Sik Bilong Bel Hevi​​—⁠Sampela Helpim

RUTH i gat sik bilong bel hevi na dispela sik i stap inap planti yia pinis. Em i tok: “Man bilong mi i helpim mi na mitupela i kisim helpim long haus sik, na senisim sampela samting long sindaun bilong mitupela, na mitupela i bin wok strong long wokim wanpela sediul mi inap bihainim. I luk olsem mitupela i painim pinis wanpela gutpela marasin, na dispela i helpim mi. Tasol taim mipela i no bin painim yet rot bilong helpim mi, oltaim man bilong mi wantaim ol pren bilong mipela, ol i save soim pasin laikim long mi na dispela i bin strongim bel bilong mi na mi no givap.”

Stori bilong Ruth i soim olsem ol man husat i kisim sik bilong bikpela bel hevi tru na dispela sik i stap longpela taim, ol i mas kisim helpim long famili na ol pren, na ating ol i mas kisim sampela kain marasin tu. Sapos ol i no mekim olsem, dispela inap bagarapim laip bilong ol. Inap olsem 2,000 yia i go pinis, tok bilong Jisas i kamapim olsem ol man i gat save long wok bilong marasin, ol inap helpim ol man i gat sik. Em i tok: ‘Ol sikman i save go long dokta.’ (Mak 2:​17) Ol dokta inap tru long mekim ol samting bilong daunim hevi bilong ol man i gat sik bilong bel hevi.a

Sampela Rot Moa Bilong Kisim Helpim

I gat kain kain rot bilong daunim sik bilong bel hevi, na man i mas makim rot i stret wantaim skel bilong bel hevi em i pilim, olsem bel hevi i bikpela o i liklik. (Lukim blok long pes 5, “Kain Kain Bel Hevi.”) Planti man i save kisim helpim long dokta bilong famili, tasol sampela i mas kisim bikpela helpim moa. Ating dokta bai tok long man i kisim sampela kain marasin bilong daunim bel hevi o em bai makim sampela narapela rot. Sampela man i kisim ol marasin ol i bin wokim long lip bilong diwai na plaua samting, na ol i senisim sampela kaikai ol i save kisim, na mekim sampela kain eksasais, na ol dispela samting i bin helpim ol.

Sampela Samting i No Helpim

1. Ol pren i laik helpim yu na ol i gat liklik save tasol o ol i no gat wanpela save long sait bilong marasin, ating ol bai tokim yu long rot yu mas bihainim na rot yu mas sakim. Ating ol bai i gat strongpela tingting olsem yu mas kisim sampela kain lip olsem marasin, o yu mas kisim marasin em dokta i makim, o yu mas abrusim olgeta dispela samting.

Tingim: Yu no ken bihainim nating tok bilong wanpela man; tok yu bihainim i mas i kam long man em yu inap bilip long em. Tasol, yu mas skelim gut ol samting na em wok bilong yu yet long wokim disisen.

2. Bel hevi inap mekim na man i no pinisim gut marasin, long wanem, em i no kamap orait o marasin i kamapim sampela hevi.

Tingim: “Sapos yu laik mekim sampela wok, orait pastaim yu mas kisim tingting long planti arapela man, na bai wok bilong yu i ken kamap gutpela. Sapos yu no mekim olsem, bai yu hatwok nating.” (Sindaun 15:22) Marasin inap helpim gut man sapos dokta na sikman i gat pasin bilong toktok gut wantaim. Stori gut long dokta long ol samting yu wari long en o yu pilim olsem wanem, na askim em sapos i stret long yu senisim marasin o yu mas kisim yet i go na bihain marasin bai helpim yu.

3. Pasin bilong bilip tumas long em yet inap mekim na man i lusim kwik pasin bilong kisim marasin bihain long sampela wik, long wanem, em i pilim olsem em i kamap orait. Ol inap lusim tingting long sik bilong ol i bin nogutim ol olsem wanem paslain long ol i kirap long kisim marasin.

Tingim: Sapos yu no toktok wantaim dokta na yu lusim kwik marasin, dispela inap kamapim bikpela hevi na yu inap kisim bagarap.

Tru, Baibel i no wanpela buk i stori long ol marasin, tasol Man i bin kamapim ol tok bilong en, God Jehova, em i Man Bilong Wokim yumi. Stori i kamap bihain long dispela bai skelim ol tok bilong Baibel we inap stiaim na mekim gut bel bilong ol man i gat sik bilong bel hevi, na ol man husat i lukautim ol.

[Futnot]

[Blok long pes 5]

KAIN KAIN BEL HEVI

Bilong wanpela marasin i ken helpim man, dispela marasin i mas stret long wanem kain bel hevi em i kisim.

◼ Bikpela bel hevi i save kamapim ol samting nogut we inap i stap inap 6-pela mun o longpela taim moa sapos man i no kisim marasin, na dispela inap nogutim i stap bilong man.

◼ Baipola. Ol man i gat dispela sik, ol inap amamas na hariap hariap long mekim kain kain wok, tasol wantu senis inap kamap na ol i bel hevi nogut tru.​​—⁠Lukim dispela stori “Living With a Mood Disorder,” long Awake! bilong Janueri 8, 2004.

◼ Disimia inap mekim na man i bel hevi na em i no inap mekim gut ol wok em i save mekim long olgeta de. Sampela inap pilim tu bikpela bel hevi.

◼ Pospatum i makim bikpela bel hevi em planti meri i save kisim bihain long ol i karim pikinini.​​—⁠Lukim stori “Save Gut Long Sik Pospatum Dipresen,” long Kirap! bilong Oktoba 8, 2003.

◼ Bel hevi long taim bilong kol i makim bel hevi man i save pilim long taim bilong kol we san i no lait tumas. Taim dispela haptaim bilong kol i pinis, dispela bel hevi i save pinis.