Sapta 13

Bilong Wanem Mi Save Bel Hevi?

Mama bilong Melani i save tingim Melani em i gutpela pikinini tru. Tasol taim Melani i kisim 17 krismas, nau em i no insait moa long ol samting bilong skul, na em i no i go moa long ol pati, na em i no kisim bikpela mak moa long skul​—mak bilong em i go daun tru. Tasol i olsem em i no tingim dispela samting. Papamama i laik save long as bilong dispela samting i painim em, na tupela i save tok isi long em, olsem: “Yu gat hevi?” Tasol Melani i save kros na tok, “Yupela larim mi! Mi no gat hevi!”

Taim Mak i gat 14 krismas em i save kirap kwik na mekim ol samting na em i no save tingting gut pastaim. Em i save birua long ol man na belhat kwik. Long skul em i no save sindaun gut; em i save bikhet nabaut na tisa i no inap lainim gut klas bilong em. Taim bel bilong em i stap nogut o em i belhat, em i save kalap long motabaik na givim siksti long ples wesan nating, o em i kisim hap plang i gat wil na em i sanap long en na sut i go daun long maunten.

MELANI tupela Mak i gat wanpela kain sik, em bikpela bel hevi, olsem tingting na bel bilong tupela i bagarap. Wanpela dokta i tok, dispela kain sik i save painim sampela skulmanki, na wan wan i save bagarap tru long dispela kain sik na ol i stap bel hevi tru.​—Dokta Donald McKnew.

Sampela taim wanpela sik bilong skin i as bilong dispela kain bel hevi. Sampela kain sik bilong blut, na sik bilong mun, na sot long blut, ol dispela kain sik inap mekim na bai man o meri i stap bel hevi. Na sampela kain marasin bilong dokta, na sampela marasin long ol spre samting long ples wok, na sampela kaikai samting i no stret long skin bilong man, na man i no save kisim gutpela kaikai, ol dispela samting tu inap givim dispela sik bel hevi long em.

Sampela As Bilong Bel Hevi

Taim ol yangpela i gat 13 i go inap 19 krismas, sampela senis i wok long kamap long skin bilong ol. Dispela i mekim na sampela taim bel bilong ol i stap amamas na sampela taim ol i bel hevi. Hevi i save painim yumi olgeta, tasol ol yangpela i no lain yet long karim ol dispela hevi, olsem na taim liklik hevi tasol i painim ol, ol i save bel hevi na pilim olsem ol man i no save tingim ol.

Sapos yangpela i no inap mekim ol wok em papamama na ol tisa na ol poroman i ting em inap mekim, ating bai em i bel hevi. Olsem yangpela man Donal, em i ting em i mas kisim bikpela mak long skul bambai papamama i ken amamas long em, long wanem ol yet i bin winim bikpela skul. Tasol em i no inap kisim bikpela mak olsem, na nau em i bel hevi nogut tru na em i laik kilim i dai skin bilong em. Em i tok, “Mi no inap mekim stret wanpela samting. Olsem na ol man i no save amamas long mi.”

Sapos man o meri i pilim olsem em i no mekim gut ol wok bilong em, ating bai em i bel hevi. Dispela kain bel hevi i bin painim wanpela Kristen bilong pastaim, nem bilong em Epafroditus. Kongrigesen i salim em i go bilong helpim Pol, long wanem Pol i stap kalabus. Tasol taim Epafroditus i kamap pinis long Pol, sik i painim em na Pol i mas helpim em! Bihain em i “bel hevi.” Ating em i pilim olsem em i no bin mekim gut dispela wok ol i bin salim em long mekim. Em i no tingim ol gutpela wok em i bin mekim taim sik i no painim yet em.​—Filipai 2:​25-30.

Ol Narapela As Bilong Bel Hevi

Wanpela meri i raitim wanpela buk na em i tok, ‘Sapos yangpela i laikim tumas wanpela man o meri na dispela man o meri i dai o i lusim em, orait ating bai yangpela i bel hevi tru. O sapos em i laikim tumas wanpela samting na dispela i lus, ating bai em i bel hevi.’ (Francine Klagsbrun i tok olsem long buk Too Young to Die​—Youth and Suicide.) Olsem na sapos papa o mama bilong yangpela i dai o i lusim em long wanem tupela i katim marit, o bos i pinisim yangpela long wok, o bikpela sik i painim em, ol dispela samting tu inap bagarapim bel bilong em na bai em i bel hevi tru.

