Sik Bilong Bel Hevi​​—⁠Man i Pilim Olsem Wanem?

JAMESa i tok: “Long wanpela moning, taim mi gat 12-pela krismas, mi kirap sindaun long bet na mi tingting olsem, ‘Ating nau em taim bilong mi long i dai.’ ” James i pilim bikpela bel hevi tru. Inap 30 yia bihain, James i tok: “Long olgeta de mi stap laip long en, mi bin wok strong long daunim dispela sik we i bagarapim tru bel na tingting bilong mi.” Taim James i stap yangpela yet, em i pilim olsem em i samting nating tasol, olsem na em i brukim ol poto bilong taim em i stap pikinini yet. Em i tok: “Mi no ting mi gutpela man na bai ol arapela inap tingim mi.”

Yumi olgeta i save bel hevi sampela taim, olsem na yumi inap ting olsem yumi save gut long sik bilong bel hevi. Tasol man i save pilim olsem wanem stret taim em i gat bikpela bel hevi na dispela bel hevi i stap longpela taim?

Samting i Nogut Tru

Taim man i kisim sik bilong bikpela bel hevi, dispela i save pasim em long mekim ol samting em i save mekim long olgeta de.

Olsem: Winim 40 yia olgeta, Álvaro i save “pret, na tingting i paul, na em i bel hevi tru.” Em i tok: “Mi kisim sik bilong bel hevi na dispela i mekim na mi save wari tumas long tingting bilong ol narapela. Mi save pilim olsem mi gat asua long olgeta kain hevi i kamap.” Em i tingim sik bilong bel hevi olsem “man i pilim bikpela pen, tasol em i no save long pen i kam we, na em i pret, tasol em i no save long as bilong pret, na moa yet, em i no laik tru long toktok long dispela samting.” Tasol nau dispela hevi i no bikpela olsem bipo. Em i save long ol samting i kirapim em long bel hevi. Em i tok, “Mi save nau olsem sampela narapela tu i gat wankain hevi olsem mi, na dispela i mekim na mi no bel hevi tumas.”

Maria i stap long Brasil na em i gat 49 krismas. Sik bilong bel hevi i mekim na em i no inap long slip, na em i save pilim pen, na ol samting i save skrapim bel bilong em, na “i olsem bel hevi bilong em i no gat pinis bilong en.” Taim ol dokta i painimaut sik bilong Maria long namba wan taim, em i amamas olsem em i save nau long sik em i kisim. Em i tok: “Tasol mi tingting planti moa yet, long wanem, i no gat planti man i kliagut long dispela sik, na sampela man husat i gat dispela sik, ol i pilim olsem em samting bilong sem long en.”

Bel Hevi i Kamap Nating?

Sampela taim ol man inap luksave long wanem samting i mekim na ol i kisim sik bilong bel hevi, tasol sampela taim dispela sik i save kamap wantu tasol na ol i no save long as bilong en. Richard bilong Saut Afrika i tok: “Wantu yu pilim bikpela bel sore, i olsem klaut i karamapim yu, na yu no save long as bilong en. Ol lain yu save long ol, i no gat wanpela bilong ol i dai, na i no gat wanpela hevi i bin kamap. Tasol bel bilong yu i bagarap na strong bilong yu i pinis. Na i no gat wanpela samting inap tekewe dispela bel hevi. Bel hevi i daunim yu olgeta, na yu no save long as bilong en.”

Sik bilong bel hevi em i no samting bilong sem long en. Tasol Ana, em i stap long Brasil, em i pilim sem taim ol i painimaut olsem em i gat sik bilong bel hevi. Em i tok: “Maski 8-pela yia i lus bihain long ol i painimaut sik bilong mi, mi pilim sem yet.” Em i pilim olsem i hatwok tru long karim dispela hevi. Em i tok: “Sampela taim mi save pilim bikpela bel hevi tru na dispela i save mekim skin i pen. Mi save pilim pen long olgeta masol bilong bodi.” Long ol kain taim olsem, i hatwok tru long lusim bet na kirap. Na i gat ol taim we Ana i save krai tasol. Em i tok: “Mi save krai nogut tru na dispela i save pinisim strong bilong mi, na mi save pilim olsem blut i no ron moa long bodi bilong mi.”

Baibel i tok olsem sampela taim ol manmeri inap pilim bikpela bel hevi tru na dispela inap daunim ol. Olsem: I gat wanpela man em aposel Pol i bin wari long em, “nogut bikpela bel hevi moa i daunim tru dispela man.” (2 Korin 2:⁠7) Sampela manmeri husat i kisim sik bilong bel hevi, ol i pilim olsem bel bilong ol i bagarap olgeta na ol i laik bai ol i mas i dai. Planti ol i kisim wankain tingting olsem profet Jona: “Sapos mi dai, em i gutpela. Na sapos mi no i dai, em i no gutpela.”​​—⁠Jona 4:⁠3.

Ol man i kisim sik bilong bel hevi, ol i ken mekim wanem bilong helpim ol yet long karim dispela hevi?

[Futnot]

[Rait long pes 3]

“Wantu yu pilim bikpela bel sore, i olsem klaut i karamapim yu, na yu no save long as bilong en”