Wanbel Wantaim Man Bilong Wokim Oganaisesen Bilong Heven na Graun
“Sapos ol manmeri bilong God i sindaun gut wantaim na i stap wanbel olsem ol brata tru, em i gutpela tumas, na ol i ken i stap belgut.”—SAM 133:1.
1, 2. (a) Wanem samting nogut i kamap samting olsem 6,000 yia bipo? (b) Baibel i kolim wanem nem long dispela bikhetman? Em i mekim wanem na em i laik kamap olsem God I Antap Tru?
MAN bilong kamapim oganaisesen bilong heven na graun em i laik bai dispela oganaisesen i stap klin na i stap stret na i stap wanbel. God i wokim man samting olsem 6,000 yia bipo, tasol taim man i nupela yet, wanpela samting nogut i kamap. Wanpela ensel i bikhet na lusim oganaisesen bilong Man bilong wokim olgeta samting na em i laik kamapim oganaisesen bilong em yet.
2 Dispela bikhetman i birua long Man bilong wokim em, olsem na Baibel i kolim em “Seten.” Insait bilong dispela nem i olsem “Birua” o “Man bilong sakim tok.” Em i namba wan man bilong sakim tok bilong Jehova, em King tru bilong heven na graun. (Jop 1:6, 7) Seten i laik kisim biknem. Em i laik kamapim oganaisesen bilong em. yet na kamap olsem God I Antap Tru. Em i laik kamap wanpela man bilong stretim ol wok na kamap wanpela god. “King bilong Babilon” long bipo i gat wankain tingting. Em i kisim bikpela namba long graun na Baibel i kolim em olsem ‘man i lait’ na ‘sta bilong moningtaim.’ Em i olsem piksa bilong Seten. (Aisaia 14:4, 12-14) Jehova i larim Seten na inap long nau Seten i stap ‘god bilong dispela graun.’—2 Korin 4:4.
3. (a) Seten i pundaunim wanem hap bilong oganaisesen bilong Jehova pastaim? (b) Wanem wanem samting i kamap na Seten i kamap bos bilong ol spirit nogut?
3 Bilong bagarapim oganaisesen bilong Jehova, Seten i wok long pundaunim pastaim laspela samting God i bin wokim, em Adam, em het bilong famili bilong ol man. (Jenesis 3:1-24; Sam 8:3-5; Rom 5:12) Bihain, planti ensel i bikhet. “Ol i lusim ples bilong ol” long heven na ol i tanim i kamap man na maritim ol meri bilong graun i gat naispela skin. (Jut 6) Pikinini bilong ol i narapela kain—ol i draipela man na ol i gat bikpela strong. Ol i kolim ol olsem ‘man bilong paitim man.’ Ol i save paitim ol man na bagarapim ol. Long taim bilong Tait ol dispela bikhet ensel i tanim i kamap spirit gen na ol i go bek long ples spirit. (Jenesis 6:1-7:23) Ol i lusim oganaisesen bilong Jehova, olsem na ol i kamap ensel nogut na Seten i kamap bos bilong ol.—Diuteronomi 32:17; Sam 106:37; Matyu 12:24; Luk 11:15-19.
4. Ol man i winim taim bilong Tait, ol i bin mekim wanem? Tasol Seten i laik mekim wanem? Bilong wanem em i laik mekim olsem?
4 Long dispela rot Seten i kamapim hap oganaisesen bilong em ol man i no inap lukim, em oganaisesen spirit. Ol man i winim taim bilong Tait, em Noa wantaim lain bilong em, ol i no lusim oganaisesen bilong Jehova. Ol i stap wanbel wantaim dispela oganaisesen i stap long heven, em ol man i no inap lukim. (Jenesis 6:9; 8:18-21) Tasol Seten i laik bagarapim dispela pasin wanbel bilong ol lain tumbuna bilong Noa. Bilong wanem em i laik mekim olsem? Bambai em i ken kamapim narapela hap bilong oganaisesen nogut bilong em hia long graun!
