 16.

2. Ol Kristen inap painim we wanpela ples bilong hait long en long ol samting bilong spirit na i stap gut?

2 Olsem aposel Jon i tok, ol manmeri bilong graun em ol bai bel nogut long ol Kristen, em ol lain i stap longwe long God na ol i stap aninit long strong bilong Satan. (1 Jon 5:​19) Ol manmeri bilong dispela graun ol i bikpela lain tru, winim lain Kristen, na Satan yet i gat bikpela strong moa, winim strong bilong ol man bilong graun. Olsem na pasin bilong dispela graun long bel nogut long ol Kristen em inap tru long bagarapim ol. Orait, ol disaipel bilong Jisas ol inap i go we bilong painim ples bilong hait na i stap gut long ol samting bilong spirit? Wanpela tok i bin kamap long Wastaua (tok Inglis) bilong Disemba 1, 1922, i bekim dispela askim olsem: “Nau yumi stap long taim nogut. Nau i gat pait i kamap namel long oganaisesen bilong Satan na oganaisesen bilong God. Em i wanpela bikpela pait tru.” Long dispela pait, oganaisesen bilong God em i ples bilong i stap gutpela long ol samting bilong spirit. Dispela tok “oganaisesen” i no stap long Baibel, na bipo, long 1922 samting, dispela tok “oganaisesen bilong God” em i wanpela nupela tok. Orait dispela oganaisesen em i wanem samting? Em inap lukautim yumi olsem wanem na bai yumi ken i stap gut?

Oganaisesen Bilong Jehova

3, 4. (a) Olsem wanpela buk dikseneri na Wastaua i tok, oganaisesen em i wanem samting? (b) Lain Witnes Bilong Jehova i stap long olgeta hap, olsem wanem yumi inap kolim ol olsem wanpela oganaisesen?

3 Wanpela buk dikseneri (Concise Oxford Dictionary) i tok, wanpela oganaisesen i olsem ‘wanpela lain ol i stretim gut wok bilong en.’ Orait yumi inap kisim tingting long dispela olsem: Ol aposel i bin bungim ol Kristen insait long ol wan wan kongrigesen long ples bilong ol na i gat wanpela lain long Jerusalem i bosim ol dispela kongrigesen, olsem na i stret yumi ken kolim dispela lain “manmeri bilong God” olsem wanpela oganaisesen. (1 Pita 2:​17) Ol Witnes Bilong Jehova long nau i save mekim wankain pasin long stretim wok bilong ol olsem wanpela oganaisesen. Ol Kristen long taim bilong ol aposel ol i gat ol man i olsem “presen,” em ol wasman na tisa, na ol i strongim pasin wanbel i stap namel long dispela lain Kristen. Sampela man olsem, ol i save raun na i go lukim ol narapela narapela kongrigesen, na sampela ol i mekim wok elda insait long kongrigesen bilong ol yet. (Efesus 4:​8, 11, 12; Aposel 20:28) Ol wankain “presen” olsem i save strongim pasin wanbel namel long ol Witnes Bilong Jehova long nau.

4 Wastaua (tok Inglis) bilong Novemba 1, 1922, i stori long dispela tok oganaisesen olsem: ‘Oganaisesen em wanpela lain i save bung wantaim bilong mekim wanpela wok.’ Na dispela Wastaua i tok moa olsem, taim yumi kolim ol Witnes Bilong Jehova olsem wanpela oganaisesen, dispela i no makim olsem ol i “wanpela liklik lain i save wok hait, nogat; em i makim olsem ol Sumatin Bilong Baibel [ol Witnes Bilong Jehova] ol i laik mekim laik bilong God, na ol i laik mekim dispela wok olsem Bikpela i save mekim olgeta samting​—⁠long pasin bilong mekim stret ol wok.” (1 Korin 14:33) Aposel Pol i kamapim klia olsem ol Kristen long taim bilong em ol tu i bin mekim stret ol wok bilong ol. Em i tok, lain Kristen God i bin makim i olsem bodi bilong man, i gat planti hap bilong en, na olgeta wan wan i mekim stret wok bilong en bambai bodi olgeta i ken wok gut. (1 Korin 12:​12-​26) Dispela em i wanpela gutpela tok piksa tru bilong makim wanpela oganaisesen! Bilong wanem ol Kristen i stretim gut wok bilong ol olsem? Bilong mekim wok long kamapim “laik bilong God,” olsem mekim laik bilong Jehova.