Tasol sapos yangpela i ting papa o mama i no sori long em na i no tingim em, orait dispela samting inap bagarapim tru bel bilong em, winim ol narapela kain hevi i painim em. Wanpela yangpela meri, nem bilong em Mari, em i tok, “Taim mama i lusim mipela, mi pilim olsem em i no laikim mi moa, na mi stap wanpis olgeta na bel bilong mi i bagarap.”

Tru tumas, ol hevi i kamap insait long famili i bagarapim tru bel bilong sampela yangpela na bel wantaim tingting bilong ol i stap nogut. Olsem: Sapos papamama i katim marit, o wanpela i dring planti tumas, o papa i mekim pasin sem long pikinini meri, o papa i paitim mama, o papa o mama i mekim nogut tru long pikinini, o em i tingim tumas ol hevi bilong em yet na i no tingim pikinini, orait dispela inap bagarapim tru bel bilong pikinini. Baibel i tok stret, olsem: “Sapos taim nogut i painim yu na bun bilong yu i slek, orait yu no gat strong tru [bilong sakim bel hevi tu]”! (Sindaun 24:10) Na sampela yangpela i kisim tingting kranki na ol i save ting em asua bilong ol yet na hevi i kamap insait long famili, na dispela tu inap bagarapim bel bilong ol.

Ol Mak Bilong En

I gat kain kain bel hevi. Sampela taim wanpela samting i kamap na yangpela i bel hevi, tasol dispela kain bel hevi i save stap liklik taim tasol na i pinis.

Tasol sapos yangpela i stap bel hevi na dispela bel hevi i no pinis kwik, na em i pilim olsem em i no inap mekim gut wanpela samting, na em i tingting planti, na bel kros, orait ol dokta i tok dispela kain bel hevi inap i go bikpela na i stap longtaim. I gat kain kain mak bilong dispela kain sik bilong bel hevi, olsem yumi lukim pinis long stori bilong Mak na Melani. Olsem: Sampela yangpela i save tingting planti na bel i stap nogut. Na sampela, em skin bilong ol i save les oltaim, o ol i no gat laik long kaikai, o ol i no inap slip, o ating skin bilong ol i lus, o planti taim ol i kisim bagarap.

Sampela yangpela i save mekim narapela kain pasin bambai ol i ken haitim bel hevi bilong ol. Ating ol i go long planti pati o ol i pamuk nabaut o bagarapim samting bilong ol man o dring planti tumas. Wanpela manki i gat 14 krismas em i tok: “Olgeta taim mi save go raun, long wanem mi save sapos mi stap wanpis long haus, bel bilong mi bai stap nogut tru.” Planti yangpela ol i mekim kain pasin olsem. Ol i laik haitim bel hevi bilong ol, tasol Baibel i tok: “Maski yumi lap, bel hevi i no inap lusim yumi.”​—Sindaun 14:13.

Bikpela Bel Hevi

Sapos yangpela i gat dispela kain sik bilong bel hevi na em i no wok long stretim, ating dispela sik bilong em bai i go bikpela tru na daunim em olgeta. (Lukim pes 107.) Yangpela meri Mari em i gat dispela kain bikpela bel hevi tru. Em i tok: “Bel bilong mi i pas olgeta na oltaim mi pret na tingting planti.” Dispela kain bikpela bel hevi tru i save stap planti mun na i no save pinis kwik, na i save kirapim planti yangpela long kilim i dai skin bilong ol yet. Long nau dispela kain bikpela bel hevi tru i painim planti manmeri long olgeta hap.

