Save Gut Long Sik Pospatum Dipresen

Wanem samting i no stret long mi? Nau tasol mi karim wanpela naispela bebi. Mi mas amamas, tasol nogat. Mi tingting planti na pilim bel hevi, na kros tu. Olsem wanem? Mi wanpela mama nogut? Bilong wanem mi bel hevi olsem?

SAPOS yu wanpela nupela mama, ating yu tu i bin pilim olsem. Sapos olsem, orait i no yu wanpela tasol. Ol i tok, 70 o 80 pesen bilong ol nupela mama i gat kain tingting olsem long sampela taim. Tasol pospatum dipresen (PPD) i wanem kain sik, na wanem as bilong en? Meri inap karim hevi bilong PPD olsem wanem? Famili bilong em, na ol narapela i ken givim wanem kain helpim?

Sampela Hevi

Dispela tok “pospatum dipresen” i makim bel hevi em meri i pilim taim em i karim pikinini pinis. Em inap painim meri maski em namba wan o namba tu taim samting em i karim pikinini. Dispela bel hevi inap kamap tu long meri em pikinini bilong em i lus long bel o em i bin rausim long bel. Ofis Bilong Wimens Helt bilong U.S. Department of Health and Human Services i tok, long sampela meri, PPD i no bikpela tumas, tasol long sampela narapela em i bikpela tru.

Sampela mak bilong PPD na i kamap long planti meri i olsem: bel i hevi, tingting planti, kros hariap, pasin i save senis senis, na skin i les. Dispela kain bel hevi i no bikpela tumas na i save stap sotpela taim tasol; em i save pinis insait long 10-pela de samting bihain long meri i karim pikinini, maski dokta i no helpim em.

Lain American College of Obstetricians and Gynecologists i tok, long wanpela bilong olgeta 10-pela 10-pela nupela mama, bel hevi bilong ol i save go bikpela na i stap longpela taim, winim 10-pela de. Dispela kain bel hevi inap kamap tu sampela mun bihain long meri i karim pikinini. Taim nupela mama i gat bikpela bel hevi olsem​—⁠bel i hevi tru, o em i tingting planti, o bel hevi i daunim em olgeta​—⁠ating em i hatwok tru long mekim ol wok em i mas mekim long olgeta de.

Na tu, inap 3-pela long olgeta 1,000 1,000 nupela mama i save kisim bikpela bel hevi tru, olsem tingting bilong em i paul nabaut na em i tingting long mekim nogut long em yet o long pikinini bilong em. Sapos olsem, kwiktaim em i mas go lukim dokta.a

Sampela As

I no gat wanpela samting stret i olsem as bilong pospatum dipresen. I luk olsem sampela samting bilong skin, na sampela samting bilong tingting bilong bel, i insait long sik PPD. Wanpela samting bilong skin i olsem: Inap 24 i go inap 48 aua bihain long meri i karim pikinini, mak bilong homon estrojen na projesteron i go daun hariap, aninit tru long mak bilong en taim meri i no kisim yet bel, na dispela i save mekim na wantu tasol senis i kamap long bodi. Dispela senis inap kamapim bel hevi, long wankain rot em pasin bilong meri i senis senis taim sik bilong mun i laik painim em. Mak bilong ol homon em glan tairoit i kamapim, em tu inap go daun hariap taim meri i karim pinis pikinini. Dispela tu inap mekim na meri i bel hevi. Long ol dispela as, ol saveman i tok olsem PPD em wanpela sik we “ol marasin homon i no wok gut insait long skin.”

Wanpela nius bilong ol dokta i tok, sik pospatum dipresen inap kamap sapos skin i sot long sampela kain vaitamin, olsem vaitamin B-kompleks.

