Go Antap

Stori: Planti man i tingim tok bilong 1 Tesalonaika 4:​17, na ol i bilip olsem wantu bai ol gutpela Kristen i lusim graun long bodi na “i go antap long klaut” bilong bungim Bikpela.

Aposel Pol i stori long wanem samting na em i tok, ol Kristen bai “go antap” bilong bungim Bikpela?

1 Te 4:​13-18: “Ol brata, mipela i laik bai yupela i ken save gut long wanem ol samting bai i kamap long ol manmeri i dai pinis. Nogut yupela i sori tumas, olsem ol arapela manmeri i no bilip long God na i no wetim taim bilong kirap bek long matmat. Yumi bilip olsem Jisas i dai na i kirap bek gen. Olsem na yumi save, long [rot] bilong Jisas, God bai i kirapim ol Kristen i dai pinis na ol bai i kam bek wantaim Jisas. Mipela i autim tok bilong Bikpela long yupela olsem. Taim Bikpela i kam bek, yumi manmeri i gat laip na i stap yet, yumi bai i no inap i go paslain long ol manmeri i dai pinis. Nogat. God bai i tok strong, na namba wan ensel bai i singaut, na biugel bilong God bai i krai. Na Bikpela bai i lusim heven na i kam daun. Na ol man i bilip long Jisas na i dai pinis, ol bai i kirap bek pastaim. Long dispela taim yumi manmeri i gat laip na i stap yet, yumi bai i go antap long klaut wantaim ol dispela manmeri, na yumi olgeta bai i bungim Bikpela. Na yumi bai i stap wantaim Bikpela oltaim oltaim. Orait yupela i mas autim dispela tok long ol arapela manmeri bilong God, bilong strongim bel bilong ol.” (Yumi ken save, sampela long kongrigesen long Tesalonaika ol i bin i dai. Olsem na Pol i kirapim ol Kristen i stap yet long strongim bel bilong ol narapela long tok bilong kirap bek. Em i tokim ol, Jisas i dai na em i kirap bek, na olsem tasol long taim Bikpela i kam bek, ol Kristen i bin stap gut long God na ol i dai pinis bai ol i kirap bek na i stap wantaim Krais.)

Husat dispela lain ol bai “go antap long klaut,” olsem 1 Tesalonaika 4:17 i tok?

1Th 4 Ves 15 i tok, em ol gutpela Kristen “i stap yet” taim Bikpela i kam bek, olsem ol i stap laip taim Bikpela i kam. Bihain bai ol i dai o nogat? Rom 6:​3-5 na 1 Korin 15:​35, 36, 44 (i stap long pes 112, 113) i tok, ol i mas i dai bambai ol inap kisim laip long heven. Tasol i no gat wok long ol i slip long matmat na wetim Bikpela i kam bek. “Wantu tasol” bai ol i “go antap” bilong i stap wantaim Bikpela.​—⁠1 Ko 15:​51, 52; na KTH 14:⁠13.

Yu ting ol man bai lukim Krais i kam long klaut na kisim ol gutpela Kristen i go antap?

Olsem wanem? Jisas i tok ol man bai lukim em gen long ai tru bilong ol?

Jo 14:19: “Liklik taim na bai ol manmeri bilong graun i no lukim mi moa. Tasol yupela [ol gutpela disaipel] bai i lukim mi. Mi stap laip, olsem na yupela tu bai i stap laip.” (Skelim wantaim 1 Timoti 6:16.)

Olsem wanem bai Bikpela “i lusim heven na i kam daun”?

Yu ting Bikpela inap “lusim heven na i kam daun,” olsem 1 Tesalonaika 4:16 i tok, na ol man i no lukim em? Long taim bilong Sodom na Gomora, Jehova i tok em bai “go daun na lukim” pasin ol manmeri i mekim. (Stt 18:21) Tasol taim Jehova i skelim pasin bilong ol olsem, i no gat wanpela man i lukim em; tasol ol i lukim ol ensel em i salim. (Jo 1:18) Olsem tasol Jisas i no ken i kam long bodi, tasol em inap lukluk i kam daun long ol gutpela disaipel bilong em long graun bilong givim pe long ol.

Orait, olsem wanem ol manmeri bai “lukim” Bikpela i ‘kam long klaut’?