Ol man i gat dispela kain sik bilong bikpela bel hevi tru ol i ting dispela sik i no inap pinis, na dispela i bagarapim bel bilong ol moa yet. Profesa John E. Mack i stori long wanpela yangpela meri i gat 14 krismas, nem bilong em Vivien, em i gat dispela kain sik. Em i gat gutpela papamama, na long skin i olsem em i stap gutpela. Tasol bel bilong em i stap nogut olgeta na em i hangamap long rop na kilim i dai skin bilong em yet! Dispela profesa i stori olsem: “Vivien i ting dispela bel hevi bilong em i no inap lusim em​—bel bilong em i pas olgeta na em i ting em bai stap olsem tasol. Olsem na em i kirap kilim i dai skin bilong em yet.”

Ol man i gat dispela kain sik bilong bikpela bel hevi tru ol i ting i no gat wanpela samting ol inap mekim bilong stretim, na ol i no inap orait na i stap amamas long bihain. Ol dokta i tok, dispela samting i mekim na planti ol i save kilim i dai skin bilong ol yet.

Tasol dispela i no gutpela rot bilong pinisim bikpela bel hevi bilong ol. Tingting na bel bilong Mari i stap nogut olgeta, na em i tok: “Mi bin tingting long kilim i dai skin bilong mi yet, tasol mi save, sapos mi stap laip yet bai mi inap painim rot bilong pinisim bel hevi bilong mi na bai mi stap gutpela.” Tru tumas, pasin bilong kilim i dai skin em i no gutpela rot bilong stretim hevi. Tasol sori tru! Planti yangpela, taim ol i stap bel hevi nogut tru, ol i ting i no gat wanpela samting ol inap mekim bai ol i kamap gutpela gen. Mari i laik daunim bel hevi bilong em, olsem na em i bin kisim drak heroin. Em i tok: “Taim mi spak long drak, mi no bel hevi liklik; mi stap amamas tasol. Tasol taim spak bilong drak i pinis, bel hevi bilong mi i kamap gen.”

Bilong Stretim Liklik Bel Hevi

Sapos yu bel hevi liklik tasol, i gat gutpela rot bilong stretim dispela. Wanpela dokta bilong Nu Yok em i gat save long dispela samting na em i tok: “Sapos man i hangre, dispela inap mekim em i bel hevi. Sapos em i no kaikai long moningtaim, na long belo tu em i no kaikai, orait long 3 klok apinun bai em i pilim olsem em i gat sik samting.”​—Em Dokta Nathan S. Kline i tok olsem.

Na kain kaikai yu save kisim, em tu i bikpela samting. Yangpela meri Debi i save bel hevi oltaim. Em i tok: “Mi save kaikai planti rabis kaikai na pastaim mi no save dispela kain kaikai i as bilong bel hevi bilong mi. Tasol nau mi no kaikai planti loli samting, na dispela bel hevi i pinis na bel bilong mi i stap gutpela.” I gat sampela samting moa yu ken mekim bilong pinisim kain liklik bel hevi olsem. Sapos yu mekim sampela eksasais, ating dispela bai helpim yu. O ating yu ken i go lukim dokta, nogut yu gat wanpela sik long skin na dispela samting i mekim na yu stap bel hevi.

Kisim Stretpela Tingting

Sapos yu no amamas long yu yet, ating dispela bai mekim na bai yu kirap long bel hevi o bai yu bel hevi moa yet. Yangpela meri Evlin em i gat 18 krismas, em i bel hevi na em i tok: “Sapos planti man i tok bilas long yu na daunim yu, bai yu bel hevi na pilim olsem yu no gutpela man.”

Tasol yu ting em i wok bilong ol narapela long skelim yu na tok yu gutpela man o nogat? Ol man i bin mekim tok bilas long aposel Pol. Sampela i tok em i no gat strong, na tok bilong em i samting nating. Olsem wanem? Pol i bel hevi na i pilim olsem em i no gutpela man? Nogat tru! Pol i laik mekim ol samting i stret long ai bilong God na bai God yet i amamas long em. Dispela em i bikpela samting long Pol. Em i amamas long ol wok God i bin helpim em long mekim, maski ol narapela i tok bilas long em. Na yu tu, sapos yu stap gutpela long ai bilong God, yu ken tingim dispela samting na ating bel hevi bilong yu bai pinis.​—2 Korin 10:​7, 10, 17, 18.