5. Oganaisesen bilong God long graun em i wanem samting?

5 Baibel i tok profet olsem ol Kristen tru bilong nau ol bai stap wanbel, na God bai bungim ol wantaim long wanpela “kantri” olsem wanpela “bikpela lain,” na ol bai stap olsem “lait namel long ol lain manmeri bilong dispela graun.” (Aisaia 66:8; Filipai 2:​15) Nau dispela “bikpela lain” ol i winim 5 milion 500 tausen. (Aisaia 60:​8-​10, 22) Tasol i no dispela lain tasol i stap insait long oganaisesen bilong God, nogat. I gat ol ensel tu i stap.

6. Husat ol i insait long olgeta hap bilong oganaisesen bilong God?

6 Planti taim ol ensel i bin wok wantaim ol wokboi bilong God long graun. (Stat 28:12; Daniel 10:​12-​14; 12:1; Hibru 1:​13, 14; KTH 14:​14-​16) Olsem na Wastaua (tok Inglis) bilong Me 15, 1925, i tok stret olsem: “Olgeta ensel holi ol i insait long oganaisesen bilong God.” Na em i tok moa olsem: “Het bilong oganaisesen bilong God em Bikpela Krais Jisas, em i holim olgeta strong na bikpela namba olgeta.” (Matyu 28:18) Olsem na oganaisesen olgeta bilong God em olgeta lain long heven na long graun em ol i wok wantaim bilong mekim laik bilong God. (Lukim blok.) Em i gutpela samting tru long yumi inap insait long dispela oganaisesen! Na yumi amamas tru long tingim taim bai kamap bihain, em olgeta samting i stap laip, long heven na long graun, ol bai wok gut wantaim long litimapim nem bilong God Jehova long pasin wanbel! (KTH 5:​13, 14) Tasol olsem wanem oganaisesen bilong God i save lukautim yumi long nau na bai yumi ken i stap gut?

Em i Lukautim Yumi Olsem Wanem?

7. Olsem wanem oganaisesen bilong God i save lukautim yumi na yumi stap gut?

7 Oganaisesen bilong God inap was long yumi na bai Satan wantaim pasin bilong em long trik na giaman i no inap bagarapim yumi. (Efesus 6:​11) Ol man i lotuim Jehova, Satan i save subim ol, na mekim nogut long ol, na traim ol bambai em i ken pulim ol na ol i lusim rot bilong ‘stretpela pasin ol i mas bihainim.’ (Aisaia 48:17; skelim wantaim Matyu 4:​1-​11.) Tru, yumi stap yet long dispela graun, olsem na ol dispela samting Satan i mekim long yumi bilong pundaunim yumi, yumi no inap abrusim olgeta. Tasol sapos yumi pas gut wantaim God na oganaisesen bilong em, dispela bai strongim yumi na lukautim yumi, na dispela i helpim yumi long wokabaut yet long rot bilong “stretpela pasin.” Olsem bai yumi no inap lus long kisim gutpela samting yumi wet long en.

8. Olsem wanem oganaisesen bilong God long heven i save helpim ol wokboi bilong em long graun?

8 Olsem wanem oganaisesen bilong God i save lukautim yumi olsem? Namba wan samting, em ol wokboi spirit bilong Jehova ol i save helpim na strongim yumi. Taim bikpela hevi tru i bin painim Jisas, wanpela ensel i kam strongim em. (Luk 22:43) Taim ol i laik kilim i dai Pita, wanpela ensel i kam helpim em long rot bilong wanpela mirakel na em i no bagarap. (Aposel 12:​6-​11) Tru, long nau i no gat ol kain mirakel olsem, tasol Jehova i tok promis long lain bilong em olsem ol ensel bai helpim na strongim ol taim ol i mekim wok bilong autim tok. (KTH 14:​6, 7) Taim sampela bikpela hevi i painim ol long dispela wok, planti taim ol i gat wanpela strong i stap long ol, em i no strong bilong yumi ol man bilong graun. (2 Korin 4:⁠7) Na ol i save tu olsem “ensel bilong Bikpela i save stap klostu long ol manmeri i aninit long Bikpela, na em i save helpim ol bai ol i no kisim bagarap.”​—⁠Song 34:⁠7.

