Sapta 32

Olsem Wanem Mi Ken Save Gut Long Poroman Mi Laik Marit Long Em?

‘MARIT bilong planti manmeri i save bagarap, long wanem taim ol i tingting long marit ol i no bin skelim gut pasin bilong poroman ol i laik marit long em.’ Em Paul H. Landis i tok olsem, em i gat wok long skelim sindaun bilong ol famili. Wanpela meri marit, em Luis, i stori long taim em i tingting long marit na em i tok, ‘Mi popaia stret. Mi poroman wantaim Andi na mi kirap laikim em, na mi no skelim gut pasin bilong em pastaim. Oltaim mitupela tasol i bung o mekim ol narapela samting, na mi no lukim ol pasin em i mekim taim em i stap wantaim ol narapela man o wok wantaim ol, o taim sampela hevi i painim em. Olsem na pasin tru bilong em i no kamap ples klia taim mitupela i no marit yet.’ Bihain marit bilong Luis i bagarap​—tupela i katim marit. Orait, sapos yu tingting pinis long marit, yu ken mekim wanem na bai yu no popaia olsem Luis i bin mekim? Yu mas save gut long poroman pastaim!

Taim Yu No Painim Yet Wanpela Poroman

Baibel i tok, “Man [o meri] i gat gutpela tingting, em i save was gut long ol pasin em i mekim.” (Sindaun 14:15) Tasol sapos yu bungim wanpela man (o meri) na yu kirap poromanim em na yu no save liklik long pasin bilong em, na yu kirap long laikim em i go i go na nau yu gat bikpela laik long em, wanem samting bai painim yu? Ating bai yu maritim em, tasol ol pasin na laik na tingting bilong yutupela i no wankain liklik! Olsem na sapos yu gat gutpela tingting, bai yu skelim gut pasin bilong em pastaim, olsem long taim yupela i bung wantaim ol narapela man bilong mekim sampela wok o mekim sampela gutpela samting bilong amamas.

Yangpela man Dev em i marit inap 10-pela yia pinis na em i stap amamas. Em i stori long taim em i bin bungim meri bilong em Ros. Dev i tok, ‘Mi lukim Ros na mi laikim em, tasol mi no tokaut kwik long dispela, na em i no save mi laikim em. Olsem na mi inap skelim gut pasin bilong em. Mi laik save, wanem kain pasin em i save mekim long ol narapela manmeri; na mi laik save, em i save mekim ol samting bilong pulim ai bilong ol man o nogat. Sampela taim mi save toktok wantaim em na long dispela rot mi save long sindaun bilong em na ol tingting na laik bilong em.’ Na sapos yu laik save gut long man (o meri) yu gat tingting long em, orait yu ken toktok gut wantaim wanpela man o meri i save gut long em, na bai yu ken save, em i gat gutpela pasin na gutpela nem o olsem wanem.​—Lukim Sindaun 31:31.

Taim Yu Gat Tingting Pinis long Wanpela Poroman

Taim yu painim pinis wanpela poroman yu ting em i stret long yu, orait nau yu ken toksave long em. Sapos em i gat wankain tingting long yu, orait yutupela i ken mekim wanem na bai narapela inap save gut long narapela?a Ating yutupela i ken bung wantaim sampela manmeri na kaikai wantaim, na nau yu gat rot long toktok wantaim em na bai yu ken save long ol tingting na pasin bilong em. Em nau, yu inap kisim sampela tingting, olsem yu laik maritim em o nogat? Nogut yutupela tasol i raun na poroman wantaim na em i kirap laikim yu tru, na bihain, sapos yu lukim sampela pasin bilong em yu no laikim tumas na yu no gat laik moa long em, bai yu hatwok long tokim em​—long wanem yu save dispela bai bagarapim bel bilong em.

Sapos yutupela i pasim tok long bung wantaim sampela manmeri, orait yu mas kamap long taim stret olsem yupela i bin makim. Na yu no ken bilas kranki​—pasim klos i stret. Na taim yutupela i toktok wantaim, putim yau long ol tok bilong em. (Jems 1:19) Sapos yu yangpela man, orait yu mas mekim gutpela pasin long dispela yangpela meri, olsem opim dua long em o givim sia long em na em i ken sindaun, na ol kain pasin olsem. Na sapos yu yangpela meri, yu mas mekim pasin daun na tok tenkyu long em taim em i mekim olsem. Sapos yangpela man i lain long mekim gut long meri em i laik marit long em, orait taim tupela i marit pinis, bai em i no hatwok long bihainim lo bilong Baibel long ol man marit, em i tok, “Bodi bilong ol meri i no strong tumas, olsem na yupela i mas mekim gutpela pasin long ol.” Na meri “i mas i stap aninit long man bilong en.”​—1 Pita 3:7; Efesus 5:33.