5. Wastaua (tok Inglis) bilong Me 1, 1921 i tok wanem long Seten i gat oganaisesen bilong em?
5 Pastaim ol brata i no save Seten i gat oganaisesen bilong em. Tasol Wastaua (tok Inglis) Me 1, 1921 i tok: ‘Seten i mekim wok nogut pinis long graun, na bihain em i pulim ol lain bilong heven na kirapim ol long paulim pasin bilong ol man. Ol i kirapim ol man long mekim pasin pait na pasin pait i pulap long graun. Seten i kamapim wanpela oganaisesen ol man i no inap lukim na wanpela oganaisesen long graun em ol man inap lukim. Em i laik mekim wankain samting olsem God i tingting long mekim.’
6. Wastaua (tok Inglis) bilong Desemba 1, 1922 i tok wanem long laik bilong Seten?
6 Wastaua (tok Inglis) bilong Desemba 1, 1922 i putim liklik het-tok olsem: “Laik Bilong Seten” na i tok klia olsem: “Nau yumi stap long taim nogut. Pait i kirap pinis namel long oganaisesen bilong Seten na oganaisesen bilong God. Em pait nogut. Seten i laik bagarapim bilip bilong oganaisesen bilong Bikpela, na sapos em inap, em i laik bagarapim lain pikinini bilong dispela oganaisesen. Bilong mekim olsem Seten i kirapim kain kain wok.”
7, 8. (a) Taim ol brata i save pinis i gat dispela tupela oganaisesen i stap birua birua, dispela save i helpim ol olsem wanem? (b) Husat i birua long dispela “pikinini man,” olsem Wastaua (tok Inglis) bilong Mas 1, 1925 i tok?
7 Taim ol brata i save i gat dispela tupela oganaisesen i stap birua birua, dispela samting i helpim ol long save long planti tok bilong Baibel na ol tok profet. Pastaim ol i no save gut long insait bilong ol tok bilong Revelesen sapta 12, tasol bihain Wastaua (tok Inglis) bilong Mas 1, 1925 i kamapim tok bilong Revelesen 12:5, olsem: “Na meri i karim pikinini man. Dispela pikinini bihain bai i holim stik ain na i bosim olgeta lain manmeri. Orait meri i karim pikinini pinis, na kwiktaim ol i kisim pikinini i go antap. Na ol i bringim em i go long God na long sia king bilong em.”
8 Long pes 67 na 68 dispela Wastaua i tok:
“Wanem namba wan samting God i laik mekim? . . . Em i laik kamapim dispela kingdom Jisas i lainim yumi long beten long en. Olsem na nupela lain i mas kamap na dispela lain bai mekim wok king na helpim olgeta lain bilong graun. . . . Wanem strongpela samting i birua long dispela na i pasim tingting bilong ol man na ol i no save long dispela gutpela nupela lain na ol gutpela samting dispela lain bai mekim bilong helpim ol? . . . Em Seten wantaim oganaisesen bilong em. . . . Pait tru i stap namel long God na Seten. Bai kingdom bilong stretpela pasin i pinisim kingdom bilong pasin nogut na tudak, na bai em i kamapim kingdom bilong tok i tru bilong senisim. . . . Bihain long 1918 oganaisesen bilong Seten—bilong bisnis na politik na lotu—ol i sakim Bikpela wantaim kingdom bilong em. Ol lotu i sakim moa yet. Na long dispela taim God i belhat long ol lain man. Kirap long dispela taim na i kam inap long nau, dispela pait i stap long graun. Paslain long dispela taim, dispela pait i kamap long heven.”
9. Long 1925 ol i tok dispela “meri” bilong Revelesen sapta 12 em i wanem samting?
9 Long dispela taim ol brata i popaia na ol i ting “pikinini man” long Aisaia 66:7 em i wankain olsem “pikinini man” long Revelesen 12:5. Olsem na dispela Wastaua (tok Inglis) bilong Mas 1, 1925 i tok:
‘“Meri’ i makim dispela hap bilong Saion, em oganaisesen bilong God, em i kamapim nupela gavman o nupela lain bilong bosim ol lain man bilong graun long stik ain na long stretpela pasin. . . . (Galesia 4:26) Em olsem: Saion o Jerusalem, em oganaisesen bilong God, em i dispela mama i kamapim dispela nupela lain o lain bilong mekim wok gavman. Ol manmeri bilong graun, em spirit holi i bin makim ol, ol i hap bilong dispela ‘meri’ na ol i olsem maus bilong em. Dispela meri ‘em i pasim san long skin bilong em olsem klos,’ em i Saion long heven wantaim ol lain bilong oganaisesen bilong God long graun long taim Bikpela i kam long tempel na God i orait long ol. . . . Nau Em i stap long tempel bilong em na em i karamapim stretpela pasin bilong em long ol olsem klos, na oganaisesen bilong em i kamapim nupela lain, narapela nem bilong en Saion, na i lait olsem san.”
