Sapta 49
Narapela Raun Bilong Autim Gutnius Long Galili
INAP olsem tupela yia Jisas i bin wok strong long autim tok, na nau em i mekim namba 3 raun bilong em long Galili. Em i raun long ol taun na liklik ples na em i wok long lainim ol manmeri insait long haus lotu bilong ol na em i autim gutnius bilong Kingdom bilong God. Ol samting em i lukim i kirapim tingting bilong em na em i save i gat bikpela wok tru i stap bilong autim tok.
Long olgeta hap Jisas i go long en em i lukim ol bikpela lain manmeri i hangre long kaikai bilong spirit na ol i stap nogut tru. Em i sori tru long ol na em i tokim ol disaipel bilong em: “Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i salim ol wokman i go bungim kaikai bilong en.”
Jisas i singautim ol 12-pela aposel bilong em i kam. Em i bin makim ol klostu olsem wanpela yia i go pinis. Nau em i salim ol i go tupela tupela bilong autim tok, na em i tokim ol: “Yupela i no ken i go long ol man bilong ol arapela lain. . . . Yupela i mas i go long ol sipsip bilong lain Israel, ol i lus pinis. Yupela go na autim tok olsem: ‘Kingdom bilong heven em i kam klostu pinis.’ ”
Em dispela Kingdom Jisas i bin lainim ol disaipel long en long Beten Bilong Bikpela. Na Kingdom i kam klostu pinis, long wanem, Jisas Krais, em King God i bin makim, em i stap wantaim ol. Bilong soim olsem ol disaipel ol i man bilong bringim tok bilong dispela gavman bilong heven i go long ol man, Jisas i givim strong long ol bilong mekim orait ol sikman na kirapim ol man i dai pinis, na em i tok ol i no ken singaut long pe.
Bihain em i tokim ol disaipel bilong em, ol i no ken redim sampela samting bilong skin bilong karim wantaim ol long taim ol i mekim dispela raun bilong autim gutnius. Em i tok: “Yupela i no ken karim gol o mani silva o mani kapa long poket bilong yupela. . . . yupela i no ken kisim tupela siot na su . . . Man i save wok, em ol i mas givim em ol kaikai samting bilong en.” Ol manmeri i amamas long harim tok, ol bai givim kaikai na ples slip long ol. Olsem Jisas i tok: “Sapos yupela i go insait long wanpela taun o wanpela ples, orait yupela i mas painimaut gut, wanem man bilong dispela ples em i gutpela na stretpela man. Na yupela i mas i stap wantaim dispela man.”
Jisas i tokim ol disaipel bilong em long pasin bilong toktok wantaim man long tok bilong Kingdom. Em i tok: “Yupela i mas tokim ol manmeri bilong haus olsem, ‘God i ken mekim gut long yupela.’ Na sapos ol manmeri bilong dispela haus i amamas long kisim yupela, orait gutpela tok bilong yupela i ken i stap long ol. Tasol sapos ol i no amamas long kisim yupela, . . . na i no laik harim tok bilong yupela, orait taim yupela i lusim dispela haus o dispela taun yupela i mas rausim pipia graun i stap long lek bilong yupela.”
Jisas i tok, sapos ol manmeri bilong wanpela taun i no laik harim tok, orait, “Long de God i makim bilong kotim ol manmeri, hevi i kamap long ol manmeri bilong dispela taun bai i winim tru hevi i kamap long ol lain bilong taun Sodom na Gomora.” Matyu 9:35–10:15; Mak 6:6-12; Luk 9:1-5.
▪ Wanem taim Jisas i kirap mekim namba 3 raun bilong autim tok long Galili? Taim em i mekim dispela namba 3 raun, nau em i save tru long wanem samting?
▪ Taim em i salim ol 12-pela aposel long autim tok, em i givim wanem kain toktok long ol?
▪ Bilong wanem i stret long ol disaipel i lainim ol manmeri olsem Kingdom i kam klostu pinis?