Tasol olsem wanem? Yu bin mekim wanpela pasin kranki o wanpela rong na yu bel hevi long dispela? God i bin tokim ol Isrel: “Maski yupela i gat planti sin, na yupela i stap olsem waitpela laplap em retpela pen i bagarapim pinis, mi Bikpela, mi tok, bai yupela inap kamap waitpela gen olsem ais.” (Aisaia 1:​18) Olsem na yu no ken lusim tingting long bikpela pasin sori na marimari bilong Papa Jehova. Em i no save les kwik long yumi. (Buk Song 103:​8-14) Tasol olsem wanem? Yu wok strong long stretim dispela pasin kranki o rong yu bin mekim? Yu mas mekim olsem bambai bel bilong yu i ken i stap isi. Baibel i tok: “Sapos man i autim olgeta sin bilong en na i givim baksait long ol dispela sin, orait bai God i marimari long en.”​—Sindaun 28:13.

Narapela rot bilong daunim bel hevi, em olsem: Yu no ken wok long winim mak i antap tumas na yu no inap winim. I no olsem yu mas winim ol narapela manki long klas bilong yu bambai wok bilong yu i kamap gutpela. (Saveman 7:​16-18) Yu mas save, sampela taim hevi bai painim yu. Na long kain taim olsem yu no ken ting, ‘I no gat wanpela man i save tingim mi.’ Yu mas ting olsem: ‘Liklik taim bai dispela bel hevi bilong mi i pinis.’ Na sapos yu laik krai, yu ken krai, no gat samting.

Mekim Sampela Wok na Dispela Bai Helpim Yu

Wanpela yangpela meri, nem bilong em Dafni, planti taim em i save bel hevi, tasol em i lain long pasin bilong daunim bel hevi. Em i tok: “Bel hevi i no inap lusim yu nating. Yu no ken tingim tingim dispela bel hevi bilong yu; yu mas kirap tingim ol narapela samting o mekim sampela wok. Yu no ken sindaun nating; yu mas kirap mekim sampela samting.” Yumi ken tingim stori bilong Linda, em i wok strong long daunim bel hevi na em i tok: “Mi kirap samapim ol dres samting. Mi wok wok i go na bihain mi no tingim moa ol samting mi bin tingting planti long en. Mi no bel hevi moa. Dispela wok mi mekim i helpim mi tru.” Sapos yu mekim sampela wok yu save gut long mekim, dispela inap helpim yu na bai yu no bel hevi na pilim olsem yu no gat save na yu no inap mekim gut wanpela wok.

O yu ken mekim sampela samting yu save amamas long mekim, na dispela tu inap helpim yu. Olsem: Ating yu ken i go raun long ol stua na wok long painim wanpela samting yu bin tingting long baim, o yu ken i go pilai spot, o kukim wanpela kain kaikai yu save laikim tru, o kaunim buk samting.

Taim Debi i bel hevi, em i save go raun o mekim wanpela liklik wok em i bin tingting long mekim, na dispela i helpim em. Tasol samting i bin helpim em tru long daunim bel hevi, em olsem: Em i save mekim sampela wok bilong helpim ol narapela man. Em i tok: “Mi bungim wanpela yangpela meri em i stap bel hevi tru, na mi kirap lainim em long Baibel. Taim mitupela i toktok wantaim long Baibel long olgeta wik, mi inap givim sampela tok long em bilong helpim em long lusim bel hevi. Ol tok bilong Baibel em i lainim i helpim em long wetim gutpela samting i kamap. Dispela wok mi mekim i helpim mi tu.” I olsem Jisas i tok: “Amamas bilong man i givim samting long ol arapela man, dispela i winim amamas bilong man i kisim samting bilong em yet.”​—Aposel 20:35.