10. Olsem wanem long oganaisesen spirit bilong Seten long nau? Nau dispela oganaisesen i mekim wanem pait?
10 Nau yumi save, dispela “snek” em Seten na em i no kaikai dispela “pikinini man”em Kingdom bilong God long han bilong Krais i kamap long heven long 1914 long pinis bilong taim bilong ol man bilong ol arapela lain. (Luk 21:24) Taim dispela Kingdom i kamap, pait i kamap long heven na ol i tromoi ol ensel nogut, dispela hap bilong oganaisesen bilong Seten yumi no inap lukim, i kam daun long graun na ol i no inap i go bek moa long heven na brukim pasin wanbel bilong lain bilong heven. Dispela oganaisesen ol i tromoi i kam daun, nau ol i kirapim pait long oganaisesen bilong Jehova hia long graun. Ol i kirapim pait long “ol arapela pikinini bilong en. Em ol dispela manmeri i save bihainim olgeta lo bilong God, na ol i autim tok bilong Jisas na bihainim em.”—Revelesen 12:17.
Wok Gut Wantaim
11. (a) Tok bilong Pol long “Jerusalem i stap long heven,” dispela tok i stret long husat long nau? (b) Devit i tok wanem long Jerusalem i stap long graun, em haus lotu bilong Jehova i stap long en?
11 “Meri” bilong God em Jerusalem o Saion. Olsem na ol tok bilong Pol long “Jerusalem i stap long heven” i stap fri, nau ol dispela tok i stret long “ol arapela pikinini bilong en,” dispela “snek,” Seten, i “kirapim pait” yet long ol. (Galesia 4:26) Long taim bilong Devit, Jerusalem em i strongpela taun na ol man bilong Jerusalem i sindaun gut wantaim. Devit i tok: “Ol i tokim mi, ‘Goan, yumi go long haus bilong Bikpela.’Ol i tok olsem na mi belgut tumas. Orait nau mipela kamap pinis na sanap insait long banis bilong Jerusalem. Ol i bin wokim gen Jerusalem na em i gutpela tumas. Ol lain bilong Isrel i save kam hia bilong tenkyu long Bikpela, olsem bipo em i bin tokim ol.”—Sam 122:1-4.
12. (a) Tok bilong Sam 122:1-4 i makim wanem samting long nau? (b) Jerusalem wantaim haus lotu sel i stap long en, olsem wanem dispela i helpim ol Isrel long i stap wanbel?
12 Dispela tok i makim oganaisesen bilong Jehova long heven na graun i stap wanbel long nau. Long ol bikpela de holi, taim ol 12-pela lain bilong Isrel i bung wantaim na lotu wantaim long Jehova long haus lotu sel long Jerusalem, long dispela taim ol man inap lukim ol i stap wanbel. Na taim King Devit i bosim ol, ol i pas yet wantaim na i stap wanbel. Ol i wanpela lain, olsem ol wantok, na ol i stap wanbel, tasol bikpela samting i mekim na ol i stap wanbel, em olsem: Ol i save lotu wantaim long God bilong ol na i gat ol lo bilong lotu ol i mas bihainim. Yes, God i orait long Jerusalem i stap olsem as ples bilong lotu bilong ol, na ol i ken lotu wantaim long dispela ples aninit long wanpela lain pris tasol ol i bilong lain bilong Livai na bilong famili bilong namba wan het-pris bilong Isrel, em Eron, bikbrata bilong profet Moses. Na olgeta 12-pela lain ol i aninit long wanpela kontrak tasol, em kontrak bilong Lo, na dispela samting i mekim ol i narapela kain long olgeta narapela lain, em ol i save lotuim ol spirit nogut.
