Amamas Wantaim Famili Bilong Yu
Ol famili inap i stap amamas?
Olsem wanem ol inap i stap olsem?
Lukim ol famili i stap long dispela nius. Yu save long sampela famili ol i stap amamas olsem? Long olgeta hap, ol famili i wok long bruk bruk. Planti samting inap mekim na famili i bruk, olsem katim marit, no gat wok mani, sampela hevi i kamap, papa o mama tasol i mas mekim bikpela long ol pikinini. Wanpela savemeri bilong dispela samting i tok: “Long nau planti man i ting, bihain bai ol man i no ken sindaun moa olsem famili famili—dispela pasin bai pinis.”
Bilong wanem i gat planti hevi i save painim ol famili? Olsem wanem yumi ken i stap amamas wantaim famili bilong yumi?
Famili i Bin Kamap Olsem Wanem
Bilong save long bekim bilong ol dispela askim, yumi mas save, marit na famili i bin kamap pastaim olsem wanem. Sapos i gat wanpela Man i bin kamapim dispela samting, orait, ol famili i mas larim em i soim rot long ol, long wanem, em yet bai save gut long olsem wanem famili i ken i stap amamas wantaim.
Planti man i ting i no gat wanpela Man i bin kamapim marit na famili. Wanpela buk (The Encyclopedia Americana) i tok: “Sampela saveman i ting, as bilong marit em olsem: Bipo bipo, taim ol animal i no senis yet na kamap man, ol animal man na animal meri i save poroman wantaim.” Tasol Jisas i tok, wanpela Man i bin wokim man na meri. Bilong strongim dispela tok em i kolim wanpela tok bilong namba wan buk bilong Baibel na em i tok: “Samting God i pasim pinis, em man i no ken katim.”—Matyu 19:4-6.
Jisas i tok stret. Wanpela God i gat bikpela save em i bin wokim namba wan man na meri na em i wokim rot bambai famili i ken sindaun wantaim na i stap amamas. God i bungim man na meri wantaim long marit na em i tok, man i mas “pas wantaim meri bilong en, na tupela i kamap wanpela bodi tasol.” (Stat 2:22-24) Orait, i gat wanem as na planti hevi i save kamap insait long ol famili long nau? Ating as bilong en i olsem: Kain sindaun em planti man i strong long kisim long nau i narapela kain long ol lo God i bin putim long Baibel.
Olsem Wanem Famili i Ken Pas Gut Wantaim?
Long nau, planti man i save tingim ol yet tasol. Wanpela saveman bilong mani i tokim wanpela lain sumatin long Amerika: “Pasin bilong mangal long mani em i gutpela samting.” Tasol pasin bilong wok strong long painim ol samting bilong skin em inap bagarapim famili, long wanem, narapela i no tingim narapela, na ol i no gat taim na mani moa bilong helpim famili. Orait, yumi ken skelim tupela savetok bilong Baibel i kolim wanem samting i bikpela samting tru bilong helpim famili long i stap amamas.
“Sapos yu stap wantaim ol pren bilong yu na yupela i kaikai kumu tasol, dispela i winim tru pasin bilong i stap wantaim ol man yu no laikim, na yupela i kaikai mit bilong bulmakau.”
“Sapos man i stap bel isi wantaim famili bilong en, na ol i gat liklik hap rabis kaikai tasol, orait dispela i winim tru pasin bilong mekim bikpela pati wantaim ol manmeri i wok long kros na tok pait.”
Dispela tok i stret, a? Sapos olgeta famili i tingim gut dispela tok, ol i no ken bruk. Na Baibel i tokaut tu long ol pasin em narapela i mas mekim long narapela insait long famili, olsem:
Ol Man Marit: ‘Yu mas laikim tru meri bilong yu, olsem yu laikim bodi bilong yu yet.’—Efesus 5:28-30.
Em gutpela tok, a? Na Baibel i tok, man marit i mas ‘mekim gutpela pasin long meri bilong em.’ (1 Pita 3:7) Em i mas tingim gut meri, na mekim gut long em, na pilim tingting bilong em. Em i save, meri tu i gat sampela gutpela tingting, olsem na em i ken harim tingting bilong meri. (Stat 21:12) Sapos man i tingim gut meri bilong em olsem man i laik bai ol narapela i mekim long em yet, dispela bai helpim tru famili, a?—Matyu 7:12.
Ol Meri Marit: ‘Yu mas i stap aninit long man bilong yu.’—Efesus 5:33.
Meri i save helpim famili long i stap amamas taim em i helpim man bilong em long inapim ol bikpela wok em i mas mekim insait long famili. Dispela em i laik bilong God, long wanem, God i givim meri long man “bilong helpim em.” (Stat 2:18) Em nau, taim meri i daun long man bilong em na em i wok gut wantaim man, sindaun bilong famili bai gutpela tru, a?
Ol Poroman Marit: “Ol marit i mas lukautim gut marit bilong [ol].”—Hibru 13:4.
Taim man na meri i stap gut long marit bilong ol, dispela inap helpim sindaun bilong famili. Pasin pamuk inap bagarapim tru famili. (Sindaun 6:27-29, 32) Olsem na Baibel i tok: “Yu mas amamas oltaim long [meri bilong yu]. . . . Nogut yu tingting oltaim long meri bilong narapela man.”—Sindaun 5:18-20.
Ol Papamama: “Skulim pikinini bilong yu long bihainim gutpela pasin.”—Sindaun 22:6.
Taim papamama i toktok gut wantaim pikinini bilong ol, dispela i save helpim famili long pas gut wantaim. Olsem na Baibel i tokim ol papamama long skulim ol pikinini long ol stretpela lo ‘taim ol i sindaun long haus na taim ol i wokabaut long rot na taim ol i laik slip na taim ol i kirap.’ (Lo 11:19) Na Baibel i tok, papamama i mas stretim ol pikinini, na dispela bai kamapim klia olsem papamama i laikim tru ol.—Sindaun 13:24; 23:13, 14; Efesus 6:4.
Ol Pikinini: “Yupela i mas bihainim tok bilong papamama.”—Efesus 6:1.
Tru, sampela taim i hatwok long bihainim tok bilong papamama bilong yu, long wanem, pasin bilong sakim lo i pulap long graun. Tasol Man i bin kamapim famili em i save wanem samting inap helpim famili long i stap amamas. Olsem na yu mas bihainim tok bilong papamama, na abrusim ol samting bilong graun i laik pulim yu long mekim pasin nogut.—Sindaun 1:10-19.
Sapos olgeta wan wan long famili i bihainim ol dispela tok bilong Baibel, sindaun bilong famili bai kamap gutpela long nau, na famili i ken tingting long i stap long nupela taim God i tok promis long kamapim bihain, na sindaun bilong ol bai gutpela tru. (2 Pita 3:13; Kamapim Tok Hait 21:3, 4) Olsem na yupela ol famili i mas stadi wantaim long Baibel long olgeta taim! Planti milion famili long olgeta hap ol i bin stadi long buk Rot Bilong Famili i Ken Stap Amamas na dispela buk i helpim tru ol.
Olgeta tok bilong Baibel long dispela nius ol i kisim long Buk Baibel.