Jisas i tok: “Long dispela taim ol manmeri bai i lukim Pikinini Bilong Man [Krais Jisas] i stap long wanpela klaut na i kam wantaim bikpela strong na bikpela lait bilong en.” (Lu 21:27) Dispela tok na ol narapela tok olsem long Baibel i no pait wantaim tok bilong Jisas long Jon 14:19. Nogat tru. Yu tingim: Long maunten Sainai, wanem samting i bin kamap taim God i ‘kam long ol manmeri long bikpela klaut,’ olsem Kisim Bek 19:9 i tok? Ol Israel i no lukim God, a? Ol i lukim tasol sampela samting i kamap na i makim olsem God i stap wantaim ol. Olsem tasol, taim Jisas i tok em bai kam “long wanpela klaut,” insait bilong dispela tok i olsem: Bai ol man i no inap lukim em, tasol bai ol i save em i kam pinis na i stap. Bai ol i “lukim” em long ai bilong tingting, olsem ol bai save em i stap. (Lukim sampela tok moa long dispela long bikpela het-tok “Kam Bek Bilong Krais.”)

Yu ting ol Kristen inap go antap long heven long bodi bilong graun?

1 Ko 15:50: “Man bilong dispela graun [em i stap yet long bodi bilong graun] em i no inap i go insait long kingdom bilong God . . . Na samting bilong bagarap em i no inap kisim samting i no save bagarap.”

Ating samting i bin painim profet Elaija i pait long dispela? Nogat tru. Bilong save long dispela, yumi mas tingim tok klia Jisas i mekim sampela handet yia bihain long taim bilong Elaija: “I no gat narapela man i bin i go antap long heven. Nogat. Pikinini Bilong Man em wanpela tasol i bin lusim heven na i kam daun.” (Jo 3:13) Elisa i lukim “wanpela raunwin i kisim Elaija i go long heven,” tasol i no olsem Elaija i bin i go long heven, em ples God na ol ensel i stap long en. Long wanem Baibel i tok, bihain long dispela Elaija i bin salim pas long king bilong Juda na krosim em. (2 Kin 2:11; 2 Sto 21:​1, 12-15) Long dispela taim bipo, ol man i no wokim yet ol balus, olsem na Jehova i mekim wok long ol samting bilong em yet (karis insait long paia na raunwin) bilong litimapim Elaija i go antap long ples ol pisin i flai nabaut long en, olsem “heven,” na bringim em i go long narapela hap.​—⁠Lukim Stat 1:​6-8, 20.

Yu ting ol gutpela Kristen bai go long heven long pasin hait​—⁠bai ol i no i dai, tasol bai ol i lusim graun i go na ol man i no lukim ol moa?

Ro 6:​3-5: “Yumi bin pas wantaim Krais Jisas na kisim baptais, na long dispela pasin yumi olgeta i bin pas wantaim dai bilong em. . . . Yumi pas wantaim Krais na yumi bin dai olsem em i bin i dai. Olsem tasol bai yumi pas wantaim em na kirap bek tu olsem em i bin kirap.” (Ol samting i bin painim Jisas i olsem piksa. Ol disaipel na ol narapela i save em i dai. Em i dai na kirap bek na bihain tasol em i go antap long heven.)

1 Ko 15:​35, 36, 44: “Ating wanpela man bai i askim olsem, ‘Ol man i dai pinis, bai ol i kirap bek olsem wanem? Bai ol i gat wanem kain bodi taim ol i kirap bek?’ Dispela em wanem kain kranki tok? Yu save, taim yu planim pikinini bilong wit samting, dispela pikinini i mas i dai pastaim, na bai em i kisim laip. Bodi yumi planim, em i bilong graun. Bodi i kirap bek, em i bilong heven.” (Olsem na man i mas i dai pastaim na bai em i kisim bodi bilong heven, a?)

Yu ting Bikpela bai kisim ol gutpela Kristen i go antap olsem mirakel, paslain long taim bilong bikpela hevi tru?

Mt 24:​21, 22: “Long dispela taim bai i gat bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen. Na sapos God i no bin sotim taim bilong ol dispela hevi, orait olgeta manmeri bai i lus. Tasol em i tingting long ol manmeri em i makim pinis. Olsem na bai em i sotim dispela taim.” (Skripsa hia i no tok ‘ol manmeri God i makim,’ olgeta bai go long heven paslain long taim bilong bikpela hevi tru, a? Nogat. Dispela skripsa i makim olsem ol dispela manmeri na ol manmeri i poroman bilong ol, ol inap winim taim bilong bikpela hevi tru.)

