Sapta 8

Olsem Wanem Mi Inap Painim Ol Gutpela Pren?

YANGPELA man Roni i bel hevi na em i tok, “Mi bin skul long dispela hap inap 8-pela yia pinis na mi no gat wanpela pren. Nogat tru!” Ating sampela taim yu tu yu bel hevi olsem, long wanem yu no inap painim wanpela gutpela pren. Tasol ating yu laik save, ol gutpela pren i save mekim wanem kain pasin long yu? Na olsem wanem yu inap painim ol gutpela pren?

Baibel i tok: “Ol gutpela pren i save laikim yumi long olgeta taim. [Ol] i save sambai long helpim yumi long taim bilong hevi.” (Sindaun 17:17) Yu no ken ting gutpela pren i bilong helpim yu long taim bilong hevi tasol. Nogat. Wanpela yangpela meri, nem bilong em Mavia, em i tok: “Sampela pren giaman i save lukim yu i laik paul, na taim yu paul pinis nau ol i tok, ‘Mi save dispela hevi bai painim yu, tasol mi pret long tokim yu.’ Tasol pren tru i no save mekim olsem. Taim yu laik paul, em i toksave pastaim bambai yu ken abrusim hevi. Ating em i save bai yu no amamas long tok bilong em, tasol em i no pret long tokim yu.”

Sapos wanpela pren bilong yu i laik helpim yu na em i tok stret long yu olsem sampela pasin yu mekim i no gutpela, ating bai yu bel hevi long dispela tok. Tasol olsem wanem? Bai yu bel nogut na sakim tok bilong em? Sindaun 27:6 i tok: “Ol pren tru i save givim pen long yu bilong helpim yu. Tasol ol birua i save mekim planti gutpela pasin long yu bilong giamanim yu tasol.” Man i gat stretpela tingting na em i save tok stret, em yu mas laikim dispela kain man i stap pren bilong yu.

Ol Pren Giaman na Ol Pren Tru

Pegi i gat 23 krismas na em i tok: “Ol samting i bin painim mi i kamapim long ples klia olsem sampela pren i no pren tru​—ol i no save helpim yumi long bihainim gutpela pasin.” Pegi i tok, taim em i yangpela yet, sampela hevi i kamap na em i mas lusim papamama. Em i go i stap wantaim tupela Witnes Bilong Jehova, em Bil wantaim meri bilong em Loi, na tupela i mekim gut long em. Tupela i kirap lainim em long tok bilong Baibel. Pegi i tok, “Mi stap wantaim ol inap sampela mun na mi stap amamas tru na mi stap bel isi.” Tasol bihain Pegi i bungim sampela yangpela na em i lusim Bil tupela Loi na bihainim ol dispela yangpela.

Pegi i stori moa, olsem: “Ol dispela nupela ‘pren’ bilong mi i lainim mi long planti samting​—ol i lainim mi long stilim ol redio-kaset samting, na raitim sek giaman bilong baim samting long stua, na smok spakbrus. Mi mas tromoi 200 dola long olgeta de bilong baim ol drak, na ol dispela ‘pren’ i lainim mi long rot bilong painim dispela bikpela mani.” Taim Pegi i gat 18 krismas em i bungim wanpela yangpela man, nem bilong em Rei. Rei i tok em bai givim nating ol drak long Pegi inap long laik bilong Pegi​—em i no ken baim. Pegi i amamas tru. Em i ting nau em i no gat wok moa long stil na giaman bilong painim mani bilong baim drak. Tasol nogat. Rei i tok Pegi i mas kamap pamukmeri bilong painim mani. Bihain Pegi i kirap ranawe na lusim dispela ples na ol pren nogut bilong em.

Pegi i go sindaun long narapela ples na bihain tupela Witnes Bilong Jehova i raun autim tok na tupela i kamap long haus bilong em. Pegi i stori olsem: “Mi lukim tupela na mi amamas nogut tru. Mi krai na mi holim tupela. Tupela meri hia i kirap nogut. Mi les pinis long pasin bilong ol pren bilong mi, em ol i man bilong tupela maus na ol i pren giaman tasol. Tasol ol Witnes hia ol i pren tru.” Orait Pegi i kirap gen long lainim tok bilong Baibel.

Tasol Pegi i hatwok long stretim pasin bilong em na bihainim lo bilong God. Em i hatwok tru long lusim pasin bilong smok. Tasol wanpela pren bilong em long lain Witnes i tokim em: “Taim yu dai long kisim wanpela smok, nogut yu smok na bihain yu beten askim God long lusim tingting long dispela. Taim yu no smok yet, yu mas beten askim God long strongim yu bambai yu no ken smok.” Pegi i tok: “Mi bihainim dispela gutpela tok bilong em na dispela i helpim mi long lusim smok. . . . Bipo bel bilong mi i gat tok long dispela pasin mi bin mekim, tasol nau bel bilong mi i stap isi na mi no sem moa long pasin bilong mi.”