13. Devit i tok wanem long ol Isrel bilong bipo ol i stap wanbel?
13 Olgeta dispela samting i mekim ol manmeri bilong God i stap wanbel tru! Ol i pas gut wantaim olsem wanpela lain o oganaisesen na dispela samting i helpim ol na lukautim ol. Devit i stori long dispela samting olsem: “Sapos ol manmeri bilong God i sindaun gut wantaim na i stap wanbel olsem ol brata tru, em i gutpela tumas, na ol i ken i stap belgut. Dispela pasin i olsem gutpela wel bilong diwai oliv ol i bin kapsaitim long het bilong Eron, na i go daun long gras bilong wasket, na i go inap long arere bilong longpela klos bilong en. Pasin bilong wanbel i olsem wara bilong nait i pundaun long maunten Hemon na ol maunten bilong Saion. Long dispela ples Bikpela i save mekim gut tru long ol man i stap wanbel. Em i givim ol laip i stap gut oltaim oltaim.”—Sam 133:1-3.
14. (a) Husat ol i stap wanbel long nau olsem ol Isrel bilong bipo? (b) Long tok piksa ol Isrel bilong spirit ol i sanap we? Ol i mekim wanem singsing wantaim?
14 Ol Isrel bilong bipo i pas gut wantaim na i stap wanbel na Devit i pilim tru dispela samting na raitim dispela sam. Na long nau tu i gat wanpela lain ol i stap wanbel olsem. Em wanem lain? Em lain Isrel bilong spirit, olsem “Isrel tru bilong God,” em ol i gat wanpela “mama” tasol na Pol i tok long dispela samting, olsem: “Tasol arapela Jerusalem i stap long heven, em i stap fri. Em i mama bilong yumi.” (Galesia 6:16; 4:26) Dispela “mama” em i no putim ol pikinini bilong em i stap kalabus aninit long kontrak bilong Lo. Nogat. Tru, Baibel i mekim tok piksa na i tok dispela “Isrel tru bilong God” i gat 12-pela lain bilong en, tasol olgeta 144,000 manmeri bilong dispela lain ol i kisim wankain “mak bilong God i stap laip,” na olgeta ol i sanap long dispela wanpela “maunten Saion” bilong heven. (Revelesen 7:1-8; 14:1-4) Ol i singsing wantaim—“ol i singim song bilong Moses, wokboi bilong God, na song bilong Pikinini Sipsip,” em Krais Jisas! (Revelesen 15:3, 4; Jon 1:29, 36) God i amamas tru long dispela “song” i makim ol i winim pait!
15. (a) God i stretim wok bilong ol 144,000 bilong mekim singsing na wanem narapela wok tu? (b) Olsem wanem dispela tok “oganaisesen” i makim pasin bilong i stap wanbel?
15 God i stretim wok bilong ol 144,000 wantaim Man Bilong Bosim Singsing bilong ol, em “Pikinini Sipsip,” tasol ol i no bilong mekim singsing tasol; nogat. Bai ol i stap king na mekim wok king inap 1,000 yia bilong stretim bek nem bilong Jehova, em i King bilong heven na graun, na bilong helpim olgeta manmeri i bilip. (Revelesen 20:4-6) “Oganaisesen” i narapela kain long pasin bilong mekim nabaut. Dispela tok “oganaisesen” yet i makim pasin bilong wok gut wantaim, olsem ol i stretim gut wok bilong olgeta wan wan na ol inap wok gut wantaim na mekim wanpela wok. Olsem na pasin bilong stretim gut wok, olsem “oganaisesen,” i save helpim ol man long pas gut wantaim, na wok gut wantaim, na bihainim lo, na stap wanbel—ol i no mekim nabaut na kros kros.
16. Inap 19 handet yia bipo God i kamapim long ples klia laik bilong em, em i laik bai ol Kristen i stap olsem wanem? Na nau ol Witnes Bilong Jehova i stap olsem wanem?
