I Stap na Wok Bilong Jisas

Em i Lainim Ol long Pasin Marimari

ATING Jisas i stap yet long Nen, ples em i bin kirapim bek pikinini man bilong meri em man bilong em i dai pinis; o ating Jisas i stap long narapela ples klostu. Wanpela Farisi, nem bilong em Saimon, em i laik lukim dispela man em i save mekim ol bikpela wok, olsem na em i singautim Jisas long i kam kaikai wantaim em.

Jisas i orait long i go−em i tingting long autim tok long ol man, olsem em i bin mekim bipo, taim em i kaikai wantaim ol man bilong kisim takis na ol sinman. Taim man i go long haus bilong ol man, ol i save mekim gut long em; em pasin bilong ol. Tasol taim Jisas i go long haus bilong Saimon ol i no bin mekim olsem long em.

Ol rot nabaut long Galili i gat planti das, na sapos man i raun long en su na lek bilong em bai hat na doti, na taim em i kamap long haus ol man i save wasim lek bilong em na mekim lek i kol. Tasol ol i no mekim olsem long Jisas. Na ol i mas givim kis long em na givim wel bilong gras long em, tasol ol i no mekim.

Ol i bung long tebol na ol i wok long kaikai, na wanpela meri i kam insait, ol i no bin singautim em. Ol i save em i meri bilong prenim nabaut ol man. Ating em i bin harim ol tok Jisas i bin autim, na em i tingim wanpela tok bilong Jisas, em i bin tok, ol man i gat hevi ol i ken i kam long Jisas na em bai mekim gut bel bilong ol. Em i bin lukim na harim ol wok bilong Jisas, na dispela i kirapim em na nau em i kam bilong painim Jisas.

Meri i kam baksait long Jisas na em i brukim skru klostu long lek bilong Jisas. Aiwara bilong em i kam daun na i pundaun long lek bilong Jisas, na long gras bilong em em i klinim lek bilong Jisas. Em i kamautim botol i gat wel long en, em wel i gat gutpela smel. Long pasin sori em i kis long lek bilong Jisas na em i kapsaitim wel i go long en. Saimon i lukluk i stap na em i no amamas. Em i tok: “Sapos dispela man em i profet tru, bai em i save long dispela meri i putim han long em, na bai em i save pasin bilong en tu. Dispela em i meri bilong sin.”

Jisas i save long tingting bilong Saimon, na em i tok: “Saimon, mi gat wanpela tok mi laik givim yu.”

Saimon i tok: “Tisa, yu autim tok bilong yu.”

Nau Jisas i kirap na i tok: “Tupela man i gat dinau long wanpela man. Wanpela em i gat dinau long 100 kina, na arapela i gat dinau long 10 kina tasol. Tupela i no inap bekim dispela dinau, olsem na dispela man i lusim dinau bilong tupela. Orait husat bilong tupela bai i laikim em moa?”

Ating Saimon i no givim bel long bekim dispela; ating em ting, em i no laik save long dispela; em i laik save long narapela samting. Tasol em i bekim na i tok: “Mi ting dispela man em i lusim bikpela dinau bilong en.”

Jisas i tok: “Tingting bilong yu i stret.” Na nau Jisas i lukluk long meri na em i tokim Saimon: “Yu lukim dispela meri hia? Mi kam insait long haus bilong yu, na yu no givim mi wara bilong wasim lek bilong mi. Tasol dispela meri em i wasim lek bilong mi long wara bilong ai bilong en. Na em i mekim drai long gras bilong en. Yu no givim kis long mi. Tasol taim mi kam insait, na i kam inap long nau, dispela meri em i wok long givim kis long lek bilong mi. Yu no welim het bilong mi long wel. Tasol dispela meri i welim lek bilong mi long sanda.”

Ol dispela samting meri i bin mekim i makim olsem em i hevi long ol rong bilong em na em i tanim bel. Olsem na Jisas i tok: “Em i bin mekim planti sin na mi tekewe ol dispela sin, olsem na em i laikim mi tru. Tasol man i mekim liklik sin na mi tekewe sin bilong en, orait em i laikim mi liklik tasol.”

I no olsem Jisas i orait long pasin pamuk. Nogat. Tasol dispela samting i makim olsem Jisas i pilim tru bel bilong man na em i sori long ol man ol i bin popaia o mekim pasin kranki na bihain ol i hevi long dispela na ol i mekim ol samting i makim olsem ol i tanim bel na ol i beten bambai Krais i ken helpim ol. Jisas i mekim gut bel bilong meri hia, em i tok: “Mi tekewe pinis sin bilong yu. . . . Bilip bilong yu em i bin mekim yu orait pinis. Yu go, na bel bilong yu i ken i stap isi.” Luk 7:​36-50; Matyu 11:​28-30.

◆ Taim Jisas i go long haus bilong Saimon, Saimon i mekim wanem kain pasin long em?

◆ Husat i kam painim Jisas? Bilong wanem em i kam?

◆ Jisas i mekim wanem tok piksa? Em i tok wanem bilong kamapim insait bilong en?