Sapta 8

Ol i Ranawe Long Man Nogut

MARIA i slip i stap na Josep i kirapim em na i tok, ‘Nau tasol ensel bilong Jehova i kamap long mi. Em i tok olsem, “Kisim pikinini wantaim mama bilong en, na yu ranawe i go long Isip. Na yu mas i stap long Isip inap long taim mi givim tok gen long yu, long wanem, Herot i laik painim pikinini na kilim em i dai.” ’

Kwiktaim 3-pela i ranawe i go. Gutpela tru ol i no lusim taim, long wanem nau Herot i save olsem ol saveman bilong hap sankamap i giamanim em. Ol i no kam toksave long em taim ol i painim pinis Jisas​—ol i go bek pinis long ples bilong ol. Herot i belhat. Em i laik bagarapim Jisas, olsem na em i putim lo long ol i mas kilim i dai olgeta pikinini man long Betlehem na ol ples klostu, em ol i gat tupela krismas o i no winim yet tupela krismas. Em i tingim ol samting ol dispela saveman i bin tokim em long en long pastaim na em i makim ol pikinini i gat kain krismas olsem.

Ol i kilim i dai olgeta liklik pikinini man long dispela hap. Em samting nogut tru! Ol soldia bilong Herot i go insait long olgeta haus. Na taim ol i painim pinis wanpela pikinini man, ol i pulim em long han bilong mama na kilim em i dai. Yumi no save hamas pikinini ol i bin kilim i dai, tasol bikpela krai na singaut sori bilong mama bilong ol dispela pikinini i truim wanpela tok profet God i bin mekim long maus bilong profet Jeremaia.

Nau Josep wantaim meri pikinini ol i kamap long Isip, na ol i sindaun long dispela ples. Tasol bihain ensel bilong Jehova i kamap gen long Josep long driman. Em i tok: “Yu kirap na kisim pikinini wantaim mama bilong en, na yu go bek long Israel. Ol man i laik kilim pikinini, ol i dai pinis.” Olsem na ol i lusim Isip na ol i go bek long as ples bilong ol. Dispela samting i truim narapela tok profet bilong Baibel i tok, Pikinini Bilong God i mas i stap long Isip na God i singautim em i kam.

Josep i gat tingting long i stap long Judia, em ples ol i bin i stap long en taim ol i no ranawe yet. Tasol em i harim tok olsem pikinini bilong Herot, em Arkelaus, em i stap king long Judia, na em tu i man nogut, na Jehova i givim toksave long em long wanpela driman. Olsem na Josep i kisim meri pikinini na ol i go long hap bilong not na ol i sindaun long taun Nasaret, i stap longwe long as ples bilong lotu Juda, na Jisas i go bikpela long dispela hap. Matyu 2:​13-23; Jeremaia 31:15; Hosea 11:1.

▪ Ol saveman bilong hap sankamap i no go bek long Herot, olsem na Herot i mekim wanem pasin nogut tru? Tasol olsem wanem na Jisas i no bagarap?

▪ Taim ol i lusim Isip i kam, bilong wanem Josep i no i go sindaun gen long Betlehem?

▪ Wanem ol tok profet bilong Baibel i bin kamap tru long dispela taim?