I Stap na Wok Bilong Jisas

Ranawe Long Man Nogut

MARIA i slip i stap na bilong wanem Josep i kirapim em long biknait tru? Josep i tok, ‘Nau tasol ensel bilong Jehova i kamap long mi. Em i tok long kisim yu wantaim pikinini na ranawe i go long Isip, long wanem Herot i laik painim pikinini bilong kilim em i dai.’

Josep i kirap kisim pikinini wantaim mama bilong en na tripela i ranawe i go. Long dispela taim Herot i save olsem ol saveman bilong ol haiden i giamanim em na ol i go bek pinis long ples bilong ol. Herot i bin tokim ol long kam toksave long em taim ol i painim pinis Jisas. Yu tingim? Herot i belhat nogut tru. Em i laik kilim i dai Jisas, olsem na em i putim lo long ol i mas kilim i dai olgeta pikinini man long Betlehem na ol ples klostu em ol i no winim yet tupela krismas. Em i tingim ol dispela samting ol saveman bilong ol haiden i bin tokim em long en taim ol i bin kamap long em bipo.

Ol i kilim i dai olgeta liklik pikinini man long dispela hap. Em samting nogut tru! Ol soldia bilong Herot i go insait long olgeta haus. Na taim ol i painim pinis wanpela pikinini man, ol i pulim em long han Bilong mama bilong em. Yumi no save hamas pikinini ol i bin kilim i dai, tasol bikpela krai na singaut sori bilong mama bilong ol dispela pikinini i truim wanpela tok profet God i mekim long maus bilong profet Jeremaia.

Nau Josep wantaim lain bilong em ol i kamap long Isip, na ol i sindaun i stap long dispela ples. Tasol bihain ensel bilong Jehova i kamap gen long Josep long driman. Em i tok, ‘Kirap na kisim Jisas wantaim mama bilong em i go bek long Isrel, long wanem ol man i laik kilim i dai pikinini, ol i dai pinis.’ Olsem na ol i go bek long as ples bilong ol na dispela samting i truim narapela tok profet bilong Baibel i tok pikinini bilong God i stap long Isip na God i singautim em i kam.

Josep i gat tingting long i stap long Judia, em ples ol i bin i stap long en paslain long taim ol i ranawe i go long Isip. Tasol em i save Akeleas, pikinini bilong Herot, em i stap king long Judia, na em tu i man nogut, olsem na long narapela driman Jehova i toksave long Josep na Josep i kisim lain bilong em i go long hap Bilong not; ol i go sindaun long taun Nasaret. Long dispela ples, longwe long as ples bilong lotu Juda, Jisas i go bikpela. Matyu 2:13-23; Jeremaia 31:15; Hosea 11:1.

◆ Ol saveman bilong ol haiden i no go bek long Herot, olsem na Herot i mekim wanem pasin nogut tru? Tasol olsem wanem na Jisas i no bagarap?

◆ Taim ol i lusim Isip i kam, bilong wanem Josep i no go sindaun gen long Betlehem?

◆ Wanem sampela tok profet bilong Baibel i bin kamap tru long dispela taim?