KTH 7:​9, 10, 14: “Mi lukim planti manmeri tru ol i bung i stap, na i no inap man i kaunim namba bilong ol. Dispela ol manmeri ol i bilong olgeta lain man . . . Ol i bin [“winim taim bilong,” NW] bikpela hevi.” (Bilong “winim” taim bilong bikpela hevi, pastaim ol dispela planti manmeri i mas i stap insait long dispela taim bilong hevi. Olsem na dispela bikpela lain em ol manmeri i stap laip long taim bilong bikpela hevi tru na ol i winim dispela taim.) (Bai ol i stap long graun; lukim pes 165, 166.)

Ol Kristen tru bai abrusim bagarap olsem wanem long taim bilong bikpela hevi tru?

Ro 10:13: “Olgeta manmeri i askim Bikpela [“Jehova,” NW] long helpim ol, em bai i kisim bek ol.”

Sef 2:3: “Yupela ol manmeri i no save bikhet na sakim tok bilong Bikpela [“Jehova,” NW, AS, Yg, By], yupela i mas i kam long em. Yupela i mas daunim yupela yet na mekim pasin i stret. Sapos yupela i mekim olsem, orait taim Bikpela i belhat na bekim pe nogut long ol manmeri, yupela bai i no inap bagarap.” (Na Aisaia 26:⁠20)

Yu ting olgeta Kristen tru bai go long heven bihain long taim bilong bikpela hevi tru?

Mt 5:5: “Ol man i save daunim nem bilong ol yet, em ol i ken amamas. Bai God i givim olgeta graun long ol.”

Sng 37:29: “Ol stretpela man bai i kisim graun God i givim ol, na bai ol i stap oltaim long en.” (Na Ps 37 ves 10, 11, 34)

1 Ko 15:50: “Man bilong dispela graun em i no inap i go insait long kingdom bilong God.”

Lukim tu bikpela het-tok “Heven.”

I gat wanem as na God i kisim sampela Kristen i go long heven bilong i stap wantaim Krais?

KTH 20:6: “Ol bai i stap pris bilong God na bilong Krais. Na ol bai i stap king wantaim Krais long dispela 1,000 yia.” (Ol bai mekim wok king wantaim Krais, olsem na i mas i gat sampela manmeri ol i bosim. Ol i husat? Lukim Matyu 5:5 na Song 37:29.)

Lukim tu bikpela het-tok “Kamap Nupela Gen.”

Ol man i go long heven, yu ting bihain bai ol i kam bek na stap oltaim long Paradais long graun?

Snd 2:21: “Ol gutpela stretpela man bai i stap gut oltaim long graun bilong yumi.” (Baibel i no tok ol bai kam bek long graun; em i tok bai ol i stap gut oltaim long graun.)

1 Te 4:17: “Yumi [ol Kristen i go antap long heven] bai i stap wantaim Bikpela oltaim oltaim.”

Sapos Man i Tok​—⁠

‘Yu ting Bikpela bai kam na kisim ol Kristen i go antap wantu tasol?’

Yu ken tok: ‘Mi save, ol man i gat kain kain tingting long dispela. Wanem tingting bilong yu? . . . Sapos yumi skelim tingting bilong yumi wantaim tok bilong Baibel, dispela inap helpim yumi, a? (Kamapim sampela tok hia i stret long helpim man bilong haus.)’

O yu ken tok: ‘Planti man i ting, wantu bai ol Kristen i go antap, na long dispela rot bai ol i abrusim bagarap long taim bilong bikpela hevi tru. Yu gat dispela tingting?’ Na ating yu ken tok moa olsem: (1) ‘Yumi laik bai God i lukautim yumi long dispela taim, a? Na mi tingim tru sampela tok bilong Baibel i kolim ol samting yumi mas mekim bambai God i lukautim yumi. (Sef 2:⁠3)’ (2) ‘Baibel i tok, God bai lukautim sampela gutpela man na bai ol i stap hia long graun. (Snd 2:​21, 22) Dispela i stret long laik bilong God long pastaim, a? Em i wokim Adam na putim em i stap long Paradais long graun.’

Narapela tok yu ken mekim, em olsem: ‘Ating yu bilip olsem long las de wantu bai Bikpela i kisim ol Kristen i go long heven, a? . . . Yu ting ol bai mekim wanem wok long heven? . . . Lukim tok bilong Kamapim Tok Hait 20:6 (na Re 5:​9, 10). . . . Tasol ol bai bosim wanem ol lain? (Sng 37:​10, 11, 29)’