9 Na oganaisesen bilong Jehova long graun i save lukautim yumi. Em i mekim olsem wanem? Sindaun 18:10 (NW) i tok: “Nem bilong Jehova i olsem strongpela haus. Ol stretpela man i ran i go insait long en na i stap gutpela.” Tasol dispela i no makim olsem sapos yumi kolim tasol nem bilong God dispela bai lukautim yumi, nogat. Taim yumi ran i go na painim ples bilong hait insait long nem bilong God, dispela i makim olsem yumi bilip long Jehova yet. (Song 20:1; 122:⁠4) Na tu, em i makim olsem yumi helpim wok king bilong Jehova, na bihainim ol lo bilong em, na yumi bilip long ol tok promis bilong em. (Song 8:​1-9; Aisaia 50:10; Hibru 11:⁠6) Na em i makim tu olsem yumi lotuim Jehova wanpela tasol. Ol man i lotuim Jehova long dispela pasin, ol tasol inap mekim wankain tok olsem man bilong raitim Song: “Yumi bilip tru long gutpela nem bilong [Jehova]. Olsem na yumi amamas long em.”​—⁠Song 33:21; 124:⁠8.

9, 10. Olsem wanem yumi ken tok, “nem bilong Jehova i olsem strongpela haus”? Olsem wanem dispela tok i stret long oganaisesen olgeta bilong God?

10 Long nau olgeta man insait long oganaisesen bilong God long graun ol i save mekim wankain tok olsem Maika, em i tok: “Bai yumi . . . lotu long God, Bikpela bilong yumi oltaim oltaim, na bihainim em wanpela tasol.” (Maika 4:⁠5) Dispela oganaisesen bilong nau em i hap bilong “lain Israel tru bilong God,” em Baibel i kolim ol olsem “wanpela lain i holim nem bilong em.” (Galesia 6:​16; Aposel 15:​14, NW; Aisaia 43:​6, 7; 1 Pita 2:​17) Olsem na bilong i stap insait long oganaisesen bilong Jehova, yumi mas insait long wanpela lain ol i laik painim, na ol i kisim, ples bilong hait insait long nem bilong God na em i lukautim ol na ol i stap gut.

11. Long wanem ol rot em oganaisesen bilong Jehova i save lukautim ol manmeri i stap insait long en na ol i stap gut?

11 Na tu, oganaisesen bilong God long graun em i wanpela lain ol i bilip, olsem wanpela lain wanbilip em narapela i save strongim narapela. (Sindaun 13:20; Rom 1:​12) Insait long dispela oganaisesen, i gat ol wasman Kristen ol i save lukautim ol sipsip, na strongim bel bilong ol sipsip i gat sik o ol i bel hevi, na ol i wok long painim rot bilong strongim bek ol manmeri i bin pundaun. (Aisaia 32:​1, 2; 1 Pita 5:​2-4) Long rot bilong oganaisesen, “wokboi i gat gutpela tingting,” em ol Kristen God i bin makim, em i save givim ‘kaikai long yumi long taim bikman i makim.’ (Matyu 24:45) Dispela “wokboi” i save givim nambawan gutpela kaikai bilong spirit long yumi​—⁠em ol stretpela save em Baibel i as bilong en na em inap bringim man long laip i stap oltaim. (Jon 17:⁠3) Dispela “wokboi” i save soim rot long ol Kristen na dispela i helpim ol long bihainim ol stretpela lo na “bihainim pasin bilong ol snek, na tingim gut pastaim ol samting [ol] i laik mekim. Na . . . bihainim pasin bilong ol dispela pisin ol i kolim balus, na [ol] i no ken tingting long mekim wanpela pasin nogut” namel long dispela pasin bilong graun inap bagarapim ol. (Matyu 10:16) Na oltaim dispela “wokboi” i save helpim ol na ol i gat planti wok ol i ken mekim long “wok bilong Bikpela,” na dispela samting yet em i strongpela samting bilong lukautim ol na bai ol i ken i stap gut.​—⁠1 Korin 15:⁠58.

Husat Ol i Insait Long Oganaisesen Bilong God?