Sapos skin i les tru na meri i no bin kisim slip, ating dispela samting tu inap mekim na meri i bel hevi. Dokta Steven I. Altchuler, wanpela dokta bilong stretim sik bilong tingting, long Mayo Klinik long Minnesota, U.S.A, em i tok: “Bihain liklik long meri i karim pikinini, sapos skin bilong em i no gat strong na meri i no inap slip, ating dispela inap mekim na ol liklik hevi inap kamap olsem wanpela bikpela hevi tru long tingting bilong em. Ating sampela meri i bel hevi olsem ol i hatwok tru long mekim ol samting em bipo​—⁠taim ol i no karim yet pikinini na ol i no gat bel hevi na ol i bin slip gut long nait​—⁠ol i no bin hatwok long mekim.” Sampela samting bilong tingting bilong bel​—⁠olsem meri i no bin tingting long kisim bel, em i karim hariap tumas pikinini, em i no stap fri moa olsem bipo, em i wari olsem em i no gat naispela skin moa, na em i no kisim helpim long ol narapela⁠—dispela tu inap mekim na meri i bel hevi.

Na tu, i gat sampela tingting kranki long pasin bilong stap mama, na dispela tu inap mekim na meri i bel hevi na i pilim olsem ol wok em i mekim i no kamap gutpela. Sampela tingting kranki i olsem: Pasin bilong stap mama em samting i stap pinis long skin; pasin bilong pas gut wantaim pikinini i save kamap wantu tasol; bebi bai stap isi; na nupela mama i mas nambawan tru. Tasol i no olsem. Pasin bilong stap mama em samting meri i mas lain na kisim save long en, na ating mama i mas lusim bikpela hap taim liklik bambai em i ken pas gut wantaim pikinini, na sampela bebi i isi moa long lukautim, winim ol narapela, na i no gat wanpela mama i nambawan olgeta.

Em Wanpela Sik Tru Tru

Bipo ol dokta i no tingim pospatum dipresen i olsem wanpela sik tru. Dokta Laurence Kruckman i tok: “Ol dokta i no bin tingim tumas hevi bilong ol meri we tingting bilong ol i no stap isi​—⁠ol i bin ting olsem tingting bilong ol i paul nabaut na em tasol na i no samting bilong tingting planti long en. I no gat wanpela taim na buk bilong glasim sik (DSM IV) bilong American Psychiatric Association i bin tokaut klia olsem pospatum dipresen em wanpela sik tru, olsem na ol dokta i no bin skul long en, na ol i no bin wok long kisim save long en. . . . Na narapela samting, taim ol meri i karim pinis pikinini, ol i save lusim haus sik insait long 24 aua, tasol 30 yia i go pinis i no olsem. Planti meri i save kisim pospatum dipresen olsem 3-pela i go inap 14 de bihain long taim ol i karim pinis pikinini. Olsem na taim ol i kisim dispela bel hevi, ol i stap pinis long haus na ol dokta i gat save long dispela sik ol i no inap painimaut ol i gat dispela sik.”

Dokta Carol E. Watkins bilong Northern County Psychiatric Associates long Baltimore, Maryland, i tok, sapos ol meri i no save ol i gat dispela sik na ol i no stretim, PPD inap i go bikpela tru na i gat hatwok tru long pas gut wantaim pikinini. Sampela mama i gat bel hevi ol i no bosim ol yet na ol i kirap paitim pikinini bilong stretim em, tasol sampela i save sindaun nating na ol i no mekim wanpela samting bilong tingim pikinini. Dispela samting inap nogutim pikinini na pasim rot bilong em long kamap gutpela long bel na tingting.

Olsem: Nius American Family Physician i tok, taim ol i skelim ol liklik pikinini bilong ol meri i gat bel hevi, ol i bin kisim save olsem tingting bilong ol i no wok gutpela olsem ol pikinini bilong ol mama i no gat bel hevi. Na PPD inap nogutim ol narapela pikinini bilong meri na poroman marit bilong em.

Rot Bilong Stretim

Yu ken mekim wanem? Yu ting em samting yu mas karim tasol i go inap long taim dispela sik i pinis? Taim yumi save olsem pospatum dipresen i no bilong i stap longpela taim na i gat rot long stretim, dispela i save mekim gut bel bilong yumi.b Ofis Bilong Wimens Helt i tok, sapos bel hevi bilong meri i no bikpela tumas na meri i malolo na famili i helpim em, ating ol dispela samting tasol inap long helpim em, tasol sapos dispela bel hevi i mekim na meri i no inap mekim wanpela wok liklik, orait em i mas go lukim dokta.

