Sapta 40
Em i Lainim Ol Long Bihainim Pasin Marimari
ATING Jisas i stap yet long Nain, em ples em i bin kirapim bek pikinini man bilong meri wanpis; o ating Jisas i stap long narapela ples klostu. Wanpela Farisi, nem bilong em Saimon, em i laik lukim dispela man em i save mekim ol bikpela wok, olsem na em i singautim Jisas long i kam kaikai wantaim em.
Jisas i go, long wanem em i tingting long autim tok long ol man, olsem em i bin mekim taim em i kaikai wantaim ol man bilong kisim takis na ol sinman. Long dispela taim bipo, taim man i go long haus bilong ol man ol i save mekim gut long em, tasol taim Jisas i go long haus bilong Saimon ol i no bin mekim olsem long em.
Ol rot nabaut long Galili i gat planti das, na sapos man i wokabaut long lek i kamap long haus bilong ol man, ol i save wasim lek bilong em. Tasol ol i no mekim olsem long Jisas. Na ol i mas givim kis long em na welim gras bilong em, tasol ol i no mekim.
Ol i kaikai i stap na wanpela meri i kam insait, em ol i no bin singautim em. Ol i save em i meri pamuk. Ating em i bin harim ol tok Jisas i autim, em i tok ‘ol man i gat hevi ol i ken i kam long mi na kisim malolo.’ Na ating em i bin lukim sampela wok Jisas i bin mekim. Ating dispela i kirapim em long i kam painim Jisas.
Meri i kam baksait long Jisas na em i brukim skru na em i krai i stap. Aiwara bilong em i kapsait long lek bilong Jisas, na em i klinim long gras bilong em. Em i kis long lek bilong Jisas na welim lek bilong em. Saimon i no amamas na em i tingting: ‘Sapos dispela man em i profet tru, bai em i save long dispela meri, em meri bilong mekim sin.’
Jisas i save long tingting bilong Saimon, na em i tok: “Mi gat wanpela tok mi laik givim yu.”
Saimon i tok: “Tisa, yu autim tok bilong yu.”
Nau Jisas i kirap na i tok: “Tupela man i gat dinau long wanpela man. Narapela i gat dinau long 100 kina, na narapela i gat dinau long 10 kina tasol. Tupela i no inap bekim dinau bilong tupela, olsem na dispela man i lusim dinau bilong tupela. Orait yu ting husat bilong tupela bai i laikim em moa?”
Ating Saimon i no tingim gut as bilong dispela tok piksa na em i bekim nating tok, olsem: “Mi ting dispela man em i lusim bikpela dinau bilong en.”
Jisas i tok: “Tingting bilong yu i stret.” Na Jisas i lukluk long meri na em i tokim Saimon: “Yu lukim dispela meri hia? Mi kam insait long haus bilong yu, na yu no givim mi wara bilong wasim lek bilong mi. Tasol dispela meri em i wasim lek bilong mi long wara bilong ai bilong em yet. Na em i mekim drai long gras bilong em yet. Yu no givim kis long mi. Tasol . . . dispela meri em i wok long givim kis long lek bilong mi. Yu no bin . . . welim het bilong mi. Tasol dispela meri . . . i welim lek bilong mi.”
Ol samting meri i mekim i kamapim klia olsem em i hevi long ol rong bilong em na em i tanim bel. Olsem na Jisas i tok: “Yumi lukim dispela meri i laikim mi tru na yumi save, God i lusim pinis ol planti sin bilong en. Tasol man i mekim liklik sin tasol na God i lusim sin bilong en, orait laik bilong en bai i liklik tasol.”
Jisas i no orait long pasin pamuk. Nogat. Tasol dispela samting i makim olsem Jisas i sori tru long ol man ol i bin mekim rong na bihain ol i hevi long dispela na ol i tanim bel na i kam long em bambai em i ken helpim ol. Jisas i mekim gut bel bilong dispela meri, na em i tok: “Mi lusim pinis ol sin bilong yu. . . . Bilip bilong yu i mekim na nau yu stap gut wantaim God.” Luk 7:36-50; Matyu 11:28-30.
▪ Taim Jisas i go long haus bilong Saimon, Saimon i no bin mekim wanem kain pasin long em?
▪ Husat i kam painim Jisas? Bilong wanem em i kam?
▪ Jisas i mekim wanem tok piksa? Em i tok wanem bilong kamapim insait bilong en?