Yu Ting Jisas Bai Kisim Yu i Go Antap?
PLANTI man i bilip olsem taim ol i dai bai ol i go antap long heven. Tasol sampela i ting, Jisas bai kisim ol i go antap. Yu gat dispela tingting?
Wanpela man bilong autim tok bilong lotu Talatala em i tok, ‘Planti milion manmeri, wantu ol i lus, na i no gat wanpela man i save ol i go we!’ Wanpela buk i stori long ol lotu i tok long dispela olsem: ‘Taim Krais i kam bek, sios bai go bung wantaim em.’—Evangelical Dictionary of Theology.
Sampela i tingting planti long ol i mas lusim ol pren na famili bilong ol na i go antap na bungim Krais. Tasol planti ol i ting, dispela samting i mas kamap. Orait, yumi laik save, em bai kamap tru? Sapos olsem, em bai kamap long wanem taim?
Kain Kain Tingting
Baibel i kamapim klia olsem, paslain long kirap bilong Taim Bilong Wan Tausen Yia Bilong Krais i Stap King, bai i gat wanpela hap taim Baibel i kolim olsem taim bilong “bikpela hevi tru.” Jisas i tok: “Long dispela taim bai i gat bikpela hevi tru. Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen.” (Matyu 24:21; KTH 20:6) Sampela i ting, taim dispela “bikpela hevi tru” i no kamap yet, Jisas bai kisim ol i go antap. Na sampela i ting ol bai mekim olsem long taim bilong dispela “bikpela hevi tru.” Na sampela i ting ol bai go antap taim dispela “bikpela hevi tru” i pinis.
Inap sampela handet yia bipo, planti man i bilip olsem ol bai go antap taim dispela “bikpela hevi tru” i pinis. Orait, long yia 1800 samting long Inglan, wanpela man bipo em i pasto bilong Sios bilong Aialan, em Jon Nelson Dabi (John Nelson Darby), em i kirapim wanpela lain ol i bilong lotu Angliken, na ol i kisim nem Bretren (olsem Brata). Nambawan ofis bilong ol i stap long Plimot. Em i raun na autim tok long hap bilong Swiselan na ol narapela hap bilong Yurop. Em i tok, kambek bilong Krais i gat tupela hap bilong en. Long pasin hait, pastaim em bai kisim ol “santuman” i go antap, paslain long wanpela bikpela hevi em bai stap inap 7-pela yia na bagarapim ol samting long graun; orait nau Krais bai kamap ples klia na ol “santuman” bai kam wantaim em na ol bai stap king wantaim Krais long graun inap wan tausen yia.
Dabi i tok, ol i mas i stap narapela kain long ol man bilong dispela graun. Ol man i gat wankain tingting olsem em, bihain ol i kisim nem olsem Ol Brata i Stap Narapela. Tasol wanpela man (B. W. Newton) i kamapim narapela lain, em ol i bilip olsem ol bai go antap, tasol ol i ting ol bai go taim dispela “bikpela hevi” i pinis. Na narapela man (Alexander Reese) i ting dispela bai kamap bihain long “bikpela hevi tru” tasol em i no bilip olsem Jisas bai mekim hait. Em i tok, dispela inap bagarapim bilip bilong ol man i wetim Krais i kam bek.
Sampela bilong ol dispela lain i ting ol dispela narapela narapela tingting inap nogutim bilip bilong ol long kambek bilong Krais. Na sampela ol i bilip olsem ol man i givim bel tru long Krais ol bai go antap pastaim, na ol narapela em ol i givim hap bel long ol samting bilong dispela graun ol bai go antap bihain.
Planti lain i save autim tok bilong lotu ol i tok, klostu nau na Krais bai kisim ol gutpela Kristen i go antap. Tasol i gat narapela narapela kain tingting bilong dispela samting, olsem na lotu Elim Pentikostal long Inglan i wokim wanpela liklik buk i tok, “Tru i gat kain kain samting ol man i ting bai kamap long taim Bikpela Jisas i kam bek, . . . tasol ol wan wan man inap kamapim wanem insait bilong dispela tok profet i stret long bilip bilong em. Sampela i no strong long bihainim wanpela tingting tasol—ol i laik wetim samting i kamap bilong truim dispela tok profet.”
Yumi mas skelim olgeta bilip wantaim Tok bilong God, em Baibel, na bai yumi ken save, ol i stret o nogat. (2 Timoti 1:13; 3:16, 17) Olsem na Baibel i tok wanem long Jisas bai kisim ol man i go antap long heven?