Bilong stretim dispela hevi, planti meri i save kisim marasin bilong daunim bel hevi,c o ol i toktok wantaim wanpela saveman i gat wok bilong stretim sik bilong tingting, o ol i kisim marasin homon, o ol i mekim wok long dispela 3-pela samting wantaim sapos dispela bel hevi i bikpela tru. Pasin bilong holim pikinini klostu long bodi bilong em, ating dispela tu inap daunim bel hevi bilong nupela mama.d Na sampela i save mekim wok long pasin bilong akupanksa, o ol lip bilong sampela kain diwai sayor samting, o marasin bilong homiopati.

Tasol i gat sampela samting yu yet i ken mekim. Kisim gutpela kaikai (olsem prut, sayor, kumu, rais samting); abrusim kafin, alkohol, na suga; eksasais liklik, na slip liklik taim bebi bilong yu i slip. Zoraya, wanpela mama Kristen i bin krai long moningtaim, apinun, na nait inap planti de bihain long taim em i karim wanpela gutpela pikinini meri, em i tok samting i bin helpim em long daunim dispela bel hevi i olsem: Em wanpela Witnes Bilong Jehova na kwiktaim em i insait gen long wok autim tok.​​—⁠Lukim blok long sampela tok moa.

Samting Ol Narapela i Ken Mekim

Taim meri i no kisim gutpela malolo, dispela i save strongim hevi bilong pospatum dipresen, olsem na ol narapela i ken helpim meri long rot bilong mekim sampela wok long haus na lukautim pikinini. Ol saveman i bin kisim save olsem taim ol wanblut i helpim nupela mama, dispela i save daunim hevi bilong PPD. Planti taim narapela inap helpim nupela mama taim ol i putim gut yau long ol tok bilong em, na givim sampela tok bilong strongim em, na abrusim pasin bilong skelim em. Tingim, PPD em wanpela sik bilong skin​—⁠em i no samting meri i bin kamapim long em yet. Oganaisesen Postpartum Education for Parents i tok, “meri i no inap subim em yet long pinisim PPD, wankain olsem em i no inap pinisim strongpela kus, daiabitis, o sik bilong klok i stap long skin bilong em.”

Long ol tok yumi skelim pinis, yumi ken save olsem: Hap taim bihain long meri i karim pikinini, em taim bilong amamas, tasol sampela taim i gat hatwok long en. Olsem na sapos yumi save gut long sik pospatum dipresen, dispela bai helpim yumi long givim gutpela helpim long ol nupela mama.

[Ol Futnot]

[Blok/Ol Piksa long pes 19]

Sampela Tok Bilong Helpim Meri i Gat Pospatum Dipresen

1. Kamapim tingting bilong bel bilong yu long ol narapela, tasol gutpela moa long ol narapela mama.

2. Askim ol narapela long helpim yu long lukautim pikinini, na long mekim ol wok long haus, na go long stua. Askim poroman marit long insait long wok bilong lukautim pikinini long nait na long mekim sampela wok long haus.

3. Makim taim long mekim wanpela gutpela samting bilong helpim yu yet, maski em 15 minit tasol, long olgeta de. Olsem: Ritim buk, wokabaut ausait, waswas long wara na maloloim skin.

4. Maski yu inap mekim wanpela samting tasol long wanpela de, dispela em i gutpela samting. Ating i gat sampela de we yu no inap mekim wanpela samting. No ken kros long yu yet taim dispela samting i kamap.

5. Pasin bilong stap wanpis i save strongim dispela bel hevi. Bilas na lusim haus, maski em inap sotpela taim tasol, long olgeta de. Gutpela win, na ol samting yu lukim, dispela bai helpim gut yu wantaim bebi.

[Kredit Lain]

Mipela i kisim dispela tok long American Academy of Family Physicians, American College of Obstetricians and Gynecologists, na Office on Women’s Health.