16 God i laik bai ol Kristen i mas i stap wanbel, olsem na 19 handet yia bipo em i “givim presen long ol man,” olsem ol aposel na profet na evanselis na wasman na tisa. Long 1879 ol i kirap long wokim nius Wastaua na God i kamapim tu ol ‘wasman na tisa.’ Dispela samting i helpim ol Witnes Bilong Jehova na long nau ol i “kamap wanbel tru long bilip, na [ol i] gat wankain save long Pikinini Bilong God.” (Efesas 4:8, 11-16) Yumi tenkyu tru long Jehova i bin helpim yumi olsem, long wanem inap planti handet yia pinis ol lotu long olgeta hap bilong graun ol i longlong nabaut na mekim nabaut.
17. Olsem wanem yumi save God i no tingting long helpim ol Kristen bilong lain bilong heven tasol bambai ol i ken i stap wanbel? Na Jisas i tok wanem long dispela samting?
17 God i no tingting long helpim tasol ol Kristen bilong lain bilong heven bambai ol i ken i stap wanbel. Nogat. Long wanem em i laik “stiaim olgeta samting i go i go, na long dispela taim em i makim pinis, bai em i bungim olgeta samting long Krais, ol samting bilong heven na bilong graun tu.” (Efesas 1:9, 10) Na Jisas i bin tok profet olsem: “Mi gat arapela sipsip tu, na ol i no bilong dispela banis. Mi mas bringim ol dispela tu. Na bai ol i harim maus bilong mi. Na bambai i gat wanpela lain sipsip tasol na wanpela wasman tasol bilong ol sipsip.”—Jon 10:16.
18. (a) Husat ol i olsem ‘ol samting long graun’ em ol i mas bungim ol wantaim? (b) Long 1935 olsem wanem ol i kirap tingim tru ol “arapela sipsip”?
18 Ol dispela “arapela sipsip” i olsem ol samting “bilong graun” God i laik bungim wantaim. Olsem na spirit bilong God i bin stiaim ol samting i go i go na samting olsem 21 yia bihain long taim Krais Jisas i kirap mekim wok king long 1914, ol i kirap tingim tru ol dispela “arapela sipsip.” Long wanpela kibung bilong ol Witnes Bilong Jehova long Wosington, long 1935, presiden bilong Sosaiti Was Taua i stori long dispela ‘bikpela lain manmeri,’ ol i olsem ol “arapela sipsip” em Gutpela Wasman, Krais Jisas, bai bungim ol. (Revelesen 7:9-17) Olsem wanem? Long dispela kibung Jisas i bungim sampela “arapela sipsip”? Tru tumas, long wanem 840 manmeri long dispela kibung ol i kisim baptais bilong makim ol i dediket long God Jehova.
19. (a) Dispela ‘bikpela lain’ i bikpela olsem wanem long nau? (b) ‘Bikpela lain’ ol i bung wantaim dispela hap bilong oganaisesen bilong Jehova ol man inap lukim na long dispela rot ol i kamap wanbel wantaim husat? Na ol i tingting strong long wanem samting?
19 Long dispela taim wok bilong bungim ‘bikpela lain’ “arapela sipsip” i kirap. Bihain planti tru ol i kam bung na nau lain bilong ol em inap olsem 2,800,000. Ol i bung wantaim dispela hap bilong oganaisesen bilong Jehova i stap long graun na ol inap lukim, em lain remnan bilong “liklik lain” bilong “dispela banis” bilong Gutpela Wasman bilong ol sipsip. Long dispela rot ol i kamap wanbel wantaim Bikpela Man bilong wokim oganaisesen bilong heven na graun. Na ol i tingting strong long holimpas dispela pasin bilong wanbel taim ol i kisim laip i stap oltaim long Paradais long graun, em Nambawan Bikpela Wasman, em Jehova, em bai givim dispela laip long ol.—Luk 12:32; 23:43.
20. Lain remnan wantaim ‘bikpela lain’ ol i tingim ol samting Nambawan Bikpela Wasman i bin mekim bilong ol bihain long 1914, na dispela i kirapim ol long mekim wanem wok?