Kamapim Bel Hevi Bilong Yu long Narapela

Baibel i tok: “Sapos man i save wari oltaim, em bai i bel hevi tru na tingting bilong en bai i bagarap. Tasol sapos man i mekim gutpela tok long wantok bilong en, orait wantok bai i belgut tru.” (Sindaun 12:25) No gat wanpela man em inap save long bel bilong yu. Olsem na yu mas kamapim bel hevi bilong yu. Yu mas kamapim long wanpela man yu bilip tru long em na em inap pilim hevi bilong yu na helpim yu. “Gutpela tok” dispela man i givim long yu inap mekim gut bel bilong yu. Baibel i tok: “Ol gutpela pren i save . . . sambai long helpim yumi long taim bilong hevi.” (Sindaun 17:17) Yangpela man Evan i gat 22 krismas, em i tok: “Sapos yu pasim hevi bilong yu long bel, bai yu wanpela tasol yu karim dispela hevi. Tasol sapos yu kamapim dispela hevi long wanpela man em inap long helpim yu, nau i olsem dispela hevi i slek liklik na yu no hatwok long karim.”

Tasol ating bai yu tok, ‘Mi traim pinis dispela samting, tasol taim mi kamapim bel hevi bilong mi ol i tokim mi, “Yu no ken tingim; yu mas amamas tasol.” ’ Orait, yu ken painim we wanpela man em inap putim yau na pilim hevi bilong yu na givim gutpela tok long yu bilong helpim yu?​—Sindaun 27:​5, 6.

Ol Man Bilong Helpim Yu

Pastaim yu mas kamapim bel hevi bilong yu long papamama. (Sindaun 23:26) Ol i save gut long yu, na sapos yu larim ol i helpim yu, ating bai ol inap helpim yu gut. Sapos ol i pilim olsem dispela bel hevi bilong yu i bikpela tru na tingting bilong yu i laik bagarap, ating bai ol i kisim yu i go lukim dokta.a

Ol brata sista long kongrigesen Kristen ol tu inap helpim yu. Mari i tok: “Inap planti yia mi stap bel hevi na mi haitim, na i no gat wanpela i save dispela bel hevi bilong mi i bikpela tru. Tasol bihain mi kamapim long wanpela lapun sista long kongrigesen na em i pilim tru bel hevi bilong mi. Bipo em tu i gat bikpela bel hevi olsem, na em i winim pinis. Taim mi save em tu i bin winim dispela kain bikpela bel hevi, dispela i strongim bel bilong mi.”

Tru, bel hevi bilong Mari i no pinis wantu tasol. Tasol em i wok long givim bel moa yet long God na isi isi em i lain long daunim bel hevi bilong em. Tru tumas, yu inap painim ol gutpela pren o ‘famili’ insait long lain bilong Jehova, em ol i laik tru long helpim yu long i stap gutpela.​—Mak 10:​29, 30; Jon 13:​34, 35.

Long Strong Bilong God

Nambawan strongpela samting bilong daunim bel hevi, em strong bilong God, aposel Pol i kolim olsem “dispela bikpela strong.” (2 Korin 4:7) Sapos yu putim ol hevi bilong yu long God, em i ken helpim yu long daunim bel hevi. (Buk Song 55:22) Long spirit holi bilong em, em inap givim bikpela strong long yu.

Sapos yu stap pren bilong God, dispela inap strongim tru bel bilong yu. Wanpela yangpela meri, nem bilong em Jojia, em i tok: “Taim mi bel hevi mi save beten planti taim. Mi save, maski hevi bilong mi i bikpela tru, bai Jehova i givim rot long mi bilong winim dispela hevi.” Dafni tu i tok olsem, em i tok: “Yu ken kamapim olgeta hevi bilong yu long Jehova. Yu kamapim bel bilong yu long em na yu save, maski i no gat wanpela man i pilim hevi bilong yu o tingim yu, Jehova i mekim tru.”

Olsem na sapos yu stap bel hevi, orait yu mas beten long God, na wok long painim wanpela man em i gat gutpela tingting na em inap pilim hevi bilong yu na yu ken kamapim bel bilong yu long em. Long kongrigesen ol elda i stap, em ol i gat save pinis long helpim ol man i gat hevi. (Jems 5:​14, 15) Ol i redi long helpim yu long i stap gut long God, olsem pren bilong Em. God i pilim hevi bilong yu na em i laik bai yu putim olgeta hevi bilong yu long em, long wanem em i save tingim yu. (1 Pita 5:​6, 7) Na Baibel i tok promis olsem: “Bel isi God i save givim yumi, . . . bai i mekim yupela i stap bel isi tru, . . . na bel na tingting bilong yupela bai i stap gut tru.”​—Filipai 4:7.