12. Husat ol i insait long oganaisesen bilong God long heven?

12 Ol manmeri insait long oganaisesen bilong God, ol inap kisim dispela helpim bilong lukautim ol. Olsem na yumi laik save, husat i insait long dispela lain? Yumi save pinis husat i insait long oganaisesen bilong heven. Satan wantaim ol ensel nogut bilong em ol i no stap moa long heven. Tasol ol gutpela ensel ol i stap yet long heven, em “ol i bung na amamas i stap.” Aposel Jon i bin lukim olsem long taim bilong las de, “Pikinini Sipsip,” na ol ensel serap (em “4-pela samting i stap laip”), na “planti ensel moa,” ol bai sanap i stap klostu long sia king bilong God. Na 24 elda bai i stap wantaim ol​—⁠ol i makim ol dispela Kristen God i bin makim na ol i go i stap pinis long gutpela ples tru bilong ol long heven. (Hibru 12:​22, 23; KTH 5:​6, 11; 12:​7-​12) Olgeta ol i insait long oganaisesen bilong God, na yumi klia gut long dispela. Tasol namel long yumi ol man, i hatwok liklik long klia gut olsem husat ol i insait long oganaisesen bilong God.

13. Olsem wanem Jisas i kamapim klia husat ol i insait long oganaisesen bilong God na husat ol i no insait long en?

13 Jisas i tok long sampela em ol bai tok ol i bihainim em: “Long de bilong bikpela kot bilong God, planti manmeri bai i tokim mi olsem, ‘Bikpela, Bikpela, mipela i bin mekim wok profet long nem bilong yu. Long nem bilong yu mipela i bin rausim ol spirit nogut. Long nem bilong yu mipela i bin wokim planti mirakel.’ Na long dispela taim mi bai tokaut long ol olsem, ‘Mi no save liklik long yupela. Yupela ol man bilong mekim pasin nogut, yupela klia long mi.’ ” (Matyu 7:​22, 23) Sapos wanpela man i mekim pasin nogut, em i no insait long oganaisesen bilong God, maski em i tok wanem, na maski em i save go we bilong mekim lotu. Na Jisas i soim yumi long olsem wanem yumi inap luksave olsem husat tru i insait long oganaisesen bilong God. Em i tok: “Yupela i no ken ting, olgeta manmeri i save kolim mi, ‘Bikpela, Bikpela,’ ol bai i go insait long kingdom bilong heven. Nogat. Man i bihainim laik bilong Papa bilong mi i stap long heven, em tasol bai i go insait long kingdom.”​—⁠Matyu 7:​21.

14. Wanem ol samting bilong laik bilong God ol manmeri insait long oganaisesen bilong God ol i mas mekim?

14 Olsem na bilong i stap insait long oganaisesen bilong God​—⁠em “kingdom bilong heven” i nambawan bikpela samting insait long en​—⁠yumi mas mekim laik bilong God. Wanem laik bilong em? Pol i kamapim klia wanpela bikpela samting long laik bilong God taim em i tok: “[God] i laik kisim bek olgeta manmeri, bai ol i ken save long as bilong tok tru.” (1 Timoti 2:⁠4) Sapos man i laik tru long kisim stretpela save bilong Baibel, na bihainim ol dispela tok long i stap bilong em, na givim dispela tok long “olgeta manmeri,” em i mekim laik bilong God. (Matyu 28:​19, 20; Rom 10:​13-​15) Na em i laik bilong God long ol wasman i givim kaikai long ol sipsip bilong Jehova na lukautim ol gut. (Jon 21:​15-​17) Ol miting Kristen i save mekim bikpela wok long dispela samting. Sapos i no gat wanpela samting i pasim man long go long ol dispela miting, tasol em i no save go, orait em i no pilim ol gutpela samting em i kisim insait long oganaisesen bilong God.​—⁠Hibru 10:​23-​25.

Pren Wantaim Pasin Bilong Graun

15. Jems i givim wanem tok lukaut long ol kongrigesen i bin stap long taim bilong em?

15 Inap 30 yia samting bihain long taim Jisas i dai, brata bilong em Jems i kamapim sampela samting inap mekim na man i no stap gut moa insait long oganaisesen bilong God. Em i tok: “Yupela i lusim God, olsem meri i lusim man bilong en na i go pamuk nabaut. Harim. Sapos man i laikim pasin bilong graun, em i mekim pasin birua long God. Ating yupela i no save long dispela, a? Olsem na sapos man i laik pren wantaim ol pasin bilong graun, em bai i kamap birua bilong God.” (Jems 4:⁠4) Wanpela birua bilong God i no save insait long oganaisesen bilong em. Orait man i save mekim wanem na em i pren wantaim pasin bilong dispela graun? Ol buk samting bilong yumi i bin tok, i gat kain kain samting i mekim, olsem man i poroman wantaim ol man i gat pasin nogut. Na Jems i toktok tu long ol tingting i no stret i stap long bel bilong man na i save kirapim em long mekim pasin i no stret.