Tasol yu ting i orait long holim han o kis samting? Long hap bilong Baibel long Song Bilong Solomon, i gat wanpela stori em inap givim tingting long yu. Em stori bilong yangpela meri bilong Sulam em i pasim tok pinis long maritim wanpela yangpela man bilong lukautim sipsip. Narapela i givim bel tru long narapela, tasol tupela i no mekim sampela samting i kirapim tupela long mekim pasin pamuk samting. Nogat. Tupela i stap stret tru. Olsem na yutupela i ken bihainim pasin bilong tupela na was gut long ol samting yutupela i mekim, nogut narapela i holim narapela na nau bel bilong yupela i kirap na yutupela i mekim sampela pasin i no stret.b​—Galesia 5:​19, 21.

“Insait Bilong Bel”

Wanpela lain i gat wok long kisim save long olsem wanem ol marit inap pas gut wantaim. Tok bilong ol i kamap long wanpela buk (Journal of Marriage and the Family) bilong Me 1980. Ol i tok: “Taim narapela i save gut long bel na tingting bilong narapela, orait taim tupela i marit pinis, bai tupela inap i stap amamas, na ating marit bilong ol bai strong na i no ken bruk.” Tru tumas, yu mas save gut long “insait bilong bel” bilong dispela man (o meri) yu laik marit long em.​—1 Pita 3:4, Baibel Nupela Testamen.

Tasol ol tingting tru i stap long bel bilong man i olsem wanpela hul wara i daun moa, na yu mas wok strong long “pulim” dispela tingting i kam antap na bai ol tingting tru long bel bilong em i kamap ples klia. (Sindaun 20:5) Yu ken tingim sampela wok yutupela i ken mekim wantaim bambai yu ken save gut long ol tingting tru i stap long bel bilong em. Tasol sapos yupela bung wantaim sampela manmeri na lukim televisen, yupela i no inap mekim olsem. Gutpela sapos yutupela i mekim sampela samting i givim rot long yutupela long toktok wantaim (olsem yupela ken bung wantaim sampela Kristen long haus bilong ol na wokim kaikai, o paitim gita na singsing, o pilai voli-bol samting), na dispela bai helpim yu long save gut long em na em i ken save gut long yu.

Bilong save long bel bilong poroman bilong yu, yu ken givim sampela askim long em, olsem: “Taim yu no gat sampela wok, yu save mekim wanem?” “Wanem sampela wok bilong God yu save amamas long mekim?” “Bilong wanem yu laikim tru dispela wok?” Taim em i bekim ol dispela kain askim, em nau, yu inap save long ol laik na tingting i stap long bel bilong em.

Orait, taim yupela i kamapim laik bilong yupela long marit, nau yutupela i mas toktok gut wantaim long ol samting em i bikpela samting long yutupela, na long yupela bai sindaun long wanem hap, na olsem wanem long haus na sindaun bilong yupela, na yutupela wantaim bai wok mani o man tasol bai go long wok; na yutupela i mas toktok tu long wok bilong man na meri insait long marit, na yupela i laik kamapim pikinini o nogat, na yupela i gat wanem ol laik bilong nau na bilong bihain. Planti yangpela Witnes Bilong Jehova, taim ol i pinis long skul, ol i save kirap mekim wok bilong autim tok bilong God long olgeta de, na taim ol i marit, ol i laik mekim yet dispela wok. Olsem na taim yutupela i no marit yet, yutupela i mas toktok gut wantaim long ol wok bilong God yupela laik mekim, nogut yutupela i gat narapela narapela laik. Na sapos i gat sampela samting long i stap bilong yu o sampela samting yu bin mekim bipo na dispela inap kamapim hevi taim yupela i marit, orait yu mas tokaut long poroman bilong yu. Na sapos yu gat sampela dinau yu no bekim yet, o yu gat sampela wok yu mas mekim bilong helpim papamama o kain wok olsem, yu no ken haitim ol dispela samting​—yu mas kamapim long em. Na sapos i gat sampela bikpela sik long famili bilong yu, o yu yet yu gat sampela sik, orait yu mas tokim em long dispela samting tu.