[Ol Futnot]

Toktok Wantaim long Ol Dispela Askim

◻ Wanem sampela samting inap mekim na bai yangpela i bel hevi? Sampela taim yu bel hevi?

◻ Sapos man i gat dispela kain bikpela bel hevi i save stap longtaim, yu inap luksave long ol mak bilong en?

◻ Yu inap luksave long ol mak bilong bikpela bel hevi tru? Olsem wanem na dispela kain bel hevi em i olsem wanpela sik nogut?

◻ Kolim sampela samting yu ken mekim bilong daunim bel hevi. Yu bin mekim sampela samting olsem na dispela i bin helpim yu?

◻ Taim yu gat bikpela bel hevi tru, bilong wanem yu mas kamapim dispela long wanpela man?

[Rait long pes 106]

Dispela kain bikpela bel hevi tru i save kirapim planti yangpela long kilim i dai skin bilong ol yet

[Rait long pes 112]

Sapos yu stap pren bilong God, dispela inap helpim yu long daunim bikpela bel hevi tru

[Blok long pes 107]

Ating Em Bikpela Bel Hevi Tru?

Daunbilo i gat lista long sampela samting i makim olsem man i bel hevi. Sapos wanpela samting olsem i painim yu inap liklik taim, orait ating bel hevi bilong yu i no bikpela tumas. Tasol sapos dispela samting i stap long yu inap longtaim na i pasim yu long mekim ol wok bilong yu bilong olgeta de, orait ating (1) yu gat sik long skin na yu mas i go lukim dokta, o (2) yu gat sik long tingting​—olsem bikpela bel hevi tru.

Yu No Amamas long Wanpela Samting. Yu no amamas moa long mekim ol wok samting bipo yu amamas long mekim. I olsem tingting bilong yu i paul na yu mekim nating tasol.

Yu Pilim Olsem Yu No Gutpela Man. Yu ting yu no inap tru mekim wanpela gutpela wok em inap helpim ol man. Olsem na ating yu pilim olsem yu gat asua.

Pasin Bilong Yu i Senis Olgeta. Sapos bipo yu man bilong amamas na toktok, ating nau yu save sem. O sapos bipo yu man bilong sem, ating nau yu kamap man bilong amamas na toktok. Ating planti taim yu save krai.

Yu Ting i No Gat Wanpela Gutpela Samting Inap Kamap. Yu ting ol samting i nogut na yu no inap mekim wanpela samting bilong stretim; ol samting bai stap olsem tasol.

Yu Laik Bai Yu Dai Tasol. Bel bilong yu i bagarap tru na yu bel hevi oltaim na yu laik bai yu dai tasol.

Tingting i Wokabaut. Tingting bilong yu i no wok gut, o taim yu kaunim wanpela buk samting, yu no kisim gut ol dispela tok, i olsem yu kaunim nating tasol.

Senis long Kaikai o Bel. Sampela taim yu no gat laik long kaikai o yu kaikai planti tumas. Sampela taim bel i pas na sampela taim yu pekpek wara.

Slip. Yu no slip gut o yu slip tumas. Ating planti taim yu driman nogut.

Skin i Pen. Het i pen, na masol i tait, na bel i pen, na bros i pen. Ating oltaim skin bilong yu i les na i no gat as bilong dispela.

[Piksa long pes 108]

Sapos yangpela i no inap mekim ol wok papamama i ting em inap mekim, ating bai em i bel hevi

[Piksa long pes 109]

Wanpela gutpela rot bilong daunim bel hevi em olsem: Yu mas kamapim bel hevi bilong yu long narapela

[Piksa long pes 110]

Sapos yu mekim sampela wok bilong helpim ol narapela man, dispela tu inap helpim yu long daunim bel hevi