16 Jems 4:​1-3 i tok: “Wanem samting em i as bilong ol tok pait na kros i kamap namel long yupela? Ol kain kain pasin bilong bel kirap i stap long yupela, na ol i save pait namel long olgeta hap bodi bilong yupela, na long dispela pasin tasol ol i save kirapim ol tok pait na kros. Ating i no olsem, a? Yupela i save laikim tumas long kisim ol kain kain samting, tasol yupela i no kisim. Olsem na yupela i save kilim ol man i dai. Yupela i save mangalim samting, na yupela i no inap kisim. Olsem na yupela i save kros nogut na kirapim pait. Yupela i no save beten long God i givim ol samting long yupela, na long dispela as yupela i no save kisim. Na taim yupela i beten long kisim samting, yupela i no save kisim, long wanem, tingting bilong yupela i no stret na yupela i beten long God. Yupela i ting long kisim ol samting bilong tromoi tasol long laik bilong bel bilong yupela.” Taim Jems i raitim pinis ol dispela tok, bihain em i mekim tok lukaut olsem yumi no ken pren wantaim pasin bilong dispela graun.

17. Wanem ol dispela pait i stap insait long kongrigesen Kristen long taim bilong ol aposel?

17 Sampela handet yia bihain long taim Jems i dai, ol Kristen giaman i kirapim pait na narapela i kilim i dai narapela. Tasol Jems i bin raitim dispela pas bilong em i go long “lain Israel tru bilong God” em ol i stap long taim bilong ol aposel na ol i bilong i stap ‘pris na king’ long heven. (KTH 20:⁠6) Narapela i no kilim i dai narapela, o kamapim pait namel long ol yet na narapela i kilim i dai narapela. Olsem na bilong wanem Jems i toktok long ol kain samting olsem i kamap namel long ol Kristen? Tingim dispela samting: Aposel Jon i tok, sapos man i bel nogut long brata bilong em, em i man bilong kilim man i dai. Na Pol i toktok long ol kros pait i kamap insait long kongrigesen, i olsem ol i pait namel long ol yet. (Taitus 3:9; 2 Timoti 2:​14; 1 Jon 3:​15-​17) Ating Jems i tingim wankain samting​—⁠olsem ol i no laikim tru ol wanlain Kristen; namel long ol yet ol Kristen i mekim wankain pasin olsem planti man bilong dispela graun i save mekim long ol narapela.

18. Wanem samting inap kirapim pasin namel long ol Kristen olsem narapela i bel nogut long narapela?

18 Bilong wanem ol kain samting olsem i bin kamap insait long ol kongrigesen Kristen? Long wanem, ol i gat ol tingting i no stret, olsem mangal, na ‘bel i kirap’ long kisim ol amamas nogut bilong skin. Na pasin hambak, bel nogut tru long ol narapela, na strong long kisim bikpela namba samting, dispela tu inap bagarapim pasin bilong ol Kristen insait long kongrigesen long pas gut wantaim na narapela i laikim tru narapela. (Jems 3:​6, 14) Kain tingting olsem i mekim na man i kamap olsem pren bilong dispela graun, olsem na em i kamap birua bilong God. Ol man i gat ol kain tingting olsem, ol i no ken ting ol inap i stap insait long oganaisesen bilong God.

