“Kirap Bek Em Mi Yet na Laip Em Mi Yet”

Jisas i lusim Perea na i kamap klostu long Betani, em wanpela ples i stap long hap is bilong Jerusalem inap 3 kilomita. Lasarus i dai na tupela susa bilong em, Marta na Maria ol i krai yet long em. Na planti manmeri i kam long haus bilong mekim gut bel bilong tupela.

Wanpela i go tokim Marta olsem Jisas i wokabaut long rot i kam. Na kwiktaim Marta i go bilong bungim Jisas. Taim em i bungim Jisas, ating em i tokim Jisas long tingting em na susa bilong em i gat inap 4-pela de i go pinis, em i tok: “Bikpela, sapos yu bin i stap hia, bai brata bilong mi i no inap i dai.” Dispela i no makim olsem Marta i no gat bilip. Em i tok: “Mi save olsem nau yet ol samting yu askim God long en, God bai givim long yu.” (Jon 11:21, 22) Marta i bilip olsem Jisas bai helpim brata bilong em.

Jisas i tokim em: “Brata bilong yu bai i kirap bek.” Marta i ting Jisas i toktok long wanpela taim bai kamap bihain we ol man i dai pinis bai kirap bek. Abraham na ol narapela wokboi bilong God long bipo i bin bilip na wet long lukim dispela taim. Na Marta i tokim em: “Mi save em bai kirap bek long las de.”—Jon 11:23, 24.

Tasol yu ting long dispela taim stret Jisas i helpim Marta? Yes, em i laik bai Marta i bilip tru olsem God i bin givim strong long em bilong daunim i dai, olsem na em i tok: “Man i bilip long mi, maski em i dai, em bai kisim laip gen. Na olgeta man i stap laip na bilip long mi, bai ol i no i dai.”—Jon 11:25, 26.

Tok bilong Jisas i no makim olsem ol disaipel bilong em long dispela taim bai i no inap i dai, nogat. Em i tokim ol olsem em tu bai dai. (Matyu 16:21; 17:22, 23) Jisas i tokaut olsem ol man i bilip long em ol bai kisim laip oltaim long bihain. Planti bilong ol i bin dai, tasol ol bai kirap bek long matmat na kisim laip oltaim, na sampela man i stap gut long God na ol i winim taim bilong las de, ol tu bai kisim laip oltaim. Tru tumas, dai bai no inap painim gen ol man husat i bilip long Jisas.

Jisas inap kirapim bek Lasarus maski Lasarus i dai 4-pela de i go pinis. Em i tok: “Kirap bek, em mi yet. Na laip, em mi yet.” Jisas i tokim Marta: “Yu bilipim dispela tok?” Marta i tok: “Yes Bikpela. Mi bilip pinis olsem yu Krais, Pikinini bilong God, dispela Man husat i mas i kam na stap namel long ol manmeri.” Marta i bilip olsem Jisas inap kirapim bek ol man i dai pinis, olsem na em i ran i go bek long haus na i tokim susa bilong em: “Tisa i kam pinis, na em i singautim yu.” (Jon 11:25-28) Kwiktaim Maria i lusim haus na i go bilong bungim Jisas. Ol narapela i lukim na ol tu i bihainim em, long wanem, ol i ting em i laik go long matmat bilong Lasarus.

Taim Maria i kamap long Jisas em i brukim skru na i krai na em i tok: “Bikpela, sapos yu bin stap long hia, brata bilong mi i no inap i dai.” Jisas i lukim Maria na ol narapela i krai, na bel bilong em i sori tru na em tu i krai. Ol narapela i lukim dispela samting na ol i kirap nogut. Tasol sampela i tok: “Dispela man i bin opim ai bilong aipas man, na olsem wanem em i no inap helpim dispela man na bai em i no ken i dai?”—Jon 11:32, 37.