Taim yutupela i toktok wantaim long ol dispela samting, bihainim pasin bilong Elihu, em i tok: “Mi save autim stret olgeta tingting i stap long bel bilong mi.” (Jop 33:​3) Wanpela meri nem bilong em Esta em i marit na em wantaim man bilong em Jei i stap amamas. Esta i stori long taim tupela i pasim tok pinis long marit. Em i tok, “Sapos mi no wanbel wantaim Jei long sampela tok bilong em, mi save kamapim stret ol tingting i stap long bel bilong mi. Na mi bihainim yet dispela pasin.”

Sapos i gat sampela samting yu ting yu mas save long en, yu no ken pret long askim poroman bilong yu long dispela, maski yu ting em bai bel hevi. Yangpela meri Bet i popaia long dispela samting taim em i tingting long maritim Jon. Bet i tokim Jon, em i no save tromoi nating mani bilong em​—em i tingting long bihain na em i save putim sampela mani long beng. Jon i tok em tu i gat dispela kain tingting. Bet i no mekim sampela tok moa long dispela samting, long wanem em i ting tupela i wanbel long en. Tasol bihain Bet i save, Jon i gat narapela tingting na em i wok long bungim mani bilong em​—em i laik baim wanpela nupela ka i gat stail tru! Olsem na taim tupela i marit pinis, olgeta taim tupela i tok pait long mani.

Yu inap mekim ol samting bilong abrusim ol dispela kain hevi. Luis i stori long taim em wantaim man bilong em i pasim tok pinis long marit na em i tok: “Mi kranki tru na mi no givim sampela askim long em olsem, ‘Taim yumi marit pinis, sapos mi gat bel na yu no laikim pikinini, olsem wanem? O sapos yumi sot long mani na mi mas i stap long haus na lukautim pikinini, bai yu ting olsem wanem long dispela?’ Sapos mi bin givim kain askim olsem long em, mi inap skelim ol tok em i mekim taim em i bekim ol dispela askim, na bai mi inap save long tingting bilong em.” Sapos yu toktok gut wantaim poroman long ol kain samting olsem, dispela bai kamapim long ples klia ol tingting tru i stap long bel bilong em​—na yu mas save long dispela samting taim yu no marit yet!

Rot Bilong Save long Pasin Bilong Em!

Olsem Esta i tok, “Taim yu no marit yet, sapos yutupela tasol i stap, ating man bai mekim gut long yu na yu ting em i gat gutpela pasin, na yu amamas long em. Tasol sapos yutupela i stap wantaim ol narapela manmeri, sampela samting inap kamap bilong traim bel bilong em na bai yu inap save em i wanem kain man. Olsem: Ating em i no amamas long tok bilong wanpela man. Orait, bai em i mekim wanem nau? Bai em i krosim dispela man o sutim sampela tok long em bilong bekim nogut long em?” Olsem na Esta i tok: “Taim mitupela i tingting pinis long marit, mitupela i save bung wantaim ol poroman bilong em na bilong mi, na papamama wantaim ol famili bilong em na bilong mi, na dispela i helpim mi gut long lukim pasin tru bilong em.”

Na tu, yutupela i ken wok wantaim long mekim sampela wok. Yutupela i ken stadi long tok bilong Baibel, na autim tok bilong God long ol man, na ol kain wok Kristen olsem. Na yutupela i ken mekim sampela wok long haus bilong papamama olsem yupela i mas mekim taim yupela i marit pinis, olsem i go baim kaikai, na kukim kaikai, na wasim ol plet samting, na klinim na stretim haus. Taim yutupela i mekim ol dispela kain wok, yu inap lukim em taim em i putim ol klos bilong wok tasol na em i no bilas gut. Na taim em i mekim ol dispela wok, pasin bilong em bai kamap ples klia na bai yu inap save, em i man o meri bilong les hariap o kros o bel hevi hariap o em i save stap bel isi tasol na em i wok gut wantaim yu na helpim yu.

Long dispela stori bilong Baibel long Song Bilong Solomon, yangpela man bilong lukautim sipsip em i lukim yangpela meri em i laik marit long em taim em i gat sampela hevi, na taim meri i mekim bikpela wok long gaden samting na san i strong tru na i kukim skin bilong em na tuhat i go daun, na sampela taim skin bilong em i les. (Solomon 1:​5, 6; 2:15) Na taim bikpela maniman King Solomon i laik kisim dispela yangpela meri na i wok long grisim em, meri i strong na i sakim em, na meri i stap gut long yangpela man bilong em. Yangpela man hia i lukim dispela gutpela pasin bilong yangpela meri na em i tok: “Pren bilong mi, yu naispela tumas. I no gat wanpela mak i stap long skin bilong yu.” (Solomon 4:7) Yumi save skin bilong yangpela meri i no gutpela olgeta. Tasol yangpela man i lukim pasin bilong meri i gutpela, i no gat sampela rong o pasin nogut long em. Em i lukim meri i strong long bihainim stretpela pasin, olsem na long ai bilong em i olsem skin bilong meri i gutpela olgeta na i no gat wanpela mak long en; em i no tingim ol liklik pasin kranki bilong meri.​—Lukim Jop 31:7.

Yangpela man hia i save gut long dispela yangpela meri em i laik marit long em. Yu tu yu mas save gut long poroman bilong yu, tasol yu no inap mekim hariap. Olsem na nogut yu kirap kwik long marit. (Sindaun 21:5) Taim man na meri i no marit yet, narapela i save strong long mekim ol samting bambai narapela i ken laikim em tru. Tasol bihain ol liklik pasin kranki bilong tupela bai kamap ples klia. Olsem na sapos yu tingting long marit, i gutpela sapos yutupela i wet liklik na i no marit hariap, na bai yu inap save gut long ol tingting na pasin bilong poroman. Orait taim yutupela i marit pinis, bai yupela inap stretim ol liklik hevi i kamap namel long yutupela, long wanem narapela i save pinis long ol liklik pasin kranki bilong narapela. Olsem na bai marit bilong yu i kamap gutpela na bai yu stap amamas.

[Ol Futnot]

Toktok Wantaim long Ol Dispela Askim

◻ Taim yu tingting pinis long marit, yu mas mekim wanem pastaim? Olsem wanem dispela i bikpela samting bilong helpim yu long i stap amamas taim yu marit pinis?

◻ Yu mas mekim wanem na bai yu inap save long “insait bilong bel” bilong poroman?

◻ Yutupela i mas toktok wantaim long wanem ol samting na bai narapela i ken save gut long narapela?

◻ Sapos yutupela i mekim kain kain wok wantaim, olsem wanem dispela inap helpim yu long save gut long poroman bilong yu?

◻ Wanem sampela samting inap kamap namel long yutupela na i makim olsem yutupela i no wanbel?

◻ I gat wanem samting na yu ken save i no gutpela long yutupela i marit?

[Blok/Piksa long pes 256, 257]

I Gutpela Mi Lusim Em?

Taim tupela yangpela i tingting, bai ol i marit o nogat, sampela taim ol i gat tupela tingting. Orait, olsem wanem sapos poroman bilong yu i gat sampela pasin i no stret na yu tingting planti long dispela, o sapos yutupela i no stap wanbel?

Olsem: Yumi save, maski narapela i laikim tru narapela, sampela taim tupela i no gat wankain tingting, na tupela i tok pait liklik long dispela. (Lukim Stat 30:2; Aposel 15:39.) Tasol sapos oltaim yutupela i save tok pait, na planti taim yupela i bruk na bihain yupela i poroman gen wantaim, yu mas tingting gut. Sampela lain i bin givim askim long 400 dokta long dispela samting na ol dokta i tok, sapos oltaim tupela i tok pait, dispela i makim olsem ‘tupela i no kisim yet gutpela tingting olsem bilong man i bikpela pinis, na ol i no redi long marit,’ na sapos bihain tupela i marit, “ating bai ol i tok pait oltaim na ol i no inap i stap wanbel.”

Na i gat narapela samting tu: Ating sampela pasin bilong poroman i kamap ples klia na yu tingting planti long en, olsem: Em i save belhat kwik, o em i save tingim em yet tasol, o em i gat tingting olsem bilong pikinini, o planti taim em i bel hevi na em i no amamas, o em i save bikhet. Olsem na yu tingting: ‘Ating mi no laik maritim em na i stap wantaim em inap oltaim oltaim.’ Tasol sampela i strong long maritim poroman i gat dispela kain pasin na ol i no tingim pasin bilong em, o ol i tok, dispela pasin bilong em i no nogut. Ol i strong tru long maritim em, maski hevi inap painim ol long dispela. Bilong wanem ol i mekim olsem?

Ol Kristen tru i ting, taim man na meri i pasim tok long marit, em i bikpela samting, na dispela tingting i stret. Olsem na sampela i ting, maski sampela pasin kranki bilong poroman i kamap ples klia o tupela i save kros pait, tupela i mas marit. Na ating ol i pret long toksave long poroman, nogut em i bel hevi. Na sampela i ting, nogut bihain ol i no inap painim narapela poroman bilong marit long em. Tasol ol dispela samting i no gutpela as na tupela i tingting yet long marit.

Taim man o meri i tingting long marit, dispela em i gutpela taim bilong skelim olsem dispela poroman i stret long em o nogat. Na sapos Kristen i tingting long marit, tasol em wantaim poroman i no stap wanbel na em i ting dispela poroman i no stret long em, Kristen i no ken ting em i mas maritim em. Na sapos em i tingting yet long maritim dispela poroman, nogut bihain em i no inap painim narapela, dispela tingting i no stret​—em i tingim em yet tasol na em i no tingim dispela poroman. (Lukim Filipai 2:4.) Olsem na sapos yu laik marit na yu no stap wanbel wantaim em na yu no amamas long sampela pasin bilong em, orait yu mas tingting gut.

Olsem: Sapos yu man, yu ting pasin bilong dispela meri i makim olsem em bai stap daun long yu na lukautim gut yu wantaim ol pikinini na lukautim gut haus? (Sindaun 31:​10-31) Na sapos yu meri, yu ting pasin bilong dispela man i makim olsem em bai sori long yu na em i no ken tingim skin bilong em yet tasol, na em bai lukautim yu gut long ol samting bilong skin? (Efesus 5:​28, 29; 1 Timoti 5:8) Ating dispela man o meri i tok em i givim bel long mekim wok bilong God, tasol olsem wanem? Ol samting em i mekim i kamapim long ples klia olsem em i gat strongpela bilip olsem em i tok?​—Jems 2:​17, 18.

Tru, yu no ken hariap lusim em sapos yu lukim sampela liklik pasin kranki bilong em. Ating pastaim yu ting em i gutpela olgeta, na nau yu lukim ol dispela liklik pasin bilong em. (Jems 3:2) Tasol yu mas tingting: Dispela bai kamapim hevi namel long yupela taim yupela i marit o bai yu no inap tingim.

Tasol sapos yu ting ol dispela pasin bilong em i no samting nating​—em bikpela samting​—orait yupela ken toktok gut wantaim long ol dispela samting, olsem: Yutupela i gat narapela narapela tingting tru, o ating narapela i no save gut long tingting bilong narapela? O yutupela wantaim i mas lain long “pasim belhat”? (Sindaun 25:28) Taim yu tokim em, ol dispela pasin bilong em i skrapim bel bilong yu, em i save mekim wanem? Em i mekim pasin daun na em i wok long stretim pasin bilong em? Na olsem wanem long yu yet? Bel bilong yu i save skrap kwik long ol liklik liklik samting narapela i mekim? Sapos olsem, orait yu tu yu mas stretim pasin bilong yu, a? (Saveman 7:9) Insait long marit, sapos narapela i sori long narapela, na em i no tingim ol liklik pasin kranki bilong narapela, bai marit bilong tupela i wok gut.​—Efesus 4:2.

Sapos yu wantaim poroman bilong yu i toktok gut long dispela samting, ating bai yutupela inap stretim ol hevi bilong yupela taim yupela i marit pinis, na bai marit bilong yutupela i gutpela. Tasol taim yupela i toktok wantaim long dispela samting, sapos yupela i tok pait gen na i no inap stretim dispela hevi, orait yu mas tingting gut. (Sindaun 22:3) Sapos yupela i marit, bai hevi i stap yet na bai yupela i no inap i stap wanbel. Olsem na ating i gutpela sapos yu lusim em na yutupela i no marit.

[Piksa long pes 253]

Sapos yutupela i bung wantaim ol narapela long mekim sampela samting, dispela bai helpim yu long skelim gut pasin bilong poroman

[Piksa long pes 254]

Sapos narapela i mekim gutpela pasin long narapela, orait taim tupela i marit pinis bai ol i bihainim yet dispela gutpela pasin

[Piksa long pes 259]

Taim yu save yutupela i no wanbel long ol samting na yu ting i no gutpela long yutupela i marit, yu mas toktok wantaim em long dispela na bai em inap save i gat wanem as na yutupela i no ken marit