19 Orait, sapos yumi lukim olsem ol tingting i no stret ol i wok long kamap long bel bilong yumi, yumi inap sutim asua i go long husat? Long Satan? Tru, em i gat hap asua. Em i “hetman i bosim strong bilong win” bilong dispela graun, em ol kain tingting olsem i pulap long en. (Efesus 2:​1, 2, NW; Taitus 2:​12) Tasol planti taim, as bilong ol tingting i no stret em dispela sin i stap long skin bilong yumi. Taim Jems i givim pinis tok lukaut long ol olsem ol i no ken i stap pren bilong dispela graun, em i tok: “Hap tok long buk bilong God i tok: ‘Dispela tingting i bin kamap na i stap insait long yumi, em i wok long aigris na mangal.’ Yupela i ting dispela tok i samting nating, a?” (Jems 4:​5, NW) Yumi olgeta, taim yumi stap yet long bel bilong mama, dispela laik bilong mekim pasin mangal i stap pinis long bel bilong yumi. (Stat 8:​21; Rom 7:​18-​20) Tasol yumi inap daunim dispela pasin long skin bilong yumi sapos yumi tokaut long ol tingting kranki bilong yumi na yumi larim Jehova i helpim yumi long daunim. Jems i tok: “God i save marimari moa yet long yumi [winim pasin bilong yumi long bel nogut long man].” (Jems 4:⁠6) Tasol ol Kristen i stap gut long God, ol dispela pasin na tingting kranki bilong skin i no inap winim ol, long wanem, i gat sampela samting bilong helpim na strongim ol, olsem spirit holi bilong God na ol gutpela brata Kristen, na strong bilong ofa bilong Jisas long baim bek ol man. (Rom 7:​24, 25) Ol i stap gutpela insait long oganaisesen bilong God, na ol i stap pren bilong God​—⁠ol i no pren bilong dispela graun.

20. Ol manmeri i insait long oganaisesen bilong God ol i kisim wanem ol blesing?

20 Baibel i tok promis olsem: “Bikpela [bai] i givim strong long ol manmeri bilong em. Em [bai] i mekim gut long ol na ol i stap bel isi.” (Song 29:11) Sapos yumi insait tru long dispela “bikpela lain” bilong Jehova i stap long nau, em oganaisesen bilong em long graun, bai yumi kisim hap strong em i save givim long lain bilong em, na bai yumi kisim dispela bel isi em i save givim long ol. Tru, lain bilong Satan i bikpela moa, winim oganaisesen bilong Jehova i stap long graun, na Satan i strong moa, winim yumi. Tasol Jehova em God i Gat Olgeta Strong. I no gat wanpela samting inap daunim strong bilong em. Na ol strongpela ensel bilong em ol tu i stap wanbel wantaim yumi long mekim wok bilong God. Olsem na maski ol lain bilong dispela graun i bel nogut long yumi, yumi inap sanap strong. Olsem Jisas i bin mekim, yumi tu inap winim strong bilong dispela graun.​—⁠Jon 16:⁠33; 1 Jon 4:⁠4.

Yu Inap Stori Long Dispela?

◻ Oganaisesen bilong God long graun em wanem samting?

◻ Olsem wanem oganaisesen bilong God i save lukautim yumi na yumi stap gut?

◻ Husat ol i insait long oganaisesen bilong God?

◻ Olsem wanem yumi inap abrusim pasin bilong i stap pren bilong dispela graun?

1. Olsem beten bilong Jisas i makim, wanem hevi i save painim ol Kristen?

16. Jems i mekim wanem tok klostu long tok lukaut bilong em olsem man i stap pren bilong dispela graun em i kamap birua bilong God?

19. (a) Sapos Kristen i lukim olsem tingting i no stret i wok long kamap long bel bilong em, em asua bilong husat tru? (b) Olsem wanem Kristen inap daunim ol tingting i no stret?

[Blok long pes 9]

Oganaisesen Bilong God Em Wanem Samting?

Long ol buk samting bilong ol Witnes Bilong Jehova, ol i kolim dispela tok “oganaisesen bilong God” bilong makim 3-pela samting.

1 Oganaisesen bilong Jehova long heven em yumi no inap lukim, em ol gutpela ensel. Baibel i kolim olsem “Jerusalem i stap long heven.”​—⁠Galesia 4:​26.

2 Oganaisesen bilong Jehova long graun em yumi inap lukim. Long nau em liklik hap bilong dispela lain God i bin makim, na bikpela lain manmeri ol i bung wantaim ol.

3 Oganaisesen bilong Jehova long heven na long graun wantaim. Long nau em oganaisesen bilong Jehova long heven wantaim dispela lain em i bin makim, em i kisim ol olsem pikinini bilong em long graun na ol i wet long kisim laip long heven. Bihain bai i gat sampela moa insait long en, olsem ol manmeri long graun em ol i kamap gutpela olgeta.

[Piksa long pes 10]

Yumi save kisim nambawan gutpela kaikai bilong spirit long rot bilong oganaisesen bilong Jehova

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim