Sapta 90

Ol Man i Dai Pinis Ol Bai Kirap Bek

JISAS i kamap klostu pinis long Betani, em i wanpela ples klostu long Jerusalem. I no planti de i go pinis na Lasarus i bin i dai na ol i planim em. Tupela susa bilong em, em Marta na Maria, ol i krai yet long em, na planti manmeri i kam long haus bilong mekim gut bel bilong tupela.

Ol i krai sori i stap na wanpela i toksave long Marta olsem Jisas i wokabaut long rot i kam. Kwiktaim Marta i go bilong bungim Jisas, tasol ating em i no toksave long Maria pastaim. Marta i kamap long Jisas na em i tok: “Bikpela, sapos yu bin i stap hia, bai brata bilong mi i no inap i dai.”

Tasol nau Marta i kamapim tingting bilong em, olsem em i ting Jisas bai mekim wanpela samting bilong helpim Lasarus. Em i tokim Jisas: “Mi save, sapos yu beten long God long wanpela samting, orait em bai givim long yu.”

Jisas i tokim em: “Brata bilong yu bai i kirap bek.”

Marta i ting Jisas i toktok long wanpela taim bihain, em taim bilong kirapim bek ol man i dai pinis. Abraham na ol narapela wokboi bilong God long bipo ol i bin wetim dispela taim bilong kisim laip gen long graun. Olsem na Marta i tok: “Mi save, em bai i kirap bek long las de, long dispela taim olgeta manmeri bai i kirap bek.”

Tasol nau Jisas i mekim wanpela tok i strongim bel bilong Marta, em i tok: “Kirap bek, em mi yet. Na laip, em mi yet.” Em i laik bai Marta i bilip tru olsem God i bin givim strong long em bilong daunim i dai, olsem na em i tok: “Man i bilip long mi, maski sapos em i dai, em bai i stap laip.” Na em i tok: “Olgeta man i stap laip na i bilip long mi, bai ol i no i dai.”

Jisas i no laik tokim Marta olsem ol gutpela wokboi bilong God i stap long dispela taim bipo ol i no ken i dai. Nogat. Em i laik bai Marta i ken save, ol man i bilip long em ol inap kisim laip i stap oltaim long bihain. Planti manmeri bai kirap bek long las de na bai ol inap kisim dispela laip i stap oltaim. Tasol i gat sampela gutpela wokboi bilong God bai ol i stap long taim ol samting nogut bilong dispela graun bai pinis, na bai ol i abrusim bagarap long dispela taim. Jisas i stori long ol dispela lain taim em i tok, bai ol i no i dai! Orait nau Jisas i tokim Marta: “Yu bilipim dispela, o nogat?”

Marta i tok, “Yes, Bikpela. Mi bilip yu Pikinini Bilong God. Yu dispela man God i bin tok long em bai i salim i kam long graun.”

Nau Marta i ran i go bek long haus na i tok isi long yau bilong Maria: “Tisa i kam i stap, na em i singautim yu.” Kwiktaim Maria i lusim haus na i go bilong bungim Jisas. Ol narapela i stap long haus na i krai sori, ol i lukim em i go na ol i bihainim em, long wanem ol i ting em i laik i go long matmat.

Maria i kamap long Jisas na i brukim skru na i krai. Em i tok: “Bikpela, sapos yu bin i stap hia, bai brata bilong mi i no inap i dai.” Jisas i lukim Maria na ol narapela i krai, na bel bilong em i sori tru. Em i tokim ol: “Yupela i putim em we?”

Ol i tok: “Bikpela, yu kam lukim.”

Nau Jisas tu i krai. Ol Juda i lukim Jisas i krai na ol i tok: “Lukim. Em i bin laikim tru dispela man.”

Tasol sampela i tok: “Em i bin opim ai bilong ol aipas na mekim ol i lukluk. Tasol bilong wanem em i no laik helpim dispela man bai em i no dai?” Jon 5:21; 6:40; 9:​1-7; 11:​17-37.

▪ Wanem taim Jisas i kamap klostu long Betani? Taim em i no kamap yet, wanem samting i bin kamap long dispela ples?

▪ I gat wanem as na Marta inap bilip olsem ol man i dai pinis ol bai kirap bek?

▪ Taim Lasarus i dai, bel bilong Jisas i olsem wanem?