Ol samting i bin painim Pegi i kamapim long ples klia olsem tok bilong Baibel i stret, em i tok: “Sapos man i wokabaut wantaim man i gat gutpela tingting, orait em tu bai i kisim gutpela tingting. Tasol sapos man i poroman wantaim ol man i no gat gutpela tingting, orait trabel bai i painim em.” (Sindaun 13:20) Pegi i tok: “Mi bin lusim ol pren bilong pastaim, em ol i save laikim tumas God, na ol dispela hevi i painim mi. Sapos mi no bin lusim ol, ol dispela hevi i no inap painim mi.”

Painim Ol Gutpela Pren

Yu inap painim we ol pren i laikim tumas God? Yu inap painim ol insait long kongrigesen Kristen. Wok long painim ol yangpela ol i save mekim ol wok i kamapim long ples klia olsem ol i gat strongpela bilip na ol i givim bel tru long God, na ol i no giaman tasol long i stap Kristen. (Lukim Jems 2:26.) Tasol sapos yu hatwok long painim kain yangpela olsem, orait yu ken poromanim sampela Kristen ol i gat bikpela krismas liklik, winim yu. Maski ol i gat bikpela krismas, yupela inap pren gut wantaim. Baibel i stori long Devit na Jonatan, em tupela i stap pren tru, tasol Jonatan i lapun liklik.​—1 Samuel 18:1.

Tasol yu mas mekim wanem na bai ol man i laik i stap pren bilong yu?

Tingim na Helpim Ol Narapela

Krais Jisas i gat sampela gutpela pren tru​—ol i redi long i dai bilong helpim em. Bilong wanem ol i laikim tumas Jisas? Long wanem, Jisas i save tingim tru ol na em i painim rot bilong helpim ol. Em i ‘laik tru’ long helpim ol. (Matyu 8:3) Tru tumas, sapos yu laik bai sampela man i kamap gutpela pren bilong yu, yu mas tingim ol na helpim ol.

Wanpela yangpela man nem bilong em Devit, em i tok, em i save tingim tru ol man na mekim gut long ol, na long dispela rot em i kisim sampela gutpela pren. Na em i tok, ‘Wanpela bikpela samting em olsem: Yu mas save long nem bilong man. Ol man i save amamas taim yu tingim na kolim nem bilong ol. Olsem bai ol i laik toktok wantaim yu o ating bai ol i kamapim wanpela hevi bilong ol long yu. Em nau, ol i wok long kamap pren bilong yu.’

Tasol olsem wanem? Yu mas kamap wanpela mauswara man bambai ol man i ken laikim yu na kamap pren bilong yu? Nogat. Jisas i save “daunim” em yet; em i no wanpela hambakman o mauswara man. (Matyu 11:​28, 29) Olsem na sapos yu laik bai ol man i kamap pren bilong yu, yu no ken tingim yu yet tasol, yu mas tingim ol narapela man. Sapos yu mekim sampela samting wantaim narapela man, olsem yutupela i kaikai wantaim o yu helpim em long mekim wanpela wok, dispela inap mekim na bai yutupela i pas gut wantaim na kamap pren tru.

Yu Save Putim Yau long Tok Bilong Ol?

Jisas i tok, “Yupela i mas lukaut gut bai yupela i harim gut tok.” (Luk 8:18) Taim Jisas i mekim dispela tok em i tingting long yumi mas putim yau long tok bilong God, tasol yumi ken bihainim dispela tok bilong Jisas taim yumi laik painim ol gutpela pren. Sapos yumi putim yau long tok bilong man, bai em i laik i stap pren bilong yumi. Olsem na taim wanpela man i toktok, yu mas putim yau na harim gut tok bilong em​—dispela em i bikpela samting sapos yu laik painim wanpela gutpela pren.

Sapos yumi putim gut yau long tok bilong ol man, bai ol i laikim yumi. Tasol bilong putim gut yau, yu no ken tingim ol samting bilong yu yet tasol, olsem tingim ol tok yu yet yu laik mekim. Nogat. ‘Yu mas tingim ol samting bilong ol arapela man tu.’​—Filipai 2:4.

Stap Gut long Ol

Jisas i stap gut long ol pren bilong em. “Em i laikim ol moa yet i go inap long taim em i dai.” (Jon 13:1) Yangpela man Godon em tu i stap gut long ol pren bilong em. Em i tok: “Bikpela samting pren tru i save mekim, em olsem: Em i save stap gut long yu na pas tru long yu. Taim hevi i painim yu, em i no ken lusim yu. Taim sampela man i sutim tok long mi na dispela tok i no stret, pren bilong mi i save sambai tru long mi, na mi save mekim wankain pasin long em.”

