Sapta 80

Ol Banis Sipsip na Wasman Bilong Sipsip

JISAS i kam long Jerusalem long bung bilong Bikpela De Bilong Makim Tempel Olsem Haus Bilong God Yet. Long yia 168 paslain long Jisas, ami bilong Antiokas Namba 4 Epifanes i daunim Jerusalem na bagarapim haus lotu, olsem tempel, wantaim alta bilong en. Tasol 3-pela yia bihain ol Juda i kisim bek Jerusalem, na ol i makim gen tempel olsem haus bilong God yet. Orait kirap long dispela taim ol Juda i mekim bung long olgeta yia bilong tingim dispela de.

Dispela bikpela de i save kamap “long taim bilong kol” long namba 25 de bilong mun Kislev bilong ol Juda. Em i olsem laspela hap bilong Novemba na namba wan hap bilong Disemba. Olsem na i gat 100 de samting tasol i stap na de Pasova bilong yia 33 bai kamap.

Orait nau Jisas i mekim wanpela tok piksa long 3-pela banis sipsip, na em i tok em yet i Gutpela Wasman bilong sipsip. Namba wan banis sipsip i makim kontrak bilong Lo God i bin mekim wantaim lain bilong em long rot bilong Moses. Dispela Lo i olsem banis i lukautim ol Juda na bai ol i no ken kisim pasin nogut bilong ol lain i no insait long dispela kontrak wantaim God. Jisas i stori long dispela banis sipsip na em i tok: “Man i no save go insait long dua bilong banis bilong sipsip, tasol em i kalapim banis . . . em i stilman na man bilong pulim ol samting bilong ol arapela man. Tasol man i save go insait long dua, em i wasman bilong sipsip.”

Sampela man i bin kamap na ol i tok ol yet i dispela man God i bin tok long salim i kam, tasol ol i no dispela wasman tru bilong sipsip em Jisas i tok long en, em i tok: “Wasman bilong dua em i save opim dua long dispela man. Na ol sipsip ol i save harim maus bilong em. Em i save kolim nem bilong ol . . . na em i kisim ol i go ausait. . . . Sapos narapela man i singautim ol, ol sipsip bai i ranawe long em, long wanem, ol i no save long maus bilong [em].”

“Wasman bilong dua” bilong namba wan banis sipsip em Jon Bilong Baptais. Olsem na em yet i “opim dua” long Jisas, olsem em i soim Jisas long ol sipsip Jisas bai bringim ol i go ausait bilong kisim kaikai. Ol dispela sipsip em Jisas i save kolim nem bilong ol, bihain bai ol i go insait long narapela banis sipsip, olsem Jisas i tok: “Mi yet mi dua bilong sipsip”​—em dua bilong dispela nupela banis sipsip. Taim Jisas i kamapim nupela kontrak wantaim ol disaipel, na long heven long de Pentikos bihain em i kapsaitim spirit holi i kam daun long ol, orait nau dua i op na ol i go insait long dispela nupela banis sipsip.

Jisas i stori moa olsem: “Mi yet mi dua. Sapos wanpela man i kam long mi na i go insait long banis, orait God bai i kisim bek em. Na em bai i go insait na i go ausait, na i go i kam na kisim kaikai. . . . mi kam bilong ol i ken kisim laip, . . . Mi yet mi gutpela wasman bilong ol sipsip. Mi save long ol sipsip bilong mi, na ol sipsip bilong mi ol i save long mi, . . . Na bai mi lusim laip bilong mi bilong helpim ol sipsip.”

I no longtaim i go pinis na Jisas i laik mekim gut bel bilong ol disaipel na em i tok: “Yupela liklik lain sipsip, yupela i no ken pret. Papa bilong yupela em i tok pinis long . . . givim kingdom bilong en long yupela.” Dispela liklik lain bihain bai ol inap olsem 144,000, ol bai go insait long nupela banis sipsip, em namba 2 banis. Tasol Jisas i tok moa olsem: “Mi gat ol arapela sipsip tu, na ol i no bilong dispela banis. Mi mas bringim ol dispela sipsip tu i kam. Na bai ol i harim maus bilong mi. Na bai i gat wanpela lain sipsip tasol na wanpela wasman tasol bilong ol.”

Ol dispela “arapela sipsip” ol i “no bilong dispela banis,” olsem na yumi save ol i bilong narapela banis sipsip, em namba 3 banis. “Liklik lain” bilong namba 2 banis sipsip bai ol i mekim wok king wantaim Jisas long heven, na dispela “ol arapela sipsip” i stap long namba 3 banis ol bai stap long Paradais long graun. Tasol maski ol i stap long tupela banis, narapela lain i no bel nogut long narapela lain, na ol i no bel hevi na ting ol i bruk long tupela lain. Nogat. Long wanem Jisas i tok, ol bai “kamap wanpela lain sipsip tasol,” na bai i gat “wanpela wasman tasol” bilong ol.

Gutpela Wasman Krais Jisas, em i lusim laip bilong em bilong helpim ol sipsip long tupela banis wantaim. Em i tok, “Long laik bilong mi yet mi bai lusim laip bilong mi, . . . na mi gat strong inap long kisim bek gen. Papa bilong mi i bin tok long mi mas mekim olsem.” Ol Juda i harim dispela tok na ol i bruk tupela lain.

Planti ol i tok, “Spirit nogut i stap long em, na em i longlong.” Tasol sampela i tok, “Dispela em i no tok bilong man i gat spirit nogut.” Na ating ol i tingting long taim Jisas i bin oraitim wanpela aipas inap sampela mun bipo, na ol i tok, “Ating spirit nogut em inap opim ai bilong ol man i aipas, a?” Jon 10:​1-22; 9:​1-7; Luk 12:32; Kamapim Tok Hait 14:​1, 3; 21:​3, 4; Buk Song 37:29.

▪ Bikpela De Bilong Makim Tempel Olsem Haus Bilong God Yet i kamap long wanem taim?

▪ Wanem dispela namba wan banis sipsip? Wasman bilong dua bilong dispela banis em i husat?

▪ Wasman bilong dua i mekim wanem na em i opim dua long Wasman bilong sipsip? Bihain long dispela taim, dua i op na ol sipsip i go insait long wanem samting?

▪ Husat ol i insait long tupela banis sipsip bilong Gutpela Wasman? Ol i mas kamap hamas lain sipsip?