20 Taim lain remnan na ol manmeri bilong ‘bikpela lain’ i tingim ol samting Nambawan Bikpela Wasman bilong ol sipsip i bin mekim long heven na long graun kirap long pinis bilong taim bilong ol man bilong ol arapela lain long 1914, ol i pilim tru long bel na ol i laik tenkyu long Em. Dispela samting i kirapim ol long singsing wantaim na litimapim nem bilong Jehova, olsem sam i tok: “Litimapim nem bilong [Ja] insait long tempel bilong en. Yumi amamas long bikpela strong bilong en i stap long heven. Em i bin mekim ol bikpela wok. Olsem na yumi litimapim nem bilong en. Em i stap nambawan tru na i gat biknem i antap tumas. Yumi litimapim nem bilong en. Winim biugel na litimapim nem bilong en. Paitim ol gita samting na mekim olkain musik na litimapim nem bilong en. Paitim kundu na mekim singsing na litimapim nem bilong en. Paitim gita na winim mambu na litimapim nem bilong en. Paitim simbol na mekim krai bilong en i go na litimapim nem bilong Bikpela. Paitim simbol strong moa bai krai i kamap bikpela na litimapim nem bilong Bikpela. Yupela olgeta samting i gat laip, yupela litimapim nem bilong [Ja]! Litimapim nem bilong [Ja]!”—Sam 150:1-6.
21. (a) Wanem taim “Olgeta samting i gat laip” bai lotuim Jehova? (b) Olgeta long kongrigesen bilong Jehova long heven na long graun, bai ol i wok wantaim husat? Na bilong mekim wanem?
21 Liklik taim tasol na bai “skai” na “graun” bilong nau i pinis long taim bilong pait bilong “bikpela de bilong God I Gat Olgeta Strong.” Bai “nupela skai” na “nupela graun” i kamap na i no ken pinis. (2 Pita 3:7-13; Revelesen 16:14, 16) Long dispela taim “olgeta samting i gat laip” na i stap long klinpela nupela graun bai ol i litimapim nem bilong Ja, em Bikpela Man bilong wokim stretpela oganaisesen bilong heven na graun. Olgeta insait long dispela oganaisesen, long heven na long graun, bai ol i litimapim nem bilong Jehova, na bai ol i stap gut long wok bilong em na wok wantaim em long stretim bek nem bilong em, em i King bilong heven na graun, inap long olgeta taim bihain. Bai olgeta samting i stap wanbel tru!
Bai Yu Bekim Wanem Tok?
◻ Wanem wanem samting i kamap na Seten i kamap bos bilong ol spirit nogut?
◻ Taim ol brata i save i gat tupela bikpela oganaisesen i stap, dispela save i helpim ol olsem wanem?
◻ Tok bilong Sam 122:1-4 i makim pasin wanbel bilong wanem samting long nau?
◻ Ol disaipel bilong Krais em spirit holi i makim ol, olsem wanem yumi save, Jehova i no tingting long helpim ol dispela disaipel tasol bambai ol i ken i stap wanbel?
◻ Wanem taim “olgeta samting i stap laip” bai litimapim nem bilong God Jehova?
[Ol piksa long pes 16, 17]
Oltaim lain bilong Jehova ol i save stap wanbel wantaim na ol i save stap wanbel wantaim Man bilong wokim oganaisesen bilong heven na graun tu.
[Sat long pes 16, 17]
OL “HOLIMPAS STRETPELA PASIN” KIBUNG DISTRIK BILONG 1986
DE PLES TOK PLES
Janueri 2-5 Pot Mosbi Tok Pisin
Tok Motu
Tok Inglis
Janueri 9-12 Lae Tok Pisin
Janueri 16-19 Madang Tok Pisin
Janueri 17-19 Rabaul Tok Pisin
Janueri 17-19 Popondetta Tok Motu
Janueri 17-19 Savaiviri Tok Motu
Janueri 18, 19 Daru Tok Motu
Janueri 24-26 Arawa Tok Pisin
Janueri 24-26 Kerema Tok Motu
Janueri 24-26 Boboa Tok Motu
Janueri 24-26 Klinwara Tok Pisin
Janueri 31-Februeri 2 Wirwir Tok Pisin
Janueri 31-Februeri 2 Kavieng Tok Pisin
Februeri 1, 2 Kikori Tok Motu
Janueri 31-Februeri 2 Agi Tok Motu
Februeri 7-9 Wewak Tok Pisin