Tasol ol pren giaman ol i man bilong tupela maus na ol i save tok baksait long yu. Baibel i tok, i gat sampela man ol i save ‘bagarapim’ pren bilong ol. (Sindaun 18:24) Orait, sapos sampela man i tok baksait long pren bilong yu, bai yu mekim wanem? Bai yu tok baksait long em na ‘bagarapim’ gutnem bilong em? O bai yu sambai long em na stap gut long em?

Kamapim Bel Bilong Yu

Jisas i save kamapim bel bilong em long ol pren bilong em na dispela i kirapim ol long laikim em moa yet. Sampela taim em i kamapim bel bilong em long ol na ol i save, “em i sori tru” long ol man, o bel bilong em i “hevi tumas.” Na wanpela taim “em i krai.” Jisas i no sem long kamapim bel bilong em long ol pren tru bilong em.​—Matyu 9:36; 26:38; Mak 10:21; Jon 11:35.

Tasol i no olsem yu mas kamapim bel bilong yu long olgeta man! Tru yu no ken giamanim man, tasol taim yu save gut long wanpela man na yu bilip long em, nau yu inap kamapim bel bilong yu long em na tokim em long tingting tru bilong yu. Na taim em i kamapim bel bilong em long yu, yu mas pilim hevi bilong em na “sori” long em bambai yutupela i ken i stap pren tru.​—1 Pita 3:8.

No Gat Wanpela Man Em i Gutpela Olgeta

Tru yutupela i pren gut wantaim, tasol yu no ken ting hevi i no inap kamap namel long yutupela. I no gat wanpela man em i gutpela olgeta. Baibel i tok: “Planti taim yumi save . . . popaia. Dispela kain samting i save kamap long yumi olgeta. Na sapos i gat wanpela man i stap, em i no save mekim sampela tok i no stret, orait em i gutpela man tru.” (Jems 3:2) Sapos yu laik kamap pren tru bilong wanpela man, yu no inap mekim hariap​—yu mas lusim bikpela hap taim na lusim sampela laik bilong yu. Yangpela man Presli em i tok, dispela em i bikpela samting. Em i tok, “Tru yu gat tingting na laik bilong yu yet long ol samting, tasol yu mas redi long harim tingting na laik bilong pren bilong yu tu.”

Yu mas sori long ol man na wok strong bambai ol i laik i stap pren bilong yu, tasol sapos yu no mekim, sori tumas! Bai yu no gat wanpela pren. Oltaim bai yu stap wanpis na bai yu no amamas. Olsem na yu mas wok strong na bai yu gat ol pren bilong yu. (Lukim Luk 16:9.) Yu mas givim taim na strong bilong yu na putim gut yau long tok bilong ol na tingim tru ol. Olsem bai yu inap tokim planti man olsem Jisas i bin tok, “Yupela i stap pren bilong mi.”​—Jon 15:14.

Toktok Wantaim long Ol Dispela Askim

◻ Pren tru i save mekim wanem kain pasin long yu? Tasol pren giaman i save mekim wanem?

◻ Yu ken painim we ol gutpela pren? Yu mas pren wantaim ol yangpela tasol o olsem wanem?

◻ Sapos wanpela pren bilong yu i mekim wanpela pasin i no stret, yu mas mekim wanem?

◻ Kolim 4-pela samting yu ken mekim bambai ol man i laik i stap pren bilong yu?

[Rait long pes 66]

‘Ol dispela nupela “pren” bilong mi i lainim mi long stil na giaman na smok spakbrus. Ol i lainim mi long mekim ol pasin nogut bambai mi inap kisim 200 dola long olgeta de bilong baim ol drak’

[Blok long pes 68, 69]

I Stret Mi Kamapim Rong Bilong Pren Bilong Mi?

Sapos yu kisim save olsem pren bilong yu i wok long kisim drak, o em i mekim pasin pamuk, o giaman, o stil​—bai yu mekim wanem? Bai yu kamapim dispela long wanpela man em i gat wok long stretim dispela samting? Planti yangpela i save pasim maus na ol i no laik kamapim rong bilong ol poroman bilong ol.

Sampela i pret long kamapim rong bilong ol poroman bilong ol, nogut ol poroman i kros long ol. Na sampela i ting ol i mas i stap gut long poroman, maski poroman i bin mekim rong. Ol i no laik bai poroman i kisim strafe, olsem na ol i haitim rong bilong em, na ol i ting long dispela rot ol i helpim em. Na sapos yu kamapim rong bilong poroman bilong yu, ating bai ol narapela yangpela i tok bilas long yu na givim baksait long yu, na ol i no laik i stap pren bilong yu moa.

