Sapta 102
Jisas i Go Insait Long Jerusalem Olsem King
LONG de bihain, em Sande Nisan 9, Jisas wantaim ol disaipel i lusim Betani na ol i wokabaut i go long Jerusalem. I no longtaim na ol i kamap klostu long Betfage, em i stap long maunten Oliv. Orait Jisas i tokim tupela disaipel:
“Yutupela go long dispela ples nau yumi lukluk long en. Na wantu bai yutupela i lukim wanpela donki ol i pasim i stap, na pikinini bilong en i stap wantaim em. Lusim rop na bringim tupela i kam long mi. Na sapos wanpela man i mekim wanpela tok long yutupela, orait yutupela i mas tok olsem, ‘Bikpela i gat wok long tupela. Na kwiktaim bai em i salim tupela i kam bek.’ ”
Pastaim ol disaipel i no save, dispela samting Jisas i tok long mekim em i bilong truim wanpela tok profet bilong Baibel, tasol bihain ol i save. Sekaraia i bin tok profet olsem dispela King em God i tok promis long salim i kam em bai sindaun long wanpela donki na go insait long Jerusalem.
Orait taim tupela disaipel i go insait long Betfage na ol i kisim dispela donki wantaim pikinini bilong en, sampela man i sanap klostu ol i tok: “Yutupela i laik mekim wanem na yutupela i lusim dispela donki?” Tupela i tokim ol, “Bikpela i gat wok long en.” Olsem na ol i larim tupela disaipel i bringim dispela tupela donki long Jisas. Na tupela i putim longpela klos bilong ol antap long tupela donki, tasol Jisas i sindaun long pikinini bilong donki.
Jisas i sindaun long donki na i go long Jerusalem, na planti manmeri moa yet i bihainim em. Planti ol i rausim ol longpela klos bilong ol na lainim long rot, na sampela ol i katim han bilong ol diwai na putim long rot. Na ol i wok long singaut olsem: “God i ken mekim gut long dispela king i kam long nem bilong Bikpela. Litimapim nem bilong God Antap Tru!”
Sampela Farisi i stap na ol i bel nogut long dispela tok ol manmeri i mekim, na ol i tokim Jisas: “Tisa, yu mas krosim ol dispela disaipel bilong yu.” Tasol Jisas i tok: “Sapos ol i pasim maus, ol ston yet bai i singaut na litimapim nem bilong God.”
Orait, Jisas i kamap klostu long Jerusalem na em i lukim taun na em i krai long en. Em i tok: “Jerusalem, nau long dispela de yet mi laik bai yu ken save long ol samting inap long mekim yu i stap gut. Tasol ol dispela samting i stap hait, na yu no inap lukim.” Jerusalem i bin mekim pasin bikhet tru na em i mas kisim strafe, olsem Jisas i tok profet long en, em i tok:
“Ol birua bilong yu [em ami bilong Rom, em Kepten Taitus i bosim] bai i kam . . . banisim yu tru long olgeta hap. Na ol bai i brukim yu na bagarapim yu tru, yu wantaim ol pikinini bilong yu i stap insait long yu. Na ol bai i no larim wanpela ston bilong yu i stap antap long narapela ston.” Dispela bagarap i painim Jerusalem inap 37 yia bihain, olsem long yia 70.
Sampela wik paslain planti manmeri long dispela bikpela lain ol i bin lukim Jisas i kirapim bek Lasarus. Orait nau ol i wok long tokim ol narapela long dispela mirakel. Olsem na taim Jisas i go insait long Jerusalem, olgeta manmeri long Jerusalem i toktok namel long ol yet, olsem: “Dispela man em i husat tru?” Ol dispela manmeri i bihainim Jisas ol i tokaut olsem: “Em Jisas, em profet i kam long taun Nasaret long Galili.” Ol Farisi i lukim na ol i kros na i toktok namel long ol yet olsem: “Dispela samting yumi laik mekim, em i no inap kamap nau. Olgeta manmeri i go bihainim em.”
Taim Jisas i go insait long Jerusalem em i go long tempel na skulim ol man. Ol aipas na lek nogut i kam long em na em i oraitim ol. Tasol ol bikpris na saveman i lukim ol mirakel em i wokim, na ol i harim ol pikinini i singaut insait long banis bilong tempel olsem: “Amamas long Pikinini Bilong Devit.” Olsem na ol i bel nogut na ol i askim Jisas: “Ating yu harim dispela tok ol i mekim?”
Jisas i tok: “Mi harim. Tasol ating yupela i no bin ritim dispela tok, ‘Ol liklik pikinini i save litimapim nem bilong yu.’ ”
Jisas i wok yet long skulim ol man, na em i lukluk raun long olgeta samting insait long tempel. Bihain em i lusim tempel na em wantaim 12-pela disaipel i go i stap long Betani long dispela nait, em Sande. Ating ol i slip long haus bilong Lasarus, em pren bilong Jisas. Matyu 21:1-11, 14-17; Mak 11:1-11; Luk 19:29-44; Jon 12:12-19; Sekaraia 9:9.
▪ Wanem taim na long wanem pasin Jisas i go insait long Jerusalem olsem King?
▪ Bilong wanem i bikpela samting long ol manmeri i mas litimapim nem bilong Jisas?
▪ Taim Jisas i lukim Jerusalem, bel bilong em i olsem wanem? Em i mekim wanem tok profet?
▪ Taim Jisas i go long tempel, wanem samting i kamap?