Tasol taim yangpela man Li i kisim save olsem gutpela pren bilong em Kris i save smok, Li i no pret long kamapim rong bilong Kris. Li i tok, “Mi pilim olsem i no stret sapos mi haitim dispela rong, olsem na mi kamapim!” Baibel i stori long wanpela yangpela man i bin mekim olsem. “Josep em i yangpela man, na em i gat 17 krismas. Em i save lukautim ol sipsip na meme wantaim ol brata bilong en, . . . Na Josep i save tokim papa long ol pasin nogut ol brata i save mekim.” (Stat 37:2) Josep i save, sapos em i pasim maus na ol brata bilong em i mekim yet ol dispela pasin nogut, bai ol i stap nogut long ai bilong God.

Sin i save bagarapim pasin bilong man. Sapos pren bilong yu i mekim rong na i no gat wanpela man i helpim em​—olsem givim sampela strongpela tok bilong Baibel long em bilong stretim em​—ating bai em i kirap mekim pasin i nogut moa yet. (Saveman 8:11) Olsem na sapos yu haitim rong bilong pren bilong yu, dispela i no inap helpim em​—na ating bai em i no inap stretim bek pasin bilong em.

Baibel i tok strong olsem: “Ol brata, sapos yupela i save olsem wanpela bilong yupela i bin mekim sin, orait yupela man i bihainim Holi Spirit, yupela i mas mekim pasin isi long dispela man na helpim em long stretim pasin bilong em.” (Galesia 6:1) Ating yu pilim olsem yu no wanpela strongpela brata na bai yu inap stretim pren bilong yu. Tasol sapos yu gat gutpela tingting bai yu kamapim dispela rong long wanpela strongpela brata em inap helpim pren bilong yu, a?

Olsem na yu mas i go toktok wantaim pren bilong yu na kamapim long ples klia dispela rong em i bin mekim. (Lukim Matyu 18:15.) Yu no ken pret. Yu mas kolim stret rong em i bin mekim na tokim em olsem wanem yu save long dispela. (Lukim Jon 16:8.) Yu no ken tok promis long haitim rong bilong em. Dispela kain promis i no stret long ai bilong God, long wanem God i tambuim pasin bilong haitim rong.​—Sindaun 28:13.

Nogut yu ting em i bin mekim rong, tasol em i no bin mekim. (Sindaun 18:13) Tasol sapos tru em i bin mekim wanpela rong na bel bilong em i gat tok long dispela, orait taim yu kamapim long ples klia, ating bai em i amamas. Yu mas putim gut yau long ol tok em i mekim. (Jems 1:19) Yu no ken mekim sampela strongpela tok olsem yu kotim em, na yu tok, “Bilong wanem yu mekim olsem?” o “Yu kranki tru!” Nogut dispela kain tok i pasim em na em i no laik kamapim bel bilong em long yu. Yu mas sori long pren bilong yu na pilim bel hevi bilong em.​—1 Pita 3:8.

Tasol sapos pren bilong yu i bin mekim bikpela rong, ating yu no inap helpim em, olsem na yu mas strong long em i go tokim papamama o sampela man i gat wok long stretim dispela kain hevi. Tasol olsem wanem sapos pren i no laik mekim olsem? Yu mas tokim em, bai yu wet liklik na sapos em i no i go kamapim rong bilong em, bai yu yet yu mekim, long wanem yu pren tru bilong em na yu laik helpim em.​—Sindaun 17:17.

Pastaim ating pren bilong yu i no pilim olsem yu laik helpim em na yu kamapim rong bilong em, na bai em i kros na i no laik i stap pren bilong yu moa. Li i tok: “Mi bin kamapim rong bilong pren bilong mi Kris, na mi save mi mekim pasin i stret. Bel bilong mi i stap isi, long wanem mi save nau sampela man i wok long helpim Kris. Na bihain Kris i kam tokim mi em i no kros long dispela samting mi bin mekim, na dispela tu i mekim gut bel bilong mi.”

Sapos pren bilong yu i bel nogut yet long stretpela pasin yu bin mekim bilong helpim em, orait yu ken save em i no wanpela pren tru bilong yu. Tasol yu ken belgut, long wanem yu bin bihainim lo bilong God na yu bin mekim pasin olsem pren tru i save mekim.

[Piksa long pes 67]

Yu hatwok long kisim sampela pren?

[Piksa long pes 70]

Sapos yu tingim gut ol narapela, bai ol i laik kamap pren bilong yu